| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
পরিৰার-টীকা
Parivāra-ṭīkā
সোল়সমহাৰারো
Soḷasamahāvāro
পঞ্ঞত্তিৰারৰণ্ণনা
Paññattivāravaṇṇanā
ৰিসুদ্ধপরিৰারস্সাতি সব্বসো পরিসুদ্ধখীণাসৰপরিৰারস্স। ধম্মক্খন্ধসরীরস্সাতি সীলসমাধিপঞ্ঞাৰিমুত্তিৰিমুত্তিঞাণদস্সনসঙ্খাতধম্মক্খন্ধসরীরস্স সাসনেতি সম্বন্ধো। তস্সাতি ‘‘পরিৰারো’’তি যো সঙ্গহং আরুল়্হো, তস্স। পুব্বাগতং নযন্তি পুব্বে আগতং ৰিনিচ্ছযং।
Visuddhaparivārassāti sabbaso parisuddhakhīṇāsavaparivārassa. Dhammakkhandhasarīrassāti sīlasamādhipaññāvimuttivimuttiñāṇadassanasaṅkhātadhammakkhandhasarīrassa sāsaneti sambandho. Tassāti ‘‘parivāro’’ti yo saṅgahaṃ āruḷho, tassa. Pubbāgataṃ nayanti pubbe āgataṃ vinicchayaṃ.
১. পকতত্থপটিনিদ্দেসো ত-সদ্দোতি তস্স ‘‘ভগৰতা’’তিআদীহি পদেহি সমানাধিকরণভাৰেন ৰুত্তত্থস্স যায ৰিনযপঞ্ঞত্তিযা ভগৰা পকতো অধিকতো সুপাকটো চ, তং ৰিনযপঞ্ঞত্তিং সদ্ধিং যাচনায অত্থভাৰেন দস্সেন্তো ‘‘যো সো…পে॰… ৰিনযপঞ্ঞত্তিং পঞ্ঞপেসী’’তি আহ। তত্থ ৰিনযপঞ্ঞত্তিন্তি ৰিনযভূতং পঞ্ঞত্তিং।
1. Pakatatthapaṭiniddeso ta-saddoti tassa ‘‘bhagavatā’’tiādīhi padehi samānādhikaraṇabhāvena vuttatthassa yāya vinayapaññattiyā bhagavā pakato adhikato supākaṭo ca, taṃ vinayapaññattiṃ saddhiṃ yācanāya atthabhāvena dassento ‘‘yo so…pe… vinayapaññattiṃ paññapesī’’ti āha. Tattha vinayapaññattinti vinayabhūtaṃ paññattiṃ.
‘‘জানতা পস্সতা’’তি ইমেসং পদানং ৰিনযস্স অধিকতত্তা তত্থ ৰুত্তনযেন তাৰ অত্থং যোজেত্ৰা ইদানি সুত্তন্তনযেন দস্সেন্তো সতিপি ঞাণদস্সন-সদ্দানং পঞ্ঞাৰেৰচনভাৰে তেন তেন ৰিসেসেন তেসং ৰিসযৰিসেসপৰত্তিদস্সনত্থং ৰিজ্জত্তযৰসেন অভিঞ্ঞানাৰরণঞাণৰসেন সব্বঞ্ঞুতঞ্ঞাণমংসচক্খুৰসেন পটিৰেধদেসনাঞাণৰসেন চ অত্থং যোজেত্ৰা দস্সেন্তো ‘‘অপিচা’’তিআদিমাহ। তত্থ পুব্বেনিৰাসাদীহীতি পুব্বেনিৰাসাসৰক্খযঞাণেহি। পটিৰেধপঞ্ঞাযাতি অরিযমগ্গপঞ্ঞায। দেসনাপঞ্ঞায পস্সতাতি দেসেতব্বধম্মানং দেসেতব্বপ্পকারং বোধনেয্যপুগ্গলানঞ্চ আসযানুসযচরিতাধিমুত্তিআদিভেদং ধম্মং দেসনাপঞ্ঞায যাথাৰতো পস্সতা। অরহতাতি অরীনং, অরানঞ্চ হতত্তা, পচ্চযাদীনঞ্চ অরহত্তা অরহতা। সম্মাসম্বুদ্ধেনাতি সম্মা সামঞ্চ সচ্চানং বুদ্ধত্তা সম্মাসম্বুদ্ধেন। অথ ৰা অন্তরাযিকধম্মে জানতা, নিয্যানিকধম্মে পস্সতা, কিলেসারীনং হতত্তা অরহতা, সম্মা সামং সব্বধম্মানং বুদ্ধত্তা সম্মাসম্বুদ্ধেনাতি এৰং চতুৰেসারজ্জৰসেনপেত্থ যোজনা ৰেদিতব্বা।
