| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
3. பஞ்ஹாபுச்ச²கவண்ணனா
3. Pañhāpucchakavaṇṇanā
638. பஞ்ஹாபுச்ச²கே பாளிஅனுஸாரேனேவ ஜா²னானங் குஸலாதி³பா⁴வோ வேதி³தப்³போ³. ஆரம்மணத்திகேஸு பன திண்ணங் ஜா²னானங் நிமித்தாரம்மணத்தா பரித்தாரம்மணாதி³பா⁴வேன நவத்தப்³ப³தா வேதி³தப்³பா³. லோகுத்தரா பனெத்த² மக்³க³காலே ப²லகாலே வா ஸியா அப்பமாணாரம்மணா. சதுத்த²ங் ஜா²னங் ஸியா பரித்தாரம்மணந்தி எத்த² குஸலதோ தேரஸ சதுத்த²ஜ்ஜா²னானி ஸப்³ப³த்த²பாத³கசதுத்த²ங், இத்³தி⁴வித⁴சதுத்த²ங், தி³ப்³ப³ஸோதஞாணசதுத்த²ங், சேதோபரியஞாணசதுத்த²ங், புப்³பே³னிவாஸஞாணசதுத்த²ங், தி³ப்³ப³சக்கு²ஞாணசதுத்த²ங், யதா²கம்மூபக³ஞாணசதுத்த²ங், அனாக³தங்ஸஞாணசதுத்த²ங், ஆகாஸானஞ்சாயதனாதி³சதுத்த²ங், லோகுத்தரசதுத்த²ந்தி.
638. Pañhāpucchake pāḷianusāreneva jhānānaṃ kusalādibhāvo veditabbo. Ārammaṇattikesu pana tiṇṇaṃ jhānānaṃ nimittārammaṇattā parittārammaṇādibhāvena navattabbatā veditabbā. Lokuttarā panettha maggakāle phalakāle vā siyā appamāṇārammaṇā. Catutthaṃ jhānaṃ siyā parittārammaṇanti ettha kusalato terasa catutthajjhānāni sabbatthapādakacatutthaṃ, iddhividhacatutthaṃ, dibbasotañāṇacatutthaṃ, cetopariyañāṇacatutthaṃ, pubbenivāsañāṇacatutthaṃ, dibbacakkhuñāṇacatutthaṃ, yathākammūpagañāṇacatutthaṃ, anāgataṃsañāṇacatutthaṃ, ākāsānañcāyatanādicatutthaṃ, lokuttaracatutthanti.
தத்த² ஸப்³ப³த்த²பாத³கசதுத்த²ங் நவத்தப்³பா³ரம்மணமேவ ஹோதி.
Tattha sabbatthapādakacatutthaṃ navattabbārammaṇameva hoti.
இத்³தி⁴வித⁴சதுத்த²ங் சித்தவஸேன காயங் பரிணாமெந்தஸ்ஸ அதி³ஸ்ஸமானேன காயேன பாடிஹாரியகரணே காயாரம்மணத்தா பரித்தாரம்மணங், காயவஸேன சித்தங் பரிணாமெந்தஸ்ஸ தி³ஸ்ஸமானேன காயேன பாடிஹாரியங் கத்வா ப்³ரஹ்மலோகங் க³ச்ச²ந்தஸ்ஸ ஸமாபத்திசித்தாரம்மணத்தா மஹக்³க³தாரம்மணங்.
Iddhividhacatutthaṃ cittavasena kāyaṃ pariṇāmentassa adissamānena kāyena pāṭihāriyakaraṇe kāyārammaṇattā parittārammaṇaṃ, kāyavasena cittaṃ pariṇāmentassa dissamānena kāyena pāṭihāriyaṃ katvā brahmalokaṃ gacchantassa samāpatticittārammaṇattā mahaggatārammaṇaṃ.
தி³ப்³ப³ஸோதஞாணசதுத்த²ங் ஸத்³தா³ரம்மணத்தா பரித்தாரம்மணங்.
Dibbasotañāṇacatutthaṃ saddārammaṇattā parittārammaṇaṃ.
