| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
29. පණ්‌ණදායකවග්‌ගො
29. Paṇṇadāyakavaggo
1-10. පණ්‌ණදායකත්‌ථෙරඅපදානාදිවණ්‌ණනා
1-10. Paṇṇadāyakattheraapadānādivaṇṇanā
1-2. එකූනතිංසතිමෙ වග්‌ගෙ පඨමාපදානෙ පණ්‌ණභොජනභොජනොති ඛීරපණ්‌ණාදිභොජනස්‌ස භුඤ්‌ජනත්‌ථාය පණ්‌ණසාලාය නිසින්‌නො අම්‌හි භවාමීති අත්‌ථො. උපවිට්‌ඨඤ්‌ච මං සන්‌තන්‌ති පණ්‌ණසාලායං උපවිට්‌ඨං සන්‌තං විජ්‌ජමානං මං. උපාගච්‌ඡි මහාඉසීති මහන්‌තෙ සීලාදිඛන්‌ධෙ එසනතො මහාඉසි. ලොකපජ්‌ජොතො ලොකපදීපො සිද්‌ධත්‌ථො භගවා උපගච්‌ඡි, මම සමීපං අගමාසීති අත්‌ථො. නිසින්‌නස්‌ස පණ්‌ණසන්‌ථරෙති උපගන්‌ත්‌වා පණ්‌ණසන්‌ථරෙ නිසින්‌නස්‌ස ඛාදනත්‌ථාය සෙදිතං පණ්‌ණං මයා දින්‌නන්‌ති සම්‌බන්‌ධො.
1-2. Ekūnatiṃsatime vagge paṭhamāpadāne paṇṇabhojanabhojanoti khīrapaṇṇādibhojanassa bhuñjanatthāya paṇṇasālāya nisinno amhi bhavāmīti attho. Upaviṭṭhañca maṃ santanti paṇṇasālāyaṃ upaviṭṭhaṃ santaṃ vijjamānaṃ maṃ. Upāgacchi mahāisīti mahante sīlādikhandhe esanato mahāisi. Lokapajjoto lokapadīpo siddhattho bhagavā upagacchi, mama samīpaṃ agamāsīti attho. Nisinnassa paṇṇasanthareti upagantvā paṇṇasanthare nisinnassa khādanatthāya seditaṃ paṇṇaṃ mayā dinnanti sambandho.
5-7. දුතියාපදානෙ සිනෙරුසමසන්‌තොසො ධරණීසමසාදිසො සිද්‌ධත්‌ථො භගවාති සම්‌බන්‌ධො. වුට්‌ඨහිත්‌වා සමාධිම්‌හාති නිරොධසමාපත්‌තිතො වුට්‌ඨහිත්‌වා විසුං හුත්‌වාති අත්‌ථො. භික්‌ඛාය මමුපට්‌ඨිතොති භික්‌ඛාචාරවෙලාය ‘‘අජ්‌ජ මම යො කොචි කිඤ්‌චි දානං දදාති, තස්‌ස මහප්‌ඵල’’න්‌ති චින්‌තෙත්‌වා නිසින්‌නස්‌ස මම සන්‌තිකං සමීපං උපට්‌ඨිතො සමීපමාගතොති අත්‌ථො. හරීතකං…පෙ.… ඵාරුසකඵලානි චාති එවං සබ්‌බං තං ඵලං සබ්‌බලොකානුකම්‌පිනො තස්‌ස සිද්‌ධත්‌ථස්‌ස මහෙසිස්‌ස මයා විප්‌පසන්‌නෙන චෙතසා දින්‌නන්‌ති අත්‌ථො.
