| Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā |
༡༡. པཉྙཏྟིཧཱརཝིབྷངྒཝཎྞནཱ
11. Paññattihāravibhaṅgavaṇṇanā
༣༩. ཏཏྠ ཀཏམོ པཉྙཏྟིཧཱརོཏི པཉྙཏྟིཧཱརཝིབྷངྒོ། ཏཏྠ ཀཱ པནཱཡཾ པཉྙཏྟཱིཏི? ཨཱཧ ‘‘ཡཱ པཀཏིཀཐཱཡ དེསནཱ’’ཏི། ཨིདཾ ཝུཏྟཾ ཧོཏི – ཡཱ དེསནཱཧཱརཱདཡོ ཝིཡ ཨསྶཱདཱདིཔདཏྠཝིསེསནིདྡྷཱརཎཾ ཨཀཏྭཱ བྷགཝཏོ སཱབྷཱཝིཀདྷམྨཀཐཱཡ དེསནཱ། ཡཱ ཏསྶཱ པཉྙཱཔནཱ, ཨཡཾ པཉྙཏྟིཧཱརོ། ཡསྨཱ པན སཱ བྷགཝཏོ ཏཐཱ ཏཐཱ ཝེནེཡྻསནྟཱནེ ཡཐཱདྷིཔྤེཏམཏྠཾ ནིཀྑིཔཏཱིཏི ནིཀྑེཔོ། ཏསྶ ཙཱཡཾ ཧཱརོ དུཀྑཱདིསངྑཱཏེ བྷཱགེ པཀཱརེཧི ཉཱཔེཏི, ཨསངྐརཏོ ཝཱ ཋཔེཏི, ཏསྨཱ ‘‘ནིཀྑེཔཔཉྙཏྟཱི’’ཏི ཝུཏྟོ། ཨིཏི པཀཏིཀཐཱཡ དེསནཱཏི སངྑེཔེན ཝུཏྟམཏྠཾ ཝིཏྠཱརེན ཝིབྷཛིཏུཾ ‘‘ཀཱ ཙ པཀཏིཀཐཱཡ དེསནཱ’’ཏི པུཙྪིཏྭཱ ‘‘ཙཏྟཱརི སཙྩཱནཱི’’ཏིཨཱདིམཱཧ།
39.Tatthakatamo paññattihāroti paññattihāravibhaṅgo. Tattha kā panāyaṃ paññattīti? Āha ‘‘yā pakatikathāya desanā’’ti. Idaṃ vuttaṃ hoti – yā desanāhārādayo viya assādādipadatthavisesaniddhāraṇaṃ akatvā bhagavato sābhāvikadhammakathāya desanā. Yā tassā paññāpanā, ayaṃ paññattihāro. Yasmā pana sā bhagavato tathā tathā veneyyasantāne yathādhippetamatthaṃ nikkhipatīti nikkhepo. Tassa cāyaṃ hāro dukkhādisaṅkhāte bhāge pakārehi ñāpeti, asaṅkarato vā ṭhapeti, tasmā ‘‘nikkhepapaññattī’’ti vutto. Iti pakatikathāya desanāti saṅkhepena vuttamatthaṃ vitthārena vibhajituṃ ‘‘kā ca pakatikathāya desanā’’ti pucchitvā ‘‘cattāri saccānī’’tiādimāha.
ཏཏྠ ཨིདཾ དུཀྑནྟི ཨཡཾ པཉྙཏྟཱིཏི ཀཀྑལ༹ཕུསནཱདིསབྷཱཝེ རཱུཔཱརཱུཔདྷམྨེ ཨཏཱིཏཱདིཝསེན ཨནེཀབྷེདབྷིནྣེ ཨབྷིནྡིཏྭཱ པཱིལ༹ནསངྑཏསནྟཱཔཝིཔརིཎཱམཊྛཏཱསཱམཉྙེན ཡཱ ཀུཙྪིཏབྷཱཝཱདིམུཁེན ཨེཀཛ྄ཛྷཾ གཧཎསྶ ཀཱརཎབྷཱུཏཱ པཉྙཏྟི, ཀཱ པན སཱཏི? ནཱམཔཉྙཏྟིནིབནྡྷནཱ ཏཛྫཱཔཉྙཏྟི། ‘‘ཝིཉྙཏྟིཝིཀཱརསཧིཏོ སདྡོ ཨེཝཱ’’ཏི ཨཔརེ། ཨིམིནཱ ནཡེན ཏཏྠ ཏཏྠ པཉྙཏྟིཨཏྠོ ཝེདིཏབྦོ། ‘‘པཉྩནྣཾ ཁནྡྷཱན’’ནྟིཨཱདིནཱ ཏསྶཱ པཉྙཏྟིཡཱ ཨུཔཱདཱནཾ དསྶེཏི། དསནྣཾ ཨིནྡྲིཡཱནནྟི ཨཊྛ རཱུཔིནྡྲིཡཱནི མནིནྡྲིཡཾ ཝེདནིནྡྲིཡནྟི ཨེཝཾ དསནྣཾ། ཨནུབྷཝནསཱམཉྙེན ཧི ཝེདནཱ ཨེཀམིནྡྲིཡཾ ཀཏཱ, ཏཐཱ སདྡྷཱདཡོ ཙ མགྒཔཀྑིཡཱཏི།
Tattha idaṃ dukkhanti ayaṃ paññattīti kakkhaḷaphusanādisabhāve rūpārūpadhamme atītādivasena anekabhedabhinne abhinditvā pīḷanasaṅkhatasantāpavipariṇāmaṭṭhatāsāmaññena yā kucchitabhāvādimukhena ekajjhaṃ gahaṇassa kāraṇabhūtā paññatti, kā pana sāti? Nāmapaññattinibandhanā tajjāpaññatti. ‘‘Viññattivikārasahito saddo evā’’ti apare. Iminā nayena tattha tattha paññattiattho veditabbo. ‘‘Pañcannaṃ khandhāna’’ntiādinā tassā paññattiyā upādānaṃ dasseti. Dasannaṃ indriyānanti aṭṭha rūpindriyāni manindriyaṃ vedanindriyanti evaṃ dasannaṃ. Anubhavanasāmaññena hi vedanā ekamindriyaṃ katā, tathā saddhādayo ca maggapakkhiyāti.