‘‘Jānatā passatā’’ti imesaṃ padānaṃ vinayassa adhikatattā tattha vuttanayena tāva atthaṃ yojetvā idāni suttantanayena dassento satipi ñāṇadassana-saddānaṃ paññāvevacanabhāve tena tena visesena tesaṃ visayavisesapavattidassanatthaṃ vijjattayavasena abhiññānāvaraṇañāṇavasena sabbaññutaññāṇamaṃsacakkhuvasena paṭivedhadesanāñāṇavasena ca atthaṃ yojetvā dassento ‘‘apicā’’tiādimāha. Tattha pubbenivāsādīhīti pubbenivāsāsavakkhayañāṇehi. Paṭivedhapaññāyāti ariyamaggapaññāya. Desanāpaññāya passatāti desetabbadhammānaṃ desetabbappakāraṃ bodhaneyyapuggalānañca āsayānusayacaritādhimuttiādibhedaṃ dhammaṃ desanāpaññāya yāthāvato passatā. Arahatāti arīnaṃ, arānañca hatattā, paccayādīnañca arahattā arahatā. Sammāsambuddhenāti sammā sāmañca saccānaṃ buddhattā sammāsambuddhena. Atha vā antarāyikadhamme jānatā, niyyānikadhamme passatā, kilesārīnaṃ hatattā arahatā, sammā sāmaṃ sabbadhammānaṃ buddhattā sammāsambuddhenāti evaṃ catuvesārajjavasenapettha yojanā veditabbā.
অপিচ ঠানাট্ঠানাদিৰিভাগং জানতা, যথাকম্মূপগে সত্তে পস্সতা, সৰাসনআসৰানং ছিন্নত্তা অরহতা, অভিঞ্ঞেয্যাদিভেদে ধম্মে অভিঞ্ঞেয্যাদিতো অৰিপরীতাৰবোধতো সম্মাসম্বুদ্ধেন। অথ ৰা তীসু কালেসু অপ্পটিহতঞাণতায জানতা, কাযকম্মাদিৰসেন তিণ্ণম্পি কম্মানং ঞাণানুপরিৰত্তিতো সম্মা কারিতায পস্সতা, দৰাদীনং অভাৰসাধিকায পহানসম্পদায অরহতা, ছন্দাদীনং অহানিহেতুভূতায অক্খযপটিভানসাধিকায সব্বঞ্ঞুতায সম্মাসম্বুদ্ধেনাতি এৰং দসবলঅট্ঠারসাৰেণিকবুদ্ধধম্মৰসেনপি যোজনা কাতব্বা।
Apica ṭhānāṭṭhānādivibhāgaṃ jānatā, yathākammūpage satte passatā, savāsanaāsavānaṃ chinnattā arahatā, abhiññeyyādibhede dhamme abhiññeyyādito aviparītāvabodhato sammāsambuddhena. Atha vā tīsu kālesu appaṭihatañāṇatāya jānatā, kāyakammādivasena tiṇṇampi kammānaṃ ñāṇānuparivattito sammā kāritāya passatā, davādīnaṃ abhāvasādhikāya pahānasampadāya arahatā, chandādīnaṃ ahānihetubhūtāya akkhayapaṭibhānasādhikāya sabbaññutāya sammāsambuddhenāti evaṃ dasabalaaṭṭhārasāveṇikabuddhadhammavasenapi yojanā kātabbā.
