| Library / Tipiṭaka / д̇ибидага • Tipiṭaka / нзд̇д̇иббагаран̣абаал̣и • Nettippakaraṇapāḷi |
11. бан̃н̃ад̇д̇ихааравибхан̇г̇о
11. Paññattihāravibhaṅgo
39. д̇ад̇т̇а гад̇амо бан̃н̃ад̇д̇ихааро? ‘‘згам̣ бхаг̇аваа д̇хаммам̣ бан̃н̃ад̇д̇ийхи вивид̇хаахи д̣̇зсзд̇ий’’д̇и.
39. Tattha katamo paññattihāro? ‘‘Ekaṃ bhagavā dhammaṃ paññattīhi vividhāhi desetī’’ti.
яаа багад̇игат̇ааяа д̣̇зсанаа. аяам̣ нигкзбабан̃н̃ад̇д̇и. гаа жа багад̇игат̇ааяа д̣̇зсанаа, жад̇д̇аари сажжаани. яат̇аа бхаг̇аваа ааха ‘‘ид̣̇ам̣ д̣̇угка’’нд̇и аяам̣ бан̃н̃ад̇д̇и бан̃жаннам̣ канд̇хаанам̣ чаннам̣ д̇хаад̇уунам̣ адтаарасаннам̣ д̇хаад̇уунам̣ д̣̇ваад̣̇асаннам̣ ааяад̇анаанам̣ д̣̇асаннам̣ инд̣̇рияаанам̣ нигкзбабан̃н̃ад̇д̇и.
Yā pakatikathāya desanā. Ayaṃ nikkhepapaññatti. Kā ca pakatikathāya desanā, cattāri saccāni. Yathā bhagavā āha ‘‘idaṃ dukkha’’nti ayaṃ paññatti pañcannaṃ khandhānaṃ channaṃ dhātūnaṃ aṭṭhārasannaṃ dhātūnaṃ dvādasannaṃ āyatanānaṃ dasannaṃ indriyānaṃ nikkhepapaññatti.
габ̣ал̣ийгаарз жз, бхигкавз, аахаарз ад̇т̇и рааг̇о ад̇т̇и нанд̣̇ий 1 ад̇т̇и д̇ан̣хаа, бад̇идтид̇ам̣ д̇ад̇т̇а вин̃н̃аан̣ам̣ вируул̣хам̣. яад̇т̇а бад̇идтид̇ам̣ вин̃н̃аан̣ам̣ вируул̣хам̣, ад̇т̇и д̇ад̇т̇а наамаруубасса авагганд̇и. яад̇т̇а ад̇т̇и наамаруубасса авагганд̇и, ад̇т̇и д̇ад̇т̇а сан̇каараанам̣ вуд̣̇д̇хи 2. яад̇т̇а ад̇т̇и сан̇каараанам̣ вуд̣̇д̇хи, ад̇т̇и д̇ад̇т̇а ааяад̇им̣ бунаб̣бхаваабхиниб̣б̣ад̇д̇и. яад̇т̇а ад̇т̇и ааяад̇им̣ бунаб̣бхаваабхиниб̣б̣ад̇д̇и, ад̇т̇и д̇ад̇т̇а ааяад̇им̣ ж̇аад̇иж̇араамаран̣ам̣. яад̇т̇а ад̇т̇и ааяад̇им̣ ж̇аад̇иж̇араамаран̣ам̣, сасогам̣ д̇ам̣, бхигкавз, сад̣̇арам̣ саубааяаасанд̇и вад̣̇аами.
Kabaḷīkāre ce, bhikkhave, āhāre atthi rāgo atthi nandī 3 atthi taṇhā, patiṭṭhitaṃ tattha viññāṇaṃ virūḷhaṃ. Yattha patiṭṭhitaṃ viññāṇaṃ virūḷhaṃ, atthi tattha nāmarūpassa avakkanti. Yattha atthi nāmarūpassa avakkanti, atthi tattha saṅkhārānaṃ vuddhi 4. Yattha atthi saṅkhārānaṃ vuddhi, atthi tattha āyatiṃ punabbhavābhinibbatti. Yattha atthi āyatiṃ punabbhavābhinibbatti, atthi tattha āyatiṃ jātijarāmaraṇaṃ. Yattha atthi āyatiṃ jātijarāmaraṇaṃ, sasokaṃ taṃ, bhikkhave, sadaraṃ saupāyāsanti vadāmi.
пассз жз…бз… маносан̃жзд̇анааяа жз, бхигкавз, аахаарз. вин̃н̃аан̣з жз, бхигкавз, аахаарз ад̇т̇и рааг̇о ад̇т̇и нанд̣̇ий ад̇т̇и д̇ан̣хаа, бад̇идтид̇ам̣ д̇ад̇т̇а вин̃н̃аан̣ам̣ вируул̣хам̣. яад̇т̇а бад̇идтид̇ам̣ вин̃н̃аан̣ам̣ вируул̣хам̣, ад̇т̇и д̇ад̇т̇а наамаруубасса авагганд̇и. яад̇т̇а ад̇т̇и наамаруубасса авагганд̇и , ад̇т̇и д̇ад̇т̇а сан̇каараанам̣ вуд̣̇д̇хи. яад̇т̇а ад̇т̇и сан̇каараанам̣ вуд̣̇д̇хи, ад̇т̇и д̇ад̇т̇а ааяад̇им̣ бунаб̣бхаваабхиниб̣б̣ад̇д̇и. яад̇т̇а ад̇т̇и ааяад̇им̣ бунаб̣бхаваабхиниб̣б̣ад̇д̇и, ад̇т̇и д̇ад̇т̇а ааяад̇им̣ ж̇аад̇иж̇араамаран̣ам̣. яад̇т̇а ад̇т̇и ааяад̇им̣ ж̇аад̇иж̇араамаран̣ам̣, сасогам̣ д̇ам̣, бхигкавз, сад̣̇арам̣ саубааяаасанд̇и вад̣̇аами. аяам̣ бабхавабан̃н̃ад̇д̇и д̣̇угкасса жа самуд̣̇аяасса жа.
