| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
11. பஞ்ஞத்திஹாரவிப⁴ங்க³வண்ணனா
11. Paññattihāravibhaṅgavaṇṇanā
39. தத்த² கதமோ பஞ்ஞத்திஹாரோதி பஞ்ஞத்திஹாரவிப⁴ங்கோ³. தத்த² கா பனாயங் பஞ்ஞத்தீதி? ஆஹ ‘‘யா பகதிகதா²ய தே³ஸனா’’தி. இத³ங் வுத்தங் ஹோதி – யா தே³ஸனாஹாராத³யோ விய அஸ்ஸாதா³தி³பத³த்த²விஸேஸனித்³தா⁴ரணங் அகத்வா ப⁴க³வதோ ஸாபா⁴விகத⁴ம்மகதா²ய தே³ஸனா. யா தஸ்ஸா பஞ்ஞாபனா, அயங் பஞ்ஞத்திஹாரோ. யஸ்மா பன ஸா ப⁴க³வதோ ததா² ததா² வேனெய்யஸந்தானே யதா²தி⁴ப்பேதமத்த²ங் நிக்கி²பதீதி நிக்கே²போ. தஸ்ஸ சாயங் ஹாரோ து³க்கா²தி³ஸங்கா²தே பா⁴கே³ பகாரேஹி ஞாபேதி, அஸங்கரதோ வா ட²பேதி, தஸ்மா ‘‘நிக்கே²பபஞ்ஞத்தீ’’தி வுத்தோ. இதி பகதிகதா²ய தே³ஸனாதி ஸங்கே²பேன வுத்தமத்த²ங் வித்தா²ரேன விப⁴ஜிதுங் ‘‘கா ச பகதிகதா²ய தே³ஸனா’’தி புச்சி²த்வா ‘‘சத்தாரி ஸச்சானீ’’திஆதி³மாஹ.
39.Tatthakatamo paññattihāroti paññattihāravibhaṅgo. Tattha kā panāyaṃ paññattīti? Āha ‘‘yā pakatikathāya desanā’’ti. Idaṃ vuttaṃ hoti – yā desanāhārādayo viya assādādipadatthavisesaniddhāraṇaṃ akatvā bhagavato sābhāvikadhammakathāya desanā. Yā tassā paññāpanā, ayaṃ paññattihāro. Yasmā pana sā bhagavato tathā tathā veneyyasantāne yathādhippetamatthaṃ nikkhipatīti nikkhepo. Tassa cāyaṃ hāro dukkhādisaṅkhāte bhāge pakārehi ñāpeti, asaṅkarato vā ṭhapeti, tasmā ‘‘nikkhepapaññattī’’ti vutto. Iti pakatikathāya desanāti saṅkhepena vuttamatthaṃ vitthārena vibhajituṃ ‘‘kā ca pakatikathāya desanā’’ti pucchitvā ‘‘cattāri saccānī’’tiādimāha.
தத்த² இத³ங் து³க்க²ந்தி அயங் பஞ்ஞத்தீதி கக்க²ளபு²ஸனாதி³ஸபா⁴வே ரூபாரூபத⁴ம்மே அதீதாதி³வஸேன அனேகபே⁴த³பி⁴ன்னே அபி⁴ந்தி³த்வா பீளனஸங்க²தஸந்தாபவிபரிணாமட்ட²தாஸாமஞ்ஞேன யா குச்சி²தபா⁴வாதி³முகே²ன ஏகஜ்ஜ²ங் க³ஹணஸ்ஸ காரணபூ⁴தா பஞ்ஞத்தி, கா பன ஸாதி? நாமபஞ்ஞத்தினிப³ந்த⁴னா தஜ்ஜாபஞ்ஞத்தி. ‘‘விஞ்ஞத்திவிகாரஸஹிதோ ஸத்³தோ³ ஏவா’’தி அபரே. இமினா நயேன தத்த² தத்த² பஞ்ஞத்திஅத்தோ² வேதி³தப்³போ³. ‘‘பஞ்சன்னங் க²ந்தா⁴ன’’ந்திஆதி³னா தஸ்ஸா பஞ்ஞத்தியா உபாதா³னங் த³ஸ்ஸேதி. த³ஸன்னங் இந்த்³ரியானந்தி அட்ட² ரூபிந்த்³ரியானி மனிந்த்³ரியங் வேத³னிந்த்³ரியந்தி ஏவங் த³ஸன்னங். அனுப⁴வனஸாமஞ்ஞேன ஹி வேத³னா ஏகமிந்த்³ரியங் கதா, ததா² ஸத்³தா⁴த³யோ ச மக்³க³பக்கி²யாதி.
Tattha idaṃ dukkhanti ayaṃ paññattīti kakkhaḷaphusanādisabhāve rūpārūpadhamme atītādivasena anekabhedabhinne abhinditvā pīḷanasaṅkhatasantāpavipariṇāmaṭṭhatāsāmaññena yā kucchitabhāvādimukhena ekajjhaṃ gahaṇassa kāraṇabhūtā paññatti, kā pana sāti? Nāmapaññattinibandhanā tajjāpaññatti. ‘‘Viññattivikārasahito saddo evā’’ti apare. Iminā nayena tattha tattha paññattiattho veditabbo. ‘‘Pañcannaṃ khandhāna’’ntiādinā tassā paññattiyā upādānaṃ dasseti. Dasannaṃ indriyānanti aṭṭha rūpindriyāni manindriyaṃ vedanindriyanti evaṃ dasannaṃ. Anubhavanasāmaññena hi vedanā ekamindriyaṃ katā, tathā saddhādayo ca maggapakkhiyāti.