২. পুচ্ছাৰিস্সজ্জনেতি পুচ্ছায ৰিস্সজ্জনে। এত্থাতি এতস্মিং পুচ্ছাৰিস্সজ্জনে। মজ্ঝিমদেসেযেৰ পঞ্ঞত্তীতি তস্মিংযেৰ দেসে যথাৰুত্তৰত্থুৰীতিক্কমে আপত্তিসম্ভৰতো। ৰিনীতকথাতি ৰিনীতৰত্থুকথা, অযমেৰ ৰা পাঠো।
2.Pucchāvissajjaneti pucchāya vissajjane. Etthāti etasmiṃ pucchāvissajjane. Majjhimadeseyeva paññattīti tasmiṃyeva dese yathāvuttavatthuvītikkame āpattisambhavato. Vinītakathāti vinītavatthukathā, ayameva vā pāṭho.
কাযেন পন আপত্তিং আপজ্জতীতি পুব্বভাগে সেৰনচিত্তং অঙ্গং কত্ৰা কাযদ্ৰারসঙ্খাতৰিঞ্ঞত্তিং জনযিত্ৰা পৰত্তচিত্তুপ্পাদসঙ্খাতং আপত্তিং আপজ্জতি। কিঞ্চাপি হি চিত্তেন সমুট্ঠাপিতা ৰিঞ্ঞত্তি, তথাপি চিত্তেন অধিপ্পেতস্স অত্থস্স কাযৰিঞ্ঞত্তিযা সাধিতত্তা ‘‘কাযদ্ৰারেন আপত্তিং আপজ্জতী’’তি ৰুচ্চতি। ইমমত্থং সন্ধাযাতি আপন্নায আপত্তিযা অনাপত্তিভাৰাপাদনস্স অসক্কুণেয্যতাসঙ্খাতমত্থং সন্ধায, ন ভণ্ডনাদিৰূপসমং।
Kāyena pana āpattiṃ āpajjatīti pubbabhāge sevanacittaṃ aṅgaṃ katvā kāyadvārasaṅkhātaviññattiṃ janayitvā pavattacittuppādasaṅkhātaṃ āpattiṃ āpajjati. Kiñcāpi hi cittena samuṭṭhāpitā viññatti, tathāpi cittena adhippetassa atthassa kāyaviññattiyā sādhitattā ‘‘kāyadvārena āpattiṃ āpajjatī’’ti vuccati. Imamatthaṃ sandhāyāti āpannāya āpattiyā anāpattibhāvāpādanassa asakkuṇeyyatāsaṅkhātamatthaṃ sandhāya, na bhaṇḍanādivūpasamaṃ.
৩. পোরাণকেহি মহাথেরেহীতি সীহল়দীপৰাসীহি মহাথেরেহি। ঠপিতাতি পোত্থকসঙ্গহারোহনকালে ঠপিতা। চতুত্থসঙ্গীতিসদিসা হি পোত্থকারোহসঙ্গীতি। উভতোৰিভঙ্গে দ্ৰত্তিংস ৰারা সুৰিঞ্ঞেয্যাৰ।
3.Porāṇakehi mahātherehīti sīhaḷadīpavāsīhi mahātherehi. Ṭhapitāti potthakasaṅgahārohanakāle ṭhapitā. Catutthasaṅgītisadisā hi potthakārohasaṅgīti. Ubhatovibhaṅge dvattiṃsa vārā suviññeyyāva.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. পারাজিককণ্ডং • 1. Pārājikakaṇḍaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / পঞ্ঞত্তিৰারৰণ্ণনা • Paññattivāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পঞ্ঞত্তিৰারৰণ্ণনা • Paññattivāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পঞ্ঞত্তিৰারৰণ্ণনা • Paññattivāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / কতাপত্তিৰারাদিৰণ্ণনা • Katāpattivārādivaṇṇanā