சேதோபரியஞாணசதுத்த²ங் காமாவசரசித்தஜானநகாலே பரித்தாரம்மணங், ரூபாவசராரூபாவசரசித்தஜானநகாலே மஹக்³க³தாரம்மணங், லோகுத்தரசித்தஜானநகாலே அப்பமாணாரம்மணங். சேதோபரியஞாணலாபீ⁴ பன புது²ஜ்ஜனோ புது²ஜ்ஜனானங்யேவ சித்தங் ஜானாதி, ந அரியானங். ஸோதாபன்னோ ஸோதாபன்னஸ்ஸ சேவ புது²ஜ்ஜனஸ்ஸ ச; ஸகதா³கா³மீ ஸகதா³கா³மினோ சேவ ஹெட்டி²மானஞ்ச த்³வின்னங்; அனாகா³மீ அனாகா³மினோ சேவ ஹெட்டி²மானஞ்ச திண்ணங்; கீ²ணாஸவோ ஸப்³பே³ஸம்பி ஜானாதி.
Cetopariyañāṇacatutthaṃ kāmāvacaracittajānanakāle parittārammaṇaṃ, rūpāvacarārūpāvacaracittajānanakāle mahaggatārammaṇaṃ, lokuttaracittajānanakāle appamāṇārammaṇaṃ. Cetopariyañāṇalābhī pana puthujjano puthujjanānaṃyeva cittaṃ jānāti, na ariyānaṃ. Sotāpanno sotāpannassa ceva puthujjanassa ca; sakadāgāmī sakadāgāmino ceva heṭṭhimānañca dvinnaṃ; anāgāmī anāgāmino ceva heṭṭhimānañca tiṇṇaṃ; khīṇāsavo sabbesampi jānāti.
புப்³பே³னிவாஸஞாணசதுத்த²ங் காமாவசரக்க²ந்தா⁴னுஸ்ஸரணகாலே பரித்தாரம்மணங், ரூபாவசராரூபாவசரக்க²ந்தா⁴னுஸ்ஸரணகாலே மஹக்³க³தாரம்மணங், ‘‘அதீதே பு³த்³த⁴பச்சேகபு³த்³த⁴கீ²ணாஸவா மக்³க³ங் பா⁴வயிங்ஸு, ப²லங் ஸச்சி²கரிங்ஸூ’’தி அனுஸ்ஸரணகாலே அப்பமாணாரம்மணங், நாமகொ³த்தானுஸ்ஸரணகாலே நவத்தப்³பா³ரம்மணங்.
Pubbenivāsañāṇacatutthaṃ kāmāvacarakkhandhānussaraṇakāle parittārammaṇaṃ, rūpāvacarārūpāvacarakkhandhānussaraṇakāle mahaggatārammaṇaṃ, ‘‘atīte buddhapaccekabuddhakhīṇāsavā maggaṃ bhāvayiṃsu, phalaṃ sacchikariṃsū’’ti anussaraṇakāle appamāṇārammaṇaṃ, nāmagottānussaraṇakāle navattabbārammaṇaṃ.
தி³ப்³ப³சக்கு²ஞாணசதுத்த²ங் வண்ணாரம்மணத்தா பரித்தாரம்மணங்.
Dibbacakkhuñāṇacatutthaṃ vaṇṇārammaṇattā parittārammaṇaṃ.
யதா²கம்மூபக³ஞாணசதுத்த²ங் காமாவசரகம்மானுஸ்ஸரணகாலே பரித்தாரம்மணங், ரூபாவசராரூபாவசரகம்மானுஸ்ஸரணகாலே மஹக்³க³தாரம்மணங்.
Yathākammūpagañāṇacatutthaṃ kāmāvacarakammānussaraṇakāle parittārammaṇaṃ, rūpāvacarārūpāvacarakammānussaraṇakāle mahaggatārammaṇaṃ.
அனாக³தங்ஸஞாணசதுத்த²ங் அனாக³தே காமதா⁴துயா நிப்³ப³த்திஜானநகாலே பரித்தாரம்மணங், ரூபாரூபப⁴வேஸு நிப்³ப³த்திஜானநகாலே மஹக்³க³தாரம்மணங், ‘‘அனாக³தே பு³த்³த⁴பச்சேகபு³த்³த⁴கீ²ணாஸவா மக்³க³ங் பா⁴வெஸ்ஸந்தி, ப²லங் ஸச்சி²கரிஸ்ஸந்தீ’’தி ஜானநகாலே அப்பமாணாரம்மணங், ‘‘அனாக³தே ஸங்கோ² நாம ராஜா ப⁴விஸ்ஸதீ’’திஆதி³னா (தீ³॰ நி॰ 3.108) நயேன நாமகொ³த்தானுஸ்ஸரணகாலே நவத்தப்³பா³ரம்மணங்.