கப³ளங் கரீயதீதி கப³ளீகாரோதி வத்து²வஸேன அயங் நித்³தே³ஸோ. யாய ஓஜாய ஸத்தா யாபெந்தி, தஸ்ஸாயேதங் அதி⁴வசனங். ஸா ஹி ஓஜட்ட²மகஸ்ஸ ரூபஸ்ஸ ஆஹரணதோ ஆஹாரோ. அத்தீ²தி மக்³கே³ன அஸமுச்சி²ன்னதாய விஜ்ஜதி. ராகோ³தி ரஞ்ஜனட்டே²ன ராகோ³. நந்த³னட்டே²ன நந்தீ³. தண்ஹாயனட்டே²ன தண்ஹா. ஸப்³பா³னேதானி லோப⁴ஸ்ஸேவ நாமானி. பதிட்டி²தங் தத்த² விஞ்ஞாணங் விருள்ஹந்தி கம்மங் ஜவாபெத்வா படிஸந்தி⁴ஆகட்³ட⁴னஸமத்த²தாய பதிட்டி²தஞ்சேவ விஞ்ஞாணங் விருள்ஹஞ்ச. யத்தா²தி தேபூ⁴மகவட்டே பு⁴ம்மங், ஸப்³ப³த்த² வா புரிமபுரிமபதே³ ஏதங் பு⁴ம்மங். அத்தி² தத்த² ஸங்கா²ரானங் வுத்³தீ⁴தி யே இமஸ்மிங் விபாகவட்டே டி²தஸ்ஸ ஆயதிங் வட்³ட⁴னஹேதுகா ஸங்கா²ரா, தே ஸந்தா⁴ய வுத்தங் – ‘‘யத்த² அத்தி² ஆயதிங் புனப்³ப⁴வாபி⁴னிப்³ப³த்தீ’’தி யஸ்மிங் டா²னே ஆயதிங் புனப்³ப⁴வாபி⁴னிப்³ப³த்தி அத்தி². அத்தி² தத்த² ஆயதிங் ஜாதிஜராமரணந்தி யத்த² படிஸந்தி⁴க்³க³ஹணங், தத்த² க²ந்தா⁴னங் அபி⁴னிப்³ப³த்திலக்க²ணா ஜாதி, பரிபாகலக்க²ணா ஜரா, பே⁴த³னலக்க²ணங் மரணஞ்ச அத்தி². அயங் பபா⁴வபஞ்ஞத்தி து³க்க²ஸ்ஸ ச ஸமுத³யஸ்ஸ சாதி அயங் யதா²வுத்தா தே³ஸனா து³க்க²ஸச்சஸ்ஸ ஸமுத³யஸச்சஸ்ஸ ச ஸமுட்டா²னபஞ்ஞத்தி, விபாகவட்டஸ்ஸ ஸங்கா²ரானஞ்ச தண்ஹாபச்சயனித்³தே³ஸதோதி அதி⁴ப்பாயோ.
Kabaḷaṃ karīyatīti kabaḷīkāroti vatthuvasena ayaṃ niddeso. Yāya ojāya sattā yāpenti, tassāyetaṃ adhivacanaṃ. Sā hi ojaṭṭhamakassa rūpassa āharaṇato āhāro. Atthīti maggena asamucchinnatāya vijjati. Rāgoti rañjanaṭṭhena rāgo. Nandanaṭṭhena nandī. Taṇhāyanaṭṭhena taṇhā. Sabbānetāni lobhasseva nāmāni. Patiṭṭhitaṃ tattha viññāṇaṃ viruḷhanti kammaṃ javāpetvā paṭisandhiākaḍḍhanasamatthatāya patiṭṭhitañceva viññāṇaṃ viruḷhañca. Yatthāti tebhūmakavaṭṭe bhummaṃ, sabbattha vā purimapurimapade etaṃ bhummaṃ. Atthi tattha saṅkhārānaṃ vuddhīti ye imasmiṃ vipākavaṭṭe ṭhitassa āyatiṃ vaḍḍhanahetukā saṅkhārā, te sandhāya vuttaṃ – ‘‘yattha atthi āyatiṃ punabbhavābhinibbattī’’ti yasmiṃ ṭhāne āyatiṃ punabbhavābhinibbatti atthi. Atthi tattha āyatiṃjātijarāmaraṇanti yattha paṭisandhiggahaṇaṃ, tattha khandhānaṃ abhinibbattilakkhaṇā jāti, paripākalakkhaṇā jarā, bhedanalakkhaṇaṃ maraṇañca atthi. Ayaṃ pabhāvapaññatti dukkhassa ca samudayassa cāti ayaṃ yathāvuttā desanā dukkhasaccassa samudayasaccassa ca samuṭṭhānapaññatti, vipākavaṭṭassa saṅkhārānañca taṇhāpaccayaniddesatoti adhippāyo.
நத்தி² ராகோ³தி அக்³க³மக்³க³பா⁴வனாய ஸமுச்சி²ன்னத்தா நத்தி² சே ராகோ³. அப்பதிட்டி²தங் தத்த² விஞ்ஞாணங் அவிருள்ஹந்தி கம்மங் ஜவாபெத்வா படிஸந்தி⁴ஆகட்³ட⁴னஸமத்த²தாயாபா⁴வேன அப்பதிட்டி²தஞ்சேவ அவிருள்ஹஞ்சாதி வுத்தபடிபக்க²னயேன அத்தோ² வேதி³தப்³போ³.
