| Library / Tipiṭaka / திபிடக • Tipiṭaka / நெத்திவிபா⁴வினீ • Nettivibhāvinī |
11. பஞ்ஞத்திஹாரஸம்பாதவிபா⁴வனா
11. Paññattihārasampātavibhāvanā
73. யேன யேன வேவசனஹாரஸம்பாதேன வேவசனானி நித்³தா⁴ரிதானி, ஸோ வேவசனஹாரஸம்பாதோ பரிபுண்ணோ, ‘‘கதமோ பஞ்ஞத்திஹாரஸம்பாதோ’’தி புச்சி²தப்³ப³த்தா ‘‘தத்த² கதமோ பஞ்ஞத்திஹாரஸம்பாதோ’’திஆதி³ வுத்தங்.
73. Yena yena vevacanahārasampātena vevacanāni niddhāritāni, so vevacanahārasampāto paripuṇṇo, ‘‘katamo paññattihārasampāto’’ti pucchitabbattā ‘‘tattha katamo paññattihārasampāto’’tiādi vuttaṃ.
‘‘கதமா ஸுத்தப்பதே³ஸபூ⁴தா பஞ்ஞத்தி கதமேஸங் த⁴ம்மானங் பஞ்ஞத்தீ’’தி புச்சி²தப்³ப³த்தா ‘‘தஸ்மா’’திஆதி³ வுத்தங். ‘‘தஸ்மா ரக்கி²தசித்தஸ்ஸா’’தி பஞ்ஞத்தி ஸதியா பத³ட்டா²னஸ்ஸ ரக்கி²தப்³ப³ஸ்ஸ சித்தஸ்ஸ பஞ்ஞாபனதோ ஸதியா பத³ட்டா²னபஞ்ஞத்தி நாம. ஸதியா ஹி ரக்கி²தப்³ப³ங் சித்தங் ஸதியா பத³ட்டா²னங் அதி⁴ட்டா²னங் நாம. தேனாஹ அட்ட²கதா²யங் – ‘‘அதி⁴ட்ட²ஹித்வா ரக்க²ந்தியா ஸதியா ரக்கி²யமானங் சித்தங் தஸ்ஸா அதி⁴ட்டா²னங் விய ஹோதீ’’தி. ‘‘ஸம்மாஸங்கப்பகோ³சரோ’’தி பஞ்ஞத்தி ஸமத²ஸ்ஸ பா⁴வனாய பஞ்ஞாபனதோ ஸமத²ஸ்ஸ பா⁴வனாபஞ்ஞத்தி நாம. ‘‘ஸம்மாதி³ட்டி²புரெக்கா²ரோ, ஞத்வான உத³யப்³ப³ய’’ந்தி பஞ்ஞத்தி த³ஸ்ஸனபூ⁴மியா நிக்கே²பஸ்ஸ பஞ்ஞாபனதோ நிக்கே²பபஞ்ஞத்தி நாம. ‘‘தி²னமித்³தா⁴பி⁴பூ⁴ பி⁴க்கூ²’’தி ஸமுத³யஸ்ஸ அனவஸேஸப்பஹானஸ்ஸ பஞ்ஞாபனதோ அனவஸேஸப்பஹானபஞ்ஞத்தி நாம. ‘‘ஸப்³பா³ து³க்³க³தியோ ஜஹே’’தி பஞ்ஞத்தி மக்³க³ஸ்ஸ அரியமக்³க³ஸ்ஸ பா⁴வனாய பஞ்ஞாபனதோ பா⁴வனாபஞ்ஞத்தி நாம.
‘‘Katamā suttappadesabhūtā paññatti katamesaṃ dhammānaṃ paññattī’’ti pucchitabbattā ‘‘tasmā’’tiādi vuttaṃ. ‘‘Tasmā rakkhitacittassā’’ti paññatti satiyā padaṭṭhānassa rakkhitabbassa cittassa paññāpanato satiyā padaṭṭhānapaññatti nāma. Satiyā hi rakkhitabbaṃ cittaṃ satiyā padaṭṭhānaṃ adhiṭṭhānaṃ nāma. Tenāha aṭṭhakathāyaṃ – ‘‘adhiṭṭhahitvā rakkhantiyā satiyā rakkhiyamānaṃ cittaṃ tassā adhiṭṭhānaṃ viya hotī’’ti. ‘‘Sammāsaṅkappagocaro’’ti paññatti samathassa bhāvanāya paññāpanato samathassa bhāvanāpaññatti nāma. ‘‘Sammādiṭṭhipurekkhāro, ñatvāna udayabbaya’’nti paññatti dassanabhūmiyā nikkhepassa paññāpanato nikkhepapaññatti nāma. ‘‘Thinamiddhābhibhū bhikkhū’’ti samudayassa anavasesappahānassa paññāpanato anavasesappahānapaññatti nāma. ‘‘Sabbā duggatiyo jahe’’ti paññatti maggassa ariyamaggassa bhāvanāya paññāpanato bhāvanāpaññatti nāma.
‘‘எத்தகோவ பஞ்ஞத்திஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ பஞ்ஞத்திஹாரஸம்பாதோ’’தி வுத்தங். யேன யேன ஸங்வண்ணனாவிஸேஸபூ⁴தேன பஞ்ஞத்திஹாரஸம்பாதேன பஞ்ஞத்திப்பபே⁴தா³ நித்³தா⁴ரிதா, ஸோ ஸோ ஸங்வண்ணனாவிஸேஸபூ⁴தோ பஞ்ஞத்திஹாரஸம்பாதோ நியுத்தோ யதா²ரஹங் நித்³தா⁴ரெத்வா யுஜ்ஜிதப்³போ³தி அத்தோ² க³ஹேதப்³போ³தி.
‘‘Ettakova paññattihārasampāto paripuṇṇo’’ti vattabbattā ‘‘niyutto paññattihārasampāto’’ti vuttaṃ. Yena yena saṃvaṇṇanāvisesabhūtena paññattihārasampātena paññattippabhedā niddhāritā, so so saṃvaṇṇanāvisesabhūto paññattihārasampāto niyutto yathārahaṃ niddhāretvā yujjitabboti attho gahetabboti.
இதி பஞ்ஞத்திஹாரஸம்பாதே ஸத்திப³லானுரூபா ரசிதா
Iti paññattihārasampāte sattibalānurūpā racitā
விபா⁴வனா நிட்டி²தா.
Vibhāvanā niṭṭhitā.
பண்டி³தேஹி பன…பே॰… க³ஹேதப்³போ³தி.
Paṇḍitehi pana…pe… gahetabboti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 11. பஞ்ஞத்திஹாரஸம்பாதோ • 11. Paññattihārasampāto
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 11. பஞ்ஞத்திஹாரஸம்பாதவண்ணனா • 11. Paññattihārasampātavaṇṇanā