ཀབལ༹ཾ ཀརཱིཡཏཱིཏི ཀབལཱི༹ཀཱརོཏི ཝཏྠུཝསེན ཨཡཾ ནིདྡེསོ། ཡཱཡ ཨོཛཱཡ སཏྟཱ ཡཱཔེནྟི, ཏསྶཱཡེཏཾ ཨདྷིཝཙནཾ། སཱ ཧི ཨོཛཊྛམཀསྶ རཱུཔསྶ ཨཱཧརཎཏོ ཨཱཧཱརོ། ཨཏྠཱིཏི མགྒེན ཨསམུཙྪིནྣཏཱཡ ཝིཛྫཏི། རཱགོཏི རཉྫནཊྛེན རཱགོ། ནནྡནཊྛེན ནནྡཱི། ཏཎྷཱཡནཊྛེན ཏཎྷཱ། སབྦཱནེཏཱནི ལོབྷསྶེཝ ནཱམཱནི། པཏིཊྛིཏཾ ཏཏྠ ཝིཉྙཱཎཾ ཝིརུལ༹ྷནྟི ཀམྨཾ ཛཝཱཔེཏྭཱ པཊིསནྡྷིཨཱཀཌྜྷནསམཏྠཏཱཡ པཏིཊྛིཏཉྩེཝ ཝིཉྙཱཎཾ ཝིརུལ༹ྷཉྩ། ཡཏྠཱཏི ཏེབྷཱུམཀཝཊྚེ བྷུམྨཾ, སབྦཏྠ ཝཱ པུརིམཔུརིམཔདེ ཨེཏཾ བྷུམྨཾ། ཨཏྠི ཏཏྠ སངྑཱརཱནཾ ཝུདྡྷཱིཏི ཡེ ཨིམསྨིཾ ཝིཔཱཀཝཊྚེ ཋིཏསྶ ཨཱཡཏིཾ ཝཌྜྷནཧེཏུཀཱ སངྑཱརཱ, ཏེ སནྡྷཱཡ ཝུཏྟཾ – ‘‘ཡཏྠ ཨཏྠི ཨཱཡཏིཾ པུནབྦྷཝཱབྷིནིབྦཏྟཱི’’ཏི ཡསྨིཾ ཋཱནེ ཨཱཡཏིཾ པུནབྦྷཝཱབྷིནིབྦཏྟི ཨཏྠི། ཨཏྠི ཏཏྠ ཨཱཡཏིཾ ཛཱཏིཛརཱམརཎནྟི ཡཏྠ པཊིསནྡྷིགྒཧཎཾ, ཏཏྠ ཁནྡྷཱནཾ ཨབྷིནིབྦཏྟིལཀྑཎཱ ཛཱཏི, པརིཔཱཀལཀྑཎཱ ཛརཱ, བྷེདནལཀྑཎཾ མརཎཉྩ ཨཏྠི། ཨཡཾ པབྷཱཝཔཉྙཏྟི དུཀྑསྶ ཙ སམུདཡསྶ ཙཱཏི ཨཡཾ ཡཐཱཝུཏྟཱ དེསནཱ དུཀྑསཙྩསྶ སམུདཡསཙྩསྶ ཙ སམུཊྛཱནཔཉྙཏྟི, ཝིཔཱཀཝཊྚསྶ སངྑཱརཱནཉྩ ཏཎྷཱཔཙྩཡནིདྡེསཏོཏི ཨདྷིཔྤཱཡོ།
Kabaḷaṃ karīyatīti kabaḷīkāroti vatthuvasena ayaṃ niddeso. Yāya ojāya sattā yāpenti, tassāyetaṃ adhivacanaṃ. Sā hi ojaṭṭhamakassa rūpassa āharaṇato āhāro. Atthīti maggena asamucchinnatāya vijjati. Rāgoti rañjanaṭṭhena rāgo. Nandanaṭṭhena nandī. Taṇhāyanaṭṭhena taṇhā. Sabbānetāni lobhasseva nāmāni. Patiṭṭhitaṃ tattha viññāṇaṃ viruḷhanti kammaṃ javāpetvā paṭisandhiākaḍḍhanasamatthatāya patiṭṭhitañceva viññāṇaṃ viruḷhañca. Yatthāti tebhūmakavaṭṭe bhummaṃ, sabbattha vā purimapurimapade etaṃ bhummaṃ. Atthi tattha saṅkhārānaṃ vuddhīti ye imasmiṃ vipākavaṭṭe ṭhitassa āyatiṃ vaḍḍhanahetukā saṅkhārā, te sandhāya vuttaṃ – ‘‘yattha atthi āyatiṃ punabbhavābhinibbattī’’ti yasmiṃ ṭhāne āyatiṃ punabbhavābhinibbatti atthi. Atthi tattha āyatiṃjātijarāmaraṇanti yattha paṭisandhiggahaṇaṃ, tattha khandhānaṃ abhinibbattilakkhaṇā jāti, paripākalakkhaṇā jarā, bhedanalakkhaṇaṃ maraṇañca atthi. Ayaṃ pabhāvapaññatti dukkhassa ca samudayassa cāti ayaṃ yathāvuttā desanā dukkhasaccassa samudayasaccassa ca samuṭṭhānapaññatti, vipākavaṭṭassa saṅkhārānañca taṇhāpaccayaniddesatoti adhippāyo.
ནཏྠི རཱགོཏི ཨགྒམགྒབྷཱཝནཱཡ སམུཙྪིནྣཏྟཱ ནཏྠི ཙེ རཱགོ། ཨཔྤཏིཊྛིཏཾ ཏཏྠ ཝིཉྙཱཎཾ ཨཝིརུལ༹ྷནྟི ཀམྨཾ ཛཝཱཔེཏྭཱ པཊིསནྡྷིཨཱཀཌྜྷནསམཏྠཏཱཡཱབྷཱཝེན ཨཔྤཏིཊྛིཏཉྩེཝ ཨཝིརུལ༹ྷཉྩཱཏི ཝུཏྟཔཊིཔཀྑནཡེན ཨཏྠོ ཝེདིཏབྦོ།
Natthi rāgoti aggamaggabhāvanāya samucchinnattā natthi ce rāgo. Appatiṭṭhitaṃ tattha viññāṇaṃ aviruḷhanti kammaṃ javāpetvā paṭisandhiākaḍḍhanasamatthatāyābhāvena appatiṭṭhitañceva aviruḷhañcāti vuttapaṭipakkhanayena attho veditabbo.