Natthi rāgoti aggamaggabhāvanāya samucchinnattā natthi ce rāgo. Appatiṭṭhitaṃ tattha viññāṇaṃ aviruḷhanti kammaṃ javāpetvā paṭisandhiākaḍḍhanasamatthatāyābhāvena appatiṭṭhitañceva aviruḷhañcāti vuttapaṭipakkhanayena attho veditabbo.
‘‘அயங் பரிஞ்ஞாபஞ்ஞத்தீ’’திஆதி³னா ஏகாபி⁴ஸமயவஸேனேவ மக்³க³ஸம்மாதி³ட்டி² சதூஸு அரியஸச்சேஸு பவத்ததீதி த³ஸ்ஸேதி. அயங் பா⁴வனாபஞ்ஞத்தீதி அயங் த்³வாராரம்மணேஹி ச²த்³வாரப்பவத்தனத⁴ம்மானங் அனிச்சானுபஸ்ஸனா மக்³க³ஸ்ஸ பா⁴வனாபஞ்ஞத்தி. நிரோத⁴பஞ்ஞத்தி நிரோத⁴ஸ்ஸாதி ரோத⁴ஸங்கா²தாய தண்ஹாய மக்³கே³ன அனவஸேஸனிரோத⁴பஞ்ஞத்தி. உப்பாத³பஞ்ஞத்தீதி உப்பன்னஸ்ஸ பஞ்ஞாபனா. ஓகாஸபஞ்ஞத்தீதி டா²னஸ்ஸ பஞ்ஞாபனா. ஆஹடனாபஞ்ஞத்தீதி நீஹரணபஞ்ஞத்தி. ஆஸாடிகானந்தி கு³ன்னங் வணேஸு நீலமக்கி²காஹி ட²பிதஅண்ட³கா ஆஸாடிகா நாம. எத்த² யஸ்ஸ உப்பன்னா, தஸ்ஸ ஸத்தஸ்ஸ அனயப்³யஸனஹேதுதாய ஆஸாடிகா வியாதி ஆஸாடிகா, கிலேஸா, தேஸங் ஆஸாடிகானங். அபி⁴னிகா⁴தபஞ்ஞத்தீதி ஸமுக்³கா⁴தபஞ்ஞத்தி.
‘‘Ayaṃ pariññāpaññattī’’tiādinā ekābhisamayavaseneva maggasammādiṭṭhi catūsu ariyasaccesu pavattatīti dasseti. Ayaṃ bhāvanāpaññattīti ayaṃ dvārārammaṇehi chadvārappavattanadhammānaṃ aniccānupassanā maggassa bhāvanāpaññatti. Nirodhapaññatti nirodhassāti rodhasaṅkhātāya taṇhāya maggena anavasesanirodhapaññatti. Uppādapaññattīti uppannassa paññāpanā. Okāsapaññattīti ṭhānassa paññāpanā. Āhaṭanāpaññattīti nīharaṇapaññatti. Āsāṭikānanti gunnaṃ vaṇesu nīlamakkhikāhi ṭhapitaaṇḍakā āsāṭikā nāma. Ettha yassa uppannā, tassa sattassa anayabyasanahetutāya āsāṭikā viyāti āsāṭikā, kilesā, tesaṃ āsāṭikānaṃ. Abhinighātapaññattīti samugghātapaññatti.
41. ஏவங் வட்டவிவட்டமுகே²ன ஸம்மஸனஉபாதா³னக்க²ந்த⁴முகே²னேவ ஸச்சேஸு பஞ்ஞத்திவிபா⁴க³ங் த³ஸ்ஸெத்வா இதா³னி தேபரிவட்டவஸேன த³ஸ்ஸேதுங் ‘‘இத³ங் ‘து³க்க²’ந்தி மே, பி⁴க்க²வே’’திஆதி³ ஆரத்³த⁴ங். தத்த² த³ஸ்ஸனட்டே²ன சக்கு². யதா²ஸபா⁴வதோ ஜானநட்டே²ன ஞாணங். படிவிஜ்ஜ²னட்டே²ன பஞ்ஞா. விதி³தகரணட்டே²ன விஜ்ஜா. ஓபா⁴ஸனட்டே²ன ஆலோகோ. ஸப்³ப³ங் பஞ்ஞாவேவசனமேவ. அயங் வேவசனபஞ்ஞத்தி. ஸச்சி²கிரியாபஞ்ஞத்தீதி பச்சக்க²கரணபஞ்ஞத்தி.
41. Evaṃ vaṭṭavivaṭṭamukhena sammasanaupādānakkhandhamukheneva saccesu paññattivibhāgaṃ dassetvā idāni teparivaṭṭavasena dassetuṃ ‘‘idaṃ ‘dukkha’nti me, bhikkhave’’tiādi āraddhaṃ. Tattha dassanaṭṭhena cakkhu. Yathāsabhāvato jānanaṭṭhena ñāṇaṃ. Paṭivijjhanaṭṭhena paññā. Viditakaraṇaṭṭhena vijjā. Obhāsanaṭṭhena āloko. Sabbaṃ paññāvevacanameva. Ayaṃ vevacanapaññatti. Sacchikiriyāpaññattīti paccakkhakaraṇapaññatti.
