| Library / Tipiṭaka / তিপিটক • Tipiṭaka / সম্মোহৰিনোদনী-অট্ঠকথা • Sammohavinodanī-aṭṭhakathā |
৩. পঞ্হাপুচ্ছকৰণ্ণনা
3. Pañhāpucchakavaṇṇanā
৬৩৮. পঞ্হাপুচ্ছকে পাল়িঅনুসারেনেৰ ঝানানং কুসলাদিভাৰো ৰেদিতব্বো। আরম্মণত্তিকেসু পন তিণ্ণং ঝানানং নিমিত্তারম্মণত্তা পরিত্তারম্মণাদিভাৰেন নৰত্তব্বতা ৰেদিতব্বা। লোকুত্তরা পনেত্থ মগ্গকালে ফলকালে ৰা সিযা অপ্পমাণারম্মণা। চতুত্থং ঝানং সিযা পরিত্তারম্মণন্তি এত্থ কুসলতো তেরস চতুত্থজ্ঝানানি সব্বত্থপাদকচতুত্থং, ইদ্ধিৰিধচতুত্থং, দিব্বসোতঞাণচতুত্থং, চেতোপরিযঞাণচতুত্থং, পুব্বেনিৰাসঞাণচতুত্থং, দিব্বচক্খুঞাণচতুত্থং, যথাকম্মূপগঞাণচতুত্থং, অনাগতংসঞাণচতুত্থং, আকাসানঞ্চাযতনাদিচতুত্থং, লোকুত্তরচতুত্থন্তি।
638. Pañhāpucchake pāḷianusāreneva jhānānaṃ kusalādibhāvo veditabbo. Ārammaṇattikesu pana tiṇṇaṃ jhānānaṃ nimittārammaṇattā parittārammaṇādibhāvena navattabbatā veditabbā. Lokuttarā panettha maggakāle phalakāle vā siyā appamāṇārammaṇā. Catutthaṃ jhānaṃ siyā parittārammaṇanti ettha kusalato terasa catutthajjhānāni sabbatthapādakacatutthaṃ, iddhividhacatutthaṃ, dibbasotañāṇacatutthaṃ, cetopariyañāṇacatutthaṃ, pubbenivāsañāṇacatutthaṃ, dibbacakkhuñāṇacatutthaṃ, yathākammūpagañāṇacatutthaṃ, anāgataṃsañāṇacatutthaṃ, ākāsānañcāyatanādicatutthaṃ, lokuttaracatutthanti.
তত্থ সব্বত্থপাদকচতুত্থং নৰত্তব্বারম্মণমেৰ হোতি।
Tattha sabbatthapādakacatutthaṃ navattabbārammaṇameva hoti.
ইদ্ধিৰিধচতুত্থং চিত্তৰসেন কাযং পরিণামেন্তস্স অদিস্সমানেন কাযেন পাটিহারিযকরণে কাযারম্মণত্তা পরিত্তারম্মণং, কাযৰসেন চিত্তং পরিণামেন্তস্স দিস্সমানেন কাযেন পাটিহারিযং কত্ৰা ব্রহ্মলোকং গচ্ছন্তস্স সমাপত্তিচিত্তারম্মণত্তা মহগ্গতারম্মণং।
Iddhividhacatutthaṃ cittavasena kāyaṃ pariṇāmentassa adissamānena kāyena pāṭihāriyakaraṇe kāyārammaṇattā parittārammaṇaṃ, kāyavasena cittaṃ pariṇāmentassa dissamānena kāyena pāṭihāriyaṃ katvā brahmalokaṃ gacchantassa samāpatticittārammaṇattā mahaggatārammaṇaṃ.
দিব্বসোতঞাণচতুত্থং সদ্দারম্মণত্তা পরিত্তারম্মণং।
Dibbasotañāṇacatutthaṃ saddārammaṇattā parittārammaṇaṃ.
