| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
9. бан̣ийд̇абхож̇анасигкаабад̣̇аван̣н̣анаа
9. Paṇītabhojanasikkhāpadavaṇṇanā
‘‘бан̣ийд̇абхож̇анааний’’д̇и ид̣̇ам̣ маж̇жхз бад̣̇алобам̣ гад̇ваа нид̣̇д̣̇идтанд̇и ааха ‘‘бан̣ийд̇асам̣садтааний’’д̇иаад̣̇и. саб̣б̣оби ‘‘од̣̇аго’’д̇и вуд̇д̇алагкан̣о мажчод̇и ‘‘мажчо наама од̣̇аго вужжад̇ий’’д̇и (баажи. 260) звам̣ вибхан̇г̇з вуд̇д̇алагкан̣о, саб̣б̣оби мажчо зва. яо гожи уд̣̇агз ж̇аад̇о мажчо наамаад̇и вуд̇д̇ам̣ ход̇и. махаанаамасигкаабад̣̇знаад̇и –
‘‘Paṇītabhojanānī’’ti idaṃ majjhe padalopaṃ katvā niddiṭṭhanti āha ‘‘paṇītasaṃsaṭṭhānī’’tiādi. Sabbopi ‘‘odako’’ti vuttalakkhaṇo macchoti ‘‘maccho nāma odako vuccatī’’ti (pāci. 260) evaṃ vibhaṅge vuttalakkhaṇo, sabbopi maccho eva. Yo koci udake jāto maccho nāmāti vuttaṃ hoti. Mahānāmasikkhāpadenāti –
‘‘аг̇илаанзна бхигкунаа жад̇умаасабажжаяабавааран̣аа саад̣̇ид̇аб̣б̣аа ан̃н̃ад̇ра бунабавааран̣ааяа ан̃н̃ад̇ра нижжабавааран̣ааяа. д̇ад̇о жз уд̇д̇ари саад̣̇иязяяа, баажид̇д̇ияа’’нд̇и –
‘‘Agilānena bhikkhunā catumāsapaccayapavāraṇā sāditabbā aññatra punapavāraṇāya aññatra niccapavāraṇāya. Tato ce uttari sādiyeyya, pācittiya’’nti –
иминаа сигкаабад̣̇зна (баажи. 306). зд̇т̇а хи сан̇гхавасзна г̇илаанабажжаяабавааран̣ааяа баваарид̇адтаанз сажз д̇ад̇т̇а рад̇д̇ийхи ваа бхзсаж̇ж̇зхи ваа барижчзд̣̇о гад̇о ход̇и ‘‘зд̇д̇игааязва рад̇д̇ияо, зд̇д̇агаани ваа бхзсаж̇ж̇аани вин̃н̃аабзд̇аб̣б̣ааний’’д̇и, д̇ад̇о рад̇д̇ибарияанд̇ад̇о ваа бхзсаж̇ж̇абарияанд̇ад̇о ваа уд̇д̇ари набхзсаж̇ж̇агаран̣ийязна ваа бхзсаж̇ж̇ам̣, ан̃н̃абхзсаж̇ж̇агаран̣ийязна ваа ан̃н̃ам̣ бхзсаж̇ж̇ам̣ вин̃н̃аабзнд̇асса баажид̇д̇ияам̣ вуд̇д̇ам̣. д̇асмаа аг̇илаано г̇илаанасан̃н̃ийби худ̇ваа бан̃жа бхзсаж̇ж̇аани вин̃н̃аабзнд̇о набхзсаж̇ж̇агаран̣ийязна бхзсаж̇ж̇ам̣ вин̃н̃аабзнд̇о наама ход̇ийд̇и ‘‘махаанаамасигкаабад̣̇зна гаарзд̇аб̣б̣о’’д̇и вуд̇д̇ам̣.