துலமதுலஞ்சாதி கா³தா²ய பசுரஜனானங் பச்சக்க²பா⁴வதோ துலிதங் பரிச்சி²ன்னந்தி துலங், காமாவசரங். ந துலந்தி அதுலங், துலங் வா ஸதி³ஸமஸ்ஸ அஞ்ஞங் லோகியகம்மங் நத்தீ²தி அதுலங், மஹக்³க³தகம்மங். காமாவசரரூபாவசரகம்மங் வா துலங், அரூபாவசரங் அதுலங், அப்பவிபாகங் வா துலங். ப³ஹுவிபாகங் அதுலங். ஸம்ப⁴வதி ஏதேனாதி ஸம்ப⁴வங், ஸம்ப⁴வஹேதுபூ⁴தங். ப⁴வஸங்கா²ரங் புனப்³ப⁴வஸங்க²ரணகங். அவஸ்ஸஜீதி விஸ்ஸஜ்ஜேஸி. முனீதி பு³த்³த⁴முனி. அஜ்ஜ²த்தரதோதி நியகஜ்ஜ²த்தரதோ . ஸமாஹிதோதி உபசாரப்பனாஸமாதி⁴வஸேன ஸமாஹிதோ. அபி⁴ந்தி³ கவசமிவாதி கவசங் விய பி⁴ந்தி³. அத்தஸம்ப⁴வந்தி அத்தனி ஸஞ்ஜாதங் கிலேஸங். இத³ங் வுத்தங் ஹோதி – ஸவிபாகட்டே²ன ஸம்ப⁴வங் ப⁴வாபி⁴ஸங்க²ரணட்டே²ன ப⁴வஸங்கா²ரந்தி ச லத்³த⁴னாமங் துலாதுலஸங்கா²தங் லோகியகம்மஞ்ச ஒஸ்ஸஜி, ஸங்கா³மஸீஸே மஹாயோதோ⁴ கவசங் விய அத்தஸம்ப⁴வங் கிலேஸஞ்ச அஜ்ஜ²த்தரதோ ஸமாஹிதோ ஹுத்வா அபி⁴ந்தீ³தி.
Tulamatulañcāti gāthāya pacurajanānaṃ paccakkhabhāvato tulitaṃ paricchinnanti tulaṃ, kāmāvacaraṃ. Na tulanti atulaṃ, tulaṃ vā sadisamassa aññaṃ lokiyakammaṃ natthīti atulaṃ, mahaggatakammaṃ. Kāmāvacararūpāvacarakammaṃ vā tulaṃ, arūpāvacaraṃ atulaṃ, appavipākaṃ vā tulaṃ. Bahuvipākaṃ atulaṃ. Sambhavati etenāti sambhavaṃ, sambhavahetubhūtaṃ. Bhavasaṅkhāraṃ punabbhavasaṅkharaṇakaṃ. Avassajīti vissajjesi. Munīti buddhamuni. Ajjhattaratoti niyakajjhattarato . Samāhitoti upacārappanāsamādhivasena samāhito. Abhindi kavacamivāti kavacaṃ viya bhindi. Attasambhavanti attani sañjātaṃ kilesaṃ. Idaṃ vuttaṃ hoti – savipākaṭṭhena sambhavaṃ bhavābhisaṅkharaṇaṭṭhena bhavasaṅkhāranti ca laddhanāmaṃ tulātulasaṅkhātaṃ lokiyakammañca ossaji, saṅgāmasīse mahāyodho kavacaṃ viya attasambhavaṃ kilesañca ajjhattarato samāhito hutvā abhindīti.
அத² வா துலந்தி துலயந்தோ தீரெந்தோ. அதுலஞ்ச ஸம்ப⁴வந்தி நிப்³பா³னஞ்சேவ ஸம்ப⁴வஞ்ச. ப⁴வஸங்கா²ரந்தி ப⁴வகா³மிகம்மங். அவஸ்ஸஜி முனீதி ‘‘பஞ்சக்க²ந்தா⁴ அனிச்சா, தேஸங் நிரோதோ⁴ நிப்³பா³னங் நிச்ச’’ந்திஆதி³னா (படி॰ ம॰ 3.38 அத்த²தோ ஸமானங்) நயேன துலயந்தோ பு³த்³த⁴முனி ப⁴வே ஆதீ³னவங் நிப்³பா³னே ஆனிஸங்ஸஞ்ச தி³ஸ்வா தங் க²ந்தா⁴னங் மூலபூ⁴தங் ப⁴வஸங்கா²ரங் கம்மக்க²யகரேன அரியமக்³கே³ன அவஸ்ஸஜி. கத²ங்? அஜ்ஜ²த்தரதோ. ஸோ ஹி விபஸ்ஸனாவஸேன அஜ்ஜ²த்தரதோ ஸமத²வஸேன ஸமாஹிதோ கவசமிவ அத்தபா⁴வங் பரியோனந்தி⁴த்வா டி²தங் அத்தனி ஸம்ப⁴வத்தா ‘‘அத்தஸம்ப⁴வ’’ந்தி லத்³த⁴னாமங் ஸப்³ப³ங் கிலேஸஜாதங் அபி⁴ந்தி³, கிலேஸாபா⁴வே கம்மங் அப்படிஸந்தி⁴கத்தா அவஸ்ஸட்ட²ங் நாம ஹோதி, கிலேஸாபா⁴வேன கம்மங் ஜஹீதி அத்தோ² (தீ³॰ நி॰ அட்ட²॰ 2.169; உதா³॰ அட்ட²॰ 51).
