| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
2. பஞ்ஹாபுச்ச²கவண்ணனா
2. Pañhāpucchakavaṇṇanā
221. பஞ்ஹாபுச்ச²கே ஸப்³பே³ஸம்பி இந்த்³ரியானங் குஸலாதி³விபா⁴கோ³ பாளினயானுஸாரேனேவ வேதி³தப்³போ³.
221. Pañhāpucchake sabbesampi indriyānaṃ kusalādivibhāgo pāḷinayānusāreneva veditabbo.
223. ஆரம்மணத்திகேஸு பன ஸத்திந்த்³ரியா அனாரம்மணாதி சக்கு²ஸோதகா⁴னஜிவ்ஹாகாயஇத்தி²புரிஸிந்த்³ரியானி ஸந்தா⁴ய வுத்தங். ஜீவிதிந்த்³ரியங் பன அரூபமிஸ்ஸகத்தா இத⁴ அனாப⁴ட்ட²ங். த்³விந்த்³ரியாதி த்³வே இந்த்³ரியா; ஸுக²து³க்க²த்³வயங் ஸந்தா⁴யேதங் வுத்தங். தஞ்ஹி ஏகந்தபரித்தாரம்மணங். தோ³மனஸ்ஸிந்த்³ரியங் ஸியா பரித்தாரம்மணங், ஸியா மஹக்³க³தாரம்மணந்தி காமாவசரத⁴ம்மே ஆரப்³ப⁴ பவத்திகாலே பரித்தாரம்மணங் ஹோதி , ரூபாவசராரூபாவசரே பன ஆரப்³ப⁴ பவத்திகாலே மஹக்³க³தாரம்மணங், பண்ணத்திங் ஆரப்³ப⁴ பவத்திகாலே நவத்தப்³பா³ரம்மணங். நவிந்த்³ரியா ஸியா பரித்தாரம்மணாதி மனிந்த்³ரியஜீவிதிந்த்³ரியஸோமனஸ்ஸிந்த்³ரியஉபெக்கி²ந்த்³ரியானி சேவ ஸத்³தா⁴தி³பஞ்சகஞ்ச ஸந்தா⁴ய இத³ங் வுத்தங். ஜீவிதிந்த்³ரியஞ்ஹி ரூபமிஸ்ஸகத்தா அனாரம்மணேஸு ரூபத⁴ம்மேஸு ஸங்க³ஹிதம்பி அரூபகொட்டா²ஸேன ஸியாபக்கே² ஸங்க³ஹிதங்.
223. Ārammaṇattikesu pana sattindriyā anārammaṇāti cakkhusotaghānajivhākāyaitthipurisindriyāni sandhāya vuttaṃ. Jīvitindriyaṃ pana arūpamissakattā idha anābhaṭṭhaṃ. Dvindriyāti dve indriyā; sukhadukkhadvayaṃ sandhāyetaṃ vuttaṃ. Tañhi ekantaparittārammaṇaṃ. Domanassindriyaṃ siyā parittārammaṇaṃ, siyā mahaggatārammaṇanti kāmāvacaradhamme ārabbha pavattikāle parittārammaṇaṃ hoti , rūpāvacarārūpāvacare pana ārabbha pavattikāle mahaggatārammaṇaṃ, paṇṇattiṃ ārabbha pavattikāle navattabbārammaṇaṃ. Navindriyā siyā parittārammaṇāti manindriyajīvitindriyasomanassindriyaupekkhindriyāni ceva saddhādipañcakañca sandhāya idaṃ vuttaṃ. Jīvitindriyañhi rūpamissakattā anārammaṇesu rūpadhammesu saṅgahitampi arūpakoṭṭhāsena siyāpakkhe saṅgahitaṃ.
சத்தாரி இந்த்³ரியானீதி ஸுக²து³க்க²தோ³மனஸ்ஸஅஞ்ஞாதாவிந்த்³ரியானி. தானி ஹி மக்³கா³ரம்மணத்திகே ந ப⁴ஜந்தி. மக்³க³ஹேதுகந்தி ஸஹஜாதஹேதுங் ஸந்தா⁴ய வுத்தங். வீரியவீமங்ஸாஜெட்ட²ககாலே ஸியா மக்³கா³தி⁴பதி, ச²ந்த³சித்தஜெட்ட²ககாலே ஸியா நவத்தப்³பா³.
