| Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
11. பஞ்ஞத்திஹாரவிப⁴ங்க³வண்ணனா
11. Paññattihāravibhaṅgavaṇṇanā
39. ப⁴க³வதோ ஸாபா⁴விகத⁴ம்மகதா²யாதி அத்தனோ பா⁴வோ ஸபா⁴வோ, ஸபா⁴வேன நிப்³ப³த்தா, ததோ வா ஆக³தாதி ஸாபா⁴விகா, ஸா ஏவ த⁴ம்மகதா²தி ஸாபா⁴விகத⁴ம்மகதா², பு³த்³தா⁴னங் ஸாமுக்கங்ஸிகத⁴ம்மகதா²தி அத்தோ² , தாய கரணபூ⁴தாய த⁴ம்மதே³ஸனாய அனஞ்ஞத்தேபி கதா²தே³ஸனானங் உபசாரஸித்³தே⁴ன பே⁴தே³னேவங் வுத்தங், அவயவஸமுதா³யவிபா⁴கே³ன வா. தேனாஹ ‘‘கா ச பகதிகதா²ய தே³ஸனா? சத்தாரி ஸச்சானீ’’தி. இத³ஞ்ஹி அத்த²ஸ்ஸ தே³ஸனாய அபே⁴தோ³பசாரங் கத்வா வுத்தங். தஸ்ஸா தே³ஸனாய பஞ்ஞாபனா. அயங் பஞ்ஞத்திஹாரோதி ஸங்கே²பேனேவ பஞ்ஞத்திஹாரஸ்ஸ ஸரூபமாஹ. ஸாதி யதா²வுத்ததே³ஸனா. ததா² ததா²தி யதா² யதா² ஸச்சானி தே³ஸேதப்³பா³னி, ததா² ததா². கத²ஞ்சேதானி தே³ஸேதப்³பா³னி? பரிஞ்ஞெய்யாதி³ப்பகாரேன. யதா²தி⁴ப்பேதந்தி அதி⁴ப்பேதானுரூபங், போ³த⁴னெய்யப³ந்த⁴வானங் போ³த⁴னாதி⁴ப்பாயானுகூலந்தி அத்தோ². அத்த²ந்தி தே³ஸேதப்³ப³த்த²ங், து³க்கா²தி³அத்த²மேவ வா. நிக்கி²பதீதி பதிட்டா²பேதி. யதோ ‘‘சத்தாரோ ஸுத்தனிக்கே²பா’’திஆதி³ (ம॰ நி॰ அட்ட²॰ 1.மூலபரியாயஸுத்தவண்ணனா) அட்ட²கதா²ஸு வுச்சதி.
39.Bhagavato sābhāvikadhammakathāyāti attano bhāvo sabhāvo, sabhāvena nibbattā, tato vā āgatāti sābhāvikā, sā eva dhammakathāti sābhāvikadhammakathā, buddhānaṃ sāmukkaṃsikadhammakathāti attho , tāya karaṇabhūtāya dhammadesanāya anaññattepi kathādesanānaṃ upacārasiddhena bhedenevaṃ vuttaṃ, avayavasamudāyavibhāgena vā. Tenāha ‘‘kā ca pakatikathāya desanā? Cattāri saccānī’’ti. Idañhi atthassa desanāya abhedopacāraṃ katvā vuttaṃ. Tassā desanāya paññāpanā. Ayaṃ paññattihāroti saṅkhepeneva paññattihārassa sarūpamāha. Sāti yathāvuttadesanā. Tathā tathāti yathā yathā saccāni desetabbāni, tathā tathā. Kathañcetāni desetabbāni? Pariññeyyādippakārena. Yathādhippetanti adhippetānurūpaṃ, bodhaneyyabandhavānaṃ bodhanādhippāyānukūlanti attho. Atthanti desetabbatthaṃ, dukkhādiatthameva vā. Nikkhipatīti patiṭṭhāpeti. Yato ‘‘cattāro suttanikkhepā’’tiādi (ma. ni. aṭṭha. 1.mūlapariyāyasuttavaṇṇanā) aṭṭhakathāsu vuccati.
தத்தா²தி நிக்கே²பதே³ஸனாயந்தி அத்தோ². மக்³க³பக்கி²யாதி து³க்க²ஸச்சதோ ப³ஹிகதாதி அதி⁴ப்பாயோ.
