| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
9. бан̣ийд̇абхож̇анасигкаабад̣̇аван̣н̣анаа
9. Paṇītabhojanasikkhāpadavaṇṇanā
257-259. навамз бан̣ийд̇асам̣садтаани бхож̇анаани бан̣ийд̇абхож̇анаани. яат̇аа хи ааж̇ан̃н̃аяуд̇д̇о рат̇о ‘‘ааж̇ан̃н̃арат̇о’’д̇и вужжад̇и, звамид̇хааби бан̣ийд̇асам̣садтаани сад̇д̇ад̇хан̃н̃аниб̣б̣ад̇д̇аани бхож̇анаани ‘‘бан̣ийд̇абхож̇анааний’’д̇и вуд̇д̇аани. язхи бана бан̣ийд̇зхи сам̣садтаани, д̇аани ‘‘бан̣ийд̇абхож̇анааний’’д̇и вужжанд̇и, д̇зсам̣ бабхзд̣̇ад̣̇ассанад̇т̇ам̣ ‘‘сзяяат̇ид̣̇ам̣, сабби наванийд̇а’’нд̇иаад̣̇и баал̣ияам̣ вуд̇д̇ам̣. ‘‘язсам̣ мам̣сам̣ габбад̇ий’’д̇и ид̣̇ан̃жа баажид̇д̇ияавад̇т̇убарижчзд̣̇ад̣̇ассанад̇т̇ам̣ вуд̇д̇ам̣, на бана габбияавад̇т̇убарижчзд̣̇ад̣̇ассанад̇т̇ам̣. на хи агаббияамам̣сасад̇д̇аанам̣ саббиаад̣̇ийни на габбанд̇и. зган̃хи мануссавасаад̇злам̣ табзд̇ваа саб̣б̣зсам̣ кийрасаббинаванийд̇авасаад̇злзсу агаббияам̣ наама над̇т̇и. саббибхад̇д̇анд̇и зд̇т̇а гин̃жааби саббисам̣садтам̣ бхад̇д̇ам̣ саббибхад̇д̇ам̣, сабби жа бхад̇д̇ан̃жа саббибхад̇д̇анд̇иби вин̃н̃ааяад̇и, адтагат̇аасу бана ‘‘саалибхад̇д̇ам̣ вияа саббибхад̇д̇ам̣ наама над̇т̇ий’’д̇и гааран̣ам̣ вад̇ваа д̣̇уггадассзва д̣̇ал̣хад̇арам̣ гад̇ваа вуд̇д̇ад̇д̇аа на саггаа ан̃н̃ам̣ вад̇д̇ум̣. адтагат̇аажарияаа зва хи ийд̣̇исзсу таанзсу бамаан̣ам̣.
257-259. Navame paṇītasaṃsaṭṭhāni bhojanāni paṇītabhojanāni. Yathā hi ājaññayutto ratho ‘‘ājaññaratho’’ti vuccati, evamidhāpi paṇītasaṃsaṭṭhāni sattadhaññanibbattāni bhojanāni ‘‘paṇītabhojanānī’’ti vuttāni. Yehi pana paṇītehi saṃsaṭṭhāni, tāni ‘‘paṇītabhojanānī’’ti vuccanti, tesaṃ pabhedadassanatthaṃ ‘‘seyyathidaṃ, sappi navanīta’’ntiādi pāḷiyaṃ vuttaṃ. ‘‘Yesaṃ maṃsaṃ kappatī’’ti idañca pācittiyavatthuparicchedadassanatthaṃ vuttaṃ, na pana kappiyavatthuparicchedadassanatthaṃ. Na hi akappiyamaṃsasattānaṃ sappiādīni na kappanti. Ekañhi manussavasātelaṃ ṭhapetvā sabbesaṃ khīrasappinavanītavasātelesu akappiyaṃ nāma natthi. Sappibhattanti ettha kiñcāpi sappisaṃsaṭṭhaṃ bhattaṃ sappibhattaṃ, sappi ca bhattañca sappibhattantipi viññāyati, aṭṭhakathāsu pana ‘‘sālibhattaṃ viya sappibhattaṃ nāma natthī’’ti kāraṇaṃ vatvā dukkaṭasseva daḷhataraṃ katvā vuttattā na sakkā aññaṃ vattuṃ. Aṭṭhakathācariyā eva hi īdisesu ṭhānesu pamāṇaṃ.