‘‘ཨཡཾ པརིཉྙཱཔཉྙཏྟཱི’’ཏིཨཱདིནཱ ཨེཀཱབྷིསམཡཝསེནེཝ མགྒསམྨཱདིཊྛི ཙཏཱུསུ ཨརིཡསཙྩེསུ པཝཏྟཏཱིཏི དསྶེཏི། ཨཡཾ བྷཱཝནཱཔཉྙཏྟཱིཏི ཨཡཾ དྭཱརཱརམྨཎེཧི ཚདྭཱརཔྤཝཏྟནདྷམྨཱནཾ ཨནིཙྩཱནུཔསྶནཱ མགྒསྶ བྷཱཝནཱཔཉྙཏྟི། ནིརོདྷཔཉྙཏྟི ནིརོདྷསྶཱཏི རོདྷསངྑཱཏཱཡ ཏཎྷཱཡ མགྒེན ཨནཝསེསནིརོདྷཔཉྙཏྟི། ཨུཔྤཱདཔཉྙཏྟཱིཏི ཨུཔྤནྣསྶ པཉྙཱཔནཱ། ཨོཀཱསཔཉྙཏྟཱིཏི ཋཱནསྶ པཉྙཱཔནཱ། ཨཱཧཊནཱཔཉྙཏྟཱིཏི ནཱིཧརཎཔཉྙཏྟི། ཨཱསཱཊིཀཱནནྟི གུནྣཾ ཝཎེསུ ནཱིལམཀྑིཀཱཧི ཋཔིཏཨཎྜཀཱ ཨཱསཱཊིཀཱ ནཱམ། ཨེཏྠ ཡསྶ ཨུཔྤནྣཱ, ཏསྶ སཏྟསྶ ཨནཡབྱསནཧེཏུཏཱཡ ཨཱསཱཊིཀཱ ཝིཡཱཏི ཨཱསཱཊིཀཱ, ཀིལེསཱ, ཏེསཾ ཨཱསཱཊིཀཱནཾ། ཨབྷིནིགྷཱཏཔཉྙཏྟཱིཏི སམུགྒྷཱཏཔཉྙཏྟི།
‘‘Ayaṃ pariññāpaññattī’’tiādinā ekābhisamayavaseneva maggasammādiṭṭhi catūsu ariyasaccesu pavattatīti dasseti. Ayaṃ bhāvanāpaññattīti ayaṃ dvārārammaṇehi chadvārappavattanadhammānaṃ aniccānupassanā maggassa bhāvanāpaññatti. Nirodhapaññatti nirodhassāti rodhasaṅkhātāya taṇhāya maggena anavasesanirodhapaññatti. Uppādapaññattīti uppannassa paññāpanā. Okāsapaññattīti ṭhānassa paññāpanā. Āhaṭanāpaññattīti nīharaṇapaññatti. Āsāṭikānanti gunnaṃ vaṇesu nīlamakkhikāhi ṭhapitaaṇḍakā āsāṭikā nāma. Ettha yassa uppannā, tassa sattassa anayabyasanahetutāya āsāṭikā viyāti āsāṭikā, kilesā, tesaṃ āsāṭikānaṃ. Abhinighātapaññattīti samugghātapaññatti.
༤༡. ཨེཝཾ ཝཊྚཝིཝཊྚམུཁེན སམྨསནཨུཔཱདཱནཀྑནྡྷམུཁེནེཝ སཙྩེསུ པཉྙཏྟིཝིབྷཱགཾ དསྶེཏྭཱ ཨིདཱནི ཏེཔརིཝཊྚཝསེན དསྶེཏུཾ ‘‘ཨིདཾ ‘དུཀྑ’ནྟི མེ, བྷིཀྑཝེ’’ཏིཨཱདི ཨཱརདྡྷཾ། ཏཏྠ དསྶནཊྛེན ཙཀྑུ། ཡཐཱསབྷཱཝཏོ ཛཱནནཊྛེན ཉཱཎཾ། པཊིཝིཛ྄ཛྷནཊྛེན པཉྙཱ། ཝིདིཏཀརཎཊྛེན ཝིཛྫཱ། ཨོབྷཱསནཊྛེན ཨཱལོཀོ། སབྦཾ པཉྙཱཝེཝཙནམེཝ། ཨཡཾ ཝེཝཙནཔཉྙཏྟི། སཙྪིཀིརིཡཱཔཉྙཏྟཱིཏི པཙྩཀྑཀརཎཔཉྙཏྟི།
41. Evaṃ vaṭṭavivaṭṭamukhena sammasanaupādānakkhandhamukheneva saccesu paññattivibhāgaṃ dassetvā idāni teparivaṭṭavasena dassetuṃ ‘‘idaṃ ‘dukkha’nti me, bhikkhave’’tiādi āraddhaṃ. Tattha dassanaṭṭhena cakkhu. Yathāsabhāvato jānanaṭṭhena ñāṇaṃ. Paṭivijjhanaṭṭhena paññā. Viditakaraṇaṭṭhena vijjā. Obhāsanaṭṭhena āloko. Sabbaṃ paññāvevacanameva. Ayaṃ vevacanapaññatti. Sacchikiriyāpaññattīti paccakkhakaraṇapaññatti.
