| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
பரிவாரவண்ணனா
Parivāravaṇṇanā
மஹாவக்³கோ³
Mahāvaggo
பஞ்ஞத்திவாரவண்ணனா
Paññattivāravaṇṇanā
1. விஸுத்³த⁴பரிவாரஸ்ஸ ஸீலக்க²ந்தா⁴தி³த⁴ம்மக்க²ந்த⁴ஸரீரஸ்ஸ ப⁴க³வதோ வினயபரியத்திஸாஸனே க²ந்த⁴கானங் அனந்தரங் பரிவாரோதி யோ வினயோ ஸங்க³ஹங் ஸமாருள்ஹோ, தஸ்ஸ தா³னி அனுத்தானத்த²வண்ணனங் கரிஸ்ஸாமீதி யோஜனா.
1. Visuddhaparivārassa sīlakkhandhādidhammakkhandhasarīrassa bhagavato vinayapariyattisāsane khandhakānaṃ anantaraṃ parivāroti yo vinayo saṅgahaṃ samāruḷho, tassa dāni anuttānatthavaṇṇanaṃ karissāmīti yojanā.
ஸமந்தசக்கு²னாதி ஸப்³ப³ஞ்ஞுதஞ்ஞாணேன. அதிவிஸுத்³தே⁴ன மங்ஸசக்கு²னாதி ரத்திந்தி³வங் ஸமந்தா யோஜனப்பமாணே அதிஸுகு²மானிபி ரூபானி பஸ்ஸனதோ அதிவிய பரிஸுத்³தே⁴ன பஸாத³சக்கு²னா. ‘‘அத்தி² தத்த² பஞ்ஞத்தீ’’திஆதீ³ஸு அத்தி² நு கோ² தத்த² பஞ்ஞத்தீதிஆதி³னா அத்தோ² க³ஹேதப்³போ³தி ஆஹ ‘‘தத்த² பஞ்ஞத்தி…பே॰… கேனாப⁴தந்தி புச்சா²’’தி.
Samantacakkhunāti sabbaññutaññāṇena. Ativisuddhena maṃsacakkhunāti rattindivaṃ samantā yojanappamāṇe atisukhumānipi rūpāni passanato ativiya parisuddhena pasādacakkhunā. ‘‘Atthi tattha paññattī’’tiādīsu atthi nu kho tattha paññattītiādinā attho gahetabboti āha ‘‘tattha paññatti…pe… kenābhatanti pucchā’’ti.
2. புச்சா²விஸ்ஸஜ்ஜனேதி புச்சா²ய விஸ்ஸஜ்ஜனே. வினீதகதா²தி வினீதவத்து²கதா², அயமேவ வா பாடோ².
2.Pucchāvissajjaneti pucchāya vissajjane. Vinītakathāti vinītavatthukathā, ayameva vā pāṭho.
த்³வங்கி³கேன ஏகேன ஸமுட்டா²னேனாதி அங்க³த்³வயஸமுதா³யபூ⁴தேன ஏகேன. அங்க³த்³வயவிமுத்தஸ்ஸ ஸமுட்டா²னஸ்ஸ அபா⁴வேபி தேஸு ஏகேனங்கே³ன வினா அயங் ஆபத்தி ந ஹோதீதி த³ஸ்ஸனத்த²மேவ ‘‘ஏகேன ஸமுட்டா²னேனா’’தி வுத்தங். இதா³னி தேஸு த்³வீஸு அங்கே³ஸு பதா⁴னங்க³ங் த³ஸ்ஸேதுமாஹ ‘‘எத்த² ஹி சித்தங் அங்க³ங் ஹோதீ’’திஆதி³. யஸ்மா பன மக்³கே³னமக்³க³ப்படிபத்திஸங்கா²தாய காயவிஞ்ஞத்தியா ஸேவனசித்தேனேவ ஸம்ப⁴வே ஸதி அயங் தங் அங்க³த்³வயங் உபாதா³ய ப⁴க³வதா பஞ்ஞத்தா ஆபத்திஸம்முதி ஹோதி, நாஸதி. தஸ்மா தங் சித்தங் காயவிஞ்ஞத்திஸங்கா²தஸ்ஸ காயஸ்ஸ அங்க³ங் காரணங் ஹோதி, ந ஆபத்தியா. தஸ்ஸ பன தங்ஸமுட்டி²தகாயோ ஏவ அங்க³ங் அப்³யவஹிதகாரணங், சித்தங் பன காரணகாரணந்தி அதி⁴ப்பாயோ. ஏவங் உபரிபி ஸப்³ப³த்த² சித்தங்க³யுத்தஸமுட்டா²னேஸு அதி⁴ப்பாயோ வேதி³தப்³போ³. ‘‘ஏகேன ஸமுட்டா²னேன ஸமுட்டா²தீ’’திஆதி³பரிவாரவசனேனேவ ஆபத்தியா அகுஸலாதி³பரமத்த²ஸபா⁴வதா பாளிஅட்ட²கதா²ஸு பரியாயதோவ வுத்தா, ஸம்முதிஸபா⁴வா ஏவ ஆபத்தீதி ஸிஜ்ஜ²தி ஸமுட்டா²னஸமுட்டி²தானங் பே⁴த³ஸித்³தி⁴தோதி க³ஹேதப்³ப³ங். இமமத்த²ங் ஸந்தா⁴யாதி ஆபன்னாய பாராஜிகாபத்தியா கேஹிசிபி ஸமதே²ஹி அனாபத்திபா⁴வாபாத³னஸ்ஸ அஸக்குணெய்யத்தஸங்கா²தமத்த²ங் ஸந்தா⁴ய.