Atha vā tulanti tulayanto tīrento. Atulañca sambhavanti nibbānañceva sambhavañca. Bhavasaṅkhāranti bhavagāmikammaṃ. Avassaji munīti ‘‘pañcakkhandhā aniccā, tesaṃ nirodho nibbānaṃ nicca’’ntiādinā (paṭi. ma. 3.38 atthato samānaṃ) nayena tulayanto buddhamuni bhave ādīnavaṃ nibbāne ānisaṃsañca disvā taṃ khandhānaṃ mūlabhūtaṃ bhavasaṅkhāraṃ kammakkhayakarena ariyamaggena avassaji. Kathaṃ? Ajjhattarato. So hi vipassanāvasena ajjhattarato samathavasena samāhito kavacamiva attabhāvaṃ pariyonandhitvā ṭhitaṃ attani sambhavattā ‘‘attasambhava’’nti laddhanāmaṃ sabbaṃ kilesajātaṃ abhindi, kilesābhāve kammaṃ appaṭisandhikattā avassaṭṭhaṃ nāma hoti, kilesābhāvena kammaṃ jahīti attho (dī. ni. aṭṭha. 2.169; udā. aṭṭha. 51).
ஸங்க²தாஸங்க²ததா⁴துவினிமுத்தஸ்ஸ அபி⁴ஞ்ஞெய்யஸ்ஸ அபா⁴வதோ வுத்தங் ‘‘துல…பே॰… த⁴ம்மான’’ந்தி. தேன த⁴ம்மபடிஸம்பி⁴தா³ வுத்தா ஹோதீதி ஆஹ – ‘‘நிக்கே²பபஞ்ஞத்தி த⁴ம்மபடிஸம்பி⁴தா³யா’’தி. ப⁴வஸங்கா²ரே ஸமுத³யபக்கி²யங் ஸந்தா⁴யாஹ ‘‘பரிச்சாக³பஞ்ஞத்தீ’’தி. து³க்க²ஸச்சபக்கி²யவஸேன ‘‘பரிஞ்ஞாபஞ்ஞத்தீ’’தி. ஸமாதா⁴னவிஸிட்ட²ஸ்ஸ அஜ்ஜ²த்தரதபா⁴வஸ்ஸ வஸேன ‘‘பா⁴வனாபஞ்ஞத்தி காயக³தாய ஸதியா’’தி வுத்தங். அஜ்ஜ²த்தரததாவிஸிட்ட²ஸ்ஸ பன ஸமாதா⁴னஸ்ஸ வஸேன ‘‘டி²திபஞ்ஞத்தி சித்தேகக்³க³தாயா’’தி வுத்தந்தி த³ட்ட²ப்³ப³ங். அபி⁴னிப்³பி³தா³பஞ்ஞத்தி சித்தஸ்ஸாதி ஆயுஸங்கா²ரொஸ்ஸஜ்ஜனவஸேன சித்தஸ்ஸ அபி⁴னீஹரணபஞ்ஞத்தி. உபாதா³னபஞ்ஞத்தீதி க³ஹணபஞ்ஞத்தி. ஸப்³ப³ஞ்ஞுதாயாதி ஸம்மாஸம்பு³த்³த⁴பா⁴வஸ்ஸ. ஏதேன அஸம்மாஸம்பு³த்³த⁴ஸ்ஸ ஆயுஸங்கா²ரொஸ்ஸஜ்ஜனங் நத்தீ²தி த³ஸ்ஸேதி. கிலேஸாபா⁴வேன ப⁴க³வா கம்மங் ஜஹதீதி த³ஸ்ஸெந்தோ ‘‘பதா³லனாபஞ்ஞத்தி அவிஜ்ஜண்ட³கோஸான’’ந்தி ஆஹ.
Saṅkhatāsaṅkhatadhātuvinimuttassa abhiññeyyassa abhāvato vuttaṃ ‘‘tula…pe… dhammāna’’nti. Tena dhammapaṭisambhidā vuttā hotīti āha – ‘‘nikkhepapaññatti dhammapaṭisambhidāyā’’ti. Bhavasaṅkhāre samudayapakkhiyaṃ sandhāyāha ‘‘pariccāgapaññattī’’ti. Dukkhasaccapakkhiyavasena ‘‘pariññāpaññattī’’ti. Samādhānavisiṭṭhassa ajjhattaratabhāvassa vasena ‘‘bhāvanāpaññatti kāyagatāya satiyā’’ti vuttaṃ. Ajjhattaratatāvisiṭṭhassa pana samādhānassa vasena ‘‘ṭhitipaññatti cittekaggatāyā’’ti vuttanti daṭṭhabbaṃ. Abhinibbidāpaññatti cittassāti āyusaṅkhārossajjanavasena cittassa abhinīharaṇapaññatti. Upādānapaññattīti gahaṇapaññatti. Sabbaññutāyāti sammāsambuddhabhāvassa. Etena asammāsambuddhassa āyusaṅkhārossajjanaṃ natthīti dasseti. Kilesābhāvena bhagavā kammaṃ jahatīti dassento ‘‘padālanāpaññatti avijjaṇḍakosāna’’nti āha.