ཏུལམཏུལཉྩཱཏི གཱཐཱཡ པཙུརཛནཱནཾ པཙྩཀྑབྷཱཝཏོ ཏུལིཏཾ པརིཙྪིནྣནྟི ཏུལཾ, ཀཱམཱཝཙརཾ། ན ཏུལནྟི ཨཏུལཾ, ཏུལཾ ཝཱ སདིསམསྶ ཨཉྙཾ ལོཀིཡཀམྨཾ ནཏྠཱིཏི ཨཏུལཾ, མཧགྒཏཀམྨཾ། ཀཱམཱཝཙརརཱུཔཱཝཙརཀམྨཾ ཝཱ ཏུལཾ, ཨརཱུཔཱཝཙརཾ ཨཏུལཾ, ཨཔྤཝིཔཱཀཾ ཝཱ ཏུལཾ། བཧུཝིཔཱཀཾ ཨཏུལཾ། སམྦྷཝཏི ཨེཏེནཱཏི སམྦྷཝཾ, སམྦྷཝཧེཏུབྷཱུཏཾ། བྷཝསངྑཱརཾ པུནབྦྷཝསངྑརཎཀཾ། ཨཝསྶཛཱིཏི ཝིསྶཛྫེསི། མུནཱིཏི བུདྡྷམུནི། ཨཛ྄ཛྷཏྟརཏོཏི ནིཡཀཛ྄ཛྷཏྟརཏོ ། སམཱཧིཏོཏི ཨུཔཙཱརཔྤནཱསམཱདྷིཝསེན སམཱཧིཏོ། ཨབྷིནྡི ཀཝཙམིཝཱཏི ཀཝཙཾ ཝིཡ བྷིནྡི། ཨཏྟསམྦྷཝནྟི ཨཏྟནི སཉྫཱཏཾ ཀིལེསཾ། ཨིདཾ ཝུཏྟཾ ཧོཏི – སཝིཔཱཀཊྛེན སམྦྷཝཾ བྷཝཱབྷིསངྑརཎཊྛེན བྷཝསངྑཱརནྟི ཙ ལདྡྷནཱམཾ ཏུལཱཏུལསངྑཱཏཾ ལོཀིཡཀམྨཉྩ ཨོསྶཛི, སངྒཱམསཱིསེ མཧཱཡོདྷོ ཀཝཙཾ ཝིཡ ཨཏྟསམྦྷཝཾ ཀིལེསཉྩ ཨཛ྄ཛྷཏྟརཏོ སམཱཧིཏོ ཧུཏྭཱ ཨབྷིནྡཱིཏི།
Tulamatulañcāti gāthāya pacurajanānaṃ paccakkhabhāvato tulitaṃ paricchinnanti tulaṃ, kāmāvacaraṃ. Na tulanti atulaṃ, tulaṃ vā sadisamassa aññaṃ lokiyakammaṃ natthīti atulaṃ, mahaggatakammaṃ. Kāmāvacararūpāvacarakammaṃ vā tulaṃ, arūpāvacaraṃ atulaṃ, appavipākaṃ vā tulaṃ. Bahuvipākaṃ atulaṃ. Sambhavati etenāti sambhavaṃ, sambhavahetubhūtaṃ. Bhavasaṅkhāraṃ punabbhavasaṅkharaṇakaṃ. Avassajīti vissajjesi. Munīti buddhamuni. Ajjhattaratoti niyakajjhattarato . Samāhitoti upacārappanāsamādhivasena samāhito. Abhindi kavacamivāti kavacaṃ viya bhindi. Attasambhavanti attani sañjātaṃ kilesaṃ. Idaṃ vuttaṃ hoti – savipākaṭṭhena sambhavaṃ bhavābhisaṅkharaṇaṭṭhena bhavasaṅkhāranti ca laddhanāmaṃ tulātulasaṅkhātaṃ lokiyakammañca ossaji, saṅgāmasīse mahāyodho kavacaṃ viya attasambhavaṃ kilesañca ajjhattarato samāhito hutvā abhindīti.
ཨཐ ཝཱ ཏུལནྟི ཏུལཡནྟོ ཏཱིརེནྟོ། ཨཏུལཉྩ སམྦྷཝནྟི ནིབྦཱནཉྩེཝ སམྦྷཝཉྩ། བྷཝསངྑཱརནྟི བྷཝགཱམིཀམྨཾ། ཨཝསྶཛི མུནཱིཏི ‘‘པཉྩཀྑནྡྷཱ ཨནིཙྩཱ, ཏེསཾ ནིརོདྷོ ནིབྦཱནཾ ནིཙྩ’’ནྟིཨཱདིནཱ (པཊི॰ མ॰ ༣.༣༨ ཨཏྠཏོ སམཱནཾ) ནཡེན ཏུལཡནྟོ བུདྡྷམུནི བྷཝེ ཨཱདཱིནཝཾ ནིབྦཱནེ ཨཱནིསཾསཉྩ དིསྭཱ ཏཾ ཁནྡྷཱནཾ མཱུལབྷཱུཏཾ བྷཝསངྑཱརཾ ཀམྨཀྑཡཀརེན ཨརིཡམགྒེན ཨཝསྶཛི། ཀཐཾ? ཨཛ྄ཛྷཏྟརཏོ། སོ ཧི ཝིཔསྶནཱཝསེན ཨཛ྄ཛྷཏྟརཏོ སམཐཝསེན སམཱཧིཏོ ཀཝཙམིཝ ཨཏྟབྷཱཝཾ པརིཡོནནྡྷིཏྭཱ ཋིཏཾ ཨཏྟནི སམྦྷཝཏྟཱ ‘‘ཨཏྟསམྦྷཝ’’ནྟི ལདྡྷནཱམཾ སབྦཾ ཀིལེསཛཱཏཾ ཨབྷིནྡི, ཀིལེསཱབྷཱཝེ ཀམྨཾ ཨཔྤཊིསནྡྷིཀཏྟཱ ཨཝསྶཊྛཾ ནཱམ ཧོཏི, ཀིལེསཱབྷཱཝེན ཀམྨཾ ཛཧཱིཏི ཨཏྠོ (དཱི॰ ནི॰ ཨཊྛ॰ ༢.༡༦༩; ཨུདཱ॰ ཨཊྛ॰ ༥༡)།
Atha vā tulanti tulayanto tīrento. Atulañca sambhavanti nibbānañceva sambhavañca. Bhavasaṅkhāranti bhavagāmikammaṃ. Avassaji munīti ‘‘pañcakkhandhā aniccā, tesaṃ nirodho nibbānaṃ nicca’’ntiādinā (paṭi. ma. 3.38 atthato samānaṃ) nayena tulayanto buddhamuni bhave ādīnavaṃ nibbāne ānisaṃsañca disvā taṃ khandhānaṃ mūlabhūtaṃ bhavasaṅkhāraṃ kammakkhayakarena ariyamaggena avassaji. Kathaṃ? Ajjhattarato. So hi vipassanāvasena ajjhattarato samathavasena samāhito kavacamiva attabhāvaṃ pariyonandhitvā ṭhitaṃ attani sambhavattā ‘‘attasambhava’’nti laddhanāmaṃ sabbaṃ kilesajātaṃ abhindi, kilesābhāve kammaṃ appaṭisandhikattā avassaṭṭhaṃ nāma hoti, kilesābhāvena kammaṃ jahīti attho (dī. ni. aṭṭha. 2.169; udā. aṭṭha. 51).