мууланд̇и габбияабхан̣д̣ам̣ санд̇хааяа вуд̇д̇ам̣. анаабад̇д̇ийд̇и висан̇гзд̇ад̇д̇аа саб̣б̣аахиязва аабад̇д̇ийхи анаабад̇д̇и. гзжи бана ‘‘баажид̇д̇иязнзва анаабад̇д̇и вуд̇д̇аа, суубод̣̇анавин̃н̃ад̇д̇ид̣̇уггадам̣ бана ход̇иязваа’’д̇и вад̣̇анд̇и, д̇ам̣ на г̇ахзд̇аб̣б̣ам̣. габбияасаббинаа агаббияасаббинаад̇и жа ид̣̇ам̣ габбияаагаббияамам̣саанам̣ васзна вуд̇д̇ам̣, д̇асмаа габбияамам̣сасаббинаа агаббияамам̣сасаббинаад̇и звамзд̇т̇а ад̇т̇о г̇ахзд̇аб̣б̣о. наанаавад̇т̇угаанийд̇и саббинаванийд̇аад̣̇ийнам̣ васзна вуд̇д̇ам̣.
Mūlanti kappiyabhaṇḍaṃ sandhāya vuttaṃ. Anāpattīti visaṅketattā sabbāhiyeva āpattīhi anāpatti. Keci pana ‘‘pācittiyeneva anāpatti vuttā, sūpodanaviññattidukkaṭaṃ pana hotiyevā’’ti vadanti, taṃ na gahetabbaṃ. Kappiyasappinā akappiyasappināti ca idaṃ kappiyākappiyamaṃsānaṃ vasena vuttaṃ, tasmā kappiyamaṃsasappinā akappiyamaṃsasappināti evamettha attho gahetabbo. Nānāvatthukānīti sappinavanītādīnaṃ vasena vuttaṃ.
261. махаанаамасигкаабад̣̇зна гаарзд̇аб̣б̣од̇и зд̇т̇а –
261.Mahānāmasikkhāpadena kāretabboti ettha –
‘‘аг̇илаанзна бхигкунаа жад̇умаасабажжаяабавааран̣аа саад̣̇ид̇аб̣б̣аа ан̃н̃ад̇ра бунабавааран̣ааяа ан̃н̃ад̇ра нижжабавааран̣ааяа, д̇ад̇о жз уд̇д̇ари саад̣̇иязяяа, баажид̇д̇ияа’’нд̇и (баажи. 306) –
‘‘Agilānena bhikkhunā catumāsapaccayapavāraṇā sāditabbā aññatra punapavāraṇāya aññatra niccapavāraṇāya, tato ce uttari sādiyeyya, pācittiya’’nti (pāci. 306) –
ид̣̇ам̣ махаанаамасигкаабад̣̇ам̣ наама. иминаа жа сигкаабад̣̇зна сан̇гхавасзна г̇илаанабажжаяабавааран̣ааяа баваарид̇адтаанз сажз д̇ад̇т̇а рад̇д̇ийхи ваа бхзсаж̇ж̇зхи ваа барижчзд̣̇о гад̇о ход̇и, зд̇д̇агааязва рад̇д̇ияо зд̇д̇агаани ваа бхзсаж̇ж̇аани вин̃н̃аабзд̇аб̣б̣аанийд̇и. ат̇а д̇ад̇о рад̇д̇ибарияанд̇ад̇о ваа бхзсаж̇ж̇абарияанд̇ад̇о ваа уд̇д̇ари на бхзсаж̇ж̇агаран̣ийязна ваа бхзсаж̇ж̇ам̣ ан̃н̃абхзсаж̇ж̇агаран̣ийязна ваа ан̃н̃ам̣ бхзсаж̇ж̇ам̣ вин̃н̃аабзнд̇асса баажид̇д̇ияам̣ вуд̇д̇ам̣. д̇асмаа аг̇илаано г̇илаанасан̃н̃ий худ̇ваа бан̃жа бхзсаж̇ж̇аани вин̃н̃аабзнд̇о на бхзсаж̇ж̇агаран̣ийязна бхзсаж̇ж̇ам̣ вин̃н̃аабзнд̇о наама ход̇ийд̇и ‘‘махаанаамасигкаабад̣̇зна гаарзд̇аб̣б̣о’’д̇и вуд̇д̇ам̣. зд̇аани