| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
។ នមោ តស្ស ភគវតោ អរហតោ សម្មាសម្ពុទ្ធស្ស។
Namo tassa bhagavato arahato sammāsambuddhassa
បរិវារវណ្ណនា
Parivāravaṇṇanā
មហាវគ្គោ
Mahāvaggo
បញ្ញត្តិវារវណ្ណនា
Paññattivāravaṇṇanā
១. វិសុទ្ធបរិវារស្ស សីលក្ខន្ធាទិធម្មក្ខន្ធសរីរស្ស ភគវតោ វិនយបរិយត្តិសាសនេ ខន្ធកានំ អនន្តរំ បរិវារោតិ យោ វិនយោ សង្គហំ សមារុឡ្ហោ, តស្ស ទានិ អនុត្តានត្ថវណ្ណនំ ករិស្សាមីតិ យោជនា។
1. Visuddhaparivārassa sīlakkhandhādidhammakkhandhasarīrassa bhagavato vinayapariyattisāsane khandhakānaṃ anantaraṃ parivāroti yo vinayo saṅgahaṃ samāruḷho, tassa dāni anuttānatthavaṇṇanaṃ karissāmīti yojanā.
សមន្តចក្ខុនាតិ សព្ពញ្ញុតញ្ញាណេន។ អតិវិសុទ្ធេន មំសចក្ខុនាតិ រត្តិន្ទិវំ សមន្តា យោជនប្បមាណេ អតិសុខុមានិបិ រូបានិ បស្សនតោ អតិវិយ បរិសុទ្ធេន បសាទចក្ខុនា។ ‘‘អត្ថិ តត្ថ បញ្ញត្តី’’តិអាទីសុ អត្ថិ នុ ខោ តត្ថ បញ្ញត្តីតិអាទិនា អត្ថោ គហេតព្ពោតិ អាហ ‘‘តត្ថ បញ្ញត្តិ…បេ.… កេនាភតន្តិ បុច្ឆា’’តិ។
Samantacakkhunāti sabbaññutaññāṇena. Ativisuddhena maṃsacakkhunāti rattindivaṃ samantā yojanappamāṇe atisukhumānipi rūpāni passanato ativiya parisuddhena pasādacakkhunā. ‘‘Atthi tattha paññattī’’tiādīsu atthi nu kho tattha paññattītiādinā attho gahetabboti āha ‘‘tattha paññatti…pe… kenābhatanti pucchā’’ti.
២. បុច្ឆាវិស្សជ្ជនេតិ បុច្ឆាយ វិស្សជ្ជនេ។ វិនីតកថាតិ វិនីតវត្ថុកថា, អយមេវ វា បាឋោ។
2.Pucchāvissajjaneti pucchāya vissajjane. Vinītakathāti vinītavatthukathā, ayameva vā pāṭho.
ទ្វង្គិកេន ឯកេន សមុដ្ឋានេនាតិ អង្គទ្វយសមុទាយភូតេន ឯកេន។ អង្គទ្វយវិមុត្តស្ស សមុដ្ឋានស្ស អភាវេបិ តេសុ ឯកេនង្គេន វិនា អយំ អាបត្តិ ន ហោតីតិ ទស្សនត្ថមេវ ‘‘ឯកេន សមុដ្ឋានេនា’’តិ វុត្តំ។ ឥទានិ តេសុ ទ្វីសុ អង្គេសុ បធានង្គំ ទស្សេតុមាហ ‘‘ឯត្ថ ហិ ចិត្តំ អង្គំ ហោតី’’តិអាទិ។ យស្មា បន មគ្គេនមគ្គប្បដិបត្តិសង្ខាតាយ កាយវិញ្ញត្តិយា សេវនចិត្តេនេវ សម្ភវេ សតិ អយំ តំ អង្គទ្វយំ ឧបាទាយ ភគវតា បញ្ញត្តា អាបត្តិសម្មុតិ ហោតិ, នាសតិ។ តស្មា តំ ចិត្តំ កាយវិញ្ញត្តិសង្ខាតស្ស កាយស្ស អង្គំ ការណំ ហោតិ, ន អាបត្តិយា។ តស្ស បន តំសមុដ្ឋិតកាយោ ឯវ អង្គំ អព្យវហិតការណំ, ចិត្តំ បន ការណការណន្តិ អធិប្បាយោ។ ឯវំ ឧបរិបិ សព្ពត្ថ ចិត្តង្គយុត្តសមុដ្ឋានេសុ អធិប្បាយោ វេទិតព្ពោ។ ‘‘ឯកេន សមុដ្ឋានេន សមុដ្ឋាតី’’តិអាទិបរិវារវចនេនេវ អាបត្តិយា អកុសលាទិបរមត្ថសភាវតា បាឡិអដ្ឋកថាសុ បរិយាយតោវ វុត្តា, សម្មុតិសភាវា ឯវ អាបត្តីតិ សិជ្ឈតិ សមុដ្ឋានសមុដ្ឋិតានំ ភេទសិទ្ធិតោតិ គហេតព្ពំ។ ឥមមត្ថំ សន្ធាយាតិ អាបន្នាយ បារាជិកាបត្តិយា កេហិចិបិ សមថេហិ អនាបត្តិភាវាបាទនស្ស អសក្កុណេយ្យត្តសង្ខាតមត្ថំ សន្ធាយ។