யோ து³க்க²மத்³த³க்கி² யதோனிதா³னந்தி யோ ஆரத்³த⁴விபஸ்ஸகோ ஸப்³ப³ங் தேபூ⁴மகங் து³க்க²ங் அத³க்கி² பஸ்ஸி, தஞ்ச யதோனிதா³னங் யங் ஹேதுகங், தம்பிஸ்ஸ காரணபா⁴வேன தண்ஹங் பஸ்ஸி. காமேஸு ஸோ ஜந்து கத²ங் நமெய்யாதி ஸோ ஏவங் படிபன்னோ புரிஸோ ஸவத்து²காமேஸு கிலேஸகாமேஸு யேன பகாரேன நமெய்ய அபி⁴னமெய்ய, ஸோ பகாரோ நத்தி². கஸ்மா? காமா ஹி லோகே ஸங்கோ³தி ஞத்வா. யஸ்மா இமஸ்மிங் லோகே காமஸதி³ஸங் ப³ந்த⁴னங் நத்தி². வுத்தஞ்சேதங் ப⁴க³வதா ‘‘ந தங் த³ள்ஹங் ப³ந்த⁴னமாஹு தீ⁴ரா’’திஆதி³ (த⁴॰ ப॰ 345; ஸங்॰ நி॰ 1.121; நெத்தி॰ 106; பேடகோ 15), தஸ்மா ஸங்கா²ரே ஆஸஜ்ஜனட்டே²ன ஸங்கோ³தி விதி³த்வா. தேஸங் ஸதீமா வினயாய ஸிக்கே²தி காயக³தாஸதியோகே³ன ஸதிமா தேஸங் காமானங் வூபஸமாய தீஸுபி ஸிக்கா²ஸு அப்பமத்தோ ஸிக்கெ²ய்யாதி அத்தோ².
Yo dukkhamaddakkhi yatonidānanti yo āraddhavipassako sabbaṃ tebhūmakaṃ dukkhaṃ adakkhi passi, tañca yatonidānaṃ yaṃ hetukaṃ, tampissa kāraṇabhāvena taṇhaṃ passi. Kāmesu so jantu kathaṃnameyyāti so evaṃ paṭipanno puriso savatthukāmesu kilesakāmesu yena pakārena nameyya abhinameyya, so pakāro natthi. Kasmā? Kāmā hi loke saṅgoti ñatvā. Yasmā imasmiṃ loke kāmasadisaṃ bandhanaṃ natthi. Vuttañcetaṃ bhagavatā ‘‘na taṃ daḷhaṃ bandhanamāhu dhīrā’’tiādi (dha. pa. 345; saṃ. ni. 1.121; netti. 106; peṭako 15), tasmā saṅkhāre āsajjanaṭṭhena saṅgoti viditvā. Tesaṃ satīmā vinayāya sikkheti kāyagatāsatiyogena satimā tesaṃ kāmānaṃ vūpasamāya tīsupi sikkhāsu appamatto sikkheyyāti attho.
வேவசனபஞ்ஞத்தீதி க²ந்தா⁴தீ³னங் வேவசனபஞ்ஞத்தி. அத³க்கீ²தி பன பதே³ன ஸம்ப³ந்த⁴த்தா வுத்தங் – ‘‘து³க்க²ஸ்ஸ பரிஞ்ஞாபஞ்ஞத்தி சா’’தி. பச்சத்தி²கதோ த³ஸ்ஸனபஞ்ஞத்தீதி அனத்த²ஜனநதோ பச்சத்தி²கதோ த³ஸ்ஸனபஞ்ஞத்தி. பாவககப்பாதி ஜலிதஅக்³கி³க்க²ந்த⁴ஸதி³ஸா. பபாதஉரகோ³பமாதி பபாதூபமாஉரகோ³பமா ச.
Vevacanapaññattīti khandhādīnaṃ vevacanapaññatti. Adakkhīti pana padena sambandhattā vuttaṃ – ‘‘dukkhassa pariññāpaññatti cā’’ti. Paccatthikato dassanapaññattīti anatthajananato paccatthikato dassanapaññatti. Pāvakakappāti jalitaaggikkhandhasadisā. Papātauragopamāti papātūpamāuragopamā ca.
மோஹஸம்ப³ந்த⁴னோ லோகோதி அயங் லோகோ அவிஜ்ஜாஹேதுகேஹி ஸங்யோஜனேஹி ப³ந்தோ⁴. ப⁴ப்³ப³ரூபோவ தி³ஸ்ஸதீதி விபன்னஜ்ஜா²ஸயோபி மாயாய ஸாடெ²ய்யேன ச படிச்சா²தி³தஸபா⁴வோ ப⁴ப்³ப³ஜாதிகங் விய அத்தானங் த³ஸ்ஸேதி. உபதி⁴ப³ந்த⁴னோ பா³லோ, தமஸா பரிவாரிதோதி தஸ்ஸ பன பா³லஸ்ஸ ததா² த³ஸ்ஸனே ஸம்மோஹதமஸா பரிவாரிதத்தா காமகு³ணேஸு அனாதீ³னவத³ஸ்ஸிதாய கிலேஸாபி⁴ஸங்கா²ரேஹி ப³ந்த⁴த்தா. ததா² பூ⁴தோ சாயங் பா³லோ பண்டி³தானங் அஸ்ஸிரீ விய கா²யதி அலக்கி²கோ ஏவ ஹுத்வா உபட்டா²தி. தயித³ங் ஸப்³ப³ங் பா³லஸ்ஸ ஸதோ ராகா³தி³கிஞ்சனதோ. பண்டி³தஸ்ஸ பன பஞ்ஞாசக்கு²னா பஸ்ஸதோ நத்தி² கிஞ்சனந்தி அயங் ஸங்கே²பத்தோ². மோஹஸீஸேன விபல்லாஸா க³ஹிதாதி ஆஹ – ‘‘தே³ஸனாபஞ்ஞத்தி விபல்லாஸான’’ந்தி. விபரீதபஞ்ஞத்தீதி விபரீதாகாரேன உபட்ட²ஹமானஸ்ஸ பஞ்ஞாபனா.
