| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
3. பஞ்ஹாபுச்ச²கவண்ணனா
3. Pañhāpucchakavaṇṇanā
462. பஞ்ஹாபுச்ச²கே பாளிஅனுஸாரேனேவ இத்³தி⁴பாதா³னங் குஸலாதி³பா⁴வோ வேதி³தப்³போ³. ஆரம்மணத்திகேஸு பன ஸப்³பே³பேதே அப்பமாணங் நிப்³பா³னங் ஆரப்³ப⁴ பவத்திதோ அப்பமாணாரம்மணா ஏவ, ந மக்³கா³ரம்மணா; ஸஹஜாதஹேதுவஸேன பன மக்³க³ஹேதுகா, ந மக்³கா³தி⁴பதினோ. சத்தாரோ ஹி அதி⁴பதயோ அஞ்ஞமஞ்ஞங் க³ருங் ந கரொந்தி. கஸ்மா? ஸயங் ஜெட்ட²கத்தா. யதா² ஹி ஸமஜாதிகா ஸமவயா ஸமதா²மா ஸமஸிப்பா சத்தாரோ ராஜபுத்தா அத்தனோ அத்தனோ ஜெட்ட²கதாய அஞ்ஞமஞ்ஞஸ்ஸ அபசிதிங் ந கரொந்தி, ஏவமிமேபி சத்தாரோ அதி⁴பதயோ பாடியேக்கங் பாடியேக்கங் ஜெட்ட²கத⁴ம்மதாய அஞ்ஞமஞ்ஞங் க³ருங் ந கரொந்தீதி ஏகந்தேனேவ ந மக்³கா³தி⁴பதினோ. அதீதாதீ³ஸு ஏகாரம்மணபா⁴வேபி ந வத்தப்³பா³. நிப்³பா³னஸ்ஸ பன ப³ஹித்³தா⁴த⁴ம்மத்தா ப³ஹித்³தா⁴ரம்மணா நாம ஹொந்தீதி. ஏவமேதஸ்மிங் பஞ்ஹாபுச்ச²கே நிப்³ப³த்திதலோகுத்தராவ இத்³தி⁴பாதா³ கதி²தா. ஸம்மாஸம்பு³த்³தே⁴ன ஹி ஸுத்தந்தபா⁴ஜனீயஸ்மிங்யேவ லோகியலோகுத்தரமிஸ்ஸகா இத்³தி⁴பாதா³ கதி²தா, அபி⁴த⁴ம்மபா⁴ஜனீயபஞ்ஹாபுச்ச²கேஸு பன லோகுத்தராயேவாதி. ஏவமயங் இத்³தி⁴பாத³விப⁴ங்கோ³பி தேபரிவட்டங் நீஹரித்வாவ த³ஸ்ஸிதோதி.
462. Pañhāpucchake pāḷianusāreneva iddhipādānaṃ kusalādibhāvo veditabbo. Ārammaṇattikesu pana sabbepete appamāṇaṃ nibbānaṃ ārabbha pavattito appamāṇārammaṇā eva, na maggārammaṇā; sahajātahetuvasena pana maggahetukā, na maggādhipatino. Cattāro hi adhipatayo aññamaññaṃ garuṃ na karonti. Kasmā? Sayaṃ jeṭṭhakattā. Yathā hi samajātikā samavayā samathāmā samasippā cattāro rājaputtā attano attano jeṭṭhakatāya aññamaññassa apacitiṃ na karonti, evamimepi cattāro adhipatayo pāṭiyekkaṃ pāṭiyekkaṃ jeṭṭhakadhammatāya aññamaññaṃ garuṃ na karontīti ekanteneva na maggādhipatino. Atītādīsu ekārammaṇabhāvepi na vattabbā. Nibbānassa pana bahiddhādhammattā bahiddhārammaṇā nāma hontīti. Evametasmiṃ pañhāpucchake nibbattitalokuttarāva iddhipādā kathitā. Sammāsambuddhena hi suttantabhājanīyasmiṃyeva lokiyalokuttaramissakā iddhipādā kathitā, abhidhammabhājanīyapañhāpucchakesu pana lokuttarāyevāti. Evamayaṃ iddhipādavibhaṅgopi teparivaṭṭaṃ nīharitvāva dassitoti.
ஸம்மோஹவினோத³னியா விப⁴ங்க³ட்ட²கதா²ய
Sammohavinodaniyā vibhaṅgaṭṭhakathāya
இத்³தி⁴பாத³விப⁴ங்க³வண்ணனா நிட்டி²தா.
Iddhipādavibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 9. இத்³தி⁴பாத³விப⁴ங்கோ³ • 9. Iddhipādavibhaṅgo