Dvaṅgikena ekena samuṭṭhānenāti aṅgadvayasamudāyabhūtena ekena. Aṅgadvayavimuttassa samuṭṭhānassa abhāvepi tesu ekenaṅgena vinā ayaṃ āpatti na hotīti dassanatthameva ‘‘ekena samuṭṭhānenā’’ti vuttaṃ. Idāni tesu dvīsu aṅgesu padhānaṅgaṃ dassetumāha ‘‘ettha hi cittaṃ aṅgaṃ hotī’’tiādi. Yasmā pana maggenamaggappaṭipattisaṅkhātāya kāyaviññattiyā sevanacitteneva sambhave sati ayaṃ taṃ aṅgadvayaṃ upādāya bhagavatā paññattā āpattisammuti hoti, nāsati. Tasmā taṃ cittaṃ kāyaviññattisaṅkhātassa kāyassa aṅgaṃ kāraṇaṃ hoti, na āpattiyā. Tassa pana taṃsamuṭṭhitakāyo eva aṅgaṃ abyavahitakāraṇaṃ, cittaṃ pana kāraṇakāraṇanti adhippāyo. Evaṃ uparipi sabbattha cittaṅgayuttasamuṭṭhānesu adhippāyo veditabbo. ‘‘Ekena samuṭṭhānena samuṭṭhātī’’tiādiparivāravacaneneva āpattiyā akusalādiparamatthasabhāvatā pāḷiaṭṭhakathāsu pariyāyatova vuttā, sammutisabhāvā eva āpattīti sijjhati samuṭṭhānasamuṭṭhitānaṃ bhedasiddhitoti gahetabbaṃ. Imamatthaṃ sandhāyāti āpannāya pārājikāpattiyā kehicipi samathehi anāpattibhāvāpādanassa asakkuṇeyyattasaṅkhātamatthaṃ sandhāya.
៣. បោរាណកេហិ មហាថេរេហីតិ សង្គីតិត្តយតោ បច្ឆា បោត្ថកសង្គីតិការកេហិ ឆឡភិញ្ញាបអសម្ភិទាទិគុណសមុជ្ជលេហិ មហាថេរេហិ។ ចតុត្ថសង្គីតិសទិសា ហិ បោត្ថការោហសង្គីតិ។
3.Porāṇakehi mahātherehīti saṅgītittayato pacchā potthakasaṅgītikārakehi chaḷabhiññāpaasambhidādiguṇasamujjalehi mahātherehi. Catutthasaṅgītisadisā hi potthakārohasaṅgīti.
១៨៨. មហាវិភង្គេតិ ភិក្ខុវិភង្គេ។ សោឡស វារា ទស្សិតាតិ យេហិ វារេហិ អាទិភូតេហិ ឧបលក្ខិតត្តា អយំ សកលោបិ បរិវារោ សោឡសបរិវារោតិ វោហរីយតិ, តេ សន្ធាយ វទតិ។
188.Mahāvibhaṅgeti bhikkhuvibhaṅge. Soḷasa vārā dassitāti yehi vārehi ādibhūtehi upalakkhitattā ayaṃ sakalopi parivāro soḷasaparivāroti voharīyati, te sandhāya vadati.
បញ្ញត្តិវារវណ្ណនា និដ្ឋិតា។
Paññattivāravaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi
១. បារាជិកកណ្ឌំ • 1. Pārājikakaṇḍaṃ
១. បារាជិកកណ្ឌំ • 1. Pārājikakaṇḍaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā
បញ្ញត្តិវារវណ្ណនា • Paññattivāravaṇṇanā
កតាបត្តិវារាទិវណ្ណនា • Katāpattivārādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បញ្ញត្តិវារវណ្ណនា • Paññattivāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បញ្ញត្តិវារវណ្ណនា • Paññattivāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / កតាបត្តិវារាទិវណ្ណនា • Katāpattivārādivaṇṇanā
