| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၇. ပာပပုညာနံ အပ္ပာနပ္ပဘာဝပဉ္ဟော
7. Pāpapuññānaṃ appānappabhāvapañho
၇. ရာဇာ အာဟ ‘‘ဘန္တေ နာဂသေန, ကတရံ နု ခော ဗဟုတရံ ပုညံ ဝာ အပုညံ ဝာ’’တိ? ‘‘ပုညံ ခော, မဟာရာဇ , ဗဟုတရံ, အပုညံ ထောက’’န္တိ။ ‘‘ကေန ကာရဏေနာ’’တိ? ‘‘အပုညံ ခော, မဟာရာဇ, ကရောန္တော ဝိပ္ပဋိသာရီ ဟောတိ ‘ပာပကမ္မံ မယာ ကတ’န္တိ, တေန ပာပံ န ဝဍ္ဎတိ။ ပုညံ ခော, မဟာရာဇ, ကရောန္တော အဝိပ္ပဋိသာရီ ဟောတိ, အဝိပ္ပဋိသာရိနော ပာမောဇ္ဇံ ဇာယတိ, ပမုဒိတသ္သ ပီတိ ဇာယတိ, ပီတိမနသ္သ ကာယော ပသ္သမ္ဘတိ, ပသ္သဒ္ဓကာယော သုခံ ဝေဒေတိ, သုခိနော စိတ္တံ သမာဓိယတိ, သမာဟိတော ယထာဘူတံ ပဇာနာတိ, တေန ကာရဏေန ပုညံ ဝဍ္ဎတိ။ ပုရိသော ခော, မဟာရာဇ, ဆိန္နဟတ္ထပာဒော ဘဂဝတော ဧကံ ဥပ္ပလဟတ္ထံ ဒတ္ဝာ ဧကနဝုတိကပ္ပာနိ ဝိနိပာတံ န ဂစ္ဆိသ္သတိ။ ဣမိနာပိ, မဟာရာဇ, ကာရဏေန ဘဏာမိ ‘ပုညံ ဗဟုတရံ, အပုညံ ထောက’’’န္တိ။
7. Rājā āha ‘‘bhante nāgasena, kataraṃ nu kho bahutaraṃ puññaṃ vā apuññaṃ vā’’ti? ‘‘Puññaṃ kho, mahārāja , bahutaraṃ, apuññaṃ thoka’’nti. ‘‘Kena kāraṇenā’’ti? ‘‘Apuññaṃ kho, mahārāja, karonto vippaṭisārī hoti ‘pāpakammaṃ mayā kata’nti, tena pāpaṃ na vaḍḍhati. Puññaṃ kho, mahārāja, karonto avippaṭisārī hoti, avippaṭisārino pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati, samāhito yathābhūtaṃ pajānāti, tena kāraṇena puññaṃ vaḍḍhati. Puriso kho, mahārāja, chinnahatthapādo bhagavato ekaṃ uppalahatthaṃ datvā ekanavutikappāni vinipātaṃ na gacchissati. Imināpi, mahārāja, kāraṇena bhaṇāmi ‘puññaṃ bahutaraṃ, apuññaṃ thoka’’’nti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ပာပပုညာနံ အပ္ပာနပ္ပဘာဝပဉ္ဟော သတ္တမော။
Pāpapuññānaṃ appānappabhāvapañho sattamo.