চেতোপরিযঞাণচতুত্থং কামাৰচরচিত্তজাননকালে পরিত্তারম্মণং, রূপাৰচরারূপাৰচরচিত্তজাননকালে মহগ্গতারম্মণং, লোকুত্তরচিত্তজাননকালে অপ্পমাণারম্মণং। চেতোপরিযঞাণলাভী পন পুথুজ্জনো পুথুজ্জনানংযেৰ চিত্তং জানাতি, ন অরিযানং। সোতাপন্নো সোতাপন্নস্স চেৰ পুথুজ্জনস্স চ; সকদাগামী সকদাগামিনো চেৰ হেট্ঠিমানঞ্চ দ্ৰিন্নং; অনাগামী অনাগামিনো চেৰ হেট্ঠিমানঞ্চ তিণ্ণং; খীণাসৰো সব্বেসম্পি জানাতি।
Cetopariyañāṇacatutthaṃ kāmāvacaracittajānanakāle parittārammaṇaṃ, rūpāvacarārūpāvacaracittajānanakāle mahaggatārammaṇaṃ, lokuttaracittajānanakāle appamāṇārammaṇaṃ. Cetopariyañāṇalābhī pana puthujjano puthujjanānaṃyeva cittaṃ jānāti, na ariyānaṃ. Sotāpanno sotāpannassa ceva puthujjanassa ca; sakadāgāmī sakadāgāmino ceva heṭṭhimānañca dvinnaṃ; anāgāmī anāgāmino ceva heṭṭhimānañca tiṇṇaṃ; khīṇāsavo sabbesampi jānāti.
পুব্বেনিৰাসঞাণচতুত্থং কামাৰচরক্খন্ধানুস্সরণকালে পরিত্তারম্মণং, রূপাৰচরারূপাৰচরক্খন্ধানুস্সরণকালে মহগ্গতারম্মণং, ‘‘অতীতে বুদ্ধপচ্চেকবুদ্ধখীণাসৰা মগ্গং ভাৰযিংসু, ফলং সচ্ছিকরিংসূ’’তি অনুস্সরণকালে অপ্পমাণারম্মণং, নামগোত্তানুস্সরণকালে নৰত্তব্বারম্মণং।
Pubbenivāsañāṇacatutthaṃ kāmāvacarakkhandhānussaraṇakāle parittārammaṇaṃ, rūpāvacarārūpāvacarakkhandhānussaraṇakāle mahaggatārammaṇaṃ, ‘‘atīte buddhapaccekabuddhakhīṇāsavā maggaṃ bhāvayiṃsu, phalaṃ sacchikariṃsū’’ti anussaraṇakāle appamāṇārammaṇaṃ, nāmagottānussaraṇakāle navattabbārammaṇaṃ.
দিব্বচক্খুঞাণচতুত্থং ৰণ্ণারম্মণত্তা পরিত্তারম্মণং।
Dibbacakkhuñāṇacatutthaṃ vaṇṇārammaṇattā parittārammaṇaṃ.
যথাকম্মূপগঞাণচতুত্থং কামাৰচরকম্মানুস্সরণকালে পরিত্তারম্মণং, রূপাৰচরারূপাৰচরকম্মানুস্সরণকালে মহগ্গতারম্মণং।
Yathākammūpagañāṇacatutthaṃ kāmāvacarakammānussaraṇakāle parittārammaṇaṃ, rūpāvacarārūpāvacarakammānussaraṇakāle mahaggatārammaṇaṃ.
অনাগতংসঞাণচতুত্থং অনাগতে কামধাতুযা নিব্বত্তিজাননকালে পরিত্তারম্মণং, রূপারূপভৰেসু নিব্বত্তিজাননকালে মহগ্গতারম্মণং, ‘‘অনাগতে বুদ্ধপচ্চেকবুদ্ধখীণাসৰা মগ্গং ভাৰেস্সন্তি, ফলং সচ্ছিকরিস্সন্তী’’তি জাননকালে অপ্পমাণারম্মণং, ‘‘অনাগতে সঙ্খো নাম রাজা ভৰিস্সতী’’তিআদিনা (দী॰ নি॰ ৩.১০৮) নযেন নামগোত্তানুস্সরণকালে নৰত্তব্বারম্মণং।
Anāgataṃsañāṇacatutthaṃ anāgate kāmadhātuyā nibbattijānanakāle parittārammaṇaṃ, rūpārūpabhavesu nibbattijānanakāle mahaggatārammaṇaṃ, ‘‘anāgate buddhapaccekabuddhakhīṇāsavā maggaṃ bhāvessanti, phalaṃ sacchikarissantī’’ti jānanakāle appamāṇārammaṇaṃ, ‘‘anāgate saṅkho nāma rājā bhavissatī’’tiādinā (dī. ni. 3.108) nayena nāmagottānussaraṇakāle navattabbārammaṇaṃ.