Anāgataṃsañāṇacatutthaṃ anāgate kāmadhātuyā nibbattijānanakāle parittārammaṇaṃ, rūpārūpabhavesu nibbattijānanakāle mahaggatārammaṇaṃ, ‘‘anāgate buddhapaccekabuddhakhīṇāsavā maggaṃ bhāvessanti, phalaṃ sacchikarissantī’’ti jānanakāle appamāṇārammaṇaṃ, ‘‘anāgate saṅkho nāma rājā bhavissatī’’tiādinā (dī. ni. 3.108) nayena nāmagottānussaraṇakāle navattabbārammaṇaṃ.
ஆகாஸானஞ்சாயதனஆகிஞ்சஞ்ஞாயதனசதுத்த²ங் நவத்தப்³பா³ரம்மணங். விஞ்ஞாணஞ்சாயதனநேவஸஞ்ஞானாஸஞ்ஞாயதனசதுத்த²ங் மஹக்³க³தாரம்மணங்.
Ākāsānañcāyatanaākiñcaññāyatanacatutthaṃ navattabbārammaṇaṃ. Viññāṇañcāyatananevasaññānāsaññāyatanacatutthaṃ mahaggatārammaṇaṃ.
லோகுத்தரசதுத்த²ங் அப்பமாணாரம்மணங்.
Lokuttaracatutthaṃ appamāṇārammaṇaṃ.
கிரியதோபி தேஸங் த்³வாத³ஸன்னங் ஜா²னானங் இத³மேவ ஆரம்மணவிதா⁴னங். தீணி ஜா²னானி நமக்³கா³ரம்மணாதி பச்சவெக்க²ணஞாணங் வா சேதோபரியாதி³ஞாணங் வா மக்³க³ங் ஆரம்மணங் கரெய்ய, தீணி ஜா²னானி ததா² அப்பவத்திதோ நமக்³கா³ரம்மணா, ஸஹஜாதஹேதுவஸேன பன ஸியா மக்³க³ஹேதுகா; வீரியஜெட்டி²காய வா வீமங்ஸாஜெட்டி²காய வா மக்³க³பா⁴வனாய மக்³கா³தி⁴பதினோ; ச²ந்த³சித்தஜெட்ட²ககாலே ப²லகாலே ச நவத்தப்³பா³.
Kiriyatopi tesaṃ dvādasannaṃ jhānānaṃ idameva ārammaṇavidhānaṃ. Tīṇi jhānāni namaggārammaṇāti paccavekkhaṇañāṇaṃ vā cetopariyādiñāṇaṃ vā maggaṃ ārammaṇaṃ kareyya, tīṇi jhānāni tathā appavattito namaggārammaṇā, sahajātahetuvasena pana siyā maggahetukā; vīriyajeṭṭhikāya vā vīmaṃsājeṭṭhikāya vā maggabhāvanāya maggādhipatino; chandacittajeṭṭhakakāle phalakāle ca navattabbā.
சதுத்த²ங் ஜா²னந்தி இதா⁴பி குஸலதோ தேரஸஸு சதுத்த²ஜ்ஜா²னேஸு ஸப்³ப³த்த²பாத³கஇத்³தி⁴வித⁴தி³ப்³ப³ஸோததி³ப்³ப³சக்கு²யதா²கம்மூபக³ஞாணசதுத்த²ஞ்சேவ சதுப்³பி³த⁴ஞ்ச ஆருப்பசதுத்த²ங் மக்³கா³ரம்மணாதி³பா⁴வேன ந வத்தப்³ப³ங். சேதோபரியபுப்³பே³னிவாஸஅனாக³தங்ஸஞாணசதுத்த²ங் பன மக்³கா³ரம்மணங் ஹோதி. ந வத்தப்³ப³ங் மக்³க³ஹேதுகங் மக்³கா³தி⁴பதீதி வா; லோகுத்தரசதுத்த²ங் மக்³கா³ரம்மணங் ந ஹோதி; மக்³க³காலே பன ஸஹஜாதஹேதுவஸேன மக்³க³ஹேதுகங்; வீரியவீமங்ஸாஜெட்டி²காய மக்³க³பா⁴வனாய மக்³கா³தி⁴பதி; ச²ந்த³சித்தஜெட்டி²காய சேவ மக்³க³பா⁴வனாய ப²லகாலே ச ந வத்தப்³ப³ங். கிரியதோபி த்³வாத³ஸஸு ஜா²னேஸு அயமேவ நயோ.
