| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༥. པཎིཧིཏཨཙྪཝགྒོ
5. Paṇihitaacchavaggo
༤༡. ‘‘སེཡྻཐཱཔི , བྷིཀྑཝེ, སཱལིསཱུཀཾ ཝཱ ཡཝསཱུཀཾ ཝཱ མིཙྪཱཔཎིཧིཏཾ ཧཏྠེན ཝཱ པཱདེན ཝཱ ཨཀྐནྟཾ ཧཏྠཾ ཝཱ པཱདཾ ཝཱ བྷེཙྪཏི 1 ལོཧིཏཾ ཝཱ ཨུཔྤཱདེསྶཏཱིཏི ནེཏཾ ཋཱནཾ ཝིཛྫཏི། ཏཾ ཀིསྶ ཧེཏུ? མིཙྪཱཔཎིཧིཏཏྟཱ, བྷིཀྑཝེ, སཱུཀསྶ། ཨེཝམེཝཾ ཁོ, བྷིཀྑཝེ, སོ ཝཏ བྷིཀྑུ མིཙྪཱཔཎིཧིཏེན ཙིཏྟེན ཨཝིཛྫཾ བྷེཙྪཏི, ཝིཛྫཾ ཨུཔྤཱདེསྶཏི, ནིབྦཱནཾ སཙྪིཀརིསྶཏཱིཏི ནེཏཾ ཋཱནཾ ཝིཛྫཏི། ཏཾ ཀིསྶ ཧེཏུ? མིཙྪཱཔཎིཧིཏཏྟཱ, བྷིཀྑཝེ, ཙིཏྟསྶཱ’’ཏི། པཋམཾ།
41. ‘‘Seyyathāpi , bhikkhave, sālisūkaṃ vā yavasūkaṃ vā micchāpaṇihitaṃ hatthena vā pādena vā akkantaṃ hatthaṃ vā pādaṃ vā bhecchati 2 lohitaṃ vā uppādessatīti netaṃ ṭhānaṃ vijjati. Taṃ kissa hetu? Micchāpaṇihitattā, bhikkhave, sūkassa. Evamevaṃ kho, bhikkhave, so vata bhikkhu micchāpaṇihitena cittena avijjaṃ bhecchati, vijjaṃ uppādessati, nibbānaṃ sacchikarissatīti netaṃ ṭhānaṃ vijjati. Taṃ kissa hetu? Micchāpaṇihitattā, bhikkhave, cittassā’’ti. Paṭhamaṃ.
༤༢. ‘‘སེཡྻཐཱཔི, བྷིཀྑཝེ, སཱལིསཱུཀཾ ཝཱ ཡཝསཱུཀཾ ཝཱ སམྨཱཔཎིཧིཏཾ ཧཏྠེན ཝཱ པཱདེན ཝཱ ཨཀྐནྟཾ ཧཏྠཾ ཝཱ པཱདཾ ཝཱ བྷེཙྪཏི ལོཧིཏཾ ཝཱ ཨུཔྤཱདེསྶཏཱིཏི ཋཱནམེཏཾ ཝིཛྫཏི། ཏཾ ཀིསྶ ཧེཏུ? སམྨཱཔཎིཧིཏཏྟཱ, བྷིཀྑཝེ, སཱུཀསྶ། ཨེཝམེཝཾ ཁོ, བྷིཀྑཝེ, སོ ཝཏ བྷིཀྑུ སམྨཱཔཎིཧིཏེན ཙིཏྟེན ཨཝིཛྫཾ བྷེཙྪཏི, ཝིཛྫཾ ཨུཔྤཱདེསྶཏི, ནིབྦཱནཾ སཙྪིཀརིསྶཏཱིཏི ཋཱནམེཏཾ ཝིཛྫཏི། ཏཾ ཀིསྶ ཧེཏུ? སམྨཱཔཎིཧིཏཏྟཱ, བྷིཀྑཝེ, ཙིཏྟསྶཱ’’ཏི། དུཏིཡཾ།
42. ‘‘Seyyathāpi, bhikkhave, sālisūkaṃ vā yavasūkaṃ vā sammāpaṇihitaṃ hatthena vā pādena vā akkantaṃ hatthaṃ vā pādaṃ vā bhecchati lohitaṃ vā uppādessatīti ṭhānametaṃ vijjati. Taṃ kissa hetu? Sammāpaṇihitattā, bhikkhave, sūkassa. Evamevaṃ kho, bhikkhave, so vata bhikkhu sammāpaṇihitena cittena avijjaṃ bhecchati, vijjaṃ uppādessati, nibbānaṃ sacchikarissatīti ṭhānametaṃ vijjati. Taṃ kissa hetu? Sammāpaṇihitattā, bhikkhave, cittassā’’ti. Dutiyaṃ.