আকাসানঞ্চাযতনআকিঞ্চঞ্ঞাযতনচতুত্থং নৰত্তব্বারম্মণং। ৰিঞ্ঞাণঞ্চাযতননেৰসঞ্ঞানাসঞ্ঞাযতনচতুত্থং মহগ্গতারম্মণং।
Ākāsānañcāyatanaākiñcaññāyatanacatutthaṃ navattabbārammaṇaṃ. Viññāṇañcāyatananevasaññānāsaññāyatanacatutthaṃ mahaggatārammaṇaṃ.
লোকুত্তরচতুত্থং অপ্পমাণারম্মণং।
Lokuttaracatutthaṃ appamāṇārammaṇaṃ.
কিরিযতোপি তেসং দ্ৰাদসন্নং ঝানানং ইদমেৰ আরম্মণৰিধানং। তীণি ঝানানি নমগ্গারম্মণাতি পচ্চৰেক্খণঞাণং ৰা চেতোপরিযাদিঞাণং ৰা মগ্গং আরম্মণং করেয্য, তীণি ঝানানি তথা অপ্পৰত্তিতো নমগ্গারম্মণা, সহজাতহেতুৰসেন পন সিযা মগ্গহেতুকা; ৰীরিযজেট্ঠিকায ৰা ৰীমংসাজেট্ঠিকায ৰা মগ্গভাৰনায মগ্গাধিপতিনো; ছন্দচিত্তজেট্ঠককালে ফলকালে চ নৰত্তব্বা।
Kiriyatopi tesaṃ dvādasannaṃ jhānānaṃ idameva ārammaṇavidhānaṃ. Tīṇi jhānāni namaggārammaṇāti paccavekkhaṇañāṇaṃ vā cetopariyādiñāṇaṃ vā maggaṃ ārammaṇaṃ kareyya, tīṇi jhānāni tathā appavattito namaggārammaṇā, sahajātahetuvasena pana siyā maggahetukā; vīriyajeṭṭhikāya vā vīmaṃsājeṭṭhikāya vā maggabhāvanāya maggādhipatino; chandacittajeṭṭhakakāle phalakāle ca navattabbā.
চতুত্থং ঝানন্তি ইধাপি কুসলতো তেরসসু চতুত্থজ্ঝানেসু সব্বত্থপাদকইদ্ধিৰিধদিব্বসোতদিব্বচক্খুযথাকম্মূপগঞাণচতুত্থঞ্চেৰ চতুব্বিধঞ্চ আরুপ্পচতুত্থং মগ্গারম্মণাদিভাৰেন ন ৰত্তব্বং। চেতোপরিযপুব্বেনিৰাসঅনাগতংসঞাণচতুত্থং পন মগ্গারম্মণং হোতি। ন ৰত্তব্বং মগ্গহেতুকং মগ্গাধিপতীতি ৰা; লোকুত্তরচতুত্থং মগ্গারম্মণং ন হোতি; মগ্গকালে পন সহজাতহেতুৰসেন মগ্গহেতুকং; ৰীরিযৰীমংসাজেট্ঠিকায মগ্গভাৰনায মগ্গাধিপতি; ছন্দচিত্তজেট্ঠিকায চেৰ মগ্গভাৰনায ফলকালে চ ন ৰত্তব্বং। কিরিযতোপি দ্ৰাদসসু ঝানেসু অযমেৰ নযো।
Catutthaṃ jhānanti idhāpi kusalato terasasu catutthajjhānesu sabbatthapādakaiddhividhadibbasotadibbacakkhuyathākammūpagañāṇacatutthañceva catubbidhañca āruppacatutthaṃ maggārammaṇādibhāvena na vattabbaṃ. Cetopariyapubbenivāsaanāgataṃsañāṇacatutthaṃ pana maggārammaṇaṃ hoti. Na vattabbaṃ maggahetukaṃ maggādhipatīti vā; lokuttaracatutthaṃ maggārammaṇaṃ na hoti; maggakāle pana sahajātahetuvasena maggahetukaṃ; vīriyavīmaṃsājeṭṭhikāya maggabhāvanāya maggādhipati; chandacittajeṭṭhikāya ceva maggabhāvanāya phalakāle ca na vattabbaṃ. Kiriyatopi dvādasasu jhānesu ayameva nayo.
তীণি ঝানানি ন ৰত্তব্বাতি অতীতাদীসু একধম্মম্পি আরব্ভ অপ্পৰত্তিতো নৰত্তব্বাতি ৰেদিতব্বা।
Tīṇi jhānāni na vattabbāti atītādīsu ekadhammampi ārabbha appavattito navattabbāti veditabbā.