སངྑཏཱསངྑཏདྷཱཏུཝིནིམུཏྟསྶ ཨབྷིཉྙེཡྻསྶ ཨབྷཱཝཏོ ཝུཏྟཾ ‘‘ཏུལ…པེ॰… དྷམྨཱན’’ནྟི། ཏེན དྷམྨཔཊིསམྦྷིདཱ ཝུཏྟཱ ཧོཏཱིཏི ཨཱཧ – ‘‘ནིཀྑེཔཔཉྙཏྟི དྷམྨཔཊིསམྦྷིདཱཡཱ’’ཏི། བྷཝསངྑཱརེ སམུདཡཔཀྑིཡཾ སནྡྷཱཡཱཧ ‘‘པརིཙྩཱགཔཉྙཏྟཱི’’ཏི། དུཀྑསཙྩཔཀྑིཡཝསེན ‘‘པརིཉྙཱཔཉྙཏྟཱི’’ཏི། སམཱདྷཱནཝིསིཊྛསྶ ཨཛ྄ཛྷཏྟརཏབྷཱཝསྶ ཝསེན ‘‘བྷཱཝནཱཔཉྙཏྟི ཀཱཡགཏཱཡ སཏིཡཱ’’ཏི ཝུཏྟཾ། ཨཛ྄ཛྷཏྟརཏཏཱཝིསིཊྛསྶ པན སམཱདྷཱནསྶ ཝསེན ‘‘ཋིཏིཔཉྙཏྟི ཙིཏྟེཀགྒཏཱཡཱ’’ཏི ཝུཏྟནྟི དཊྛབྦཾ། ཨབྷིནིབྦིདཱཔཉྙཏྟི ཙིཏྟསྶཱཏི ཨཱཡུསངྑཱརོསྶཛྫནཝསེན ཙིཏྟསྶ ཨབྷིནཱིཧརཎཔཉྙཏྟི། ཨུཔཱདཱནཔཉྙཏྟཱིཏི གཧཎཔཉྙཏྟི། སབྦཉྙུཏཱཡཱཏི སམྨཱསམྦུདྡྷབྷཱཝསྶ། ཨེཏེན ཨསམྨཱསམྦུདྡྷསྶ ཨཱཡུསངྑཱརོསྶཛྫནཾ ནཏྠཱིཏི དསྶེཏི། ཀིལེསཱབྷཱཝེན བྷགཝཱ ཀམྨཾ ཛཧཏཱིཏི དསྶེནྟོ ‘‘པདཱལནཱཔཉྙཏྟི ཨཝིཛྫཎྜཀོསཱན’’ནྟི ཨཱཧ།
Saṅkhatāsaṅkhatadhātuvinimuttassa abhiññeyyassa abhāvato vuttaṃ ‘‘tula…pe… dhammāna’’nti. Tena dhammapaṭisambhidā vuttā hotīti āha – ‘‘nikkhepapaññatti dhammapaṭisambhidāyā’’ti. Bhavasaṅkhāre samudayapakkhiyaṃ sandhāyāha ‘‘pariccāgapaññattī’’ti. Dukkhasaccapakkhiyavasena ‘‘pariññāpaññattī’’ti. Samādhānavisiṭṭhassa ajjhattaratabhāvassa vasena ‘‘bhāvanāpaññatti kāyagatāya satiyā’’ti vuttaṃ. Ajjhattaratatāvisiṭṭhassa pana samādhānassa vasena ‘‘ṭhitipaññatti cittekaggatāyā’’ti vuttanti daṭṭhabbaṃ. Abhinibbidāpaññatti cittassāti āyusaṅkhārossajjanavasena cittassa abhinīharaṇapaññatti. Upādānapaññattīti gahaṇapaññatti. Sabbaññutāyāti sammāsambuddhabhāvassa. Etena asammāsambuddhassa āyusaṅkhārossajjanaṃ natthīti dasseti. Kilesābhāvena bhagavā kammaṃ jahatīti dassento ‘‘padālanāpaññatti avijjaṇḍakosāna’’nti āha.