Mohasambandhano lokoti ayaṃ loko avijjāhetukehi saṃyojanehi bandho. Bhabbarūpova dissatīti vipannajjhāsayopi māyāya sāṭheyyena ca paṭicchāditasabhāvo bhabbajātikaṃ viya attānaṃ dasseti. Upadhibandhano bālo, tamasā parivāritoti tassa pana bālassa tathā dassane sammohatamasā parivāritattā kāmaguṇesu anādīnavadassitāya kilesābhisaṅkhārehi bandhattā. Tathā bhūto cāyaṃ bālo paṇḍitānaṃ assirī viya khāyati alakkhiko eva hutvā upaṭṭhāti. Tayidaṃ sabbaṃ bālassa sato rāgādikiñcanato. Paṇḍitassa pana paññācakkhunā passato natthi kiñcananti ayaṃ saṅkhepattho. Mohasīsena vipallāsā gahitāti āha – ‘‘desanāpaññatti vipallāsāna’’nti. Viparītapaññattīti viparītākārena upaṭṭhahamānassa paññāpanā.
அத்தி² நிப்³பா³னந்தி ஸமணப்³ராஹ்மணானங் வாசாவத்து²மத்தமேவ. நத்தி² நிப்³பா³னந்தி பரமத்த²தோ அலப்³ப⁴மானஸபா⁴வத்தாதி விப்படிபன்னானங் மிச்சா²வாத³ங் ப⁴ஞ்ஜிதுங் ப⁴க³வதா வுத்தங் – ‘‘அத்தி², பி⁴க்க²வே, அஜாதங் அபூ⁴தங் அகதங் அஸங்க²த’’ந்தி. தத்த² ஹேதுங் த³ஸ்ஸேதுங் ‘‘நோ சேதங், பி⁴க்க²வே’’திஆதி³ வுத்தங். தஸ்ஸத்தோ² – பி⁴க்க²வே, யதி³ அஸங்க²தா தா⁴து ந அப⁴விஸ்ஸ, ந இத⁴ ஸப்³ப³ஸ்ஸ ஸங்க²தஸ்ஸ நிஸ்ஸரணங் ஸியா. நிப்³பா³னஞ்ஹி ஆரம்மணங் கத்வா பவத்தமானா ஸம்மாதி³ட்டி²ஆத³யோ மக்³க³த⁴ம்மா அனவஸேஸகிலேஸே ஸமுச்சி²ந்த³ந்தி, ததோ திவித⁴ஸ்ஸபி வட்டஸ்ஸ அப்பவத்தீதி.
Atthi nibbānanti samaṇabrāhmaṇānaṃ vācāvatthumattameva. Natthi nibbānanti paramatthato alabbhamānasabhāvattāti vippaṭipannānaṃ micchāvādaṃ bhañjituṃ bhagavatā vuttaṃ – ‘‘atthi, bhikkhave, ajātaṃ abhūtaṃ akataṃ asaṅkhata’’nti. Tattha hetuṃ dassetuṃ ‘‘no cetaṃ, bhikkhave’’tiādi vuttaṃ. Tassattho – bhikkhave, yadi asaṅkhatā dhātu na abhavissa, na idha sabbassa saṅkhatassa nissaraṇaṃ siyā. Nibbānañhi ārammaṇaṃ katvā pavattamānā sammādiṭṭhiādayo maggadhammā anavasesakilese samucchindanti, tato tividhassapi vaṭṭassa appavattīti.
தத்தா²யமதி⁴ப்பாயோ – யதா² பரிஞ்ஞெய்யதாய ஸஉத்தரானங் காமானங் ரூபானஞ்ச படிபக்க²பூ⁴தங் தப்³பி³து⁴ரஸபா⁴வங் நிஸ்ஸரணங் பஞ்ஞாயதி, ஏவங் தங்ஸபா⁴வானங் ஸங்க²ப⁴த⁴ம்மானங் படிபக்க²பூ⁴தேன தப்³பி³து⁴ரதாஸபா⁴வேன நிஸ்ஸரணேன ப⁴விதப்³ப³ங், யஞ்ச தங் நிஸ்ஸரணங். ஸா அஸங்க²தா தா⁴து. கிஞ்ச பி⁴ய்யோ? ஸங்க²தத⁴ம்மாரம்மணங் விபஸ்ஸனாஞாணங். அபி ச அனுலோமஞாணங் கிலேஸே ந ஸமுச்சே²த³வஸேன பஜஹிதுங் ஸக்கோதி. ஸம்முதிஸச்சாரம்மணம்பி பட²மஜ்ஜா²னாதீ³ஸு ஞாணங் விக்க²ம்ப⁴னமத்தமேவ கரோதி, கிலேஸானங் ந ஸமுச்சே²த³ங், ஸமுச்சே²த³ப்பஹானகரஞ்ச அரியமக்³க³ஞாணங், தஸ்ஸ ஸங்க²தத⁴ம்மஸம்முதிஸச்சவிபரீதேன ஆரம்மணேன ப⁴விதப்³ப³ங், ஸா அஸங்க²தா தா⁴து. ததா² நிப்³பா³ன-ஸத்³தோ³ கத்த²சி விஸயே அவிபரீதத்தோ² வேதி³தப்³போ³, உபசாரவுத்திஸப்³பா⁴வதோ, யதா² தங் ‘‘ஸீஹஸத்³தோ³’’தி.