Phasse ce…pe… manosañcetanāya ce, bhikkhave, āhāre. Viññāṇe ce, bhikkhave, āhāre atthi rāgo atthi nandī atthi taṇhā, patiṭṭhitaṃ tattha viññāṇaṃ virūḷhaṃ. Yattha patiṭṭhitaṃ viññāṇaṃ virūḷhaṃ, atthi tattha nāmarūpassa avakkanti. Yattha atthi nāmarūpassa avakkanti , atthi tattha saṅkhārānaṃ vuddhi. Yattha atthi saṅkhārānaṃ vuddhi, atthi tattha āyatiṃ punabbhavābhinibbatti. Yattha atthi āyatiṃ punabbhavābhinibbatti, atthi tattha āyatiṃ jātijarāmaraṇaṃ. Yattha atthi āyatiṃ jātijarāmaraṇaṃ, sasokaṃ taṃ, bhikkhave, sadaraṃ saupāyāsanti vadāmi. Ayaṃ pabhavapaññatti dukkhassa ca samudayassa ca.
габ̣ал̣ийгаарз жз, бхигкавз 5, аахаарз над̇т̇и рааг̇о над̇т̇и нанд̣̇ий над̇т̇и д̇ан̣хаа, аббад̇идтид̇ам̣ д̇ад̇т̇а вин̃н̃аан̣ам̣ авируул̣хам̣. яад̇т̇а аббад̇идтид̇ам̣ вин̃н̃аан̣ам̣ авируул̣хам̣, над̇т̇и д̇ад̇т̇а наамаруубасса авагганд̇и. яад̇т̇а над̇т̇и наамаруубасса авагганд̇и, над̇т̇и д̇ад̇т̇а сан̇каараанам̣ вуд̣̇д̇хи. яад̇т̇а над̇т̇и сан̇каараанам̣ вуд̣̇д̇хи, над̇т̇и д̇ад̇т̇а ааяад̇им̣ бунаб̣бхаваабхиниб̣б̣ад̇д̇и. яад̇т̇а над̇т̇и ааяад̇им̣ бунаб̣бхаваабхиниб̣б̣ад̇д̇и, над̇т̇и д̇ад̇т̇а ааяад̇им̣ ж̇аад̇иж̇араамаран̣ам̣. яад̇т̇а над̇т̇и ааяад̇им̣ ж̇аад̇иж̇араамаран̣ам̣, асогам̣ д̇ам̣, бхигкавз, ад̣̇арам̣ анубааяаасанд̇и вад̣̇аами.
Kabaḷīkāre ce, bhikkhave 6, āhāre natthi rāgo natthi nandī natthi taṇhā, appatiṭṭhitaṃ tattha viññāṇaṃ avirūḷhaṃ. Yattha appatiṭṭhitaṃ viññāṇaṃ avirūḷhaṃ, natthi tattha nāmarūpassa avakkanti. Yattha natthi nāmarūpassa avakkanti, natthi tattha saṅkhārānaṃ vuddhi. Yattha natthi saṅkhārānaṃ vuddhi, natthi tattha āyatiṃ punabbhavābhinibbatti. Yattha natthi āyatiṃ punabbhavābhinibbatti, natthi tattha āyatiṃ jātijarāmaraṇaṃ. Yattha natthi āyatiṃ jātijarāmaraṇaṃ, asokaṃ taṃ, bhikkhave, adaraṃ anupāyāsanti vadāmi.
пассз жз…бз… маносан̃жзд̇анааяа жз, бхигкавз, аахаарз. вин̃н̃аан̣з жз, бхигкавз, аахаарз над̇т̇и рааг̇о над̇т̇и нанд̣̇ий над̇т̇и д̇ан̣хаа, аббад̇идтид̇ам̣ д̇ад̇т̇а вин̃н̃аан̣ам̣ авируул̣хам̣. яад̇т̇а аббад̇идтид̇ам̣ вин̃н̃аан̣ам̣ авируул̣хам̣, над̇т̇и д̇ад̇т̇а наамаруубасса авагганд̇и. яад̇т̇а над̇т̇и наамаруубасса авагганд̇и, над̇т̇и д̇ад̇т̇а сан̇каараанам̣ вуд̣̇д̇хи. яад̇т̇а над̇т̇и сан̇каараанам̣ вуд̣̇д̇хи, над̇т̇и д̇ад̇т̇а ааяад̇им̣ бунаб̣бхаваабхиниб̣б̣ад̇д̇и. яад̇т̇а над̇т̇и ааяад̇им̣ бунаб̣бхаваабхиниб̣б̣ад̇д̇и, над̇т̇и д̇ад̇т̇а ааяад̇им̣ ж̇аад̇иж̇араамаран̣ам̣. яад̇т̇а над̇т̇и ааяад̇им̣ ж̇аад̇иж̇араамаран̣ам̣, асогам̣ д̇ам̣, бхигкавз, ад̣̇арам̣ анубааяаасанд̇и вад̣̇аами.
Phasse ce…pe… manosañcetanāya ce, bhikkhave, āhāre. Viññāṇe ce, bhikkhave, āhāre natthi rāgo natthi nandī natthi taṇhā, appatiṭṭhitaṃ tattha viññāṇaṃ avirūḷhaṃ. Yattha appatiṭṭhitaṃ viññāṇaṃ avirūḷhaṃ, natthi tattha nāmarūpassa avakkanti. Yattha natthi nāmarūpassa avakkanti, natthi tattha saṅkhārānaṃ vuddhi. Yattha natthi saṅkhārānaṃ vuddhi, natthi tattha āyatiṃ punabbhavābhinibbatti. Yattha natthi āyatiṃ punabbhavābhinibbatti, natthi tattha āyatiṃ jātijarāmaraṇaṃ. Yattha natthi āyatiṃ jātijarāmaraṇaṃ, asokaṃ taṃ, bhikkhave, adaraṃ anupāyāsanti vadāmi.
