| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๒. ปญฺญาสุตฺตวณฺณนา
2. Paññāsuttavaṇṇanā
๒. ทุติเย อาทิพฺรหฺมจริยิกายาติ มคฺคพฺรหฺมจริยสฺส อาทิภูตายฯ ปญฺญายาติ วิปสฺสนายฯ ครุฎฺฐานิยนฺติ คารวุปฺปตฺติปจฺจยภูตํ ครุภาวนียํฯ ติพฺพนฺติ พหลํฯ ปริปุจฺฉตีติ อตฺถปาฬิอนุสนฺธิปุพฺพาปรํ ปุจฺฉติฯ ปริปญฺหตีติ ปญฺหํ กโรติ, อิทญฺจิทญฺจ ปฎิปุจฺฉิสฺสามีติ วิตเกฺกติฯ ทฺวเยนาติ ทุวิเธนฯ อนานากถิโกติ อนานตฺตกถิโก โหติฯ อติรจฺฉานกถิโกติ นานาวิธํ ติรจฺฉานกถํ น กเถติฯ อริยํ วา ตุณฺหีภาวนฺติ อริยตุณฺหีภาโว นาม จตุตฺถชฺฌานํ, เสสกมฺมฎฺฐานมนสิกาโรปิ วฎฺฎติฯ ชานํ ชานาตีติ ชานิตพฺพกํ ชานาติฯ ปสฺสํ ปสฺสตีติ ปสฺสิตพฺพกํ ปสฺสติฯ ปิยตฺตายาติ ปิยภาวตฺถายฯ ครุตฺตายาติ ครุภาวตฺถายฯ ภาวนายาติ ภาวนตฺถาย คุณสมฺภาวนาย วาฯ สามญฺญายาติ สมณธมฺมตฺถายฯ เอกีภาวายาติ นิรนฺตรภาวตฺถายฯ
2. Dutiye ādibrahmacariyikāyāti maggabrahmacariyassa ādibhūtāya. Paññāyāti vipassanāya. Garuṭṭhāniyanti gāravuppattipaccayabhūtaṃ garubhāvanīyaṃ. Tibbanti bahalaṃ. Paripucchatīti atthapāḷianusandhipubbāparaṃ pucchati. Paripañhatīti pañhaṃ karoti, idañcidañca paṭipucchissāmīti vitakketi. Dvayenāti duvidhena. Anānākathikoti anānattakathiko hoti. Atiracchānakathikoti nānāvidhaṃ tiracchānakathaṃ na katheti. Ariyaṃ vā tuṇhībhāvanti ariyatuṇhībhāvo nāma catutthajjhānaṃ, sesakammaṭṭhānamanasikāropi vaṭṭati. Jānaṃ jānātīti jānitabbakaṃ jānāti. Passaṃ passatīti passitabbakaṃ passati. Piyattāyāti piyabhāvatthāya. Garuttāyāti garubhāvatthāya. Bhāvanāyāti bhāvanatthāya guṇasambhāvanāya vā. Sāmaññāyāti samaṇadhammatthāya. Ekībhāvāyāti nirantarabhāvatthāya.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๒. ปญฺญาสุตฺตํ • 2. Paññāsuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๒-๔. ปญฺญาสุตฺตาทิวณฺณนา • 2-4. Paññāsuttādivaṇṇanā