ཡོ དུཀྑམདྡཀྑི ཡཏོནིདཱནནྟི ཡོ ཨཱརདྡྷཝིཔསྶཀོ སབྦཾ ཏེབྷཱུམཀཾ དུཀྑཾ ཨདཀྑི པསྶི, ཏཉྩ ཡཏོནིདཱནཾ ཡཾ ཧེཏུཀཾ, ཏམྤིསྶ ཀཱརཎབྷཱཝེན ཏཎྷཾ པསྶི། ཀཱམེསུ སོ ཛནྟུ ཀཐཾ ནམེཡྻཱཏི སོ ཨེཝཾ པཊིཔནྣོ པུརིསོ སཝཏྠུཀཱམེསུ ཀིལེསཀཱམེསུ ཡེན པཀཱརེན ནམེཡྻ ཨབྷིནམེཡྻ, སོ པཀཱརོ ནཏྠི། ཀསྨཱ? ཀཱམཱ ཧི ལོཀེ སངྒོཏི ཉཏྭཱ། ཡསྨཱ ཨིམསྨིཾ ལོཀེ ཀཱམསདིསཾ བནྡྷནཾ ནཏྠི། ཝུཏྟཉྩེཏཾ བྷགཝཏཱ ‘‘ན ཏཾ དལ༹ྷཾ བནྡྷནམཱཧུ དྷཱིརཱ’’ཏིཨཱདི (དྷ॰ པ॰ ༣༤༥; སཾ॰ ནི॰ ༡.༡༢༡; ནེཏྟི॰ ༡༠༦; པེཊཀོ ༡༥), ཏསྨཱ སངྑཱརེ ཨཱསཛྫནཊྛེན སངྒོཏི ཝིདིཏྭཱ། ཏེསཾ སཏཱིམཱ ཝིནཡཱཡ སིཀྑེཏི ཀཱཡགཏཱསཏིཡོགེན སཏིམཱ ཏེསཾ ཀཱམཱནཾ ཝཱུཔསམཱཡ ཏཱིསུཔི སིཀྑཱསུ ཨཔྤམཏྟོ སིཀྑེཡྻཱཏི ཨཏྠོ།
Yo dukkhamaddakkhi yatonidānanti yo āraddhavipassako sabbaṃ tebhūmakaṃ dukkhaṃ adakkhi passi, tañca yatonidānaṃ yaṃ hetukaṃ, tampissa kāraṇabhāvena taṇhaṃ passi. Kāmesu so jantu kathaṃnameyyāti so evaṃ paṭipanno puriso savatthukāmesu kilesakāmesu yena pakārena nameyya abhinameyya, so pakāro natthi. Kasmā? Kāmā hi loke saṅgoti ñatvā. Yasmā imasmiṃ loke kāmasadisaṃ bandhanaṃ natthi. Vuttañcetaṃ bhagavatā ‘‘na taṃ daḷhaṃ bandhanamāhu dhīrā’’tiādi (dha. pa. 345; saṃ. ni. 1.121; netti. 106; peṭako 15), tasmā saṅkhāre āsajjanaṭṭhena saṅgoti viditvā. Tesaṃ satīmā vinayāya sikkheti kāyagatāsatiyogena satimā tesaṃ kāmānaṃ vūpasamāya tīsupi sikkhāsu appamatto sikkheyyāti attho.
ཝེཝཙནཔཉྙཏྟཱིཏི ཁནྡྷཱདཱིནཾ ཝེཝཙནཔཉྙཏྟི། ཨདཀྑཱིཏི པན པདེན སམྦནྡྷཏྟཱ ཝུཏྟཾ – ‘‘དུཀྑསྶ པརིཉྙཱཔཉྙཏྟི ཙཱ’’ཏི། པཙྩཏྠིཀཏོ དསྶནཔཉྙཏྟཱིཏི ཨནཏྠཛནནཏོ པཙྩཏྠིཀཏོ དསྶནཔཉྙཏྟི། པཱཝཀཀཔྤཱཏི ཛལིཏཨགྒིཀྑནྡྷསདིསཱ། པཔཱཏཨུརགོཔམཱཏི པཔཱཏཱུཔམཱཨུརགོཔམཱ ཙ།
Vevacanapaññattīti khandhādīnaṃ vevacanapaññatti. Adakkhīti pana padena sambandhattā vuttaṃ – ‘‘dukkhassa pariññāpaññatti cā’’ti. Paccatthikato dassanapaññattīti anatthajananato paccatthikato dassanapaññatti. Pāvakakappāti jalitaaggikkhandhasadisā. Papātauragopamāti papātūpamāuragopamā ca.
མོཧསམྦནྡྷནོ ལོཀོཏི ཨཡཾ ལོཀོ ཨཝིཛྫཱཧེཏུཀེཧི སཾཡོཛནེཧི བནྡྷོ། བྷབྦརཱུཔོཝ དིསྶཏཱིཏི ཝིཔནྣཛ྄ཛྷཱསཡོཔི མཱཡཱཡ སཱཋེཡྻེན ཙ པཊིཙྪཱདིཏསབྷཱཝོ བྷབྦཛཱཏིཀཾ ཝིཡ ཨཏྟཱནཾ དསྶེཏི། ཨུཔདྷིབནྡྷནོ བཱལོ, ཏམསཱ པརིཝཱརིཏོཏི ཏསྶ པན བཱལསྶ ཏཐཱ དསྶནེ སམྨོཧཏམསཱ པརིཝཱརིཏཏྟཱ ཀཱམགུཎེསུ ཨནཱདཱིནཝདསྶིཏཱཡ ཀིལེསཱབྷིསངྑཱརེཧི བནྡྷཏྟཱ། ཏཐཱ བྷཱུཏོ ཙཱཡཾ བཱལོ པཎྜིཏཱནཾ ཨསྶིརཱི ཝིཡ ཁཱཡཏི ཨལཀྑིཀོ ཨེཝ ཧུཏྭཱ ཨུཔཊྛཱཏི། ཏཡིདཾ སབྦཾ བཱལསྶ སཏོ རཱགཱདིཀིཉྩནཏོ། པཎྜིཏསྶ པན པཉྙཱཙཀྑུནཱ པསྶཏོ ནཏྠི ཀིཉྩནནྟི ཨཡཾ སངྑེཔཏྠོ། མོཧསཱིསེན ཝིཔལླཱསཱ གཧིཏཱཏི ཨཱཧ – ‘‘དེསནཱཔཉྙཏྟི ཝིཔལླཱསཱན’’ནྟི། ཝིཔརཱིཏཔཉྙཏྟཱིཏི ཝིཔརཱིཏཱཀཱརེན ཨུཔཊྛཧམཱནསྶ པཉྙཱཔནཱ།
Mohasambandhano lokoti ayaṃ loko avijjāhetukehi saṃyojanehi bandho. Bhabbarūpova dissatīti vipannajjhāsayopi māyāya sāṭheyyena ca paṭicchāditasabhāvo bhabbajātikaṃ viya attānaṃ dasseti. Upadhibandhano bālo, tamasā parivāritoti tassa pana bālassa tathā dassane sammohatamasā parivāritattā kāmaguṇesu anādīnavadassitāya kilesābhisaṅkhārehi bandhattā. Tathā bhūto cāyaṃ bālo paṇḍitānaṃ assirī viya khāyati alakkhiko eva hutvā upaṭṭhāti. Tayidaṃ sabbaṃ bālassa sato rāgādikiñcanato. Paṇḍitassa pana paññācakkhunā passato natthi kiñcananti ayaṃ saṅkhepattho. Mohasīsena vipallāsā gahitāti āha – ‘‘desanāpaññatti vipallāsāna’’nti. Viparītapaññattīti viparītākārena upaṭṭhahamānassa paññāpanā.
