| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
பரிவாரவண்ணனா
Parivāravaṇṇanā
ஸோளஸமஹாவாரவண்ணனா
Soḷasamahāvāravaṇṇanā
பஞ்ஞத்திவாரவண்ணனா
Paññattivāravaṇṇanā
1-2. ஸீலஸமாதி⁴பஞ்ஞாவிமுத்திவிமுத்திஞாணத³ஸ்ஸனஸங்கா²தஸ்ஸ த⁴ம்மக்க²ந்த⁴ஸரீரஸ்ஸ ஸாஸனேதி அத்தோ². பரிவாரோதி ஸங்க³ஹங் யோ ஸமாருள்ஹோ, தஸ்ஸ பரிவாரஸ்ஸ. வினயபூ⁴தா பஞ்ஞத்தி வினயபஞ்ஞத்தி. ‘‘பஞ்ஞத்திகாலங் ஜானதா’’தி து³கனயவஸேன வத்வா புன ஸுத்தந்தனயேன வத்துங் ‘‘அபிச புப்³பே³னிவாஸாதீ³ஹீ’’தி வுத்தங். தத்த² பஸ்ஸனங் நாம த³ஸ்ஸனத்தா தி³ப்³ப³சக்கு²னா யோஜிதங் படிவேத⁴ஞாணத³ஸ்ஸனங். தே³ஸனாபஞ்ஞாய பஸ்ஸதாதி ஆஸயானுஸயாதி³கே. புச்சா²யாதி ஸத்தமீ. புனபி எத்தா²தி புச்சா²விஸ்ஸஜ்ஜனே. மிச்சா²தி³ட்டீ²தி நத்தி²கதி³ட்டி² அந்தக்³கா³ஹிகதி³ட்டி². ‘‘ஆஜீவஹேது பஞ்ஞத்தானீ’’தி வசனதோ இமானி ச² ஸிக்கா²பதா³னி ட²பெத்வா ஸேஸா ஆசாரவிபத்தி நாமாதி வேதி³தப்³ப³ங். காயேன பன ஆபத்திங் ஆபஜ்ஜதீதி எத்த² ‘‘புப்³ப³பா⁴கே³ ஸேவனசித்தமங்க³ங் கத்வா காயத்³வாரஸங்கா²தங் விஞ்ஞத்திங் ஜனயித்வா பவத்தசித்துப்பாத³ஸங்கா²தங் ஆபத்திங் ஆபஜ்ஜதி, கிஞ்சாபி சித்தேன ஸமுட்டா²பிதா விஞ்ஞத்தி, ததா²பி சித்தேன அதி⁴ப்பேதஸ்ஸ அத்த²ஸ்ஸ விஞ்ஞத்தியா ஸாதி⁴தத்தா ‘காயத்³வாரேன ஆபஜ்ஜதீ’தி வுத்த’’ந்தி இமமத்த²ங் ஸந்தா⁴ய வுத்தங், ந ப⁴ண்ட³னாதி³த்தயவூபஸமங். ஆபாணகோடிகந்தி ஜீவிதபரியந்தங் கத்வா. போராணகேஹி மஹாதே²ரேஹீதி ஸீஹளதீ³பே மஹாதே²ரேஹி பொத்த²கங் ஆரோபிதகாலே ட²பிதாதி அத்தோ². ‘‘சதுத்த²ஸங்கீ³திஸதி³ஸா பொத்த²காருள்ஹஸங்கீ³தி அஹோஸீ’’தி வுத்தங்.
1-2. Sīlasamādhipaññāvimuttivimuttiñāṇadassanasaṅkhātassa dhammakkhandhasarīrassa sāsaneti attho. Parivāroti saṅgahaṃ yo samāruḷho, tassa parivārassa. Vinayabhūtā paññatti vinayapaññatti. ‘‘Paññattikālaṃ jānatā’’ti dukanayavasena vatvā puna suttantanayena vattuṃ ‘‘apica pubbenivāsādīhī’’ti vuttaṃ. Tattha passanaṃ nāma dassanattā dibbacakkhunā yojitaṃ paṭivedhañāṇadassanaṃ. Desanāpaññāya passatāti āsayānusayādike. Pucchāyāti sattamī. Punapi etthāti pucchāvissajjane. Micchādiṭṭhīti natthikadiṭṭhi antaggāhikadiṭṭhi. ‘‘Ājīvahetu paññattānī’’ti vacanato imāni cha sikkhāpadāni ṭhapetvā sesā ācāravipatti nāmāti veditabbaṃ. Kāyena pana āpattiṃ āpajjatīti ettha ‘‘pubbabhāge sevanacittamaṅgaṃ katvā kāyadvārasaṅkhātaṃ viññattiṃ janayitvā pavattacittuppādasaṅkhātaṃ āpattiṃ āpajjati, kiñcāpi cittena samuṭṭhāpitā viññatti, tathāpi cittena adhippetassa atthassa viññattiyā sādhitattā ‘kāyadvārena āpajjatī’ti vutta’’nti imamatthaṃ sandhāya vuttaṃ, na bhaṇḍanādittayavūpasamaṃ. Āpāṇakoṭikanti jīvitapariyantaṃ katvā. Porāṇakehi mahātherehīti sīhaḷadīpe mahātherehi potthakaṃ āropitakāle ṭhapitāti attho. ‘‘Catutthasaṅgītisadisā potthakāruḷhasaṅgīti ahosī’’ti vuttaṃ.
மஹாவிப⁴ங்கே³ பஞ்ஞத்திவாரவண்ணனா நிட்டி²தா.
Mahāvibhaṅge paññattivāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 1. பாராஜிககண்ட³ங் • 1. Pārājikakaṇḍaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / பஞ்ஞத்திவாரவண்ணனா • Paññattivāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஞ்ஞத்திவாரவண்ணனா • Paññattivāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஞ்ஞத்திவாரவண்ணனா • Paññattivāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / கதாபத்திவாராதி³வண்ணனா • Katāpattivārādivaṇṇanā