5-7. Dutiyāpadāne sinerusamasantoso dharaṇīsamasādiso siddhattho bhagavāti sambandho. Vuṭṭhahitvā samādhimhāti nirodhasamāpattito vuṭṭhahitvā visuṃ hutvāti attho. Bhikkhāya mamupaṭṭhitoti bhikkhācāravelāya ‘‘ajja mama yo koci kiñci dānaṃ dadāti, tassa mahapphala’’nti cintetvā nisinnassa mama santikaṃ samīpaṃ upaṭṭhito samīpamāgatoti attho. Harītakaṃ…pe… phārusakaphalāni cāti evaṃ sabbaṃ taṃ phalaṃ sabbalokānukampino tassa siddhatthassa mahesissa mayā vippasannena cetasā dinnanti attho.
11-12. තතියාපදානෙ සීහං යථා වනචරන්‌ති වනෙ චරමානං සීහරාජං ඉව චරමානං සිද්‌ධත්‌ථං භගවන්‌තන්‌ති සම්‌බන්‌ධො. නිසභාජානියං යථාති වසභො, නිසභො, විසභො, ආසභොති චත්‌තාරො ගවජෙට්‌ඨකා. තෙසු ගවසතස්‌ස ජෙට්‌ඨකො වසභො, ගවසහස්‌සස්‌ස ජෙට්‌ඨකො නිසභො, ගවසතසහස්‌සස්‌ස ජෙට්‌ඨකො විසභො, ගවකොටිසතසහස්‌සස්‌ස ජෙට්‌ඨකො ආසභො. ඉධ පන ආසභො ‘‘නිසභො’’ති වුත්‌තො, ආජානීයං අභීතං නිච්‌චලං උසභරාජං ඉවාති අත්‌ථො. කකුධං විලසන්‌තංවාති පුප්‌ඵපල්‌ලවෙහි සොභමානං කකුධරුක්‌ඛං ඉව නරාසභං නරානං ආසභං උත්‌තමං ආගච්‌ඡන්‌තං සිද්‌ධත්‌ථං භගවන්‌තං දිස්‌වා සද්‌ධාය සම්‌පයුත්‌තත්‌තා විප්‌පසන්‌නෙන චෙතසා පච්‌චුග්‌ගමනං අකාසින්‌ති අත්‌ථො.
11-12. Tatiyāpadāne sīhaṃ yathā vanacaranti vane caramānaṃ sīharājaṃ iva caramānaṃ siddhatthaṃ bhagavantanti sambandho. Nisabhājāniyaṃ yathāti vasabho, nisabho, visabho, āsabhoti cattāro gavajeṭṭhakā. Tesu gavasatassa jeṭṭhako vasabho, gavasahassassa jeṭṭhako nisabho, gavasatasahassassa jeṭṭhako visabho, gavakoṭisatasahassassa jeṭṭhako āsabho. Idha pana āsabho ‘‘nisabho’’ti vutto, ājānīyaṃ abhītaṃ niccalaṃ usabharājaṃ ivāti attho. Kakudhaṃ vilasantaṃvāti pupphapallavehi sobhamānaṃ kakudharukkhaṃ iva narāsabhaṃ narānaṃ āsabhaṃ uttamaṃ āgacchantaṃ siddhatthaṃ bhagavantaṃ disvā saddhāya sampayuttattā vippasannena cetasā paccuggamanaṃ akāsinti attho.
චතුත්‌ථාපදානාදීනි දසමාවසානානි සුවිඤ්‌ඤෙය්‍යානෙවාති.
Catutthāpadānādīni dasamāvasānāni suviññeyyānevāti.
එකූනතිංසතිමවග්‌ගවණ්‌ණනා සමත්‌තා.
Ekūnatiṃsatimavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi
1. පණ්‌ණදායකත්‌ථෙරඅපදානං • 1. Paṇṇadāyakattheraapadānaṃ
2. ඵලදායකත්‌ථෙරඅපදානං • 2. Phaladāyakattheraapadānaṃ
3. පච්‌චුග්‌ගමනියත්‌ථෙරඅපදානං • 3. Paccuggamaniyattheraapadānaṃ