аяам̣ барин̃н̃аабан̃н̃ад̇д̇и д̣̇угкасса, бахаанабан̃н̃ад̇д̇и самуд̣̇аяасса, бхааванаабан̃н̃ад̇д̇и маг̇г̇асса, сажчигирияаабан̃н̃ад̇д̇и нирод̇хасса.
Ayaṃ pariññāpaññatti dukkhassa, pahānapaññatti samudayassa, bhāvanāpaññatti maggassa, sacchikiriyāpaññatti nirodhassa.
40. самаад̇хим̣, бхигкавз, бхаавзт̇а. аббамад̇д̇о нибаго сад̇о, самаахид̇о, бхигкавз, бхигку яат̇аабхууд̇ам̣ баж̇аанаад̇и. гин̃жа яат̇аабхууд̇ам̣ баж̇аанаад̇и? ‘‘жагку 7 анижжа’’нд̇и яат̇аабхууд̇ам̣ баж̇аанаад̇и. ‘‘руубаа анижжаа’’д̇и яат̇аабхууд̇ам̣ баж̇аанаад̇и ‘‘жагкувин̃н̃аан̣ам̣ анижжа’’нд̇и яат̇аабхууд̇ам̣ баж̇аанаад̇и. ‘‘жагкусампассо анижжо’’д̇и яат̇аабхууд̇ам̣ баж̇аанаад̇и. яамбид̣̇ам̣ 8 жагкусампассабажжаяаа уббаж̇ж̇ад̇и взд̣̇аяид̇ам̣ сукам̣ ваа д̣̇угкам̣ ваа ад̣̇угкамасукам̣ ваа, д̇амби анижжанд̇и яат̇аабхууд̇ам̣ баж̇аанаад̇и.
40. Samādhiṃ, bhikkhave, bhāvetha. Appamatto nipako sato, samāhito, bhikkhave, bhikkhu yathābhūtaṃ pajānāti. Kiñca yathābhūtaṃ pajānāti? ‘‘Cakkhu 9 anicca’’nti yathābhūtaṃ pajānāti. ‘‘Rūpā aniccā’’ti yathābhūtaṃ pajānāti ‘‘cakkhuviññāṇaṃ anicca’’nti yathābhūtaṃ pajānāti. ‘‘Cakkhusamphasso anicco’’ti yathābhūtaṃ pajānāti. Yampidaṃ 10 cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi aniccanti yathābhūtaṃ pajānāti.
сод̇ам̣ …бз… гхаанам̣…бз… ж̇ивхаа…бз… гааяо…бз… ‘‘мано анижжо’’д̇и 11 яат̇аабхууд̇ам̣ баж̇аанаад̇и. ‘‘д̇хаммаа анижжаа’’д̇и яат̇аабхууд̇ам̣ баж̇аанаад̇и. ‘‘мановин̃н̃аан̣ам̣ анижжа’’нд̇и яат̇аабхууд̇ам̣ баж̇аанаад̇и. ‘‘маносампассо анижжо’’д̇и яат̇аабхууд̇ам̣ баж̇аанаад̇и. яамбид̣̇ам̣ маносампассабажжаяаа уббаж̇ж̇ад̇и взд̣̇аяид̇ам̣ сукам̣ ваа д̣̇угкам̣ ваа ад̣̇угкамасукам̣ ваа, д̇амби анижжанд̇и яат̇аабхууд̇ам̣ баж̇аанаад̇и.
Sotaṃ …pe… ghānaṃ…pe… jivhā…pe… kāyo…pe… ‘‘mano anicco’’ti 12 yathābhūtaṃ pajānāti. ‘‘Dhammā aniccā’’ti yathābhūtaṃ pajānāti. ‘‘Manoviññāṇaṃ anicca’’nti yathābhūtaṃ pajānāti. ‘‘Manosamphasso anicco’’ti yathābhūtaṃ pajānāti. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā, tampi aniccanti yathābhūtaṃ pajānāti.
аяам̣ бхааванаабан̃н̃ад̇д̇и маг̇г̇асса, барин̃н̃аабан̃н̃ад̇д̇и д̣̇угкасса, бахаанабан̃н̃ад̇д̇и самуд̣̇аяасса, сажчигирияаабан̃н̃ад̇д̇и нирод̇хасса.
Ayaṃ bhāvanāpaññatti maggassa, pariññāpaññatti dukkhassa, pahānapaññatti samudayassa, sacchikiriyāpaññatti nirodhassa.
руубам̣ , раад̇ха, вигират̇а вид̇хамат̇а вид̣̇д̇хам̣сзт̇а вигийл̣анияам̣ 13 гарот̇а, бан̃н̃ааяа д̇ан̣хагкаяааяа бадибаж̇ж̇ат̇а. д̇ан̣хагкаяаа д̣̇угкагкаяо, д̣̇угкагкаяаа ниб̣б̣аанам̣. взд̣̇анам̣…бз…. сан̃н̃ам̣…бз… сан̇каарз вин̃н̃аан̣ам̣ вигират̇а вид̇хамат̇а вид̣̇д̇хам̣сзт̇а вигийл̣анияам̣ гарот̇а, бан̃н̃ааяа д̇ан̣хагкаяааяа бадибаж̇ж̇ат̇а. д̇ан̣хагкаяаа д̣̇угкагкаяо, д̣̇угкагкаяаа ниб̣б̣аанам̣.
