| Library / Tipiṭaka / ਤਿਪਿਟਕ • Tipiṭaka / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā |
॥ ਨਮੋ ਤਸ੍ਸ ਭਗવਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ॥
Namo tassa bhagavato arahato sammāsambuddhassa
ਪਰਿવਾਰવਣ੍ਣਨਾ
Parivāravaṇṇanā
ਸੋਲ਼ਸਮਹਾવਾਰવਣ੍ਣਨਾ
Soḷasamahāvāravaṇṇanā
ਪਞ੍ਞਤ੍ਤਿવਾਰવਣ੍ਣਨਾ
Paññattivāravaṇṇanā
੧-੨. ਸੀਲਸਮਾਧਿਪਞ੍ਞਾવਿਮੁਤ੍ਤਿવਿਮੁਤ੍ਤਿਞਾਣਦਸ੍ਸਨਸਙ੍ਖਾਤਸ੍ਸ ਧਮ੍ਮਕ੍ਖਨ੍ਧਸਰੀਰਸ੍ਸ ਸਾਸਨੇਤਿ ਅਤ੍ਥੋ। ਪਰਿવਾਰੋਤਿ ਸਙ੍ਗਹਂ ਯੋ ਸਮਾਰੁਲ਼੍ਹੋ, ਤਸ੍ਸ ਪਰਿવਾਰਸ੍ਸ। વਿਨਯਭੂਤਾ ਪਞ੍ਞਤ੍ਤਿ વਿਨਯਪਞ੍ਞਤ੍ਤਿ। ‘‘ਪਞ੍ਞਤ੍ਤਿਕਾਲਂ ਜਾਨਤਾ’’ਤਿ ਦੁਕਨਯવਸੇਨ વਤ੍વਾ ਪੁਨ ਸੁਤ੍ਤਨ੍ਤਨਯੇਨ વਤ੍ਤੁਂ ‘‘ਅਪਿਚ ਪੁਬ੍ਬੇਨਿવਾਸਾਦੀਹੀ’’ਤਿ વੁਤ੍ਤਂ। ਤਤ੍ਥ ਪਸ੍ਸਨਂ ਨਾਮ ਦਸ੍ਸਨਤ੍ਤਾ ਦਿਬ੍ਬਚਕ੍ਖੁਨਾ ਯੋਜਿਤਂ ਪਟਿવੇਧਞਾਣਦਸ੍ਸਨਂ। ਦੇਸਨਾਪਞ੍ਞਾਯ ਪਸ੍ਸਤਾਤਿ ਆਸਯਾਨੁਸਯਾਦਿਕੇ। ਪੁਚ੍ਛਾਯਾਤਿ ਸਤ੍ਤਮੀ। ਪੁਨਪਿ ਏਤ੍ਥਾਤਿ ਪੁਚ੍ਛਾવਿਸ੍ਸਜ੍ਜਨੇ। ਮਿਚ੍ਛਾਦਿਟ੍ਠੀਤਿ ਨਤ੍ਥਿਕਦਿਟ੍ਠਿ ਅਨ੍ਤਗ੍ਗਾਹਿਕਦਿਟ੍ਠਿ। ‘‘ਆਜੀવਹੇਤੁ ਪਞ੍ਞਤ੍ਤਾਨੀ’’ਤਿ વਚਨਤੋ ਇਮਾਨਿ ਛ ਸਿਕ੍ਖਾਪਦਾਨਿ ਠਪੇਤ੍વਾ ਸੇਸਾ ਆਚਾਰવਿਪਤ੍ਤਿ ਨਾਮਾਤਿ વੇਦਿਤਬ੍ਬਂ। ਕਾਯੇਨ ਪਨ ਆਪਤ੍ਤਿਂ ਆਪਜ੍ਜਤੀਤਿ ਏਤ੍ਥ ‘‘ਪੁਬ੍ਬਭਾਗੇ ਸੇવਨਚਿਤ੍ਤਮਙ੍ਗਂ ਕਤ੍વਾ ਕਾਯਦ੍વਾਰਸਙ੍ਖਾਤਂ વਿਞ੍ਞਤ੍ਤਿਂ ਜਨਯਿਤ੍વਾ ਪવਤ੍ਤਚਿਤ੍ਤੁਪ੍ਪਾਦਸਙ੍ਖਾਤਂ ਆਪਤ੍ਤਿਂ ਆਪਜ੍ਜਤਿ, ਕਿਞ੍ਚਾਪਿ ਚਿਤ੍ਤੇਨ ਸਮੁਟ੍ਠਾਪਿਤਾ વਿਞ੍ਞਤ੍ਤਿ, ਤਥਾਪਿ ਚਿਤ੍ਤੇਨ ਅਧਿਪ੍ਪੇਤਸ੍ਸ ਅਤ੍ਥਸ੍ਸ વਿਞ੍ਞਤ੍ਤਿਯਾ ਸਾਧਿਤਤ੍ਤਾ ‘ਕਾਯਦ੍વਾਰੇਨ ਆਪਜ੍ਜਤੀ’ਤਿ વੁਤ੍ਤ’’ਨ੍ਤਿ ਇਮਮਤ੍ਥਂ ਸਨ੍ਧਾਯ વੁਤ੍ਤਂ, ਨ ਭਣ੍ਡਨਾਦਿਤ੍ਤਯવੂਪਸਮਂ। ਆਪਾਣਕੋਟਿਕਨ੍ਤਿ ਜੀવਿਤਪਰਿਯਨ੍ਤਂ ਕਤ੍વਾ। ਪੋਰਾਣਕੇਹਿ ਮਹਾਥੇਰੇਹੀਤਿ ਸੀਹਲ਼ਦੀਪੇ ਮਹਾਥੇਰੇਹਿ ਪੋਤ੍ਥਕਂ ਆਰੋਪਿਤਕਾਲੇ ਠਪਿਤਾਤਿ ਅਤ੍ਥੋ। ‘‘ਚਤੁਤ੍ਥਸਙ੍ਗੀਤਿਸਦਿਸਾ ਪੋਤ੍ਥਕਾਰੁਲ਼੍ਹਸਙ੍ਗੀਤਿ ਅਹੋਸੀ’’ਤਿ વੁਤ੍ਤਂ।