Catutthaṃ jhānanti idhāpi kusalato terasasu catutthajjhānesu sabbatthapādakaiddhividhadibbasotadibbacakkhuyathākammūpagañāṇacatutthañceva catubbidhañca āruppacatutthaṃ maggārammaṇādibhāvena na vattabbaṃ. Cetopariyapubbenivāsaanāgataṃsañāṇacatutthaṃ pana maggārammaṇaṃ hoti. Na vattabbaṃ maggahetukaṃ maggādhipatīti vā; lokuttaracatutthaṃ maggārammaṇaṃ na hoti; maggakāle pana sahajātahetuvasena maggahetukaṃ; vīriyavīmaṃsājeṭṭhikāya maggabhāvanāya maggādhipati; chandacittajeṭṭhikāya ceva maggabhāvanāya phalakāle ca na vattabbaṃ. Kiriyatopi dvādasasu jhānesu ayameva nayo.
தீணி ஜா²னானி ந வத்தப்³பா³தி அதீதாதீ³ஸு ஏகத⁴ம்மம்பி ஆரப்³ப⁴ அப்பவத்திதோ நவத்தப்³பா³தி வேதி³தப்³பா³.
Tīṇi jhānāni na vattabbāti atītādīsu ekadhammampi ārabbha appavattito navattabbāti veditabbā.
சதுத்த²ங் ஜா²னந்தி குஸலதோ தேரஸஸு சதுத்த²ஜ்ஜா²னேஸு ஸப்³ப³த்த²பாத³கசதுத்த²ங் நவத்தப்³பா³ரம்மணமேவ. இத்³தி⁴வித⁴சதுத்த²ங் காயவஸேன சித்தபரிணாமனே ஸமாபத்திசித்தாரம்மணத்தா அதீதாரம்மணங்; ‘‘அனாக³தே இமானி புப்பா²னி மா மிலாயிங்ஸு, தீ³பா மா நிப்³பா³யிங்ஸு, ஏகோ அக்³கி³க்க²ந்தோ⁴ ஸமுட்டா²து, பப்³ப³தோ ஸமுட்டா²தூ’’தி அதி⁴ட்டா²னகாலே அனாக³தாரம்மணங்; சித்தவஸேன காயபரிணாமனகாலே காயாரம்மணத்தா பச்சுப்பன்னாரம்மணங். தி³ப்³ப³ஸோதஞாணசதுத்த²ங் ஸத்³தா³ரம்மணத்தா பச்சுப்பனாரம்மணங். சேதோபரியஞாணசதுத்த²ங் அதீதே ஸத்ததி³வஸப்³ப⁴ந்தரே உப்பஜ்ஜித்வா நிருத்³த⁴சித்தஜானநகாலே அதீதாரம்மணங்; அனாக³தே ஸத்ததி³வஸப்³ப⁴ந்தரே உப்பஜ்ஜனகசித்தஜானநகாலே அனாக³தாரம்மணங். ‘‘யதா² இமஸ்ஸ போ⁴தோ மனோஸங்கா²ரா பணிஹிதா இமஸ்ஸ சித்தஸ்ஸ அனந்தரா அமுங் நாம விதக்கங் விதக்கெஸ்ஸதீதி. ஸோ ப³ஹுஞ்சேபி ஆதி³ஸதி, ததே²வ தங் ஹோதி நோ அஞ்ஞதா²’’தி இமினா ஹி ஸுத்தேன (அ॰ நி॰ 3.61) சேதோபரியஞாணஸ்ஸேவ பவத்தி பகாஸிதா. அத்³தா⁴னபச்சுப்பன்னஸந்ததிபச்சுப்பன்னவஸேனேவ பச்சுப்பன்னங் ஆரப்³ப⁴ பவத்திகாலே பச்சுப்பன்னாரம்மணங். வித்தா²ரகதா² பனெத்த² ஹெட்டா²அட்ட²கதா²கண்ட³வண்ணனாயங் வுத்தனயேனேவ வேதி³தப்³பா³.