༤༣. ‘‘ཨིདྷཱཧཾ 3, བྷིཀྑཝེ, ཨེཀཙྩཾ པུགྒལཾ པདུཊྛཙིཏྟཾ ཨེཝཾ ཙེཏསཱ ཙེཏོ པརིཙྩ པཛཱནཱམི – ‘ཨིམམྷི ཙེ ཨཡཾ སམཡེ པུགྒལོ ཀཱལཾ ཀརེཡྻ, ཡཐཱབྷཏཾ ནིཀྑིཏྟོ ཨེཝཾ ནིརཡེ’། ཏཾ ཀིསྶ ཧེཏུ? ཙིཏྟཾ ཧིསྶ , བྷིཀྑཝེ, པདུཊྛཾ། ‘‘ཙེཏོཔདོསཧེཏུ པན, བྷིཀྑཝེ, ཨེཝམིདྷེཀཙྩེ སཏྟཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫནྟཱི’’ཏི། ཏཏིཡཾ།
43. ‘‘Idhāhaṃ 4, bhikkhave, ekaccaṃ puggalaṃ paduṭṭhacittaṃ evaṃ cetasā ceto paricca pajānāmi – ‘imamhi ce ayaṃ samaye puggalo kālaṃ kareyya, yathābhataṃ nikkhitto evaṃ niraye’. Taṃ kissa hetu? Cittaṃ hissa , bhikkhave, paduṭṭhaṃ. ‘‘Cetopadosahetu pana, bhikkhave, evamidhekacce sattā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjantī’’ti. Tatiyaṃ.
༤༤. ‘‘ཨིདྷཱཧཾ, བྷིཀྑཝེ, ཨེཀཙྩཾ པུགྒལཾ པསནྣཙིཏྟཾ ཨེཝཾ ཙེཏསཱ ཙེཏོ པརིཙྩ པཛཱནཱམི – ‘ཨིམམྷི ཙེ ཨཡཾ སམཡེ པུགྒལོ ཀཱལཾ ཀརེཡྻ, ཡཐཱབྷཏཾ ནིཀྑིཏྟོ ཨེཝཾ སགྒེ’། ཏཾ ཀིསྶ ཧེཏུ? ཙིཏྟཾ ཧིསྶ, བྷིཀྑཝེ, པསནྣཾ། ‘‘ཙེཏོཔསཱདཧེཏུ པན, བྷིཀྑཝེ, ཨེཝམིདྷེཀཙྩེ སཏྟཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫནྟཱི’’ཏི། ཙཏུཏྠཾ།
44. ‘‘Idhāhaṃ, bhikkhave, ekaccaṃ puggalaṃ pasannacittaṃ evaṃ cetasā ceto paricca pajānāmi – ‘imamhi ce ayaṃ samaye puggalo kālaṃ kareyya, yathābhataṃ nikkhitto evaṃ sagge’. Taṃ kissa hetu? Cittaṃ hissa, bhikkhave, pasannaṃ. ‘‘Cetopasādahetu pana, bhikkhave, evamidhekacce sattā kāyassa bhedā paraṃ maraṇā sugatiṃ saggaṃ lokaṃ upapajjantī’’ti. Catutthaṃ.
