| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
६. मक्कटकवग्गो
6. Makkaṭakavaggo
१. पन्थमक्कटकङ्गपञ्हो
1. Panthamakkaṭakaṅgapañho
१. ‘‘भन्ते नागसेन, ‘पन्थमक्कटकस्स एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, पन्थमक्कटको पन्थे मक्कटजालवितानं कत्वा यदि तत्थ जालके लग्गति किमि वा मक्खिका वा पटङ्गो वा, तं गहेत्वा भक्खयति, एवमेव खो, महाराज, योगिना योगावचरेन छसु द्वारेसु सतिपट्ठानजालवितानं कत्वा यदि तत्थ किलेसमक्खिका बज्झन्ति, तत्थेव घातेतब्बा। इदं, महाराज, पन्थमक्कटकस्स एकं अङ्गं गहेतब्बं। भासितम्पेतं, महाराज, थेरेन अनुरुद्धेन –
1. ‘‘Bhante nāgasena, ‘panthamakkaṭakassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, panthamakkaṭako panthe makkaṭajālavitānaṃ katvā yadi tattha jālake laggati kimi vā makkhikā vā paṭaṅgo vā, taṃ gahetvā bhakkhayati, evameva kho, mahārāja, yoginā yogāvacarena chasu dvāresu satipaṭṭhānajālavitānaṃ katvā yadi tattha kilesamakkhikā bajjhanti, tattheva ghātetabbā. Idaṃ, mahārāja, panthamakkaṭakassa ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘चित्तं नियमे छसु द्वारेसु, सतिपट्ठानवरुत्तमे।
‘‘‘Cittaṃ niyame chasu dvāresu, satipaṭṭhānavaruttame;
किलेसा तत्थ लग्गा चे, हन्तब्बा ते विपस्सिना’’’ति॥
Kilesā tattha laggā ce, hantabbā te vipassinā’’’ti.
पन्थमक्कटकङ्गपञ्हो पठमो।
Panthamakkaṭakaṅgapañho paṭhamo.
