| Library / Tipiṭaka / তিপিটক • Tipiṭaka / নেত্তিৰিভাৰিনী • Nettivibhāvinī |
১১. পঞ্ঞত্তিহারসম্পাতৰিভাৰনা
11. Paññattihārasampātavibhāvanā
৭৩. যেন যেন ৰেৰচনহারসম্পাতেন ৰেৰচনানি নিদ্ধারিতানি, সো ৰেৰচনহারসম্পাতো পরিপুণ্ণো, ‘‘কতমো পঞ্ঞত্তিহারসম্পাতো’’তি পুচ্ছিতব্বত্তা ‘‘তত্থ কতমো পঞ্ঞত্তিহারসম্পাতো’’তিআদি ৰুত্তং।
73. Yena yena vevacanahārasampātena vevacanāni niddhāritāni, so vevacanahārasampāto paripuṇṇo, ‘‘katamo paññattihārasampāto’’ti pucchitabbattā ‘‘tattha katamo paññattihārasampāto’’tiādi vuttaṃ.
‘‘কতমা সুত্তপ্পদেসভূতা পঞ্ঞত্তি কতমেসং ধম্মানং পঞ্ঞত্তী’’তি পুচ্ছিতব্বত্তা ‘‘তস্মা’’তিআদি ৰুত্তং। ‘‘তস্মা রক্খিতচিত্তস্সা’’তি পঞ্ঞত্তি সতিযা পদট্ঠানস্স রক্খিতব্বস্স চিত্তস্স পঞ্ঞাপনতো সতিযা পদট্ঠানপঞ্ঞত্তি নাম। সতিযা হি রক্খিতব্বং চিত্তং সতিযা পদট্ঠানং অধিট্ঠানং নাম। তেনাহ অট্ঠকথাযং – ‘‘অধিট্ঠহিত্ৰা রক্খন্তিযা সতিযা রক্খিযমানং চিত্তং তস্সা অধিট্ঠানং ৰিয হোতী’’তি। ‘‘সম্মাসঙ্কপ্পগোচরো’’তি পঞ্ঞত্তি সমথস্স ভাৰনায পঞ্ঞাপনতো সমথস্স ভাৰনাপঞ্ঞত্তি নাম। ‘‘সম্মাদিট্ঠিপুরেক্খারো, ঞত্ৰান উদযব্বয’’ন্তি পঞ্ঞত্তি দস্সনভূমিযা নিক্খেপস্স পঞ্ঞাপনতো নিক্খেপপঞ্ঞত্তি নাম। ‘‘থিনমিদ্ধাভিভূ ভিক্খূ’’তি সমুদযস্স অনৰসেসপ্পহানস্স পঞ্ঞাপনতো অনৰসেসপ্পহানপঞ্ঞত্তি নাম। ‘‘সব্বা দুগ্গতিযো জহে’’তি পঞ্ঞত্তি মগ্গস্স অরিযমগ্গস্স ভাৰনায পঞ্ঞাপনতো ভাৰনাপঞ্ঞত্তি নাম।
‘‘Katamā suttappadesabhūtā paññatti katamesaṃ dhammānaṃ paññattī’’ti pucchitabbattā ‘‘tasmā’’tiādi vuttaṃ. ‘‘Tasmā rakkhitacittassā’’ti paññatti satiyā padaṭṭhānassa rakkhitabbassa cittassa paññāpanato satiyā padaṭṭhānapaññatti nāma. Satiyā hi rakkhitabbaṃ cittaṃ satiyā padaṭṭhānaṃ adhiṭṭhānaṃ nāma. Tenāha aṭṭhakathāyaṃ – ‘‘adhiṭṭhahitvā rakkhantiyā satiyā rakkhiyamānaṃ cittaṃ tassā adhiṭṭhānaṃ viya hotī’’ti. ‘‘Sammāsaṅkappagocaro’’ti paññatti samathassa bhāvanāya paññāpanato samathassa bhāvanāpaññatti nāma. ‘‘Sammādiṭṭhipurekkhāro, ñatvāna udayabbaya’’nti paññatti dassanabhūmiyā nikkhepassa paññāpanato nikkhepapaññatti nāma. ‘‘Thinamiddhābhibhū bhikkhū’’ti samudayassa anavasesappahānassa paññāpanato anavasesappahānapaññatti nāma. ‘‘Sabbā duggatiyo jahe’’ti paññatti maggassa ariyamaggassa bhāvanāya paññāpanato bhāvanāpaññatti nāma.
‘‘এত্তকোৰ পঞ্ঞত্তিহারসম্পাতো পরিপুণ্ণো’’তি ৰত্তব্বত্তা ‘‘নিযুত্তো পঞ্ঞত্তিহারসম্পাতো’’তি ৰুত্তং। যেন যেন সংৰণ্ণনাৰিসেসভূতেন পঞ্ঞত্তিহারসম্পাতেন পঞ্ঞত্তিপ্পভেদা নিদ্ধারিতা, সো সো সংৰণ্ণনাৰিসেসভূতো পঞ্ঞত্তিহারসম্পাতো নিযুত্তো যথারহং নিদ্ধারেত্ৰা যুজ্জিতব্বোতি অত্থো গহেতব্বোতি।
‘‘Ettakova paññattihārasampāto paripuṇṇo’’ti vattabbattā ‘‘niyutto paññattihārasampāto’’ti vuttaṃ. Yena yena saṃvaṇṇanāvisesabhūtena paññattihārasampātena paññattippabhedā niddhāritā, so so saṃvaṇṇanāvisesabhūto paññattihārasampāto niyutto yathārahaṃ niddhāretvā yujjitabboti attho gahetabboti.
ইতি পঞ্ঞত্তিহারসম্পাতে সত্তিবলানুরূপা রচিতা
Iti paññattihārasampāte sattibalānurūpā racitā
ৰিভাৰনা নিট্ঠিতা।
Vibhāvanā niṭṭhitā.
পণ্ডিতেহি পন…পে॰… গহেতব্বোতি।
Paṇḍitehi pana…pe… gahetabboti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ১১. পঞ্ঞত্তিহারসম্পাতো • 11. Paññattihārasampāto
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ১১. পঞ্ঞত্তিহারসম্পাতৰণ্ণনা • 11. Paññattihārasampātavaṇṇanā
