| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
५. पञ्ञत्तिसुत्तं
5. Paññattisuttaṃ
१५. ‘‘चतस्सो इमा, भिक्खवे, अग्गपञ्ञत्तियो। कतमा चतस्सो? एतदग्गं, भिक्खवे, अत्तभावीनं यदिदं – राहु असुरिन्दो। एतदग्गं, भिक्खवे, कामभोगीनं यदिदं – राजा मन्धाता। एतदग्गं, भिक्खवे, आधिपतेय्यानं यदिदं – मारो पापिमा। सदेवके, भिक्खवे, लोके समारके सब्रह्मके सस्समणब्राह्मणिया पजाय सदेवमनुस्साय तथागतो अग्गमक्खायति अरहं सम्मासम्बुद्धो। इमा खो, भिक्खवे, चतस्सो अग्गपञ्ञत्तियो’’ति।
15. ‘‘Catasso imā, bhikkhave, aggapaññattiyo. Katamā catasso? Etadaggaṃ, bhikkhave, attabhāvīnaṃ yadidaṃ – rāhu asurindo. Etadaggaṃ, bhikkhave, kāmabhogīnaṃ yadidaṃ – rājā mandhātā. Etadaggaṃ, bhikkhave, ādhipateyyānaṃ yadidaṃ – māro pāpimā. Sadevake, bhikkhave, loke samārake sabrahmake sassamaṇabrāhmaṇiyā pajāya sadevamanussāya tathāgato aggamakkhāyati arahaṃ sammāsambuddho. Imā kho, bhikkhave, catasso aggapaññattiyo’’ti.
‘‘राहुग्गं अत्तभावीनं, मन्धाता कामभोगिनं।
‘‘Rāhuggaṃ attabhāvīnaṃ, mandhātā kāmabhoginaṃ;
मारो आधिपतेय्यानं, इद्धिया यससा जलं॥
Māro ādhipateyyānaṃ, iddhiyā yasasā jalaṃ.
‘‘उद्धं तिरियं अपाचीनं, यावता जगतो गति।
‘‘Uddhaṃ tiriyaṃ apācīnaṃ, yāvatā jagato gati;
सदेवकस्स लोकस्स, बुद्धो अग्गो पवुच्चती’’ति॥ पञ्चमं।
Sadevakassa lokassa, buddho aggo pavuccatī’’ti. pañcamaṃ;
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ५. पञ्ञत्तिसुत्तवण्णना • 5. Paññattisuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ५. पञ्ञत्तिसुत्तवण्णना • 5. Paññattisuttavaṇṇanā