ཨཏྠི ནིབྦཱནནྟི སམཎབྲཱཧྨཎཱནཾ ཝཱཙཱཝཏྠུམཏྟམེཝ། ནཏྠི ནིབྦཱནནྟི པརམཏྠཏོ ཨལབྦྷམཱནསབྷཱཝཏྟཱཏི ཝིཔྤཊིཔནྣཱནཾ མིཙྪཱཝཱདཾ བྷཉྫིཏུཾ བྷགཝཏཱ ཝུཏྟཾ – ‘‘ཨཏྠི, བྷིཀྑཝེ, ཨཛཱཏཾ ཨབྷཱུཏཾ ཨཀཏཾ ཨསངྑཏ’’ནྟི། ཏཏྠ ཧེཏུཾ དསྶེཏུཾ ‘‘ནོ ཙེཏཾ, བྷིཀྑཝེ’’ཏིཨཱདི ཝུཏྟཾ། ཏསྶཏྠོ – བྷིཀྑཝེ, ཡདི ཨསངྑཏཱ དྷཱཏུ ན ཨབྷཝིསྶ, ན ཨིདྷ སབྦསྶ སངྑཏསྶ ནིསྶརཎཾ སིཡཱ། ནིབྦཱནཉྷི ཨཱརམྨཎཾ ཀཏྭཱ པཝཏྟམཱནཱ སམྨཱདིཊྛིཨཱདཡོ མགྒདྷམྨཱ ཨནཝསེསཀིལེསེ སམུཙྪིནྡནྟི, ཏཏོ ཏིཝིདྷསྶཔི ཝཊྚསྶ ཨཔྤཝཏྟཱིཏི།
Atthi nibbānanti samaṇabrāhmaṇānaṃ vācāvatthumattameva. Natthi nibbānanti paramatthato alabbhamānasabhāvattāti vippaṭipannānaṃ micchāvādaṃ bhañjituṃ bhagavatā vuttaṃ – ‘‘atthi, bhikkhave, ajātaṃ abhūtaṃ akataṃ asaṅkhata’’nti. Tattha hetuṃ dassetuṃ ‘‘no cetaṃ, bhikkhave’’tiādi vuttaṃ. Tassattho – bhikkhave, yadi asaṅkhatā dhātu na abhavissa, na idha sabbassa saṅkhatassa nissaraṇaṃ siyā. Nibbānañhi ārammaṇaṃ katvā pavattamānā sammādiṭṭhiādayo maggadhammā anavasesakilese samucchindanti, tato tividhassapi vaṭṭassa appavattīti.
ཏཏྠཱཡམདྷིཔྤཱཡོ – ཡཐཱ པརིཉྙེཡྻཏཱཡ སཨུཏྟརཱནཾ ཀཱམཱནཾ རཱུཔཱནཉྩ པཊིཔཀྑབྷཱུཏཾ ཏབྦིདྷུརསབྷཱཝཾ ནིསྶརཎཾ པཉྙཱཡཏི, ཨེཝཾ ཏཾསབྷཱཝཱནཾ སངྑབྷདྷམྨཱནཾ པཊིཔཀྑབྷཱུཏེན ཏབྦིདྷུརཏཱསབྷཱཝེན ནིསྶརཎེན བྷཝིཏབྦཾ, ཡཉྩ ཏཾ ནིསྶརཎཾ། སཱ ཨསངྑཏཱ དྷཱཏུ། ཀིཉྩ བྷིཡྻོ? སངྑཏདྷམྨཱརམྨཎཾ ཝིཔསྶནཱཉཱཎཾ། ཨཔི ཙ ཨནུལོམཉཱཎཾ ཀིལེསེ ན སམུཙྪེདཝསེན པཛཧིཏུཾ སཀྐོཏི། སམྨུཏིསཙྩཱརམྨཎམྤི པཋམཛ྄ཛྷཱནཱདཱིསུ ཉཱཎཾ ཝིཀྑམྦྷནམཏྟམེཝ ཀརོཏི, ཀིལེསཱནཾ ན སམུཙྪེདཾ, སམུཙྪེདཔྤཧཱནཀརཉྩ ཨརིཡམགྒཉཱཎཾ, ཏསྶ སངྑཏདྷམྨསམྨུཏིསཙྩཝིཔརཱིཏེན ཨཱརམྨཎེན བྷཝིཏབྦཾ, སཱ ཨསངྑཏཱ དྷཱཏུ། ཏཐཱ ནིབྦཱན-སདྡོ ཀཏྠཙི ཝིསཡེ ཨཝིཔརཱིཏཏྠོ ཝེདིཏབྦོ, ཨུཔཙཱརཝུཏྟིསབྦྷཱཝཏོ, ཡཐཱ ཏཾ ‘‘སཱིཧསདྡོ’’ཏི།
Tatthāyamadhippāyo – yathā pariññeyyatāya sauttarānaṃ kāmānaṃ rūpānañca paṭipakkhabhūtaṃ tabbidhurasabhāvaṃ nissaraṇaṃ paññāyati, evaṃ taṃsabhāvānaṃ saṅkhabhadhammānaṃ paṭipakkhabhūtena tabbidhuratāsabhāvena nissaraṇena bhavitabbaṃ, yañca taṃ nissaraṇaṃ. Sā asaṅkhatā dhātu. Kiñca bhiyyo? Saṅkhatadhammārammaṇaṃ vipassanāñāṇaṃ. Api ca anulomañāṇaṃ kilese na samucchedavasena pajahituṃ sakkoti. Sammutisaccārammaṇampi paṭhamajjhānādīsu ñāṇaṃ vikkhambhanamattameva karoti, kilesānaṃ na samucchedaṃ, samucchedappahānakarañca ariyamaggañāṇaṃ, tassa saṅkhatadhammasammutisaccaviparītena ārammaṇena bhavitabbaṃ, sā asaṅkhatā dhātu. Tathā nibbāna-saddo katthaci visaye aviparītattho veditabbo, upacāravuttisabbhāvato, yathā taṃ ‘‘sīhasaddo’’ti.