Iminā sikkhāpadena (pāci. 306). Ettha hi saṅghavasena gilānapaccayapavāraṇāya pavāritaṭṭhāne sace tattha rattīhi vā bhesajjehi vā paricchedo kato hoti ‘‘ettikāyeva rattiyo, ettakāni vā bhesajjāni viññāpetabbānī’’ti, tato rattipariyantato vā bhesajjapariyantato vā uttari nabhesajjakaraṇīyena vā bhesajjaṃ, aññabhesajjakaraṇīyena vā aññaṃ bhesajjaṃ viññāpentassa pācittiyaṃ vuttaṃ. Tasmā agilāno gilānasaññīpi hutvā pañca bhesajjāni viññāpento nabhesajjakaraṇīyena bhesajjaṃ viññāpento nāma hotīti ‘‘mahānāmasikkhāpadena kāretabbo’’ti vuttaṃ.
яо бана набхзсаж̇ж̇ад̇т̇ааяа вин̃н̃аабзд̇и, ат̇а ко гзвалам̣ ад̇д̇ано бхун̃ж̇анад̇т̇ааяа, со суубод̣̇анавин̃н̃ад̇д̇ияааязва гаарзд̇аб̣б̣о. вуд̇д̇ан̃хзд̇ам̣ саманд̇абаасаад̣̇игааяам̣ ‘‘суд̣̇д̇хаани саббиаад̣̇ийни вин̃н̃аабзд̇ваа бхун̃ж̇анд̇о баажид̇д̇ияам̣ наабаж̇ж̇ад̇и , сзкиязсу суубод̣̇анавин̃н̃ад̇д̇ид̣̇уггадам̣ аабаж̇ж̇ад̇ий’’д̇и (баажи. адта. 259). суубод̣̇анавин̃н̃ад̇д̇ияаа гаарзд̇аб̣б̣од̇и ‘‘на суубам̣ ваа од̣̇анам̣ ваа аг̇илаано’’д̇иаад̣̇инаа (баажи. 613) сигкаабад̣̇зна гаарзд̇аб̣б̣о, д̣̇уггадзна гаарзд̇аб̣б̣од̇и вуд̇д̇ам̣ ход̇и. иминаад̇и иминаа бан̣ийд̇абхож̇анасигкаабад̣̇зна.
Yo pana nabhesajjatthāya viññāpeti, atha kho kevalaṃ attano bhuñjanatthāya, so sūpodanaviññattiyāyeva kāretabbo. Vuttañhetaṃ samantapāsādikāyaṃ ‘‘suddhāni sappiādīni viññāpetvā bhuñjanto pācittiyaṃ nāpajjati , sekhiyesu sūpodanaviññattidukkaṭaṃ āpajjatī’’ti (pāci. aṭṭha. 259). Sūpodanaviññattiyā kāretabboti ‘‘na sūpaṃ vā odanaṃ vā agilāno’’tiādinā (pāci. 613) sikkhāpadena kāretabbo, dukkaṭena kāretabboti vuttaṃ hoti. Imināti iminā paṇītabhojanasikkhāpadena.
