| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൭. പാപപുഞ്ഞാനം അപ്പാനപ്പഭാവപഞ്ഹോ
7. Pāpapuññānaṃ appānappabhāvapañho
൭. രാജാ ആഹ ‘‘ഭന്തേ നാഗസേന, കതരം നു ഖോ ബഹുതരം പുഞ്ഞം വാ അപുഞ്ഞം വാ’’തി? ‘‘പുഞ്ഞം ഖോ, മഹാരാജ , ബഹുതരം, അപുഞ്ഞം ഥോക’’ന്തി. ‘‘കേന കാരണേനാ’’തി? ‘‘അപുഞ്ഞം ഖോ, മഹാരാജ, കരോന്തോ വിപ്പടിസാരീ ഹോതി ‘പാപകമ്മം മയാ കത’ന്തി, തേന പാപം ന വഡ്ഢതി. പുഞ്ഞം ഖോ, മഹാരാജ, കരോന്തോ അവിപ്പടിസാരീ ഹോതി, അവിപ്പടിസാരിനോ പാമോജ്ജം ജായതി, പമുദിതസ്സ പീതി ജായതി, പീതിമനസ്സ കായോ പസ്സമ്ഭതി, പസ്സദ്ധകായോ സുഖം വേദേതി, സുഖിനോ ചിത്തം സമാധിയതി, സമാഹിതോ യഥാഭൂതം പജാനാതി, തേന കാരണേന പുഞ്ഞം വഡ്ഢതി. പുരിസോ ഖോ, മഹാരാജ, ഛിന്നഹത്ഥപാദോ ഭഗവതോ ഏകം ഉപ്പലഹത്ഥം ദത്വാ ഏകനവുതികപ്പാനി വിനിപാതം ന ഗച്ഛിസ്സതി. ഇമിനാപി, മഹാരാജ, കാരണേന ഭണാമി ‘പുഞ്ഞം ബഹുതരം, അപുഞ്ഞം ഥോക’’’ന്തി.
7. Rājā āha ‘‘bhante nāgasena, kataraṃ nu kho bahutaraṃ puññaṃ vā apuññaṃ vā’’ti? ‘‘Puññaṃ kho, mahārāja , bahutaraṃ, apuññaṃ thoka’’nti. ‘‘Kena kāraṇenā’’ti? ‘‘Apuññaṃ kho, mahārāja, karonto vippaṭisārī hoti ‘pāpakammaṃ mayā kata’nti, tena pāpaṃ na vaḍḍhati. Puññaṃ kho, mahārāja, karonto avippaṭisārī hoti, avippaṭisārino pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati, samāhito yathābhūtaṃ pajānāti, tena kāraṇena puññaṃ vaḍḍhati. Puriso kho, mahārāja, chinnahatthapādo bhagavato ekaṃ uppalahatthaṃ datvā ekanavutikappāni vinipātaṃ na gacchissati. Imināpi, mahārāja, kāraṇena bhaṇāmi ‘puññaṃ bahutaraṃ, apuññaṃ thoka’’’nti.
‘‘കല്ലോസി, ഭന്തേ നാഗസേനാ’’തി.
‘‘Kallosi, bhante nāgasenā’’ti.
പാപപുഞ്ഞാനം അപ്പാനപ്പഭാവപഞ്ഹോ സത്തമോ.
Pāpapuññānaṃ appānappabhāvapañho sattamo.
