| Library / Tipiṭaka / တိပိဋက • Tipiṭaka / သမ္မောဟဝိနောဒနီ-အဋ္ဌကထာ • Sammohavinodanī-aṭṭhakathā |
၃. ပဉ္ဟာပုစ္ဆကဝဏ္ဏနာ
3. Pañhāpucchakavaṇṇanā
၃၈၆. ပဉ္ဟာပုစ္ဆကေ ပာဠိအနုသာရေနေဝ သတိပဋ္ဌာနာနံ ကုသလာဒိဘာဝော ဝေဒိတဗ္ဗော။ အာရမ္မဏတ္တိကေသု ပန သဗ္ဗာနိပိ ဧတာနိ အပ္ပမာဏံ နိဗ္ဗာနံ အာရဗ္ဘ ပဝတ္တနတော အပ္ပမာဏာရမ္မဏာနေဝ, န မဂ္ဂာရမ္မဏာနိ; သဟဇာတဟေတုဝသေန ပန မဂ္ဂဟေတုကာနိ; ဝီရိယံ ဝာ ဝီမံသံ ဝာ ဇေဋ္ဌကံ ကတ္ဝာ မဂ္ဂဘာဝနာကာလေ မဂ္ဂာဓိပတီနိ; ဆန္ဒစိတ္တဇေဋ္ဌကာယ မဂ္ဂဘာဝနာယ နဝတ္တဗ္ဗာနိ မဂ္ဂာဓိပတီနီတိ ဖလကာလေပိ နဝတ္တဗ္ဗာနေဝ; အတီတာဒီသု ဧကာရမ္မဏဘာဝေနပိ နဝတ္တဗ္ဗာနိ; နိဗ္ဗာနသ္သ ပန ဗဟိဒ္ဓာဓမ္မတ္တာ ဗဟိဒ္ဓာရမ္မဏာနိ နာမ ဟောန္တီတိ။ ဧဝမေတသ္မိံ ပဉ္ဟာပုစ္ဆကေ နိဗ္ဗတ္တိတလောကုတ္တရာနေဝ သတိပဋ္ဌာနာနိ ကထိတာနိ။ သမ္မာသမ္ဗုဒ္ဓေန ဟိ သုတ္တန္တဘာဇနီယသ္မိံယေဝ လောကိယလောကုတ္တရမိသ္သကာ သတိပဋ္ဌာနာ ကထိတာ; အဘိဓမ္မဘာဇနီယပဉ္ဟာပုစ္ဆကေသု ပန လောကုတ္တရာယေဝာတိ။ ဧဝမယံ သတိပဋ္ဌာနဝိဘင္ဂောပိ တေပရိဝဋ္ဋံ နီဟရိတ္ဝာ ဘာဇေတ္ဝာ ဒသ္သိတောတိ။
386. Pañhāpucchake pāḷianusāreneva satipaṭṭhānānaṃ kusalādibhāvo veditabbo. Ārammaṇattikesu pana sabbānipi etāni appamāṇaṃ nibbānaṃ ārabbha pavattanato appamāṇārammaṇāneva, na maggārammaṇāni; sahajātahetuvasena pana maggahetukāni; vīriyaṃ vā vīmaṃsaṃ vā jeṭṭhakaṃ katvā maggabhāvanākāle maggādhipatīni; chandacittajeṭṭhakāya maggabhāvanāya navattabbāni maggādhipatīnīti phalakālepi navattabbāneva; atītādīsu ekārammaṇabhāvenapi navattabbāni; nibbānassa pana bahiddhādhammattā bahiddhārammaṇāni nāma hontīti. Evametasmiṃ pañhāpucchake nibbattitalokuttarāneva satipaṭṭhānāni kathitāni. Sammāsambuddhena hi suttantabhājanīyasmiṃyeva lokiyalokuttaramissakā satipaṭṭhānā kathitā; abhidhammabhājanīyapañhāpucchakesu pana lokuttarāyevāti. Evamayaṃ satipaṭṭhānavibhaṅgopi teparivaṭṭaṃ nīharitvā bhājetvā dassitoti.
သမ္မောဟဝိနောဒနိယာ ဝိဘင္ဂဋ္ဌကထာယ
Sammohavinodaniyā vibhaṅgaṭṭhakathāya
သတိပဋ္ဌာနဝိဘင္ဂဝဏ္ဏနာ နိဋ္ဌိတာ။
Satipaṭṭhānavibhaṅgavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ဝိဘင္ဂပာဠိ • Vibhaṅgapāḷi / ၇. သတိပဋ္ဌာနဝိဘင္ဂော • 7. Satipaṭṭhānavibhaṅgo