1-2. Sīlasamādhipaññāvimuttivimuttiñāṇadassanasaṅkhātassa dhammakkhandhasarīrassa sāsaneti attho. Parivāroti saṅgahaṃ yo samāruḷho, tassa parivārassa. Vinayabhūtā paññatti vinayapaññatti. ‘‘Paññattikālaṃ jānatā’’ti dukanayavasena vatvā puna suttantanayena vattuṃ ‘‘apica pubbenivāsādīhī’’ti vuttaṃ. Tattha passanaṃ nāma dassanattā dibbacakkhunā yojitaṃ paṭivedhañāṇadassanaṃ. Desanāpaññāya passatāti āsayānusayādike. Pucchāyāti sattamī. Punapi etthāti pucchāvissajjane. Micchādiṭṭhīti natthikadiṭṭhi antaggāhikadiṭṭhi. ‘‘Ājīvahetu paññattānī’’ti vacanato imāni cha sikkhāpadāni ṭhapetvā sesā ācāravipatti nāmāti veditabbaṃ. Kāyena pana āpattiṃ āpajjatīti ettha ‘‘pubbabhāge sevanacittamaṅgaṃ katvā kāyadvārasaṅkhātaṃ viññattiṃ janayitvā pavattacittuppādasaṅkhātaṃ āpattiṃ āpajjati, kiñcāpi cittena samuṭṭhāpitā viññatti, tathāpi cittena adhippetassa atthassa viññattiyā sādhitattā ‘kāyadvārena āpajjatī’ti vutta’’nti imamatthaṃ sandhāya vuttaṃ, na bhaṇḍanādittayavūpasamaṃ. Āpāṇakoṭikanti jīvitapariyantaṃ katvā. Porāṇakehi mahātherehīti sīhaḷadīpe mahātherehi potthakaṃ āropitakāle ṭhapitāti attho. ‘‘Catutthasaṅgītisadisā potthakāruḷhasaṅgīti ahosī’’ti vuttaṃ.
ਮਹਾવਿਭਙ੍ਗੇ ਪਞ੍ਞਤ੍ਤਿવਾਰવਣ੍ਣਨਾ ਨਿਟ੍ਠਿਤਾ।
Mahāvibhaṅge paññattivāravaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਪਰਿવਾਰਪਾਲ਼ਿ • Parivārapāḷi / ੧. ਪਾਰਾਜਿਕਕਣ੍ਡਂ • 1. Pārājikakaṇḍaṃ
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਪਰਿવਾਰ-ਅਟ੍ਠਕਥਾ • Parivāra-aṭṭhakathā / ਪਞ੍ਞਤ੍ਤਿવਾਰવਣ੍ਣਨਾ • Paññattivāravaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਪਞ੍ਞਤ੍ਤਿવਾਰવਣ੍ਣਨਾ • Paññattivāravaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਪਞ੍ਞਤ੍ਤਿવਾਰવਣ੍ਣਨਾ • Paññattivāravaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ਕਤਾਪਤ੍ਤਿવਾਰਾਦਿવਣ੍ਣਨਾ • Katāpattivārādivaṇṇanā