Rūpaṃ , rādha, vikiratha vidhamatha viddhaṃsetha vikīḷaniyaṃ 14 karotha, paññāya taṇhakkhayāya paṭipajjatha. Taṇhakkhayā dukkhakkhayo, dukkhakkhayā nibbānaṃ. Vedanaṃ…pe…. Saññaṃ…pe… saṅkhāre viññāṇaṃ vikiratha vidhamatha viddhaṃsetha vikīḷaniyaṃ karotha, paññāya taṇhakkhayāya paṭipajjatha. Taṇhakkhayā dukkhakkhayo, dukkhakkhayā nibbānaṃ.
аяам̣ нирод̇хабан̃н̃ад̇д̇и нирод̇хасса, ниб̣б̣ид̣̇аабан̃н̃ад̇д̇и ассаад̣̇асса, барин̃н̃аабан̃н̃ад̇д̇и д̣̇угкасса, бахаанабан̃н̃ад̇д̇и самуд̣̇аяасса, бхааванаабан̃н̃ад̇д̇и маг̇г̇асса, сажчигирияаабан̃н̃ад̇д̇и нирод̇хасса.
Ayaṃ nirodhapaññatti nirodhassa, nibbidāpaññatti assādassa, pariññāpaññatti dukkhassa, pahānapaññatti samudayassa, bhāvanāpaññatti maggassa, sacchikiriyāpaññatti nirodhassa.
‘‘со ид̣̇ам̣ д̣̇угка’’нд̇и яат̇аабхууд̇ам̣ баж̇аанаад̇и, ‘‘аяам̣ д̣̇угкасамуд̣̇аяо’’д̇и яат̇аабхууд̇ам̣ баж̇аанаад̇и, ‘‘аяам̣ д̣̇угканирод̇хо’’д̇и яат̇аабхууд̇ам̣ баж̇аанаад̇и ‘‘аяам̣ д̣̇угканирод̇хаг̇ааминий бадибад̣̇аа’’д̇и яат̇аабхууд̇ам̣ баж̇аанаад̇и.
‘‘So idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti ‘‘ayaṃ dukkhanirodhagāminī paṭipadā’’ti yathābhūtaṃ pajānāti.
аяам̣ бадивзд̇хабан̃н̃ад̇д̇и сажжаанам̣, нигкзбабан̃н̃ад̇д̇и д̣̇ассанабхуумияаа, бхааванаабан̃н̃ад̇д̇и маг̇г̇асса, сажчигирияаабан̃н̃ад̇д̇и сод̇аабад̇д̇ипаласса. ‘‘со имз аасаваа’’д̇и яат̇аабхууд̇ам̣ баж̇аанаад̇и, ‘‘аяам̣ аасавасамуд̣̇аяо’’д̇и яат̇аабхууд̇ам̣ баж̇аанаад̇и, ‘‘аяам̣ аасаванирод̇хо’’д̇и яат̇аабхууд̇ам̣ баж̇аанаад̇и. ‘‘аяам̣ аасаванирод̇хаг̇ааминий бадибад̣̇аа’’д̇и яат̇аабхууд̇ам̣ баж̇аанаад̇и. ‘‘имз аасаваа асзсам̣ нируж̇жханд̇ий’’д̇и яат̇аабхууд̇ам̣ баж̇аанаад̇и.
Ayaṃ paṭivedhapaññatti saccānaṃ, nikkhepapaññatti dassanabhūmiyā, bhāvanāpaññatti maggassa, sacchikiriyāpaññatti sotāpattiphalassa. ‘‘So ime āsavā’’ti yathābhūtaṃ pajānāti, ‘‘ayaṃ āsavasamudayo’’ti yathābhūtaṃ pajānāti, ‘‘ayaṃ āsavanirodho’’ti yathābhūtaṃ pajānāti. ‘‘Ayaṃ āsavanirodhagāminī paṭipadā’’ti yathābhūtaṃ pajānāti. ‘‘Ime āsavā asesaṃ nirujjhantī’’ti yathābhūtaṃ pajānāti.
аяам̣ уббаад̣̇абан̃н̃ад̇д̇и каяз н̃аан̣асса, огаасабан̃н̃ад̇д̇и ануббаад̣̇з н̃аан̣асса, бхааванаабан̃н̃ад̇д̇и маг̇г̇асса, барин̃н̃аабан̃н̃ад̇д̇и д̣̇угкасса, бахаанабан̃н̃ад̇д̇и самуд̣̇аяасса, аарамбхабан̃н̃ад̇д̇и вийрияинд̣̇рияасса, аасааданабан̃н̃ад̇д̇и аасаадигаанам̣, нигкзбабан̃н̃ад̇д̇и бхааванаабхуумияаа, абхинигхаад̇абан̃н̃ад̇д̇и баабагаанам̣ агусалаанам̣ д̇хаммаанам̣.
Ayaṃ uppādapaññatti khaye ñāṇassa, okāsapaññatti anuppāde ñāṇassa, bhāvanāpaññatti maggassa, pariññāpaññatti dukkhassa, pahānapaññatti samudayassa, ārambhapaññatti vīriyindriyassa, āsāṭanapaññatti āsāṭikānaṃ, nikkhepapaññatti bhāvanābhūmiyā, abhinighātapaññatti pāpakānaṃ akusalānaṃ dhammānaṃ.
41. ид̣̇ам̣ ‘‘д̣̇угка’’нд̇и мз, бхигкавз, буб̣б̣з анануссуд̇зсу д̇хаммзсу жагкум̣ уд̣̇абаад̣̇и, н̃аан̣ам̣ уд̣̇абаад̣̇и, бан̃н̃аа уд̣̇абаад̣̇и, виж̇ж̇аа уд̣̇абаад̣̇и, аалого уд̣̇абаад̣̇и. аяам̣ ‘‘д̣̇угкасамуд̣̇аяо’’д̇и мз, бхигкавз…бз… аяам̣ ‘‘д̣̇угканирод̇хо’’д̇и мз, бхигкавз…бз…. аяам̣ ‘‘д̣̇угканирод̇хаг̇ааминий бадибад̣̇аа’’д̇и мз, бхигкавз, буб̣б̣з анануссуд̇зсу д̇хаммзсу жагкум̣ уд̣̇абаад̣̇и, н̃аан̣ам̣ уд̣̇абаад̣̇и, бан̃н̃аа уд̣̇абаад̣̇и, виж̇ж̇аа уд̣̇абаад̣̇и, аалого уд̣̇абаад̣̇и.