চতুত্থং ঝানন্তি কুসলতো তেরসসু চতুত্থজ্ঝানেসু সব্বত্থপাদকচতুত্থং নৰত্তব্বারম্মণমেৰ। ইদ্ধিৰিধচতুত্থং কাযৰসেন চিত্তপরিণামনে সমাপত্তিচিত্তারম্মণত্তা অতীতারম্মণং; ‘‘অনাগতে ইমানি পুপ্ফানি মা মিলাযিংসু, দীপা মা নিব্বাযিংসু, একো অগ্গিক্খন্ধো সমুট্ঠাতু, পব্বতো সমুট্ঠাতূ’’তি অধিট্ঠানকালে অনাগতারম্মণং; চিত্তৰসেন কাযপরিণামনকালে কাযারম্মণত্তা পচ্চুপ্পন্নারম্মণং। দিব্বসোতঞাণচতুত্থং সদ্দারম্মণত্তা পচ্চুপ্পনারম্মণং। চেতোপরিযঞাণচতুত্থং অতীতে সত্তদিৰসব্ভন্তরে উপ্পজ্জিত্ৰা নিরুদ্ধচিত্তজাননকালে অতীতারম্মণং; অনাগতে সত্তদিৰসব্ভন্তরে উপ্পজ্জনকচিত্তজাননকালে অনাগতারম্মণং। ‘‘যথা ইমস্স ভোতো মনোসঙ্খারা পণিহিতা ইমস্স চিত্তস্স অনন্তরা অমুং নাম ৰিতক্কং ৰিতক্কেস্সতীতি। সো বহুঞ্চেপি আদিসতি, তথেৰ তং হোতি নো অঞ্ঞথা’’তি ইমিনা হি সুত্তেন (অ॰ নি॰ ৩.৬১) চেতোপরিযঞাণস্সেৰ পৰত্তি পকাসিতা। অদ্ধানপচ্চুপ্পন্নসন্ততিপচ্চুপ্পন্নৰসেনেৰ পচ্চুপ্পন্নং আরব্ভ পৰত্তিকালে পচ্চুপ্পন্নারম্মণং। ৰিত্থারকথা পনেত্থ হেট্ঠাঅট্ঠকথাকণ্ডৰণ্ণনাযং ৰুত্তনযেনেৰ ৰেদিতব্বা।
Catutthaṃ jhānanti kusalato terasasu catutthajjhānesu sabbatthapādakacatutthaṃ navattabbārammaṇameva. Iddhividhacatutthaṃ kāyavasena cittapariṇāmane samāpatticittārammaṇattā atītārammaṇaṃ; ‘‘anāgate imāni pupphāni mā milāyiṃsu, dīpā mā nibbāyiṃsu, eko aggikkhandho samuṭṭhātu, pabbato samuṭṭhātū’’ti adhiṭṭhānakāle anāgatārammaṇaṃ; cittavasena kāyapariṇāmanakāle kāyārammaṇattā paccuppannārammaṇaṃ. Dibbasotañāṇacatutthaṃ saddārammaṇattā paccuppanārammaṇaṃ. Cetopariyañāṇacatutthaṃ atīte sattadivasabbhantare uppajjitvā niruddhacittajānanakāle atītārammaṇaṃ; anāgate sattadivasabbhantare uppajjanakacittajānanakāle anāgatārammaṇaṃ. ‘‘Yathā imassa bhoto manosaṅkhārā paṇihitā imassa cittassa anantarā amuṃ nāma vitakkaṃ vitakkessatīti. So bahuñcepi ādisati, tatheva taṃ hoti no aññathā’’ti iminā hi suttena (a. ni. 3.61) cetopariyañāṇasseva pavatti pakāsitā. Addhānapaccuppannasantatipaccuppannavaseneva paccuppannaṃ ārabbha pavattikāle paccuppannārammaṇaṃ. Vitthārakathā panettha heṭṭhāaṭṭhakathākaṇḍavaṇṇanāyaṃ vuttanayeneva veditabbā.