Tatthāyamadhippāyo – yathā pariññeyyatāya sauttarānaṃ kāmānaṃ rūpānañca paṭipakkhabhūtaṃ tabbidhurasabhāvaṃ nissaraṇaṃ paññāyati, evaṃ taṃsabhāvānaṃ saṅkhabhadhammānaṃ paṭipakkhabhūtena tabbidhuratāsabhāvena nissaraṇena bhavitabbaṃ, yañca taṃ nissaraṇaṃ. Sā asaṅkhatā dhātu. Kiñca bhiyyo? Saṅkhatadhammārammaṇaṃ vipassanāñāṇaṃ. Api ca anulomañāṇaṃ kilese na samucchedavasena pajahituṃ sakkoti. Sammutisaccārammaṇampi paṭhamajjhānādīsu ñāṇaṃ vikkhambhanamattameva karoti, kilesānaṃ na samucchedaṃ, samucchedappahānakarañca ariyamaggañāṇaṃ, tassa saṅkhatadhammasammutisaccaviparītena ārammaṇena bhavitabbaṃ, sā asaṅkhatā dhātu. Tathā nibbāna-saddo katthaci visaye aviparītattho veditabbo, upacāravuttisabbhāvato, yathā taṃ ‘‘sīhasaddo’’ti.
அத² வா ‘‘அத்தி², பி⁴க்க²வே, அஜாதங் அபூ⁴தங் அகதங் அஸங்க²த’’ந்தி (உதா³॰ 73) வசனங் அவிபரீதத்த²ங், ப⁴க³வதா பா⁴ஸிதத்தா. யஞ்ஹி ப⁴க³வதா பா⁴ஸிதங், தங் அவிபரீதத்த²ங். யதா² தங் ‘‘ஸப்³பே³ ஸங்கா²ரா அனிச்சா, ஸப்³பே³ ஸங்கா²ரா து³க்கா², ஸப்³பே³ த⁴ம்மா அனத்தா’’தி (ம॰ நி॰ 1.353, 356; கதா²॰ 753; சூளனி॰ அஜிதமாணவபுச்சா²னித்³தே³ஸ 4; படி॰ ம॰ 1.31; நெத்தி॰ 5; த⁴॰ ப॰ 277-279), ஏவம்பி யுத்திவஸேன அஸங்க²தாய தா⁴துயா பரமத்த²தோ ஸப்³பா⁴வோ வேதி³தப்³போ³. கிங் வா ஏதாய யுத்திசிந்தாய? யஸ்மா ப⁴க³வதா ‘‘அத்தி², பி⁴க்க²வே, அஜாதங் அபூ⁴தங் அகதங் அஸங்க²தந்தி (உதா³॰ 73), அப்பச்சயா த⁴ம்மா அஸங்க²தா த⁴ம்மாதி (த⁴॰ ஸ॰ து³கமாதிகா 7-8) ச, அஸங்க²தஞ்ச வோ, பி⁴க்க²வே, த⁴ம்மங் தே³ஸெஸ்ஸாமி அஸங்க²தகா³மினிஞ்ச படிபத³’’ந்திஆதி³னா (ஸங்॰ நி॰ 4.366-367, 377) ச அனேகேஹி ஸுத்தபதே³ஹி நிப்³பா³னதா⁴துயா பரமத்த²தோ ஸப்³பா⁴வோ தே³ஸிதோதி. தத்த² உபனயனபஞ்ஞத்தீதி படிபக்க²தோ ஹேதுஉபனயனஸ்ஸ பஞ்ஞாபனா. ஜோதனாபஞ்ஞத்தீதி படிஞ்ஞாதஸ்ஸ அத்த²ஸ்ஸ ஸித்³தி⁴யா பகாஸனாபஞ்ஞத்தி. ஸேஸங் ஸப்³ப³ங் ஸுவிஞ்ஞெய்யமேவ.
Atha vā ‘‘atthi, bhikkhave, ajātaṃ abhūtaṃ akataṃ asaṅkhata’’nti (udā. 73) vacanaṃ aviparītatthaṃ, bhagavatā bhāsitattā. Yañhi bhagavatā bhāsitaṃ, taṃ aviparītatthaṃ. Yathā taṃ ‘‘sabbe saṅkhārā aniccā, sabbe saṅkhārā dukkhā, sabbe dhammā anattā’’ti (ma. ni. 1.353, 356; kathā. 753; cūḷani. ajitamāṇavapucchāniddesa 4; paṭi. ma. 1.31; netti. 5; dha. pa. 277-279), evampi yuttivasena asaṅkhatāya dhātuyā paramatthato sabbhāvo veditabbo. Kiṃ vā etāya yutticintāya? Yasmā bhagavatā ‘‘atthi, bhikkhave, ajātaṃ abhūtaṃ akataṃ asaṅkhatanti (udā. 73), appaccayā dhammā asaṅkhatā dhammāti (dha. sa. dukamātikā 7-8) ca, asaṅkhatañca vo, bhikkhave, dhammaṃ desessāmi asaṅkhatagāminiñca paṭipada’’ntiādinā (saṃ. ni. 4.366-367, 377) ca anekehi suttapadehi nibbānadhātuyā paramatthato sabbhāvo desitoti. Tattha upanayanapaññattīti paṭipakkhato hetuupanayanassa paññāpanā. Jotanāpaññattīti paṭiññātassa atthassa siddhiyā pakāsanāpaññatti. Sesaṃ sabbaṃ suviññeyyameva.
பஞ்ஞத்திஹாரவிப⁴ங்க³வண்ணனா நிட்டி²தா.
Paññattihāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 11. பஞ்ஞத்திஹாரவிப⁴ங்கோ³ • 11. Paññattihāravibhaṅgo
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 11. பஞ்ஞத்திஹாரவிப⁴ங்க³வண்ணனா • 11. Paññattihāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 11. பஞ்ஞத்திஹாரவிப⁴ங்க³விபா⁴வனா • 11. Paññattihāravibhaṅgavibhāvanā