баадид̣̇зсанийяавад̇т̇уунийд̇и баал̣ияам̣ ааг̇ад̇асаббиаад̣̇ийни санд̇хааяа вуд̇д̇ам̣. баал̣ияам̣ анааг̇ад̇аани бана агаббияасаббиаад̣̇ийни бхигкунийнамби д̣̇уггадавад̇т̇уунийд̇и взд̣̇ид̇аб̣б̣ам̣. суубод̣̇анавин̃н̃ад̇д̇ияанд̇и бхигкуунам̣ баажид̇д̇ияавад̇т̇ууни бхигкунийнам̣ баадид̣̇зсанийяавад̇т̇ууни жа табзд̇ваа авасзсавин̃н̃ад̇д̇им̣ санд̇хааяа вуд̇д̇ам̣. сзсамзд̇т̇а уд̇д̇аанамзва. бан̣ийд̇абхож̇анад̇аа, аг̇илаанад̇аа, агад̇авин̃н̃ад̇д̇ияаа бадилаабхо, аж̇жхохаран̣анд̇и имаани банзд̇т̇а жад̇д̇аари ан̇г̇аани.
Idaṃ mahānāmasikkhāpadaṃ nāma. Iminā ca sikkhāpadena saṅghavasena gilānapaccayapavāraṇāya pavāritaṭṭhāne sace tattha rattīhi vā bhesajjehi vā paricchedo kato hoti, ettakāyeva rattiyo ettakāni vā bhesajjāni viññāpetabbānīti. Atha tato rattipariyantato vā bhesajjapariyantato vā uttari na bhesajjakaraṇīyena vā bhesajjaṃ aññabhesajjakaraṇīyena vā aññaṃ bhesajjaṃ viññāpentassa pācittiyaṃ vuttaṃ. Tasmā agilāno gilānasaññī hutvā pañca bhesajjāni viññāpento na bhesajjakaraṇīyena bhesajjaṃ viññāpento nāma hotīti ‘‘mahānāmasikkhāpadena kāretabbo’’ti vuttaṃ. Etāni pāṭidesanīyavatthūnīti pāḷiyaṃ āgatasappiādīni sandhāya vuttaṃ. Pāḷiyaṃ anāgatāni pana akappiyasappiādīni bhikkhunīnampi dukkaṭavatthūnīti veditabbaṃ. Sūpodanaviññattiyanti bhikkhūnaṃ pācittiyavatthūni bhikkhunīnaṃ pāṭidesanīyavatthūni ca ṭhapetvā avasesaviññattiṃ sandhāya vuttaṃ. Sesamettha uttānameva. Paṇītabhojanatā, agilānatā, akataviññattiyā paṭilābho, ajjhoharaṇanti imāni panettha cattāri aṅgāni.
бан̣ийд̇абхож̇анасигкаабад̣̇аван̣н̣анаа нидтид̇аа.
Paṇītabhojanasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 4. бхож̇анаваг̇г̇о • 4. Bhojanavaggo
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 9. бан̣ийд̇абхож̇анасигкаабад̣̇аван̣н̣анаа • 9. Paṇītabhojanasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 9. бан̣ийд̇абхож̇анасигкаабад̣̇аван̣н̣анаа • 9. Paṇītabhojanasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 9. бан̣ийд̇абхож̇анасигкаабад̣̇аван̣н̣анаа • 9. Paṇītabhojanasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 9. бан̣ийд̇абхож̇анасигкаабад̣̇ам̣ • 9. Paṇītabhojanasikkhāpadaṃ
