| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၆. မက္ကဋကဝဂ္ဂော
6. Makkaṭakavaggo
၁. ပန္ထမက္ကဋကင္ဂပဉ္ဟော
1. Panthamakkaṭakaṅgapañho
၁. ‘‘ဘန္တေ နာဂသေန, ‘ပန္ထမက္ကဋကသ္သ ဧကံ အင္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ပန္ထမက္ကဋကော ပန္ထေ မက္ကဋဇာလဝိတာနံ ကတ္ဝာ ယဒိ တတ္ထ ဇာလကေ လဂ္ဂတိ ကိမိ ဝာ မက္ခိကာ ဝာ ပဋင္ဂော ဝာ, တံ ဂဟေတ္ဝာ ဘက္ခယတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ဆသု ဒ္ဝာရေသု သတိပဋ္ဌာနဇာလဝိတာနံ ကတ္ဝာ ယဒိ တတ္ထ ကိလေသမက္ခိကာ ဗဇ္ဈန္တိ, တတ္ထေဝ ဃာတေတဗ္ဗာ။ ဣဒံ, မဟာရာဇ, ပန္ထမက္ကဋကသ္သ ဧကံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန အနုရုဒ္ဓေန –
1. ‘‘Bhante nāgasena, ‘panthamakkaṭakassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, panthamakkaṭako panthe makkaṭajālavitānaṃ katvā yadi tattha jālake laggati kimi vā makkhikā vā paṭaṅgo vā, taṃ gahetvā bhakkhayati, evameva kho, mahārāja, yoginā yogāvacarena chasu dvāresu satipaṭṭhānajālavitānaṃ katvā yadi tattha kilesamakkhikā bajjhanti, tattheva ghātetabbā. Idaṃ, mahārāja, panthamakkaṭakassa ekaṃ aṅgaṃ gahetabbaṃ. Bhāsitampetaṃ, mahārāja, therena anuruddhena –
‘‘‘စိတ္တံ နိယမေ ဆသု ဒ္ဝာရေသု၊ သတိပဋ္ဌာနဝရုတ္တမေ။
‘‘‘Cittaṃ niyame chasu dvāresu, satipaṭṭhānavaruttame;
ကိလေသာ တတ္ထ လဂ္ဂာ စေ၊ ဟန္တဗ္ဗာ တေ ဝိပသ္သိနာ’’’တိ။
Kilesā tattha laggā ce, hantabbā te vipassinā’’’ti.
ပန္ထမက္ကဋကင္ဂပဉ္ဟော ပဌမော။
Panthamakkaṭakaṅgapañho paṭhamo.