পুব্বেনিৰাসঞাণচতুত্থং অতীতক্খন্ধানুস্সরণকালে অতীতারম্মণং, নামগোত্তানুস্সরণকালে নৰত্তব্বারম্মণং। দিব্বচক্খুঞাণচতুত্থং ৰণ্ণারম্মণত্তা পচ্চুপ্পন্নারম্মণং। যথাকম্মূপগঞাণচতুত্থং অতীতকম্মমেৰ আরম্মণং করোতীতি অতীতারম্মণং। অনাগতংসঞাণচতুত্থং অনাগতক্খন্ধানুস্সরণকালে অনাগতারম্মণং, নামগোত্তানুস্সরণকালে নৰত্তব্বারম্মণং। আকাসানঞ্চাযতনআকিঞ্চঞ্ঞাযতনচতুত্থং নৰত্তব্বারম্মণমেৰ। ৰিঞ্ঞাণঞ্চাযতননেৰসঞ্ঞানাসঞ্ঞাযতনচতুত্থং অতীতারম্মণমেৰ। লোকুত্তরচতুত্থং নৰত্তব্বারম্মণমেৰ। কিরিযতোপি দ্ৰাদসসু চতুত্থজ্ঝানেসু এসেৰ নযো।
Pubbenivāsañāṇacatutthaṃ atītakkhandhānussaraṇakāle atītārammaṇaṃ, nāmagottānussaraṇakāle navattabbārammaṇaṃ. Dibbacakkhuñāṇacatutthaṃ vaṇṇārammaṇattā paccuppannārammaṇaṃ. Yathākammūpagañāṇacatutthaṃ atītakammameva ārammaṇaṃ karotīti atītārammaṇaṃ. Anāgataṃsañāṇacatutthaṃ anāgatakkhandhānussaraṇakāle anāgatārammaṇaṃ, nāmagottānussaraṇakāle navattabbārammaṇaṃ. Ākāsānañcāyatanaākiñcaññāyatanacatutthaṃ navattabbārammaṇameva. Viññāṇañcāyatananevasaññānāsaññāyatanacatutthaṃ atītārammaṇameva. Lokuttaracatutthaṃ navattabbārammaṇameva. Kiriyatopi dvādasasu catutthajjhānesu eseva nayo.
তীণি ঝানানি বহিদ্ধারম্মণাতি অজ্ঝত্ততো বহিদ্ধাভূতং নিমিত্তং আরব্ভ পৰত্তিতো বহিদ্ধারম্মণা।
Tīṇijhānāni bahiddhārammaṇāti ajjhattato bahiddhābhūtaṃ nimittaṃ ārabbha pavattito bahiddhārammaṇā.
চতুত্থং ঝানন্তি ইধাপি কুসলতো তেরসসু চতুত্থজ্ঝানেসু সব্বত্থপাদকচতুত্থং বহিদ্ধারম্মণমেৰ।
Catutthaṃ jhānanti idhāpi kusalato terasasu catutthajjhānesu sabbatthapādakacatutthaṃ bahiddhārammaṇameva.
ইদ্ধিৰিধচতুত্থং কাযৰসেন চিত্তপরিণামনেপি চিত্তৰসেন কাযপরিণামনেপি অত্তনোৰ কাযচিত্তারম্মণত্তা অজ্ঝত্তারম্মণং; ‘‘বহিদ্ধা হত্থিম্পি দস্সেতী’’তিআদিনা নযেন পৰত্তকালে বহিদ্ধারম্মণং।
Iddhividhacatutthaṃ kāyavasena cittapariṇāmanepi cittavasena kāyapariṇāmanepi attanova kāyacittārammaṇattā ajjhattārammaṇaṃ; ‘‘bahiddhā hatthimpi dassetī’’tiādinā nayena pavattakāle bahiddhārammaṇaṃ.
দিব্বসোতঞাণচতুত্থং অত্তনো কুচ্ছিগতসদ্দারম্মণকালে অজ্ঝত্তারম্মণং, পরস্স সদ্দারম্মণকালে বহিদ্ধারম্মণং, উভযৰসেনাপি অজ্ঝত্তবহিদ্ধারম্মণং।
Dibbasotañāṇacatutthaṃ attano kucchigatasaddārammaṇakāle ajjhattārammaṇaṃ, parassa saddārammaṇakāle bahiddhārammaṇaṃ, ubhayavasenāpi ajjhattabahiddhārammaṇaṃ.
চেতোপরিযঞাণচতুত্থং বহিদ্ধারম্মণমেৰ।
Cetopariyañāṇacatutthaṃ bahiddhārammaṇameva.
পুব্বেনিৰাসঞাণচতুত্থং অত্তনো খন্ধানুস্সরণকালে অজ্ঝত্তারম্মণং, পরস্স খন্ধানঞ্চেৰ নামগোত্তস্স চ অনুস্সরণকালে বহিদ্ধারম্মণং।
Pubbenivāsañāṇacatutthaṃ attano khandhānussaraṇakāle ajjhattārammaṇaṃ, parassa khandhānañceva nāmagottassa ca anussaraṇakāle bahiddhārammaṇaṃ.