41. Idaṃ ‘‘dukkha’’nti me, bhikkhave, pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi. Ayaṃ ‘‘dukkhasamudayo’’ti me, bhikkhave…pe… ayaṃ ‘‘dukkhanirodho’’ti me, bhikkhave…pe…. Ayaṃ ‘‘dukkhanirodhagāminī paṭipadā’’ti me, bhikkhave, pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.
аяам̣ д̣̇зсанаабан̃н̃ад̇д̇и сажжаанам̣, нигкзбабан̃н̃ад̇д̇и суд̇амаяияаа бан̃н̃ааяа сажчигирияаабан̃н̃ад̇д̇и анан̃н̃аад̇ан̃н̃ассаамийд̇инд̣̇рияасса, бавад̇д̇анаабан̃н̃ад̇д̇и д̇хаммажаггасса.
Ayaṃ desanāpaññatti saccānaṃ, nikkhepapaññatti sutamayiyā paññāya sacchikiriyāpaññatti anaññātaññassāmītindriyassa, pavattanāpaññatti dhammacakkassa.
‘‘д̇ам̣ ко банид̣̇ам̣ д̣̇угкам̣ барин̃н̃зяяа’’нд̇и мз, бхигкавз, буб̣б̣з анануссуд̇зсу д̇хаммзсу жагкум̣ уд̣̇абаад̣̇и, н̃аан̣ам̣ уд̣̇абаад̣̇и, бан̃н̃аа уд̣̇абаад̣̇и, виж̇ж̇аа уд̣̇абаад̣̇и, аалого уд̣̇абаад̣̇и. ‘‘со ко банааяам̣ д̣̇угкасамуд̣̇аяо бахаад̇аб̣б̣о’’д̇и мз, бхигкавз…бз… ‘‘со ко банааяам̣ д̣̇угканирод̇хо сажчигаад̇аб̣б̣о’’д̇и мз, бхигкавз…бз… ‘‘саа ко банааяам̣ д̣̇угканирод̇хаг̇ааминий бадибад̣̇аа бхаавзд̇аб̣б̣аа’’д̇и мз, бхигкавз буб̣б̣з анануссуд̇зсу д̇хаммзсу жагкум̣ уд̣̇абаад̣̇и, н̃аан̣ам̣ уд̣̇абаад̣̇и, бан̃н̃аа уд̣̇абаад̣̇и, виж̇ж̇аа уд̣̇абаад̣̇и, аалого уд̣̇абаад̣̇и.
‘‘Taṃ kho panidaṃ dukkhaṃ pariññeyya’’nti me, bhikkhave, pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi. ‘‘So kho panāyaṃ dukkhasamudayo pahātabbo’’ti me, bhikkhave…pe… ‘‘so kho panāyaṃ dukkhanirodho sacchikātabbo’’ti me, bhikkhave…pe… ‘‘sā kho panāyaṃ dukkhanirodhagāminī paṭipadā bhāvetabbā’’ti me, bhikkhave pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.
аяам̣ бхааванаабан̃н̃ад̇д̇и маг̇г̇асса, нигкзбабан̃н̃ад̇д̇и жинд̇аамаяияаа бан̃н̃ааяа, сажчигирияаабан̃н̃ад̇д̇и ан̃н̃инд̣̇рияасса.
Ayaṃ bhāvanāpaññatti maggassa, nikkhepapaññatti cintāmayiyā paññāya, sacchikiriyāpaññatti aññindriyassa.
‘‘д̇ам̣ ко банид̣̇ам̣ д̣̇угкам̣ барин̃н̃аад̇а’’нд̇и мз, бхигкавз, буб̣б̣з анануссуд̇зсу д̇хаммзсу жагкум̣ уд̣̇абаад̣̇и, н̃аан̣ам̣ уд̣̇абаад̣̇и, бан̃н̃аа уд̣̇абаад̣̇и, виж̇ж̇аа уд̣̇абаад̣̇и, аалого уд̣̇абаад̣̇и. ‘‘со ко банааяам̣ д̣̇угкасамуд̣̇аяо бахийно’’д̇и мз, бхигкавз…бз… ‘‘со ко банааяам̣ д̣̇угканирод̇хо сажчигад̇о’’д̇и мз, бхигкавз…бз… ‘‘саа ко банааяам̣ д̣̇угканирод̇хаг̇ааминий бадибад̣̇аа бхаавид̇аа’’д̇и мз, бхигкавз буб̣б̣з анануссуд̇зсу д̇хаммзсу жагкум̣ уд̣̇абаад̣̇и, н̃аан̣ам̣ уд̣̇абаад̣̇и, бан̃н̃аа уд̣̇абаад̣̇и, виж̇ж̇аа уд̣̇абаад̣̇и, аалого уд̣̇абаад̣̇и. аяам̣ бхааванаабан̃н̃ад̇д̇и маг̇г̇асса, нигкзбабан̃н̃ад̇д̇и бхааванаамаяияаа бан̃н̃ааяа, сажчигирияаабан̃н̃ад̇д̇и ан̃н̃аад̇аавино инд̣̇рияасса, бавад̇д̇анаабан̃н̃ад̇д̇и д̇хаммажаггасса.