Dvaṅgikena ekena samuṭṭhānenāti aṅgadvayasamudāyabhūtena ekena. Aṅgadvayavimuttassa samuṭṭhānassa abhāvepi tesu ekenaṅgena vinā ayaṃ āpatti na hotīti dassanatthameva ‘‘ekena samuṭṭhānenā’’ti vuttaṃ. Idāni tesu dvīsu aṅgesu padhānaṅgaṃ dassetumāha ‘‘ettha hi cittaṃ aṅgaṃ hotī’’tiādi. Yasmā pana maggenamaggappaṭipattisaṅkhātāya kāyaviññattiyā sevanacitteneva sambhave sati ayaṃ taṃ aṅgadvayaṃ upādāya bhagavatā paññattā āpattisammuti hoti, nāsati. Tasmā taṃ cittaṃ kāyaviññattisaṅkhātassa kāyassa aṅgaṃ kāraṇaṃ hoti, na āpattiyā. Tassa pana taṃsamuṭṭhitakāyo eva aṅgaṃ abyavahitakāraṇaṃ, cittaṃ pana kāraṇakāraṇanti adhippāyo. Evaṃ uparipi sabbattha cittaṅgayuttasamuṭṭhānesu adhippāyo veditabbo. ‘‘Ekena samuṭṭhānena samuṭṭhātī’’tiādiparivāravacaneneva āpattiyā akusalādiparamatthasabhāvatā pāḷiaṭṭhakathāsu pariyāyatova vuttā, sammutisabhāvā eva āpattīti sijjhati samuṭṭhānasamuṭṭhitānaṃ bhedasiddhitoti gahetabbaṃ. Imamatthaṃ sandhāyāti āpannāya pārājikāpattiyā kehicipi samathehi anāpattibhāvāpādanassa asakkuṇeyyattasaṅkhātamatthaṃ sandhāya.
3. போராணகேஹி மஹாதே²ரேஹீதி ஸங்கீ³தித்தயதோ பச்சா² பொத்த²கஸங்கீ³திகாரகேஹி ச²ளபி⁴ஞ்ஞாபஅஸம்பி⁴தா³தி³கு³ணஸமுஜ்ஜலேஹி மஹாதே²ரேஹி. சதுத்த²ஸங்கீ³திஸதி³ஸா ஹி பொத்த²காரோஹஸங்கீ³தி.
3.Porāṇakehi mahātherehīti saṅgītittayato pacchā potthakasaṅgītikārakehi chaḷabhiññāpaasambhidādiguṇasamujjalehi mahātherehi. Catutthasaṅgītisadisā hi potthakārohasaṅgīti.
188. மஹாவிப⁴ங்கே³தி பி⁴க்கு²விப⁴ங்கே³. ஸோளஸ வாரா த³ஸ்ஸிதாதி யேஹி வாரேஹி ஆதி³பூ⁴தேஹி உபலக்கி²தத்தா அயங் ஸகலோபி பரிவாரோ ஸோளஸபரிவாரோதி வோஹரீயதி, தே ஸந்தா⁴ய வத³தி.
188.Mahāvibhaṅgeti bhikkhuvibhaṅge. Soḷasa vārā dassitāti yehi vārehi ādibhūtehi upalakkhitattā ayaṃ sakalopi parivāro soḷasaparivāroti voharīyati, te sandhāya vadati.
பஞ்ஞத்திவாரவண்ணனா நிட்டி²தா.
Paññattivāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
1. பாராஜிககண்ட³ங் • 1. Pārājikakaṇḍaṃ
1. பாராஜிககண்ட³ங் • 1. Pārājikakaṇḍaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā
பஞ்ஞத்திவாரவண்ணனா • Paññattivāravaṇṇanā
கதாபத்திவாராதி³வண்ணனா • Katāpattivārādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஞ்ஞத்திவாரவண்ணனா • Paññattivāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பஞ்ஞத்திவாரவண்ணனா • Paññattivāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / கதாபத்திவாராதி³வண்ணனா • Katāpattivārādivaṇṇanā