༤༥. ‘‘སེཡྻཐཱཔི , བྷིཀྑཝེ, ཨུདཀརཧདོ ཨཱཝིལོ ལུལི༹ཏོ ཀལལཱིབྷཱུཏོ ཏཏྠ ཙཀྑུམཱ པུརིསོ ཏཱིརེ ཋིཏོ ན པསྶེཡྻ སིཔྤིསམྦུཀམྤི 5 སཀྑརཀཋལམྤི མཙྪགུམྦམྤི ཙརནྟམྤི ཏིཊྛནྟམྤི། ཏཾ ཀིསྶ ཧེཏུ? ཨཱཝིལཏྟཱ, བྷིཀྑཝེ, ཨུདཀསྶ། ཨེཝམེཝཾ ཁོ, བྷིཀྑཝེ, སོ ཝཏ བྷིཀྑུ ཨཱཝིལེན ཙིཏྟེན ཨཏྟཏྠཾ ཝཱ ཉསྶཏི པརཏྠཾ ཝཱ ཉསྶཏི ཨུབྷཡཏྠཾ ཝཱ ཉསྶཏི ཨུཏྟརིཾ ཝཱ མནུསྶདྷམྨཱ ཨལམརིཡཉཱཎདསྶནཝིསེསཾ སཙྪིཀརིསྶཏཱིཏི ནེཏཾ ཋཱནཾ ཝིཛྫཏི། ཏཾ ཀིསྶ ཧེཏུ? ཨཱཝིལཏྟཱ, བྷིཀྑཝེ, ཙིཏྟསྶཱ’’ཏི། པཉྩམཾ།
45. ‘‘Seyyathāpi , bhikkhave, udakarahado āvilo luḷito kalalībhūto tattha cakkhumā puriso tīre ṭhito na passeyya sippisambukampi 6 sakkharakaṭhalampi macchagumbampi carantampi tiṭṭhantampi. Taṃ kissa hetu? Āvilattā, bhikkhave, udakassa. Evamevaṃ kho, bhikkhave, so vata bhikkhu āvilena cittena attatthaṃ vā ñassati paratthaṃ vā ñassati ubhayatthaṃ vā ñassati uttariṃ vā manussadhammā alamariyañāṇadassanavisesaṃ sacchikarissatīti netaṃ ṭhānaṃ vijjati. Taṃ kissa hetu? Āvilattā, bhikkhave, cittassā’’ti. Pañcamaṃ.
༤༦. ‘‘སེཡྻཐཱཔི, བྷིཀྑཝེ, ཨུདཀརཧདོ ཨཙྪོ ཝིཔྤསནྣོ ཨནཱཝིལོ ཏཏྠ ཙཀྑུམཱ པུརིསོ ཏཱིརེ ཋིཏོ པསྶེཡྻ སིཔྤིསམྦུཀམྤི སཀྑརཀཋལམྤི མཙྪགུམྦམྤི ཙརནྟམྤི ཏིཊྛནྟམྤི། ཏཾ ཀིསྶ ཧེཏུ? ཨནཱཝིལཏྟཱ, བྷིཀྑཝེ, ཨུདཀསྶ། ཨེཝམེཝཾ ཁོ, བྷིཀྑཝེ, སོ ཝཏ བྷིཀྑུ ཨནཱཝིལེན ཙིཏྟེན ཨཏྟཏྠཾ ཝཱ ཉསྶཏི པརཏྠཾ ཝཱ ཉསྶཏི ཨུབྷཡཏྠཾ ཝཱ ཉསྶཏི ཨུཏྟརིཾ ཝཱ མནུསྶདྷམྨཱ ཨལམརིཡཉཱཎདསྶནཝིསེསཾ སཙྪིཀརིསྶཏཱིཏི ཋཱནམེཏཾ ཝིཛྫཏི། ཏཾ ཀིསྶ ཧེཏུ? ཨནཱཝིལཏྟཱ, བྷིཀྑཝེ, ཙིཏྟསྶཱ’’ཏི། ཚཊྛཾ།
46. ‘‘Seyyathāpi, bhikkhave, udakarahado accho vippasanno anāvilo tattha cakkhumā puriso tīre ṭhito passeyya sippisambukampi sakkharakaṭhalampi macchagumbampi carantampi tiṭṭhantampi. Taṃ kissa hetu? Anāvilattā, bhikkhave, udakassa. Evamevaṃ kho, bhikkhave, so vata bhikkhu anāvilena cittena attatthaṃ vā ñassati paratthaṃ vā ñassati ubhayatthaṃ vā ñassati uttariṃ vā manussadhammā alamariyañāṇadassanavisesaṃ sacchikarissatīti ṭhānametaṃ vijjati. Taṃ kissa hetu? Anāvilattā, bhikkhave, cittassā’’ti. Chaṭṭhaṃ.