Catutthaṃ jhānanti kusalato terasasu catutthajjhānesu sabbatthapādakacatutthaṃ navattabbārammaṇameva. Iddhividhacatutthaṃ kāyavasena cittapariṇāmane samāpatticittārammaṇattā atītārammaṇaṃ; ‘‘anāgate imāni pupphāni mā milāyiṃsu, dīpā mā nibbāyiṃsu, eko aggikkhandho samuṭṭhātu, pabbato samuṭṭhātū’’ti adhiṭṭhānakāle anāgatārammaṇaṃ; cittavasena kāyapariṇāmanakāle kāyārammaṇattā paccuppannārammaṇaṃ. Dibbasotañāṇacatutthaṃ saddārammaṇattā paccuppanārammaṇaṃ. Cetopariyañāṇacatutthaṃ atīte sattadivasabbhantare uppajjitvā niruddhacittajānanakāle atītārammaṇaṃ; anāgate sattadivasabbhantare uppajjanakacittajānanakāle anāgatārammaṇaṃ. ‘‘Yathā imassa bhoto manosaṅkhārā paṇihitā imassa cittassa anantarā amuṃ nāma vitakkaṃ vitakkessatīti. So bahuñcepi ādisati, tatheva taṃ hoti no aññathā’’ti iminā hi suttena (a. ni. 3.61) cetopariyañāṇasseva pavatti pakāsitā. Addhānapaccuppannasantatipaccuppannavaseneva paccuppannaṃ ārabbha pavattikāle paccuppannārammaṇaṃ. Vitthārakathā panettha heṭṭhāaṭṭhakathākaṇḍavaṇṇanāyaṃ vuttanayeneva veditabbā.
புப்³பே³னிவாஸஞாணசதுத்த²ங் அதீதக்க²ந்தா⁴னுஸ்ஸரணகாலே அதீதாரம்மணங், நாமகொ³த்தானுஸ்ஸரணகாலே நவத்தப்³பா³ரம்மணங். தி³ப்³ப³சக்கு²ஞாணசதுத்த²ங் வண்ணாரம்மணத்தா பச்சுப்பன்னாரம்மணங். யதா²கம்மூபக³ஞாணசதுத்த²ங் அதீதகம்மமேவ ஆரம்மணங் கரோதீதி அதீதாரம்மணங். அனாக³தங்ஸஞாணசதுத்த²ங் அனாக³தக்க²ந்தா⁴னுஸ்ஸரணகாலே அனாக³தாரம்மணங், நாமகொ³த்தானுஸ்ஸரணகாலே நவத்தப்³பா³ரம்மணங். ஆகாஸானஞ்சாயதனஆகிஞ்சஞ்ஞாயதனசதுத்த²ங் நவத்தப்³பா³ரம்மணமேவ. விஞ்ஞாணஞ்சாயதனநேவஸஞ்ஞானாஸஞ்ஞாயதனசதுத்த²ங் அதீதாரம்மணமேவ. லோகுத்தரசதுத்த²ங் நவத்தப்³பா³ரம்மணமேவ. கிரியதோபி த்³வாத³ஸஸு சதுத்த²ஜ்ஜா²னேஸு ஏஸேவ நயோ.
Pubbenivāsañāṇacatutthaṃ atītakkhandhānussaraṇakāle atītārammaṇaṃ, nāmagottānussaraṇakāle navattabbārammaṇaṃ. Dibbacakkhuñāṇacatutthaṃ vaṇṇārammaṇattā paccuppannārammaṇaṃ. Yathākammūpagañāṇacatutthaṃ atītakammameva ārammaṇaṃ karotīti atītārammaṇaṃ. Anāgataṃsañāṇacatutthaṃ anāgatakkhandhānussaraṇakāle anāgatārammaṇaṃ, nāmagottānussaraṇakāle navattabbārammaṇaṃ. Ākāsānañcāyatanaākiñcaññāyatanacatutthaṃ navattabbārammaṇameva. Viññāṇañcāyatananevasaññānāsaññāyatanacatutthaṃ atītārammaṇameva. Lokuttaracatutthaṃ navattabbārammaṇameva. Kiriyatopi dvādasasu catutthajjhānesu eseva nayo.
