| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২৯. পণ্ণদাযকৰগ্গো
29. Paṇṇadāyakavaggo
১-১০. পণ্ণদাযকত্থেরঅপদানাদিৰণ্ণনা
1-10. Paṇṇadāyakattheraapadānādivaṇṇanā
১-২. একূনতিংসতিমে ৰগ্গে পঠমাপদানে পণ্ণভোজনভোজনোতি খীরপণ্ণাদিভোজনস্স ভুঞ্জনত্থায পণ্ণসালায নিসিন্নো অম্হি ভৰামীতি অত্থো। উপৰিট্ঠঞ্চ মং সন্তন্তি পণ্ণসালাযং উপৰিট্ঠং সন্তং ৰিজ্জমানং মং। উপাগচ্ছি মহাইসীতি মহন্তে সীলাদিখন্ধে এসনতো মহাইসি। লোকপজ্জোতো লোকপদীপো সিদ্ধত্থো ভগৰা উপগচ্ছি, মম সমীপং অগমাসীতি অত্থো। নিসিন্নস্স পণ্ণসন্থরেতি উপগন্ত্ৰা পণ্ণসন্থরে নিসিন্নস্স খাদনত্থায সেদিতং পণ্ণং মযা দিন্নন্তি সম্বন্ধো।
1-2. Ekūnatiṃsatime vagge paṭhamāpadāne paṇṇabhojanabhojanoti khīrapaṇṇādibhojanassa bhuñjanatthāya paṇṇasālāya nisinno amhi bhavāmīti attho. Upaviṭṭhañca maṃ santanti paṇṇasālāyaṃ upaviṭṭhaṃ santaṃ vijjamānaṃ maṃ. Upāgacchi mahāisīti mahante sīlādikhandhe esanato mahāisi. Lokapajjoto lokapadīpo siddhattho bhagavā upagacchi, mama samīpaṃ agamāsīti attho. Nisinnassa paṇṇasanthareti upagantvā paṇṇasanthare nisinnassa khādanatthāya seditaṃ paṇṇaṃ mayā dinnanti sambandho.
৫-৭. দুতিযাপদানে সিনেরুসমসন্তোসো ধরণীসমসাদিসো সিদ্ধত্থো ভগৰাতি সম্বন্ধো। ৰুট্ঠহিত্ৰা সমাধিম্হাতি নিরোধসমাপত্তিতো ৰুট্ঠহিত্ৰা ৰিসুং হুত্ৰাতি অত্থো। ভিক্খায মমুপট্ঠিতোতি ভিক্খাচারৰেলায ‘‘অজ্জ মম যো কোচি কিঞ্চি দানং দদাতি, তস্স মহপ্ফল’’ন্তি চিন্তেত্ৰা নিসিন্নস্স মম সন্তিকং সমীপং উপট্ঠিতো সমীপমাগতোতি অত্থো। হরীতকং…পে॰… ফারুসকফলানি চাতি এৰং সব্বং তং ফলং সব্বলোকানুকম্পিনো তস্স সিদ্ধত্থস্স মহেসিস্স মযা ৰিপ্পসন্নেন চেতসা দিন্নন্তি অত্থো।
5-7. Dutiyāpadāne sinerusamasantoso dharaṇīsamasādiso siddhattho bhagavāti sambandho. Vuṭṭhahitvā samādhimhāti nirodhasamāpattito vuṭṭhahitvā visuṃ hutvāti attho. Bhikkhāya mamupaṭṭhitoti bhikkhācāravelāya ‘‘ajja mama yo koci kiñci dānaṃ dadāti, tassa mahapphala’’nti cintetvā nisinnassa mama santikaṃ samīpaṃ upaṭṭhito samīpamāgatoti attho. Harītakaṃ…pe… phārusakaphalāni cāti evaṃ sabbaṃ taṃ phalaṃ sabbalokānukampino tassa siddhatthassa mahesissa mayā vippasannena cetasā dinnanti attho.
১১-১২. ততিযাপদানে সীহং যথা ৰনচরন্তি ৰনে চরমানং সীহরাজং ইৰ চরমানং সিদ্ধত্থং ভগৰন্তন্তি সম্বন্ধো। নিসভাজানিযং যথাতি ৰসভো, নিসভো, ৰিসভো, আসভোতি চত্তারো গৰজেট্ঠকা। তেসু গৰসতস্স জেট্ঠকো ৰসভো, গৰসহস্সস্স জেট্ঠকো নিসভো, গৰসতসহস্সস্স জেট্ঠকো ৰিসভো, গৰকোটিসতসহস্সস্স জেট্ঠকো আসভো। ইধ পন আসভো ‘‘নিসভো’’তি ৰুত্তো, আজানীযং অভীতং নিচ্চলং উসভরাজং ইৰাতি অত্থো। ককুধং ৰিলসন্তংৰাতি পুপ্ফপল্লৰেহি সোভমানং ককুধরুক্খং ইৰ নরাসভং নরানং আসভং উত্তমং আগচ্ছন্তং সিদ্ধত্থং ভগৰন্তং দিস্ৰা সদ্ধায সম্পযুত্তত্তা ৰিপ্পসন্নেন চেতসা পচ্চুগ্গমনং অকাসিন্তি অত্থো।
11-12. Tatiyāpadāne sīhaṃ yathā vanacaranti vane caramānaṃ sīharājaṃ iva caramānaṃ siddhatthaṃ bhagavantanti sambandho. Nisabhājāniyaṃ yathāti vasabho, nisabho, visabho, āsabhoti cattāro gavajeṭṭhakā. Tesu gavasatassa jeṭṭhako vasabho, gavasahassassa jeṭṭhako nisabho, gavasatasahassassa jeṭṭhako visabho, gavakoṭisatasahassassa jeṭṭhako āsabho. Idha pana āsabho ‘‘nisabho’’ti vutto, ājānīyaṃ abhītaṃ niccalaṃ usabharājaṃ ivāti attho. Kakudhaṃ vilasantaṃvāti pupphapallavehi sobhamānaṃ kakudharukkhaṃ iva narāsabhaṃ narānaṃ āsabhaṃ uttamaṃ āgacchantaṃ siddhatthaṃ bhagavantaṃ disvā saddhāya sampayuttattā vippasannena cetasā paccuggamanaṃ akāsinti attho.
চতুত্থাপদানাদীনি দসমাৰসানানি সুৰিঞ্ঞেয্যানেৰাতি।
Catutthāpadānādīni dasamāvasānāni suviññeyyānevāti.
একূনতিংসতিমৰগ্গৰণ্ণনা সমত্তা।
Ekūnatiṃsatimavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi
১. পণ্ণদাযকত্থেরঅপদানং • 1. Paṇṇadāyakattheraapadānaṃ
২. ফলদাযকত্থেরঅপদানং • 2. Phaladāyakattheraapadānaṃ
৩. পচ্চুগ্গমনিযত্থেরঅপদানং • 3. Paccuggamaniyattheraapadānaṃ