༤༧. ‘‘སེཡྻཐཱཔི, བྷིཀྑཝེ, ཡཱནི ཀཱནིཙི རུཀྑཛཱཏཱནཾ ཕནྡནོ ཏེསཾ ཨགྒམཀྑཱཡཏི ཡདིདཾ མུདུཏཱཡ ཙེཝ ཀམྨཉྙཏཱཡ ཙ། ཨེཝམེཝཾ ཁོ ཨཧཾ, བྷིཀྑཝེ , ནཱཉྙཾ ཨེཀདྷམྨམྤི སམནུཔསྶཱམི ཡཾ ཨེཝཾ བྷཱཝིཏཾ བཧུལཱིཀཏཾ མུདུ ཙ ཧོཏི ཀམྨཉྙཉྩ ཡཐཡིདཾ ཙིཏྟཾ། ཙིཏྟཾ, བྷིཀྑཝེ, བྷཱཝིཏཾ བཧུལཱིཀཏཾ མུདུ ཙ ཧོཏི ཀམྨཉྙཉྩ ཧོཏཱི’’ཏི། སཏྟམཾ།
47. ‘‘Seyyathāpi, bhikkhave, yāni kānici rukkhajātānaṃ phandano tesaṃ aggamakkhāyati yadidaṃ mudutāya ceva kammaññatāya ca. Evamevaṃ kho ahaṃ, bhikkhave , nāññaṃ ekadhammampi samanupassāmi yaṃ evaṃ bhāvitaṃ bahulīkataṃ mudu ca hoti kammaññañca yathayidaṃ cittaṃ. Cittaṃ, bhikkhave, bhāvitaṃ bahulīkataṃ mudu ca hoti kammaññañca hotī’’ti. Sattamaṃ.
༤༨. ‘‘ནཱཧཾ , བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡཾ ཨེཝཾ ལཧུཔརིཝཏྟཾ ཡཐཡིདཾ ཙིཏྟཾ། ཡཱཝཉྩིདཾ, བྷིཀྑཝེ, ཨུཔམཱཔི ན སུཀརཱ ཡཱཝ ལཧུཔརིཝཏྟཾ ཙིཏྟ’’ནྟི། ཨཊྛམཾ།
48. ‘‘Nāhaṃ , bhikkhave, aññaṃ ekadhammampi samanupassāmi yaṃ evaṃ lahuparivattaṃ yathayidaṃ cittaṃ. Yāvañcidaṃ, bhikkhave, upamāpi na sukarā yāva lahuparivattaṃ citta’’nti. Aṭṭhamaṃ.
༤༩. ‘‘པབྷསྶརམིདཾ, བྷིཀྑཝེ, ཙིཏྟཾ། ཏཉྩ ཁོ ཨཱགནྟུཀེཧི ཨུཔཀྐིལེསེཧི ཨུཔཀྐིལིཊྛ’’ནྟི། ནཝམཾ།
49. ‘‘Pabhassaramidaṃ, bhikkhave, cittaṃ. Tañca kho āgantukehi upakkilesehi upakkiliṭṭha’’nti. Navamaṃ.
༥༠. ‘‘པབྷསྶརམིདཾ, བྷིཀྑཝེ, ཙིཏྟཾ། ཏཉྩ ཁོ ཨཱགནྟུཀེཧི ཨུཔཀྐིལེསེཧི ཝིཔྤམུཏྟ’’ནྟི། དསམཾ།
50. ‘‘Pabhassaramidaṃ, bhikkhave, cittaṃ. Tañca kho āgantukehi upakkilesehi vippamutta’’nti. Dasamaṃ.
པཎིཧིཏཨཙྪཝགྒོ པཉྩམོ།
Paṇihitaacchavaggo pañcamo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥. པཎིཧིཏཨཙྪཝགྒཝཎྞནཱ • 5. Paṇihitaacchavaggavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༥. པཎིཧིཏཨཙྪཝགྒཝཎྞནཱ • 5. Paṇihitaacchavaggavaṇṇanā
