| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੭. ਪਾਪਪੁਞ੍ਞਾਨਂ ਅਪ੍ਪਾਨਪ੍ਪਭਾવਪਞ੍ਹੋ
7. Pāpapuññānaṃ appānappabhāvapañho
੭. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਕਤਰਂ ਨੁ ਖੋ ਬਹੁਤਰਂ ਪੁਞ੍ਞਂ વਾ ਅਪੁਞ੍ਞਂ વਾ’’ਤਿ? ‘‘ਪੁਞ੍ਞਂ ਖੋ, ਮਹਾਰਾਜ , ਬਹੁਤਰਂ, ਅਪੁਞ੍ਞਂ ਥੋਕ’’ਨ੍ਤਿ। ‘‘ਕੇਨ ਕਾਰਣੇਨਾ’’ਤਿ? ‘‘ਅਪੁਞ੍ਞਂ ਖੋ, ਮਹਾਰਾਜ, ਕਰੋਨ੍ਤੋ વਿਪ੍ਪਟਿਸਾਰੀ ਹੋਤਿ ‘ਪਾਪਕਮ੍ਮਂ ਮਯਾ ਕਤ’ਨ੍ਤਿ, ਤੇਨ ਪਾਪਂ ਨ વਡ੍ਢਤਿ। ਪੁਞ੍ਞਂ ਖੋ, ਮਹਾਰਾਜ, ਕਰੋਨ੍ਤੋ ਅવਿਪ੍ਪਟਿਸਾਰੀ ਹੋਤਿ, ਅવਿਪ੍ਪਟਿਸਾਰਿਨੋ ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤਿ, ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ, ਪਸ੍ਸਦ੍ਧਕਾਯੋ ਸੁਖਂ વੇਦੇਤਿ, ਸੁਖਿਨੋ ਚਿਤ੍ਤਂ ਸਮਾਧਿਯਤਿ, ਸਮਾਹਿਤੋ ਯਥਾਭੂਤਂ ਪਜਾਨਾਤਿ, ਤੇਨ ਕਾਰਣੇਨ ਪੁਞ੍ਞਂ વਡ੍ਢਤਿ। ਪੁਰਿਸੋ ਖੋ, ਮਹਾਰਾਜ, ਛਿਨ੍ਨਹਤ੍ਥਪਾਦੋ ਭਗવਤੋ ਏਕਂ ਉਪ੍ਪਲਹਤ੍ਥਂ ਦਤ੍વਾ ਏਕਨવੁਤਿਕਪ੍ਪਾਨਿ વਿਨਿਪਾਤਂ ਨ ਗਚ੍ਛਿਸ੍ਸਤਿ। ਇਮਿਨਾਪਿ, ਮਹਾਰਾਜ, ਕਾਰਣੇਨ ਭਣਾਮਿ ‘ਪੁਞ੍ਞਂ ਬਹੁਤਰਂ, ਅਪੁਞ੍ਞਂ ਥੋਕ’’’ਨ੍ਤਿ।
7. Rājā āha ‘‘bhante nāgasena, kataraṃ nu kho bahutaraṃ puññaṃ vā apuññaṃ vā’’ti? ‘‘Puññaṃ kho, mahārāja , bahutaraṃ, apuññaṃ thoka’’nti. ‘‘Kena kāraṇenā’’ti? ‘‘Apuññaṃ kho, mahārāja, karonto vippaṭisārī hoti ‘pāpakammaṃ mayā kata’nti, tena pāpaṃ na vaḍḍhati. Puññaṃ kho, mahārāja, karonto avippaṭisārī hoti, avippaṭisārino pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati, samāhito yathābhūtaṃ pajānāti, tena kāraṇena puññaṃ vaḍḍhati. Puriso kho, mahārāja, chinnahatthapādo bhagavato ekaṃ uppalahatthaṃ datvā ekanavutikappāni vinipātaṃ na gacchissati. Imināpi, mahārāja, kāraṇena bhaṇāmi ‘puññaṃ bahutaraṃ, apuññaṃ thoka’’’nti.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ।
‘‘Kallosi, bhante nāgasenā’’ti.
ਪਾਪਪੁਞ੍ਞਾਨਂ ਅਪ੍ਪਾਨਪ੍ਪਭਾવਪਞ੍ਹੋ ਸਤ੍ਤਮੋ।
Pāpapuññānaṃ appānappabhāvapañho sattamo.