‘‘саббибхад̇д̇ам̣ д̣̇зхий’’д̇и вуд̇д̇з гим̣ ход̇ийд̇и ааха ‘‘саббибхад̇д̇ам̣ ‘д̣̇зхий’д̇и вуд̇д̇з банаа’’д̇иаад̣̇и. суубод̣̇анавин̃н̃ад̇д̇ияаа д̣̇уггадамзва ход̇ийд̇и самб̣анд̇хо. гасмаад̇и ааха ‘‘яасмаа’’д̇иаад̣̇и. ат̇а яат̇аа ‘‘бан̣ийд̇абхож̇анааний’’д̇и, звам̣ ‘‘саббибхад̇д̇а’’нд̇и ид̣̇амби гасмаа на вин̃н̃ааяад̇ийд̇и жз? анзганд̇игад̇д̇аа. д̇ат̇аа хи ‘‘бан̣ийд̇абхож̇анааний’’д̇и вуд̇д̇з ‘‘бан̣ийд̇асам̣садтаани бхож̇анаани бан̣ийд̇абхож̇анааний’’д̇и аяамад̇т̇о зганд̇ад̇о бан̃н̃ааяад̇и, ‘‘саббибхад̇д̇а’’нд̇и вуд̇д̇з бана ‘‘саббимаяам̣ бхад̇д̇ам̣ саббибхад̇д̇а’’нд̇иби вин̃н̃ааяамаанад̇д̇аа ‘саббисам̣садтам̣ бхад̇д̇ам̣ саббибхад̇д̇а’’нд̇и аяамад̇т̇о на зганд̇ад̇о бан̃н̃ааяад̇и. зса наяо ‘‘наванийд̇абхад̇д̇ам̣ д̣̇зхий’’д̇иаад̣̇ийсуби.
‘‘Sappibhattaṃ dehī’’ti vutte kiṃ hotīti āha ‘‘sappibhattaṃ ‘dehī’ti vutte panā’’tiādi. Sūpodanaviññattiyā dukkaṭameva hotīti sambandho. Kasmāti āha ‘‘yasmā’’tiādi. Atha yathā ‘‘paṇītabhojanānī’’ti, evaṃ ‘‘sappibhatta’’nti idampi kasmā na viññāyatīti ce? Anekantikattā. Tathā hi ‘‘paṇītabhojanānī’’ti vutte ‘‘paṇītasaṃsaṭṭhāni bhojanāni paṇītabhojanānī’’ti ayamattho ekantato paññāyati, ‘‘sappibhatta’’nti vutte pana ‘‘sappimayaṃ bhattaṃ sappibhatta’’ntipi viññāyamānattā ‘sappisaṃsaṭṭhaṃ bhattaṃ sappibhatta’’nti ayamattho na ekantato paññāyati. Esa nayo ‘‘navanītabhattaṃ dehī’’tiādīsupi.
буриманаязнзваад̇и ‘‘бхад̇д̇ам̣ д̣̇ад̇ваа саббим̣ гад̇ваа бхун̃ж̇аа’’д̇и буримзнзва наязна. сажз бана ‘‘саббинаа’’д̇и вуд̇д̇з гзвалам̣ сзсзсу наванийд̇аад̣̇ийсу ан̃н̃ад̇арзна д̣̇зд̇и, висан̇гзд̇амзва ход̇и. анаабад̇д̇ийд̇и висан̇гзд̇ад̇д̇аа саб̣б̣аахиязва аабад̇д̇ийхи анаабад̇д̇и. ‘‘гин̃жааби анаабад̇д̇и, ад̇д̇ано бана баяог̇зна ниб̣б̣ад̇д̇ад̇д̇аа на бхун̃ж̇ид̇аб̣б̣а’’нд̇и вад̣̇анд̇и. габбияасаббинаад̇и габбияамам̣сасаббинаа. зса наяо агаббияасаббинаад̇и зд̇т̇ааби. габбияаагаббияад̇аа хи мам̣саанам̣язва, на саббиаад̣̇ийнам̣. табзд̇ваа згам̣ мануссавасаад̇злам̣ саб̣б̣зсам̣ кийрад̣̇ад̇хисаббинаванийд̇авасаад̇злзсу агаббияам̣ наама над̇т̇и.
Purimanayenevāti ‘‘bhattaṃ datvā sappiṃ katvā bhuñjā’’ti purimeneva nayena. Sace pana ‘‘sappinā’’ti vutte kevalaṃ sesesu navanītādīsu aññatarena deti, visaṅketameva hoti. Anāpattīti visaṅketattā sabbāhiyeva āpattīhi anāpatti. ‘‘Kiñcāpi anāpatti, attano pana payogena nibbattattā na bhuñjitabba’’nti vadanti. Kappiyasappināti kappiyamaṃsasappinā. Esa nayo akappiyasappināti etthāpi. Kappiyākappiyatā hi maṃsānaṃyeva, na sappiādīnaṃ. Ṭhapetvā ekaṃ manussavasātelaṃ sabbesaṃ khīradadhisappinavanītavasātelesu akappiyaṃ nāma natthi.