தீணி ஜா²னானி ப³ஹித்³தா⁴ரம்மணாதி அஜ்ஜ²த்ததோ ப³ஹித்³தா⁴பூ⁴தங் நிமித்தங் ஆரப்³ப⁴ பவத்திதோ ப³ஹித்³தா⁴ரம்மணா.
Tīṇijhānāni bahiddhārammaṇāti ajjhattato bahiddhābhūtaṃ nimittaṃ ārabbha pavattito bahiddhārammaṇā.
சதுத்த²ங் ஜா²னந்தி இதா⁴பி குஸலதோ தேரஸஸு சதுத்த²ஜ்ஜா²னேஸு ஸப்³ப³த்த²பாத³கசதுத்த²ங் ப³ஹித்³தா⁴ரம்மணமேவ.
Catutthaṃ jhānanti idhāpi kusalato terasasu catutthajjhānesu sabbatthapādakacatutthaṃ bahiddhārammaṇameva.
இத்³தி⁴வித⁴சதுத்த²ங் காயவஸேன சித்தபரிணாமனேபி சித்தவஸேன காயபரிணாமனேபி அத்தனோவ காயசித்தாரம்மணத்தா அஜ்ஜ²த்தாரம்மணங்; ‘‘ப³ஹித்³தா⁴ ஹத்தி²ம்பி த³ஸ்ஸேதீ’’திஆதி³னா நயேன பவத்தகாலே ப³ஹித்³தா⁴ரம்மணங்.
Iddhividhacatutthaṃ kāyavasena cittapariṇāmanepi cittavasena kāyapariṇāmanepi attanova kāyacittārammaṇattā ajjhattārammaṇaṃ; ‘‘bahiddhā hatthimpi dassetī’’tiādinā nayena pavattakāle bahiddhārammaṇaṃ.
தி³ப்³ப³ஸோதஞாணசதுத்த²ங் அத்தனோ குச்சி²க³தஸத்³தா³ரம்மணகாலே அஜ்ஜ²த்தாரம்மணங், பரஸ்ஸ ஸத்³தா³ரம்மணகாலே ப³ஹித்³தா⁴ரம்மணங், உப⁴யவஸேனாபி அஜ்ஜ²த்தப³ஹித்³தா⁴ரம்மணங்.
Dibbasotañāṇacatutthaṃ attano kucchigatasaddārammaṇakāle ajjhattārammaṇaṃ, parassa saddārammaṇakāle bahiddhārammaṇaṃ, ubhayavasenāpi ajjhattabahiddhārammaṇaṃ.
சேதோபரியஞாணசதுத்த²ங் ப³ஹித்³தா⁴ரம்மணமேவ.
Cetopariyañāṇacatutthaṃ bahiddhārammaṇameva.
புப்³பே³னிவாஸஞாணசதுத்த²ங் அத்தனோ க²ந்தா⁴னுஸ்ஸரணகாலே அஜ்ஜ²த்தாரம்மணங், பரஸ்ஸ க²ந்தா⁴னஞ்சேவ நாமகொ³த்தஸ்ஸ ச அனுஸ்ஸரணகாலே ப³ஹித்³தா⁴ரம்மணங்.
Pubbenivāsañāṇacatutthaṃ attano khandhānussaraṇakāle ajjhattārammaṇaṃ, parassa khandhānañceva nāmagottassa ca anussaraṇakāle bahiddhārammaṇaṃ.
தி³ப்³ப³சக்கு²ஞாணசதுத்த²ங் அத்தனோ ரூபாரம்மணகாலே அஜ்ஜ²த்தாரம்மணங், பரஸ்ஸ ரூபாரம்மணகாலே ப³ஹித்³தா⁴ரம்மணங், உப⁴யவஸேனாபி அஜ்ஜ²த்தப³ஹித்³தா⁴ரம்மணங்.
Dibbacakkhuñāṇacatutthaṃ attano rūpārammaṇakāle ajjhattārammaṇaṃ, parassa rūpārammaṇakāle bahiddhārammaṇaṃ, ubhayavasenāpi ajjhattabahiddhārammaṇaṃ.
