| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৯. পণীতভোজনসিক্খাপদং
9. Paṇītabhojanasikkhāpadaṃ
২৫৭. নৰমে পকট্ঠভাৰং নীতন্তি পণীতন্তি ৰুত্তে পণীতসদ্দো উত্তমত্থোতি আহ ‘‘উত্তমভোজনানী’’তি। সম্পন্নো নাম ন মধুরগুণো, অথ খো মধুরগুণযুত্তং ভোজনমেৰাতি আহ ‘‘সম্পত্তিযুত্ত’’ন্তি। কস্সাতি করণত্থে চেতং সামিৰচনং, কেনাতি হি অত্থো। ‘‘সুরস’’ন্তিইমিনা সাদীযতি অস্সাদীযতীতি সাদূতি ৰচনত্থস্স সরূপং দস্সেতি।
257. Navame pakaṭṭhabhāvaṃ nītanti paṇītanti vutte paṇītasaddo uttamatthoti āha ‘‘uttamabhojanānī’’ti. Sampanno nāma na madhuraguṇo, atha kho madhuraguṇayuttaṃ bhojanamevāti āha ‘‘sampattiyutta’’nti. Kassāti karaṇatthe cetaṃ sāmivacanaṃ, kenāti hi attho. ‘‘Surasa’’ntiiminā sādīyati assādīyatīti sādūti vacanatthassa sarūpaṃ dasseti.
২৫৯. ‘‘যো পন…পে॰… ভুঞ্জেয্যা’’তি এত্থ ৰিনিচ্ছযো এৰং ৰেদিতব্বোতি যোজনা। সুদ্ধানীতি ওদনেন অসংসট্ঠানি। ওদনসংসট্ঠানি সব্বিআদীনীতি সম্বন্ধো। এত্থাতি ইমস্মিং সিক্খাপদে। হীতি সচ্চং। ‘‘পণীতসংসট্ঠানী’’তিইমিনা পণীতেহি সব্বিআদীহি সংসট্ঠানি ভোজনানি পণীতভোজনানীতি অত্থং দস্সেতি। ‘‘সত্তধঞ্ঞনিব্বত্তানী’’তি ইমিনা ভোজনানং সরূপং দস্সেতি।
259. ‘‘Yo pana…pe… bhuñjeyyā’’ti ettha vinicchayo evaṃ veditabboti yojanā. Suddhānīti odanena asaṃsaṭṭhāni. Odanasaṃsaṭṭhāni sabbiādīnīti sambandho. Etthāti imasmiṃ sikkhāpade. Hīti saccaṃ. ‘‘Paṇītasaṃsaṭṭhānī’’tiiminā paṇītehi sabbiādīhi saṃsaṭṭhāni bhojanāni paṇītabhojanānīti atthaṃ dasseti. ‘‘Sattadhaññanibbattānī’’ti iminā bhojanānaṃ sarūpaṃ dasseti.
‘‘সব্বিনা ভত্ত’’ন্তিআদীনং পঞ্চন্নং ৰিকপ্পানং মজ্ঝে তীসুপি ৰিকপ্পেসু ‘‘ভত্ত’’ন্তি যোজেতব্বং। এৰং ৰাক্যং কত্ৰা ৰিঞ্ঞাপনে আপত্তিং দস্সেত্ৰা সমাসং কত্ৰা ৰিঞ্ঞাপনে তং দস্সেন্তো আহ ‘‘সব্বিভত্তং দেহী’’তিআদি।
‘‘Sabbinā bhatta’’ntiādīnaṃ pañcannaṃ vikappānaṃ majjhe tīsupi vikappesu ‘‘bhatta’’nti yojetabbaṃ. Evaṃ vākyaṃ katvā viññāpane āpattiṃ dassetvā samāsaṃ katvā viññāpane taṃ dassento āha ‘‘sabbibhattaṃ dehī’’tiādi.
ইতোতি গাৰিতো লদ্ধেনাতি সম্বন্ধো। ৰিসঙ্কেতন্তি সঙ্কেততো ঞাপিততো ৰিগতং ৰিরহিতন্তি অত্থো। হীতি সচ্চং। ইমিনা ৰিসঙ্কেতস্স গুণদোসং দস্সেতি।
Itoti gāvito laddhenāti sambandho. Visaṅketanti saṅketato ñāpitato vigataṃ virahitanti attho. Hīti saccaṃ. Iminā visaṅketassa guṇadosaṃ dasseti.