‘‘Taṃ kho panidaṃ dukkhaṃ pariññāta’’nti me, bhikkhave, pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi. ‘‘So kho panāyaṃ dukkhasamudayo pahīno’’ti me, bhikkhave…pe… ‘‘so kho panāyaṃ dukkhanirodho sacchikato’’ti me, bhikkhave…pe… ‘‘sā kho panāyaṃ dukkhanirodhagāminī paṭipadā bhāvitā’’ti me, bhikkhave pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi. Ayaṃ bhāvanāpaññatti maggassa, nikkhepapaññatti bhāvanāmayiyā paññāya, sacchikiriyāpaññatti aññātāvino indriyassa, pavattanāpaññatti dhammacakkassa.
‘‘д̇уламад̇улан̃жа самбхавам̣, бхавасан̇каарамавассаж̇и муни;
‘‘Tulamatulañca sambhavaṃ, bhavasaṅkhāramavassaji muni;
аж̇жхад̇д̇арад̇о самаахид̇о, абхинд̣̇и 15 гаважамивад̇д̇асамбхава’’нд̇и.
Ajjhattarato samāhito, abhindi 16 kavacamivattasambhava’’nti.
‘‘д̇ула’’нд̇и сан̇каарад̇хаад̇у. ‘‘ад̇ула’’нд̇и ниб̣б̣аанад̇хаад̇у, ‘‘д̇уламад̇улан̃жа самбхава’’нд̇и абхин̃н̃аабан̃н̃ад̇д̇и саб̣б̣ад̇хаммаанам̣. нигкзбабан̃н̃ад̇д̇и д̇хаммабадисамбхид̣̇ааяа. ‘‘бхавасан̇каарамавассаж̇и муний’’д̇и барижжааг̇абан̃н̃ад̇д̇и самуд̣̇аяасса. барин̃н̃аабан̃н̃ад̇д̇и д̣̇угкасса. ‘‘аж̇жхад̇д̇арад̇о самаахид̇о’’д̇и бхааванаабан̃н̃ад̇д̇и гааяаг̇ад̇ааяа сад̇ияаа. тид̇ибан̃н̃ад̇д̇и жид̇д̇згаг̇г̇ад̇ааяа. ‘‘абхинд̣̇и гаважамивад̇д̇асамбхава’’нд̇и абхиниб̣б̣ид̣̇аабан̃н̃ад̇д̇и жид̇д̇асса, убаад̣̇аанабан̃н̃ад̇д̇и саб̣б̣ан̃н̃уд̇ааяа, бад̣̇ааланаабан̃н̃ад̇д̇и авиж̇ж̇ан̣д̣агосаанам̣. д̇знааха бхаг̇аваа ‘‘д̇уламад̇улан̃жа самбхава’’нд̇и.
‘‘Tula’’nti saṅkhāradhātu. ‘‘Atula’’nti nibbānadhātu, ‘‘tulamatulañca sambhava’’nti abhiññāpaññatti sabbadhammānaṃ. Nikkhepapaññatti dhammapaṭisambhidāya. ‘‘Bhavasaṅkhāramavassaji munī’’ti pariccāgapaññatti samudayassa. Pariññāpaññatti dukkhassa. ‘‘Ajjhattarato samāhito’’ti bhāvanāpaññatti kāyagatāya satiyā. Ṭhitipaññatti cittekaggatāya. ‘‘Abhindi kavacamivattasambhava’’nti abhinibbidāpaññatti cittassa, upādānapaññatti sabbaññutāya, padālanāpaññatti avijjaṇḍakosānaṃ. Tenāha bhagavā ‘‘tulamatulañca sambhava’’nti.
яо д̣̇угкамад̣̇д̣̇агки яад̇онид̣̇аанам̣, гаамзсу со ж̇анд̇у гат̇ам̣ намзяяа;
Yo dukkhamaddakkhi yatonidānaṃ, kāmesu so jantu kathaṃ nameyya;
гаамаа хи логз сан̇г̇од̇и н̃ад̇ваа, д̇зсам̣ сад̇иймаа винаяааяа сигкзд̇и.
Kāmā hi loke saṅgoti ñatvā, tesaṃ satīmā vinayāya sikkheti.
‘‘яо д̣̇угка’’нд̇и взважанабан̃н̃ад̇д̇и жа д̣̇угкасса барин̃н̃аабан̃н̃ад̇д̇и жа. ‘‘яад̇онид̣̇аана’’нд̇и бабхавабан̃н̃ад̇д̇и жа самуд̣̇аяасса бахаанабан̃н̃ад̇д̇и жа. ‘‘ад̣̇д̣̇агкий’’д̇и взважанабан̃н̃ад̇д̇и жа н̃аан̣ажагкусса бадивзд̇хабан̃н̃ад̇д̇и жа. ‘‘гаамзсу со ж̇анд̇угат̇ам̣ намзяяаа’’д̇и взважанабан̃н̃ад̇д̇и жа гаамад̇ан̣хааяа абхинивзсабан̃н̃ад̇д̇и жа. ‘‘гаамаа хи логз сан̇г̇од̇и н̃ад̇ваа’’д̇и бажжад̇т̇игад̇о д̣̇ассанабан̃н̃ад̇д̇и гаамаанам̣. гаамаа хи ан̇г̇аарагаасуубамаа мам̣сабзсуубамаа баавагагаббаа бабаад̇аураг̇обамаа жа. ‘‘д̇зсам̣ сад̇иймаа’’д̇и абажаяабан̃н̃ад̇д̇и бахаанааяа, нигкзбабан̃н̃ад̇д̇и гааяаг̇ад̇ааяа сад̇ияаа, бхааванаабан̃н̃ад̇д̇и маг̇г̇асса. ‘‘винаяааяа сигкз’’д̇и бадивзд̇хабан̃н̃ад̇д̇и рааг̇авинаяасса д̣̇осавинаяасса мохавинаяасса. ‘‘ж̇анд̇уу’’д̇и взважанабан̃н̃ад̇д̇и яог̇исса. яад̣̇аа хи яог̇ий гаамаа сан̇г̇од̇и баж̇аанаад̇и. со гаамаанам̣ ануббаад̣̇ааяа гусалз д̇хаммз уббаад̣̇аяад̇и, со ануббаннаанам̣ гусалаанам̣ д̇хаммаанам̣ уббаад̣̇ааяа вааяамад̇и. аяам̣ вааяаамабан̃н̃ад̇д̇и аббад̇д̇асса бад̇д̇ияаа. нигкзбабан̃н̃ад̇д̇и орамад̇д̇игааяа асанд̇удтияаа. д̇ад̇т̇а со уббаннаанам̣ гусалаанам̣ д̇хаммаанам̣ тид̇ияаа вааяамад̇ийд̇и аяам̣ аббамаад̣̇абан̃н̃ад̇д̇и бхааванааяа, нигкзбабан̃н̃ад̇д̇и вийрияинд̣̇рияасса, аарагкабан̃н̃ад̇д̇и гусалаанам̣ д̇хаммаанам̣, тид̇ибан̃н̃ад̇д̇и ад̇хижид̇д̇асигкааяа. д̇знааха бхаг̇аваа ‘‘яо д̣̇угкамад̣̇д̣̇агки яад̇онид̣̇аана’’нд̇и.
