| Library / Tipiṭaka / តិបិដក • Tipiṭaka / សម្មោហវិនោទនី-អដ្ឋកថា • Sammohavinodanī-aṭṭhakathā |
៣. បញ្ហាបុច្ឆកវណ្ណនា
3. Pañhāpucchakavaṇṇanā
៤៨២. បញ្ហាបុច្ឆកេ បាឡិអនុសារេនេវ ពោជ្ឈង្គានំ កុសលាទិភាវោ វេទិតព្ពោ។ អារម្មណត្តិកេសុ បន សព្ពេបេតេ អប្បមាណំ និព្ពានំ អារព្ភ បវត្តិតោ អប្បមាណារម្មណា ឯវ, ន មគ្គារម្មណា។ សហជាតហេតុវសេន បនេត្ថ កុសលា មគ្គហេតុកា, វីរិយំ វា វីមំសំ វា ជេដ្ឋកំ កត្វា មគ្គភាវនាកាលេ មគ្គាធិបតិនោ, ឆន្ទចិត្តជេដ្ឋិកាយ មគ្គភាវនាយ ន វត្តព្ពា មគ្គាធិបតិនោតិ, ផលកាលេបិ ន វត្តព្ពា ឯវ។
482. Pañhāpucchake pāḷianusāreneva bojjhaṅgānaṃ kusalādibhāvo veditabbo. Ārammaṇattikesu pana sabbepete appamāṇaṃ nibbānaṃ ārabbha pavattito appamāṇārammaṇā eva, na maggārammaṇā. Sahajātahetuvasena panettha kusalā maggahetukā, vīriyaṃ vā vīmaṃsaṃ vā jeṭṭhakaṃ katvā maggabhāvanākāle maggādhipatino, chandacittajeṭṭhikāya maggabhāvanāya na vattabbā maggādhipatinoti, phalakālepi na vattabbā eva.
អតីតាទីសុ ឯការម្មណភាវេនបិ ន វត្តព្ពា, និព្ពានស្ស បន ពហិទ្ធាធម្មត្តា ពហិទ្ធារម្មណា នាម ហោន្តីតិ។ ឯវមេតស្មិំ បញ្ហាបុច្ឆកេបិ និព្ពត្តិតលោកុត្តរាវ ពោជ្ឈង្គា កថិតា ។ សម្មាសម្ពុទ្ធេន ហិ សុត្តន្តភាជនីយស្សេវ បឋមនយស្មិំ លោកិយា, ទុតិយតតិយេសុ លោកិយលោកុត្តរមិស្សកា ពោជ្ឈង្គា កថិតា។ អភិធម្មភាជនីយស្ស បន ចតូសុបិ នយេសុ ឥមស្មិញ្ច បញ្ហាបុច្ឆកេ លោកុត្តរាយេវាតិ ឯវមយំ ពោជ្ឈង្គវិភង្គោបិ តេបរិវដ្ដំ នីហរិត្វាវ ភាជេត្វា ទស្សិតោតិ។
Atītādīsu ekārammaṇabhāvenapi na vattabbā, nibbānassa pana bahiddhādhammattā bahiddhārammaṇā nāma hontīti. Evametasmiṃ pañhāpucchakepi nibbattitalokuttarāva bojjhaṅgā kathitā . Sammāsambuddhena hi suttantabhājanīyasseva paṭhamanayasmiṃ lokiyā, dutiyatatiyesu lokiyalokuttaramissakā bojjhaṅgā kathitā. Abhidhammabhājanīyassa pana catūsupi nayesu imasmiñca pañhāpucchake lokuttarāyevāti evamayaṃ bojjhaṅgavibhaṅgopi teparivaṭṭaṃ nīharitvāva bhājetvā dassitoti.
សម្មោហវិនោទនិយា វិភង្គដ្ឋកថាយ
Sammohavinodaniyā vibhaṅgaṭṭhakathāya
ពោជ្ឈង្គវិភង្គវណ្ណនា និដ្ឋិតា។
Bojjhaṅgavibhaṅgavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / វិភង្គបាឡិ • Vibhaṅgapāḷi / ១០. ពោជ្ឈង្គវិភង្គោ • 10. Bojjhaṅgavibhaṅgo