ཨཐ ཝཱ ‘‘ཨཏྠི, བྷིཀྑཝེ, ཨཛཱཏཾ ཨབྷཱུཏཾ ཨཀཏཾ ཨསངྑཏ’’ནྟི (ཨུདཱ॰ ༧༣) ཝཙནཾ ཨཝིཔརཱིཏཏྠཾ, བྷགཝཏཱ བྷཱསིཏཏྟཱ། ཡཉྷི བྷགཝཏཱ བྷཱསིཏཾ, ཏཾ ཨཝིཔརཱིཏཏྠཾ། ཡཐཱ ཏཾ ‘‘སབྦེ སངྑཱརཱ ཨནིཙྩཱ, སབྦེ སངྑཱརཱ དུཀྑཱ, སབྦེ དྷམྨཱ ཨནཏྟཱ’’ཏི (མ॰ ནི॰ ༡.༣༥༣, ༣༥༦; ཀཐཱ॰ ༧༥༣; ཙཱུལ༹ནི॰ ཨཛིཏམཱཎཝཔུཙྪཱནིདྡེས ༤; པཊི॰ མ॰ ༡.༣༡; ནེཏྟི॰ ༥; དྷ॰ པ॰ ༢༧༧-༢༧༩), ཨེཝམྤི ཡུཏྟིཝསེན ཨསངྑཏཱཡ དྷཱཏུཡཱ པརམཏྠཏོ སབྦྷཱཝོ ཝེདིཏབྦོ། ཀིཾ ཝཱ ཨེཏཱཡ ཡུཏྟིཙིནྟཱཡ? ཡསྨཱ བྷགཝཏཱ ‘‘ཨཏྠི, བྷིཀྑཝེ, ཨཛཱཏཾ ཨབྷཱུཏཾ ཨཀཏཾ ཨསངྑཏནྟི (ཨུདཱ॰ ༧༣), ཨཔྤཙྩཡཱ དྷམྨཱ ཨསངྑཏཱ དྷམྨཱཏི (དྷ॰ ས॰ དུཀམཱཏིཀཱ ༧-༨) ཙ, ཨསངྑཏཉྩ ཝོ, བྷིཀྑཝེ, དྷམྨཾ དེསེསྶཱམི ཨསངྑཏགཱམིནིཉྩ པཊིཔད’’ནྟིཨཱདིནཱ (སཾ॰ ནི॰ ༤.༣༦༦-༣༦༧, ༣༧༧) ཙ ཨནེཀེཧི སུཏྟཔདེཧི ནིབྦཱནདྷཱཏུཡཱ པརམཏྠཏོ སབྦྷཱཝོ དེསིཏོཏི། ཏཏྠ ཨུཔནཡནཔཉྙཏྟཱིཏི པཊིཔཀྑཏོ ཧེཏུཨུཔནཡནསྶ པཉྙཱཔནཱ། ཛོཏནཱཔཉྙཏྟཱིཏི པཊིཉྙཱཏསྶ ཨཏྠསྶ སིདྡྷིཡཱ པཀཱསནཱཔཉྙཏྟི། སེསཾ སབྦཾ སུཝིཉྙེཡྻམེཝ།
Atha vā ‘‘atthi, bhikkhave, ajātaṃ abhūtaṃ akataṃ asaṅkhata’’nti (udā. 73) vacanaṃ aviparītatthaṃ, bhagavatā bhāsitattā. Yañhi bhagavatā bhāsitaṃ, taṃ aviparītatthaṃ. Yathā taṃ ‘‘sabbe saṅkhārā aniccā, sabbe saṅkhārā dukkhā, sabbe dhammā anattā’’ti (ma. ni. 1.353, 356; kathā. 753; cūḷani. ajitamāṇavapucchāniddesa 4; paṭi. ma. 1.31; netti. 5; dha. pa. 277-279), evampi yuttivasena asaṅkhatāya dhātuyā paramatthato sabbhāvo veditabbo. Kiṃ vā etāya yutticintāya? Yasmā bhagavatā ‘‘atthi, bhikkhave, ajātaṃ abhūtaṃ akataṃ asaṅkhatanti (udā. 73), appaccayā dhammā asaṅkhatā dhammāti (dha. sa. dukamātikā 7-8) ca, asaṅkhatañca vo, bhikkhave, dhammaṃ desessāmi asaṅkhatagāminiñca paṭipada’’ntiādinā (saṃ. ni. 4.366-367, 377) ca anekehi suttapadehi nibbānadhātuyā paramatthato sabbhāvo desitoti. Tattha upanayanapaññattīti paṭipakkhato hetuupanayanassa paññāpanā. Jotanāpaññattīti paṭiññātassa atthassa siddhiyā pakāsanāpaññatti. Sesaṃ sabbaṃ suviññeyyameva.
པཉྙཏྟིཧཱརཝིབྷངྒཝཎྞནཱ ནིཊྛིཏཱ།
Paññattihāravibhaṅgavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ནེཏྟིཔྤཀརཎཔཱལི༹ • Nettippakaraṇapāḷi / ༡༡. པཉྙཏྟིཧཱརཝིབྷངྒོ • 11. Paññattihāravibhaṅgo
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཔྤཀརཎ-ཊཱིཀཱ • Nettippakaraṇa-ṭīkā / ༡༡. པཉྙཏྟིཧཱརཝིབྷངྒཝཎྞནཱ • 11. Paññattihāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༡༡. པཉྙཏྟིཧཱརཝིབྷངྒཝིབྷཱཝནཱ • 11. Paññattihāravibhaṅgavibhāvanā
