| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
29. பண்ணதா³யகவக்³கோ³
29. Paṇṇadāyakavaggo
1-10. பண்ணதா³யகத்தே²ரஅபதா³னாதி³வண்ணனா
1-10. Paṇṇadāyakattheraapadānādivaṇṇanā
1-2. ஏகூனதிங்ஸதிமே வக்³கே³ பட²மாபதா³னே பண்ணபோ⁴ஜனபோ⁴ஜனோதி கீ²ரபண்ணாதி³போ⁴ஜனஸ்ஸ பு⁴ஞ்ஜனத்தா²ய பண்ணஸாலாய நிஸின்னோ அம்ஹி ப⁴வாமீதி அத்தோ². உபவிட்ட²ஞ்ச மங் ஸந்தந்தி பண்ணஸாலாயங் உபவிட்ட²ங் ஸந்தங் விஜ்ஜமானங் மங். உபாக³ச்சி² மஹாஇஸீதி மஹந்தே ஸீலாதி³க²ந்தே⁴ ஏஸனதோ மஹாஇஸி. லோகபஜ்ஜோதோ லோகபதீ³போ ஸித்³த⁴த்தோ² ப⁴க³வா உபக³ச்சி², மம ஸமீபங் அக³மாஸீதி அத்தோ². நிஸின்னஸ்ஸ பண்ணஸந்த²ரேதி உபக³ந்த்வா பண்ணஸந்த²ரே நிஸின்னஸ்ஸ கா²த³னத்தா²ய ஸேதி³தங் பண்ணங் மயா தி³ன்னந்தி ஸம்ப³ந்தோ⁴.
1-2. Ekūnatiṃsatime vagge paṭhamāpadāne paṇṇabhojanabhojanoti khīrapaṇṇādibhojanassa bhuñjanatthāya paṇṇasālāya nisinno amhi bhavāmīti attho. Upaviṭṭhañca maṃ santanti paṇṇasālāyaṃ upaviṭṭhaṃ santaṃ vijjamānaṃ maṃ. Upāgacchi mahāisīti mahante sīlādikhandhe esanato mahāisi. Lokapajjoto lokapadīpo siddhattho bhagavā upagacchi, mama samīpaṃ agamāsīti attho. Nisinnassa paṇṇasanthareti upagantvā paṇṇasanthare nisinnassa khādanatthāya seditaṃ paṇṇaṃ mayā dinnanti sambandho.
5-7. து³தியாபதா³னே ஸினேருஸமஸந்தோஸோ த⁴ரணீஸமஸாதி³ஸோ ஸித்³த⁴த்தோ² ப⁴க³வாதி ஸம்ப³ந்தோ⁴. வுட்ட²ஹித்வா ஸமாதி⁴ம்ஹாதி நிரோத⁴ஸமாபத்திதோ வுட்ட²ஹித்வா விஸுங் ஹுத்வாதி அத்தோ². பி⁴க்கா²ய மமுபட்டி²தோதி பி⁴க்கா²சாரவேலாய ‘‘அஜ்ஜ மம யோ கோசி கிஞ்சி தா³னங் த³தா³தி, தஸ்ஸ மஹப்ப²ல’’ந்தி சிந்தெத்வா நிஸின்னஸ்ஸ மம ஸந்திகங் ஸமீபங் உபட்டி²தோ ஸமீபமாக³தோதி அத்தோ². ஹரீதகங்…பே॰… பா²ருஸகப²லானி சாதி ஏவங் ஸப்³ப³ங் தங் ப²லங் ஸப்³ப³லோகானுகம்பினோ தஸ்ஸ ஸித்³த⁴த்த²ஸ்ஸ மஹேஸிஸ்ஸ மயா விப்பஸன்னேன சேதஸா தி³ன்னந்தி அத்தோ².