யதா²கம்மூபக³ஞாணசதுத்த²ங் அத்தனோ கம்மஜானநகாலே அஜ்ஜ²த்தாரம்மணங், பரஸ்ஸ கம்மஜானநகாலே ப³ஹித்³தா⁴ரம்மணங், உப⁴யவஸேனாபி அஜ்ஜ²த்தப³ஹித்³தா⁴ரம்மணங்.
Yathākammūpagañāṇacatutthaṃ attano kammajānanakāle ajjhattārammaṇaṃ, parassa kammajānanakāle bahiddhārammaṇaṃ, ubhayavasenāpi ajjhattabahiddhārammaṇaṃ.
அனாக³தங்ஸஞாணசதுத்த²ங் அத்தனோ அனாக³தே நிப்³ப³த்திஜானநகாலே அஜ்ஜ²த்தாரம்மணங், பரஸ்ஸ க²ந்தா⁴னுஸ்ஸரணகாலே சேவ நாமகொ³த்தானுஸ்ஸரணகாலே ச ப³ஹித்³தா⁴ரம்மணங், உப⁴யவஸேனாபி அஜ்ஜ²த்தப³ஹித்³தா⁴ரம்மணங்.
Anāgataṃsañāṇacatutthaṃ attano anāgate nibbattijānanakāle ajjhattārammaṇaṃ, parassa khandhānussaraṇakāle ceva nāmagottānussaraṇakāle ca bahiddhārammaṇaṃ, ubhayavasenāpi ajjhattabahiddhārammaṇaṃ.
ஆகாஸானஞ்சாயதனசதுத்த²ங் ப³ஹித்³தா⁴ரம்மணங். ஆகிஞ்சஞ்ஞாயதனசதுத்த²ங் நவத்தப்³பா³ரம்மணங். விஞ்ஞாணஞ்சாயதனநேவஸஞ்ஞானாஸஞ்ஞாயதனசதுத்த²ங் அஜ்ஜ²த்தாரம்மணங்.
Ākāsānañcāyatanacatutthaṃ bahiddhārammaṇaṃ. Ākiñcaññāyatanacatutthaṃ navattabbārammaṇaṃ. Viññāṇañcāyatananevasaññānāsaññāyatanacatutthaṃ ajjhattārammaṇaṃ.
லோகுத்தரசதுத்த²ங் ப³ஹித்³தா⁴ரம்மணமேவ. கிரியதோபி த்³வாத³ஸஸு ஜா²னேஸு அயமேவ நயோதி.
Lokuttaracatutthaṃ bahiddhārammaṇameva. Kiriyatopi dvādasasu jhānesu ayameva nayoti.
இமஸ்மிங் பன ஜா²னவிப⁴ங்கே³ ஸம்மாஸம்பு³த்³தே⁴ன ஸுத்தந்தபா⁴ஜனீயேபி லோகியலோகுத்தரமிஸ்ஸகானேவ ஜா²னானி கதி²தானி; அபி⁴த⁴ம்மபா⁴ஜனீயேபி பஞ்ஹாபுச்ச²கேபி. தயோபி ஹி ஏதே நயா தேபூ⁴மகத⁴ம்மமிஸ்ஸகத்தா ஏகபரிச்சே²தா³ ஏவ. ஏவமயங் ஜா²னவிப⁴ங்கோ³பி தேபரிவட்டங் நீஹரித்வாவ பா⁴ஜெத்வா த³ஸ்ஸிதோதி.
Imasmiṃ pana jhānavibhaṅge sammāsambuddhena suttantabhājanīyepi lokiyalokuttaramissakāneva jhānāni kathitāni; abhidhammabhājanīyepi pañhāpucchakepi. Tayopi hi ete nayā tebhūmakadhammamissakattā ekaparicchedā eva. Evamayaṃ jhānavibhaṅgopi teparivaṭṭaṃ nīharitvāva bhājetvā dassitoti.
ஸம்மோஹவினோத³னியா விப⁴ங்க³ட்ட²கதா²ய
Sammohavinodaniyā vibhaṅgaṭṭhakathāya
ஜா²னவிப⁴ங்க³வண்ணனா நிட்டி²தா.
Jhānavibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 12. ஜா²னவிப⁴ங்கோ³ • 12. Jhānavibhaṅgo