барибхог̇зби д̣̇уггадамзва ид̇ха анад̇хиббзд̇ад̇д̇аад̇и ад̇хиббааяо. сажз асад̇и агаббияасаббимхи буриманаязнзва агаббияанаванийд̇аад̣̇ийни д̣̇зд̇и ‘‘саббим̣ гад̇ваа бхун̃ж̇аа’’д̇и, агаббияасаббинаава д̣̇иннам̣ ход̇и. яат̇аа жа ‘‘габбияасаббинаа д̣̇зхий’’д̇и вуд̇д̇з агаббияасаббинаа д̣̇зд̇и, висан̇гзд̇ам̣, звам̣ ‘‘‘агаббияасаббинаа’д̇и вуд̇д̇з габбияасаббинаа д̣̇зд̇ий’’д̇и зд̇т̇ааби бадибаадияаа згамзгам̣ вид̇т̇аарзд̇ваа вужжамаанзби аяамзвад̇т̇о вад̇д̇аб̣б̣о сияаа, со жа сан̇кзбзнаби саггаа вин̃н̃аад̇унд̇и вид̇т̇ааранаяам̣ хид̇ваа иминаава наязна саб̣б̣абад̣̇зсу винижчаяо взд̣̇ид̇аб̣б̣од̇и вуд̇д̇ам̣. аяан̃хзд̇т̇а сан̇кзбад̇т̇о – язна язна вин̃н̃ад̇д̇и ход̇и, д̇асмим̣ ваа д̇асса муулз ваа лад̣̇д̇хз д̇ам̣ д̇ам̣ лад̣̇д̇хамзва ход̇и. сажз бана ан̃н̃ам̣ баал̣ияаа ааг̇ад̇ам̣ ваа анааг̇ад̇ам̣ ваа д̣̇зд̇и, висан̇гзд̇анд̇и. наанаадтаанз ваад̇и д̇асмим̣язва гхарз саббим̣, ид̇арасмим̣ наванийд̇анд̇иаад̣̇инаа наанаадтаанз ваа.
Paribhogepi dukkaṭameva idha anadhippetattāti adhippāyo. Sace asati akappiyasappimhi purimanayeneva akappiyanavanītādīni deti ‘‘sappiṃ katvā bhuñjā’’ti, akappiyasappināva dinnaṃ hoti. Yathā ca ‘‘kappiyasappinā dehī’’ti vutte akappiyasappinā deti, visaṅketaṃ, evaṃ ‘‘‘akappiyasappinā’ti vutte kappiyasappinā detī’’ti etthāpi paṭipāṭiyā ekamekaṃ vitthāretvā vuccamānepi ayamevattho vattabbo siyā, so ca saṅkhepenapi sakkā viññātunti vitthāranayaṃ hitvā imināva nayena sabbapadesu vinicchayo veditabboti vuttaṃ. Ayañhettha saṅkhepattho – yena yena viññatti hoti, tasmiṃ vā tassa mūle vā laddhe taṃ taṃ laddhameva hoti. Sace pana aññaṃ pāḷiyā āgataṃ vā anāgataṃ vā deti, visaṅketanti. Nānāṭṭhāne vāti tasmiṃyeva ghare sappiṃ, itarasmiṃ navanītantiādinā nānāṭṭhāne vā.
бан̣ийд̇абхож̇анасигкаабад̣̇аван̣н̣анаа нидтид̇аа.
Paṇītabhojanasikkhāpadavaṇṇanā niṭṭhitā.