5-7. Dutiyāpadāne sinerusamasantoso dharaṇīsamasādiso siddhattho bhagavāti sambandho. Vuṭṭhahitvā samādhimhāti nirodhasamāpattito vuṭṭhahitvā visuṃ hutvāti attho. Bhikkhāya mamupaṭṭhitoti bhikkhācāravelāya ‘‘ajja mama yo koci kiñci dānaṃ dadāti, tassa mahapphala’’nti cintetvā nisinnassa mama santikaṃ samīpaṃ upaṭṭhito samīpamāgatoti attho. Harītakaṃ…pe… phārusakaphalāni cāti evaṃ sabbaṃ taṃ phalaṃ sabbalokānukampino tassa siddhatthassa mahesissa mayā vippasannena cetasā dinnanti attho.
11-12. ததியாபதா³னே ஸீஹங் யதா² வனசரந்தி வனே சரமானங் ஸீஹராஜங் இவ சரமானங் ஸித்³த⁴த்த²ங் ப⁴க³வந்தந்தி ஸம்ப³ந்தோ⁴. நிஸபா⁴ஜானியங் யதா²தி வஸபோ⁴, நிஸபோ⁴, விஸபோ⁴, ஆஸபோ⁴தி சத்தாரோ க³வஜெட்ட²கா. தேஸு க³வஸதஸ்ஸ ஜெட்ட²கோ வஸபோ⁴, க³வஸஹஸ்ஸஸ்ஸ ஜெட்ட²கோ நிஸபோ⁴, க³வஸதஸஹஸ்ஸஸ்ஸ ஜெட்ட²கோ விஸபோ⁴, க³வகோடிஸதஸஹஸ்ஸஸ்ஸ ஜெட்ட²கோ ஆஸபோ⁴. இத⁴ பன ஆஸபோ⁴ ‘‘நிஸபோ⁴’’தி வுத்தோ, ஆஜானீயங் அபீ⁴தங் நிச்சலங் உஸப⁴ராஜங் இவாதி அத்தோ². ககுத⁴ங் விலஸந்தங்வாதி புப்ப²பல்லவேஹி ஸோப⁴மானங் ககுத⁴ருக்க²ங் இவ நராஸப⁴ங் நரானங் ஆஸப⁴ங் உத்தமங் ஆக³ச்ச²ந்தங் ஸித்³த⁴த்த²ங் ப⁴க³வந்தங் தி³ஸ்வா ஸத்³தா⁴ய ஸம்பயுத்தத்தா விப்பஸன்னேன சேதஸா பச்சுக்³க³மனங் அகாஸிந்தி அத்தோ².
11-12. Tatiyāpadāne sīhaṃ yathā vanacaranti vane caramānaṃ sīharājaṃ iva caramānaṃ siddhatthaṃ bhagavantanti sambandho. Nisabhājāniyaṃ yathāti vasabho, nisabho, visabho, āsabhoti cattāro gavajeṭṭhakā. Tesu gavasatassa jeṭṭhako vasabho, gavasahassassa jeṭṭhako nisabho, gavasatasahassassa jeṭṭhako visabho, gavakoṭisatasahassassa jeṭṭhako āsabho. Idha pana āsabho ‘‘nisabho’’ti vutto, ājānīyaṃ abhītaṃ niccalaṃ usabharājaṃ ivāti attho. Kakudhaṃ vilasantaṃvāti pupphapallavehi sobhamānaṃ kakudharukkhaṃ iva narāsabhaṃ narānaṃ āsabhaṃ uttamaṃ āgacchantaṃ siddhatthaṃ bhagavantaṃ disvā saddhāya sampayuttattā vippasannena cetasā paccuggamanaṃ akāsinti attho.
சதுத்தா²பதா³னாதீ³னி த³ஸமாவஸானானி ஸுவிஞ்ஞெய்யானேவாதி.
Catutthāpadānādīni dasamāvasānāni suviññeyyānevāti.
ஏகூனதிங்ஸதிமவக்³க³வண்ணனா ஸமத்தா.
Ekūnatiṃsatimavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
1. பண்ணதா³யகத்தே²ரஅபதா³னங் • 1. Paṇṇadāyakattheraapadānaṃ
2. ப²லதா³யகத்தே²ரஅபதா³னங் • 2. Phaladāyakattheraapadānaṃ
3. பச்சுக்³க³மனியத்தே²ரஅபதா³னங் • 3. Paccuggamaniyattheraapadānaṃ