Cattāri indriyānīti sukhadukkhadomanassaaññātāvindriyāni. Tāni hi maggārammaṇattike na bhajanti. Maggahetukanti sahajātahetuṃ sandhāya vuttaṃ. Vīriyavīmaṃsājeṭṭhakakāle siyā maggādhipati, chandacittajeṭṭhakakāle siyā navattabbā.
த³ஸிந்த்³ரியா ஸியா உப்பன்னா, ஸியா உப்பாதி³னோதி ஸத்த ரூபிந்த்³ரியானி தீணி ச விபாகிந்த்³ரியானி ஸந்தா⁴யேதங் வுத்தங். த³ஸிந்த்³ரியானி தோ³மனஸ்ஸேன ஸத்³தி⁴ங் ஹெட்டா² வுத்தானேவ. தத்த² தோ³மனஸ்ஸிந்த்³ரியங் பண்ணத்திங் ஆரப்³ப⁴ பவத்திகாலே நவத்தப்³பா³ரம்மணங், ஸேஸானி நிப்³பா³னபச்சவெக்க²ணகாலேபி. தீணிந்த்³ரியானி ப³ஹித்³தா⁴ரம்மணானீதி தீணி லோகுத்தரிந்த்³ரியானி. சத்தாரீதி ஸுக²து³க்க²ஸோமனஸ்ஸதோ³மனஸ்ஸானி. தானி ஹி அஜ்ஜ²த்தத⁴ம்மேபி ப³ஹித்³தா⁴த⁴ம்மேபி ஆரப்³ப⁴ பவத்தந்தி. அட்டி²ந்த்³ரியாதி மனிந்த்³ரியஜீவிதிந்த்³ரியஉபெக்கி²ந்த்³ரியானி சேவ ஸத்³தா⁴தி³பஞ்சகஞ்ச. தத்த² ஆகிஞ்சஞ்ஞாயதனகாலே நவத்தப்³பா³ரம்மணதா வேதி³தப்³பா³.
Dasindriyāsiyā uppannā, siyā uppādinoti satta rūpindriyāni tīṇi ca vipākindriyāni sandhāyetaṃ vuttaṃ. Dasindriyāni domanassena saddhiṃ heṭṭhā vuttāneva. Tattha domanassindriyaṃ paṇṇattiṃ ārabbha pavattikāle navattabbārammaṇaṃ, sesāni nibbānapaccavekkhaṇakālepi. Tīṇindriyāni bahiddhārammaṇānīti tīṇi lokuttarindriyāni. Cattārīti sukhadukkhasomanassadomanassāni. Tāni hi ajjhattadhammepi bahiddhādhammepi ārabbha pavattanti. Aṭṭhindriyāti manindriyajīvitindriyaupekkhindriyāni ceva saddhādipañcakañca. Tattha ākiñcaññāyatanakāle navattabbārammaṇatā veditabbā.
இதி இமஸ்மிம்பி பஞ்ஹாபுச்ச²கே த³ஸிந்த்³ரியானி காமாவசரானி, தீணி லோகுத்தரானி, நவ லோகியலோகுத்தரமிஸ்ஸகானேவ கதி²தானீதி. அயம்பி அபி⁴த⁴ம்மபா⁴ஜனீயேன ஸத்³தி⁴ங் ஏகபரிச்சே²தோ³வ ஹோதி. அயங் பன இந்த்³ரியவிப⁴ங்கோ³ த்³வேபரிவட்டங் நீஹரித்வா பா⁴ஜெத்வா த³ஸ்ஸிதோதி.
Iti imasmimpi pañhāpucchake dasindriyāni kāmāvacarāni, tīṇi lokuttarāni, nava lokiyalokuttaramissakāneva kathitānīti. Ayampi abhidhammabhājanīyena saddhiṃ ekaparicchedova hoti. Ayaṃ pana indriyavibhaṅgo dveparivaṭṭaṃ nīharitvā bhājetvā dassitoti.
ஸம்மோஹவினோத³னியா விப⁴ங்க³ட்ட²கதா²ய
Sammohavinodaniyā vibhaṅgaṭṭhakathāya
இந்த்³ரியவிப⁴ங்க³வண்ணனா நிட்டி²தா.
Indriyavibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 5. இந்த்³ரியவிப⁴ங்கோ³ • 5. Indriyavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 5. இந்த்³ரியவிப⁴ங்கோ³ • 5. Indriyavibhaṅgo