Tatthāti nikkhepadesanāyanti attho. Maggapakkhiyāti dukkhasaccato bahikatāti adhippāyo.
யஸ்மிங் டா²னேதி யஸ்மிங் ப⁴வாதி³ஸங்கா²தே டா²னே. யதா²வுத்தா தே³ஸனாதி சதுராஹாரபடிப³த்³த⁴ராகா³தி³முகே²ன வட்டதீ³பனீ வுத்தப்பகாரா தே³ஸனா.
Yasmiṃ ṭhāneti yasmiṃ bhavādisaṅkhāte ṭhāne. Yathāvuttā desanāti caturāhārapaṭibaddharāgādimukhena vaṭṭadīpanī vuttappakārā desanā.
41. தேபரிவட்டவஸேனாதி எத்தா²பி ‘‘ஸச்சேஸூ’’தி யோஜேதப்³ப³ங். பரிஞ்ஞாபஞ்ஞத்தீதி ஆஹாதி ஸம்ப³ந்தோ⁴. அஜ்ஜ²த்தரதோ, ஸமாஹிதோதி பத³த்³வயேன ஸமாதா⁴னவிஸிட்ட²ங் அஜ்ஜ²த்தரததாபா⁴வனங் தீ³பேதி கோ³சரஜ்ஜ²த்ததாதீ³பனதோ. கேவலோ ஹி அஜ்ஜ²த்தஸத்³தோ³ அஜ்ஜ²த்தஜ்ஜ²த்தகோ³சரஜ்ஜ²த்தேஸுபி வத்ததி. அஜ்ஜ²த்தரததாவிஸிட்ட²ஞ்ச ஸமாதா⁴னங் ஸாதிஸயங் சித்தட்டி²திங் தீ³பேதீதி இமமத்த²ங் த³ஸ்ஸேதி ‘‘ஸமாதா⁴னவிஸிட்ட²ஸ்ஸா’’திஆதி³னா.
41.Teparivaṭṭavasenāti etthāpi ‘‘saccesū’’ti yojetabbaṃ. Pariññāpaññattīti āhāti sambandho. Ajjhattarato, samāhitoti padadvayena samādhānavisiṭṭhaṃ ajjhattaratatābhāvanaṃ dīpeti gocarajjhattatādīpanato. Kevalo hi ajjhattasaddo ajjhattajjhattagocarajjhattesupi vattati. Ajjhattaratatāvisiṭṭhañca samādhānaṃ sātisayaṃ cittaṭṭhitiṃ dīpetīti imamatthaṃ dasseti ‘‘samādhānavisiṭṭhassā’’tiādinā.
ஆஸஜ்ஜனட்டே²னாதி ஆஸங்க³னட்டே²ன. ததா² த³ஸ்ஸனந்தி அததா²பூ⁴தஸ்ஸாபி ப⁴ப்³ப³ரூபஸ்ஸ விய அத்தனோ வித³ங்ஸனங். அலக்கி²கோதி விலக்கி²கோ.
Āsajjanaṭṭhenāti āsaṅganaṭṭhena. Tathā dassananti atathābhūtassāpi bhabbarūpassa viya attano vidaṃsanaṃ. Alakkhikoti vilakkhiko.