দিব্বচক্খুঞাণচতুত্থং অত্তনো রূপারম্মণকালে অজ্ঝত্তারম্মণং, পরস্স রূপারম্মণকালে বহিদ্ধারম্মণং, উভযৰসেনাপি অজ্ঝত্তবহিদ্ধারম্মণং।
Dibbacakkhuñāṇacatutthaṃ attano rūpārammaṇakāle ajjhattārammaṇaṃ, parassa rūpārammaṇakāle bahiddhārammaṇaṃ, ubhayavasenāpi ajjhattabahiddhārammaṇaṃ.
যথাকম্মূপগঞাণচতুত্থং অত্তনো কম্মজাননকালে অজ্ঝত্তারম্মণং, পরস্স কম্মজাননকালে বহিদ্ধারম্মণং, উভযৰসেনাপি অজ্ঝত্তবহিদ্ধারম্মণং।
Yathākammūpagañāṇacatutthaṃ attano kammajānanakāle ajjhattārammaṇaṃ, parassa kammajānanakāle bahiddhārammaṇaṃ, ubhayavasenāpi ajjhattabahiddhārammaṇaṃ.
অনাগতংসঞাণচতুত্থং অত্তনো অনাগতে নিব্বত্তিজাননকালে অজ্ঝত্তারম্মণং, পরস্স খন্ধানুস্সরণকালে চেৰ নামগোত্তানুস্সরণকালে চ বহিদ্ধারম্মণং, উভযৰসেনাপি অজ্ঝত্তবহিদ্ধারম্মণং।
Anāgataṃsañāṇacatutthaṃ attano anāgate nibbattijānanakāle ajjhattārammaṇaṃ, parassa khandhānussaraṇakāle ceva nāmagottānussaraṇakāle ca bahiddhārammaṇaṃ, ubhayavasenāpi ajjhattabahiddhārammaṇaṃ.
আকাসানঞ্চাযতনচতুত্থং বহিদ্ধারম্মণং। আকিঞ্চঞ্ঞাযতনচতুত্থং নৰত্তব্বারম্মণং। ৰিঞ্ঞাণঞ্চাযতননেৰসঞ্ঞানাসঞ্ঞাযতনচতুত্থং অজ্ঝত্তারম্মণং।
Ākāsānañcāyatanacatutthaṃ bahiddhārammaṇaṃ. Ākiñcaññāyatanacatutthaṃ navattabbārammaṇaṃ. Viññāṇañcāyatananevasaññānāsaññāyatanacatutthaṃ ajjhattārammaṇaṃ.
লোকুত্তরচতুত্থং বহিদ্ধারম্মণমেৰ। কিরিযতোপি দ্ৰাদসসু ঝানেসু অযমেৰ নযোতি।
Lokuttaracatutthaṃ bahiddhārammaṇameva. Kiriyatopi dvādasasu jhānesu ayameva nayoti.
ইমস্মিং পন ঝানৰিভঙ্গে সম্মাসম্বুদ্ধেন সুত্তন্তভাজনীযেপি লোকিযলোকুত্তরমিস্সকানেৰ ঝানানি কথিতানি; অভিধম্মভাজনীযেপি পঞ্হাপুচ্ছকেপি। তযোপি হি এতে নযা তেভূমকধম্মমিস্সকত্তা একপরিচ্ছেদা এৰ। এৰমযং ঝানৰিভঙ্গোপি তেপরিৰট্টং নীহরিত্ৰাৰ ভাজেত্ৰা দস্সিতোতি।
Imasmiṃ pana jhānavibhaṅge sammāsambuddhena suttantabhājanīyepi lokiyalokuttaramissakāneva jhānāni kathitāni; abhidhammabhājanīyepi pañhāpucchakepi. Tayopi hi ete nayā tebhūmakadhammamissakattā ekaparicchedā eva. Evamayaṃ jhānavibhaṅgopi teparivaṭṭaṃ nīharitvāva bhājetvā dassitoti.
সম্মোহৰিনোদনিযা ৰিভঙ্গট্ঠকথায
Sammohavinodaniyā vibhaṅgaṭṭhakathāya
ঝানৰিভঙ্গৰণ্ণনা নিট্ঠিতা।
Jhānavibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১২. ঝানৰিভঙ্গো • 12. Jhānavibhaṅgo