কপ্পিযসব্বিনা দেহীতি কপ্পিযসব্বিনা সংসট্ঠং ভত্তং দেহীতি যোজনা। এসেৰ নযো সেসেসুপি। যেন যেনাতি যেন যেন সব্বিআদিনা। তস্মিং তস্সাতি এত্থাপি ৰিচ্ছাৰসেন অত্থো দট্ঠব্বো। পাল়িযং আগতসব্বি নাম গোসব্বি, অজিকাসব্বি, মহিংসসব্বি, যেসং মংসং কপ্পতি, তেসং সব্বি চ। নৰনীতং নাম এৰমেৰ। তেলং নাম তিলতেলং, সাসপতেলং, মধুকতেলং, এরণ্ডতেলং, ৰসাতেলঞ্চ। মধু নাম মক্খিকামধু। ফাণিতং নাম উচ্ছুম্হা নিব্বত্তং। মচ্ছো নাম উদকচরো। পাল়িঅনাগতো মচ্ছো নাম নত্থি। মংসং নাম যেসং মংসং কপ্পতি, তেসং মংসং। খীরদধীনি সব্বিসদিসানেৰ। ৰুত্তং যথা এৰং ‘‘নৰনীতভত্তং দেহী’’তিআদীসুপি সূপোদনৰিঞ্ঞত্তিদুক্কটমেৰ হোতীতি যোজনা। হীতি সচ্চং। সো চাতি সো চত্থো। তত্থাতি তস্মিং অত্থে। কিং পযোজনং। নত্থেৰ পযোজনন্তি অধিপ্পাযো।
Kappiyasabbinā dehīti kappiyasabbinā saṃsaṭṭhaṃ bhattaṃ dehīti yojanā. Eseva nayo sesesupi. Yena yenāti yena yena sabbiādinā. Tasmiṃ tassāti etthāpi vicchāvasena attho daṭṭhabbo. Pāḷiyaṃ āgatasabbi nāma gosabbi, ajikāsabbi, mahiṃsasabbi, yesaṃ maṃsaṃ kappati, tesaṃ sabbi ca. Navanītaṃ nāma evameva. Telaṃ nāma tilatelaṃ, sāsapatelaṃ, madhukatelaṃ, eraṇḍatelaṃ, vasātelañca. Madhu nāma makkhikāmadhu. Phāṇitaṃ nāma ucchumhā nibbattaṃ. Maccho nāma udakacaro. Pāḷianāgato maccho nāma natthi. Maṃsaṃ nāma yesaṃ maṃsaṃ kappati, tesaṃ maṃsaṃ. Khīradadhīni sabbisadisāneva. Vuttaṃ yathā evaṃ ‘‘navanītabhattaṃ dehī’’tiādīsupi sūpodanaviññattidukkaṭameva hotīti yojanā. Hīti saccaṃ. So cāti so cattho. Tatthāti tasmiṃ atthe. Kiṃ payojanaṃ. Nattheva payojananti adhippāyo.
পটিলদ্ধং ভোজনন্তি সম্বন্ধো। একরসন্তি এককিচ্চং। ততোতি নৰপণীতভোজনতো নীহরিত্ৰাতি সম্বন্ধো।
Paṭiladdhaṃ bhojananti sambandho. Ekarasanti ekakiccaṃ. Tatoti navapaṇītabhojanato nīharitvāti sambandho.
সব্বানীতি নৰ পাচিত্তিযানি সন্ধায ৰুত্তং।
Sabbānīti nava pācittiyāni sandhāya vuttaṃ.
২৬১. উভযেসম্পীতি ভিক্খুভিক্খুনীনম্পি। সব্বীতি চেত্থ যো নং পরিভুঞ্জতি, তস্স বলাযুৰড্ঢনত্থং সব্বতি গচ্ছতি পৰত্ততীতি সব্বি, ঘতং। ততিযক্খরেনেৰ সজ্ঝাযিতব্বং লিখিতব্বঞ্চ । কস্মা? ততিযক্খরট্ঠানেযেৰ সব্ব গতিযন্তি গতিঅত্থস্স সব্বধাতুস্স ধাতুপাঠেসু আগতত্তাতি। নৰমং।
261.Ubhayesampīti bhikkhubhikkhunīnampi. Sabbīti cettha yo naṃ paribhuñjati, tassa balāyuvaḍḍhanatthaṃ sabbati gacchati pavattatīti sabbi, ghataṃ. Tatiyakkhareneva sajjhāyitabbaṃ likhitabbañca . Kasmā? Tatiyakkharaṭṭhāneyeva sabba gatiyanti gatiatthassa sabbadhātussa dhātupāṭhesu āgatattāti. Navamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. ভোজনৰগ্গো • 4. Bhojanavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৯. পণীতভোজনসিক্খাপদৰণ্ণনা • 9. Paṇītabhojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৯. পণীতভোজনসিক্খাপদৰণ্ণনা • 9. Paṇītabhojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৯. পণীতভোজনসিক্খাপদৰণ্ণনা • 9. Paṇītabhojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৯. পণীতভোজনসিক্খাপদৰণ্ণনা • 9. Paṇītabhojanasikkhāpadavaṇṇanā