காமானந்தி காமாவசரத⁴ம்மானங். ரூபானந்தி ரூபாவசரத⁴ம்மானங். நிஸ்ஸரணந்தி காமானங் ரூபாவசரத⁴ம்மா நிஸ்ஸரணங், தேஸங் அரூபாவசரத⁴ம்மா நிஸ்ஸரணங். ஏவங் தங்ஸபா⁴வானந்தி ஸஉத்தரஸபா⁴வானங். ததா²தி யதா² ஸங்க²தத⁴ம்மானங் நிஸ்ஸரணபா⁴வதோ, கிலேஸஸமுச்சே²த³கஸ்ஸ அரியமக்³க³ஸ்ஸ ஆரம்மணபா⁴வதோ ச அத்தே²வ அஸங்க²தா தா⁴து, ததா² வுச்சமானேனாபி காரணேன அத்தே²வ அஸங்க²தா தா⁴தூதி த³ஸ்ஸேதி. கத்த²சி விஸயேதி அஸங்க²ததா⁴துங் ஸந்தா⁴ய வத³தி. அவிபரீதத்தோ²தி பூ⁴தத்தோ². ‘‘யதோ கோ² போ⁴ அயங் அத்தா பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி, எத்தாவதா கோ² போ⁴ அயங் அத்தா பரமதி³ட்ட²த⁴ம்மனிப்³பா³னப்பத்தோ ஹோதி (தீ³॰ நி॰ 1.94), ஸபகட்ட²னிப்³பா³னபா⁴வினோ’’தி ச ஏவமாதீ³ஸு உபசாரவுத்திஸப்³பா⁴வதோ. யதா² தங் ஸீஹஸத்³தோ³தி யதா² ‘‘ஸீஹோ மாணவகோ’’திஆதி³னா மாணவகாதீ³ஸு உபசாரவுத்தினா வத்தமானோ மிக³ராஜே பூ⁴தத்த²விஸயே தி³ட்டோ², ஏவங் நிப்³பா³னஸத்³தோ³பி காமகு³ணரூபஜ்ஜா²னஸமங்கி³தாஸு உபசாரவுத்தியா வத்தமானோ கத்த²சி விஸயே அவிபரீதத்தோ². யத்த² ச விஸயே அவிபரீதத்தோ², ஸா அஸங்க²தா தா⁴து. ஹத்த²தலே ஸஆமலகங் விய ஞெய்யங் பச்சக்க²தோ பஸ்ஸந்தஸ்ஸ ஏகப்பமாணஸ்ஸ ஸத்து²வசனமேவெத்த² பமாணந்தி த³ஸ்ஸெந்தோ ‘‘கிங் வா ஏதாய யுத்திசிந்தாயா’’திஆதி³மாஹ. ‘‘படிஞ்ஞாதஸ்ஸ அத்த²ஸ்ஸ ஸித்³தி⁴யா பகாஸனாபஞ்ஞத்தீ’’தி நிக³மங் ஸந்தா⁴யாஹாதி.
Kāmānanti kāmāvacaradhammānaṃ. Rūpānanti rūpāvacaradhammānaṃ. Nissaraṇanti kāmānaṃ rūpāvacaradhammā nissaraṇaṃ, tesaṃ arūpāvacaradhammā nissaraṇaṃ. Evaṃ taṃsabhāvānanti sauttarasabhāvānaṃ. Tathāti yathā saṅkhatadhammānaṃ nissaraṇabhāvato, kilesasamucchedakassa ariyamaggassa ārammaṇabhāvato ca attheva asaṅkhatā dhātu, tathā vuccamānenāpi kāraṇena attheva asaṅkhatā dhātūti dasseti. Katthaci visayeti asaṅkhatadhātuṃ sandhāya vadati. Aviparītatthoti bhūtattho. ‘‘Yato kho bho ayaṃ attā pañcahi kāmaguṇehi samappito samaṅgībhūto paricāreti, ettāvatā kho bho ayaṃ attā paramadiṭṭhadhammanibbānappatto hoti (dī. ni. 1.94), sapakaṭṭhanibbānabhāvino’’ti ca evamādīsu upacāravuttisabbhāvato. Yathā taṃ sīhasaddoti yathā ‘‘sīho māṇavako’’tiādinā māṇavakādīsu upacāravuttinā vattamāno migarāje bhūtatthavisaye diṭṭho, evaṃ nibbānasaddopi kāmaguṇarūpajjhānasamaṅgitāsu upacāravuttiyā vattamāno katthaci visaye aviparītattho. Yattha ca visaye aviparītattho, sā asaṅkhatā dhātu. Hatthatale saāmalakaṃ viya ñeyyaṃ paccakkhato passantassa ekappamāṇassa satthuvacanamevettha pamāṇanti dassento ‘‘kiṃ vā etāya yutticintāyā’’tiādimāha. ‘‘Paṭiññātassa atthassa siddhiyā pakāsanāpaññattī’’ti nigamaṃ sandhāyāhāti.
பஞ்ஞத்திஹாரவிப⁴ங்க³வண்ணனா நிட்டி²தா.
Paññattihāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 11. பஞ்ஞத்திஹாரவிப⁴ங்கோ³ • 11. Paññattihāravibhaṅgo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 11. பஞ்ஞத்திஹாரவிப⁴ங்க³வண்ணனா • 11. Paññattihāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 11. பஞ்ஞத்திஹாரவிப⁴ங்க³விபா⁴வனா • 11. Paññattihāravibhaṅgavibhāvanā