‘‘Yo dukkha’’nti vevacanapaññatti ca dukkhassa pariññāpaññatti ca. ‘‘Yatonidāna’’nti pabhavapaññatti ca samudayassa pahānapaññatti ca. ‘‘Addakkhī’’ti vevacanapaññatti ca ñāṇacakkhussa paṭivedhapaññatti ca. ‘‘Kāmesu so jantukathaṃ nameyyā’’ti vevacanapaññatti ca kāmataṇhāya abhinivesapaññatti ca. ‘‘Kāmā hi loke saṅgoti ñatvā’’ti paccatthikato dassanapaññatti kāmānaṃ. Kāmā hi aṅgārakāsūpamā maṃsapesūpamā pāvakakappā papātauragopamā ca. ‘‘Tesaṃ satīmā’’ti apacayapaññatti pahānāya, nikkhepapaññatti kāyagatāya satiyā, bhāvanāpaññatti maggassa. ‘‘Vinayāya sikkhe’’ti paṭivedhapaññatti rāgavinayassa dosavinayassa mohavinayassa. ‘‘Jantū’’ti vevacanapaññatti yogissa. Yadā hi yogī kāmā saṅgoti pajānāti. So kāmānaṃ anuppādāya kusale dhamme uppādayati, so anuppannānaṃ kusalānaṃ dhammānaṃ uppādāya vāyamati. Ayaṃ vāyāmapaññatti appattassa pattiyā. Nikkhepapaññatti oramattikāya asantuṭṭhiyā. Tattha so uppannānaṃ kusalānaṃ dhammānaṃ ṭhitiyā vāyamatīti ayaṃ appamādapaññatti bhāvanāya, nikkhepapaññatti vīriyindriyassa, ārakkhapaññatti kusalānaṃ dhammānaṃ, ṭhitipaññatti adhicittasikkhāya. Tenāha bhagavā ‘‘yo dukkhamaddakkhi yatonidāna’’nti.
‘‘мохасамб̣анд̇хано лого, бхаб̣б̣аруубова д̣̇иссад̇и;
‘‘Mohasambandhano loko, bhabbarūpova dissati;
ассирий вияа 19 кааяад̇и, бассад̇о над̇т̇и гин̃жана’’нд̇и.
Assirī viya 20 khāyati, passato natthi kiñcana’’nti.
‘‘мохасамб̣анд̇хано лого’’д̇и д̣̇зсанаабан̃н̃ад̇д̇и вибаллаасаанам̣. ‘‘бхаб̣б̣аруубова д̣̇иссад̇ий’’д̇и вибарийд̇абан̃н̃ад̇д̇и логасса. ‘‘убад̇хиб̣анд̇хано б̣аало’’д̇и бабхавабан̃н̃ад̇д̇и баабагаанам̣ ижчааважараанам̣, гижжабан̃н̃ад̇д̇и барияудтаанаанам̣. б̣алавабан̃н̃ад̇д̇и гилзсаанам̣. вирууханаабан̃н̃ад̇д̇и сан̇каараанам̣. ‘‘д̇амасаа бариваарид̇о’’д̇и д̣̇зсанаабан̃н̃ад̇д̇и авиж̇ж̇анд̇хагаарасса взважанабан̃н̃ад̇д̇и жа. ‘‘ассирий вияа кааяад̇ий’’д̇и д̣̇ассанабан̃н̃ад̇д̇и д̣̇иб̣б̣ажагкусса, нигкзбабан̃н̃ад̇д̇и бан̃н̃аажагкусса. ‘‘бассад̇о над̇т̇и гин̃жана’’нд̇и бадивзд̇хабан̃н̃ад̇д̇и сад̇д̇аанам̣, рааг̇о гин̃жанам̣ д̣̇осо гин̃жанам̣ мохо гин̃жанам̣. д̇знааха бхаг̇аваа ‘‘мохасамб̣анд̇хано лого’’д̇и.
‘‘Mohasambandhano loko’’ti desanāpaññatti vipallāsānaṃ. ‘‘Bhabbarūpova dissatī’’ti viparītapaññatti lokassa. ‘‘Upadhibandhano bālo’’ti pabhavapaññatti pāpakānaṃ icchāvacarānaṃ, kiccapaññatti pariyuṭṭhānānaṃ. Balavapaññatti kilesānaṃ. Virūhanāpaññatti saṅkhārānaṃ. ‘‘Tamasā parivārito’’ti desanāpaññatti avijjandhakārassa vevacanapaññatti ca. ‘‘Assirī viya khāyatī’’ti dassanapaññatti dibbacakkhussa, nikkhepapaññatti paññācakkhussa. ‘‘Passato natthi kiñcana’’nti paṭivedhapaññatti sattānaṃ, rāgo kiñcanaṃ doso kiñcanaṃ moho kiñcanaṃ. Tenāha bhagavā ‘‘mohasambandhano loko’’ti.
