| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
3. பஞ்ஹாபுச்ச²கவண்ணனா
3. Pañhāpucchakavaṇṇanā
504. பஞ்ஹாபுச்ச²கே பாளிஅனுஸாரேனேவ மக்³க³ங்கா³னங் குஸலாதி³பா⁴வோ வேதி³தப்³போ³. ஆரம்மணத்திகேஸு பன ஸப்³பா³னிபேதானி அப்பமாணங் நிப்³பா³னங் ஆரப்³ப⁴ பவத்திதோ அப்பமாணாரம்மணானேவ, ந மக்³கா³ரம்மணானி. நேவ ஹி மக்³கோ³ ந ப²லங் மக்³க³ங் ஆரம்மணங் கரோதி. ஸஹஜாதஹேதுவஸேன பனெத்த² குஸலானி மக்³க³ஹேதுகானி; வீரியங் வா வீமங்ஸங் வா ஜெட்ட²கங் கத்வா மக்³க³பா⁴வனாகாலே மக்³கா³தி⁴பதீனி; ச²ந்த³சித்தஜெட்டி²காய மக்³க³பா⁴வனாய ந வத்தப்³பா³னி மக்³கா³தி⁴பதீனீதி; ப²லகாலேபி ந வத்தப்³பா³னேவ.
504. Pañhāpucchake pāḷianusāreneva maggaṅgānaṃ kusalādibhāvo veditabbo. Ārammaṇattikesu pana sabbānipetāni appamāṇaṃ nibbānaṃ ārabbha pavattito appamāṇārammaṇāneva, na maggārammaṇāni. Neva hi maggo na phalaṃ maggaṃ ārammaṇaṃ karoti. Sahajātahetuvasena panettha kusalāni maggahetukāni; vīriyaṃ vā vīmaṃsaṃ vā jeṭṭhakaṃ katvā maggabhāvanākāle maggādhipatīni; chandacittajeṭṭhikāya maggabhāvanāya na vattabbāni maggādhipatīnīti; phalakālepi na vattabbāneva.
அதீதாதீ³ஸு ஏகாரம்மணபா⁴வேனபி ந வத்தப்³பா³னி; நிப்³பா³னஸ்ஸ பன ப³ஹித்³தா⁴த⁴ம்மத்தா ப³ஹித்³தா⁴ரம்மணானி நாம ஹொந்தீதி ஏவமேதஸ்மிங் பஞ்ஹாபுச்ச²கேபி நிப்³ப³த்திதலோகுத்தரானேவ மக்³க³ங்கா³னி கதி²தானி. ஸம்மாஸம்பு³த்³தே⁴ன ஹி ஸுத்தந்தபா⁴ஜனீயஸ்மிங்யேவ லோகியலோகுத்தரானி மக்³க³ங்கா³னி கதி²தானி; அபி⁴த⁴ம்மபா⁴ஜனீயே பன பஞ்ஹாபுச்ச²கே ச லோகுத்தரானேவாதி ஏவமயங் மக்³க³விப⁴ங்கோ³பி தேபரிவட்டங் நீஹரித்வாவ பா⁴ஜெத்வா த³ஸ்ஸிதோதி.
Atītādīsu ekārammaṇabhāvenapi na vattabbāni; nibbānassa pana bahiddhādhammattā bahiddhārammaṇāni nāma hontīti evametasmiṃ pañhāpucchakepi nibbattitalokuttarāneva maggaṅgāni kathitāni. Sammāsambuddhena hi suttantabhājanīyasmiṃyeva lokiyalokuttarāni maggaṅgāni kathitāni; abhidhammabhājanīye pana pañhāpucchake ca lokuttarānevāti evamayaṃ maggavibhaṅgopi teparivaṭṭaṃ nīharitvāva bhājetvā dassitoti.
ஸம்மோஹவினோத³னியா விப⁴ங்க³ட்ட²கதா²ய
Sammohavinodaniyā vibhaṅgaṭṭhakathāya
மக்³க³ங்க³விப⁴ங்க³வண்ணனா நிட்டி²தா.
Maggaṅgavibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 11. மக்³க³ங்க³விப⁴ங்கோ³ • 11. Maggaṅgavibhaṅgo