‘‘ад̇т̇и, бхигкавз, аж̇аад̇ам̣ абхууд̇ам̣ агад̇ам̣ асан̇кад̇ам̣, но жзд̇ам̣, бхигкавз, абхависса аж̇аад̇ам̣ абхууд̇ам̣ агад̇ам̣ асан̇кад̇ам̣. наяид̇ха 21 ж̇аад̇асса бхууд̇асса гад̇асса сан̇кад̇асса ниссаран̣ам̣ бан̃н̃ааязт̇а. яасмаа жа ко, бхигкавз, ад̇т̇и аж̇аад̇ам̣ абхууд̇ам̣ агад̇ам̣ асан̇кад̇ам̣, д̇асмаа ж̇аад̇асса бхууд̇асса гад̇асса сан̇кад̇асса ниссаран̣ам̣ бан̃н̃ааяад̇ий’’д̇и.
‘‘Atthi, bhikkhave, ajātaṃ abhūtaṃ akataṃ asaṅkhataṃ, no cetaṃ, bhikkhave, abhavissa ajātaṃ abhūtaṃ akataṃ asaṅkhataṃ. Nayidha 22 jātassa bhūtassa katassa saṅkhatassa nissaraṇaṃ paññāyetha. Yasmā ca kho, bhikkhave, atthi ajātaṃ abhūtaṃ akataṃ asaṅkhataṃ, tasmā jātassa bhūtassa katassa saṅkhatassa nissaraṇaṃ paññāyatī’’ti.
‘‘но жзд̇ам̣, бхигкавз, абхависса аж̇аад̇ам̣ абхууд̇ам̣ агад̇ам̣ асан̇кад̇а’’нд̇и д̣̇зсанаабан̃н̃ад̇д̇и ниб̣б̣аанасса взважанабан̃н̃ад̇д̇и жа. ‘‘наяид̇ха ж̇аад̇асса бхууд̇асса гад̇асса сан̇кад̇асса ниссаран̣ам̣ бан̃н̃ааязт̇аа’’д̇и взважанабан̃н̃ад̇д̇и сан̇кад̇асса убанаяанабан̃н̃ад̇д̇и жа. ‘‘яасмаа жа ко, бхигкавз, ад̇т̇и аж̇аад̇ам̣ абхууд̇ам̣ агад̇ам̣ асан̇кад̇а’’нд̇и взважанабан̃н̃ад̇д̇и ниб̣б̣аанасса ж̇од̇анаабан̃н̃ад̇д̇и жа. ‘‘д̇асмаа ж̇аад̇асса бхууд̇асса гад̇асса сан̇кад̇асса ниссаран̣ам̣ бан̃н̃ааяад̇ий’’д̇и аяам̣ взважанабан̃н̃ад̇д̇и ниб̣б̣аанасса, нияяаанигабан̃н̃ад̇д̇и маг̇г̇асса, ниссаран̣абан̃н̃ад̇д̇и сам̣саарад̇о. д̇знааха бхаг̇аваа ‘‘но жзд̇ам̣, бхигкавз, абхависсаа’’д̇и. д̇знааха ааяасмаа махаагажжааяано ‘‘згам̣ бхаг̇аваа д̇хаммам̣, бан̃н̃ад̇д̇ийхи вивид̇хаахи д̣̇зсзд̇ий’’д̇и.
‘‘No cetaṃ, bhikkhave, abhavissa ajātaṃ abhūtaṃ akataṃ asaṅkhata’’nti desanāpaññatti nibbānassa vevacanapaññatti ca. ‘‘Nayidha jātassa bhūtassa katassa saṅkhatassa nissaraṇaṃ paññāyethā’’ti vevacanapaññatti saṅkhatassa upanayanapaññatti ca. ‘‘Yasmā ca kho, bhikkhave, atthi ajātaṃ abhūtaṃ akataṃ asaṅkhata’’nti vevacanapaññatti nibbānassa jotanāpaññatti ca. ‘‘Tasmā jātassa bhūtassa katassa saṅkhatassa nissaraṇaṃ paññāyatī’’ti ayaṃ vevacanapaññatti nibbānassa, niyyānikapaññatti maggassa, nissaraṇapaññatti saṃsārato. Tenāha bhagavā ‘‘no cetaṃ, bhikkhave, abhavissā’’ti. Tenāha āyasmā mahākaccāyano ‘‘ekaṃ bhagavā dhammaṃ, paññattīhi vividhāhi desetī’’ti.
нияуд̇д̇о бан̃н̃ад̇д̇и хааро.
Niyutto paññatti hāro.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / куд̣̇д̣̇аганигааяа (адтагат̇аа) • Khuddakanikāya (aṭṭhakathā) / нзд̇д̇иббагаран̣а-адтагат̇аа • Nettippakaraṇa-aṭṭhakathā / 11. бан̃н̃ад̇д̇ихааравибхан̇г̇аван̣н̣анаа • 11. Paññattihāravibhaṅgavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / куд̣̇д̣̇аганигааяа (дийгаа) • Khuddakanikāya (ṭīkā) / нзд̇д̇иббагаран̣а-дийгаа • Nettippakaraṇa-ṭīkā / 11. бан̃н̃ад̇д̇ихааравибхан̇г̇аван̣н̣анаа • 11. Paññattihāravibhaṅgavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / куд̣̇д̣̇аганигааяа (дийгаа) • Khuddakanikāya (ṭīkā) / нзд̇д̇ивибхаавиний • Nettivibhāvinī / 11. бан̃н̃ад̇д̇ихааравибхан̇г̇авибхааванаа • 11. Paññattihāravibhaṅgavibhāvanā
