| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๑๑. ปาปสามเณรีสุตฺตํ
11. Pāpasāmaṇerīsuttaṃ
๒๒๒. ‘‘อิธาหํ, อาวุโส, คิชฺฌกูฎา ปพฺพตา โอโรหโนฺต อทฺทสํ สามเณริํ เวหาสํ คจฺฉนฺติํฯ ตสฺสา สงฺฆาฎิปิ อาทิตฺตา สมฺปชฺชลิตา สโชติภูตา, ปโตฺตปิ อาทิโตฺต สมฺปชฺชลิโต สโชติภูโต, กายพนฺธนมฺปิ อาทิตฺตํ สมฺปชฺชลิตํ สโชติภูตํ, กาโยปิ อาทิโตฺต สมฺปชฺชลิโต สโชติภูโตฯ สา สุทํ อฎฺฎสฺสรํ กโรติฯ ตสฺส มยฺหํ, อาวุโส, เอตทโหสิ – ‘อจฺฉริยํ วต, โภ, อพฺภุตํ วต, โภ! เอวรูโปปิ นาม สโตฺต ภวิสฺสติ! เอวรูโปปิ นาม ยโกฺข ภวิสฺสติ! เอวรูโปปิ นาม อตฺตภาวปฎิลาโภ ภวิสฺสตี’’’ติ!!
222. ‘‘Idhāhaṃ, āvuso, gijjhakūṭā pabbatā orohanto addasaṃ sāmaṇeriṃ vehāsaṃ gacchantiṃ. Tassā saṅghāṭipi ādittā sampajjalitā sajotibhūtā, pattopi āditto sampajjalito sajotibhūto, kāyabandhanampi ādittaṃ sampajjalitaṃ sajotibhūtaṃ, kāyopi āditto sampajjalito sajotibhūto. Sā sudaṃ aṭṭassaraṃ karoti. Tassa mayhaṃ, āvuso, etadahosi – ‘acchariyaṃ vata, bho, abbhutaṃ vata, bho! Evarūpopi nāma satto bhavissati! Evarūpopi nāma yakkho bhavissati! Evarūpopi nāma attabhāvapaṭilābho bhavissatī’’’ti!!
อถ โข ภควา ภิกฺขู อามเนฺตสิ – ‘‘จกฺขุภูตา วต, ภิกฺขเว, สาวกา วิหรนฺติ; ญาณภูตา วต, ภิกฺขเว, สาวกา วิหรนฺติ, ยตฺร หิ นาม สาวโก เอวรูปํ ญสฺสติ วา ทกฺขติ วา สกฺขิํ วา กริสฺสติฯ ปุเพฺพว เม สา, ภิกฺขเว, สามเณรี ทิฎฺฐา อโหสิฯ อปิ จาหํ น พฺยากาสิํฯ อหเญฺจตํ พฺยากเรยฺยํ, ปเร จ เม น สทฺทเหยฺยุํฯ เย เม น สทฺทเหยฺยุํ, เตสํ ตํ อสฺส ทีฆรตฺตํ อหิตาย ทุกฺขายฯ เอสา, ภิกฺขเว, สามเณรี กสฺสปสฺส สมฺมาสมฺพุทฺธสฺส ปาวจเน ปาปสามเณรี อโหสิฯ สา ตสฺส กมฺมสฺส วิปาเกน พหูนิ วสฺสานิ พหูนิ วสฺสสตานิ พหูนิ วสฺสสหสฺสานิ พหูนิ วสฺสสตสหสฺสานิ นิรเย ปจฺจิตฺวา ตเสฺสว กมฺมสฺส วิปากาวเสเสน เอวรูปํ อตฺตภาวปฎิลาภํ ปฎิสํเวทยตี’’ติฯ เอกาทสมํฯ
Atha kho bhagavā bhikkhū āmantesi – ‘‘cakkhubhūtā vata, bhikkhave, sāvakā viharanti; ñāṇabhūtā vata, bhikkhave, sāvakā viharanti, yatra hi nāma sāvako evarūpaṃ ñassati vā dakkhati vā sakkhiṃ vā karissati. Pubbeva me sā, bhikkhave, sāmaṇerī diṭṭhā ahosi. Api cāhaṃ na byākāsiṃ. Ahañcetaṃ byākareyyaṃ, pare ca me na saddaheyyuṃ. Ye me na saddaheyyuṃ, tesaṃ taṃ assa dīgharattaṃ ahitāya dukkhāya. Esā, bhikkhave, sāmaṇerī kassapassa sammāsambuddhassa pāvacane pāpasāmaṇerī ahosi. Sā tassa kammassa vipākena bahūni vassāni bahūni vassasatāni bahūni vassasahassāni bahūni vassasatasahassāni niraye paccitvā tasseva kammassa vipākāvasesena evarūpaṃ attabhāvapaṭilābhaṃ paṭisaṃvedayatī’’ti. Ekādasamaṃ.
ทุติโย วโคฺคฯ
Dutiyo vaggo.
ตสฺสุทฺทานํ –
Tassuddānaṃ –
กูเป นิมุโคฺค หิ โส ปารทาริโก;
Kūpe nimuggo hi so pāradāriko;
คูถขาทิ อหุ ทุฎฺฐพฺราหฺมโณฯ
Gūthakhādi ahu duṭṭhabrāhmaṇo.
นิจฺฉวิตฺถิ อติจารินี อหุ;
Nicchavitthi aticārinī ahu;
มงฺคุลิตฺถิ อหุ อิกฺขณิตฺถิกาฯ
Maṅgulitthi ahu ikkhaṇitthikā.
โอกิลินิ สปตฺตงฺคาโรกิริ;
Okilini sapattaṅgārokiri;
สีสจฺฉิโนฺน อหุ โจรฆาตโกฯ
Sīsacchinno ahu coraghātako.
ภิกฺขุ ภิกฺขุนี สิกฺขมานา;
Bhikkhu bhikkhunī sikkhamānā;
สามเณโร อถ สามเณริกาฯ
Sāmaṇero atha sāmaṇerikā.
กสฺสปสฺส วินยสฺมิํ ปพฺพชฺชํ;
Kassapassa vinayasmiṃ pabbajjaṃ;
ปาปกมฺมํ กริํสุ ตาวเทติฯ
Pāpakammaṃ kariṃsu tāvadeti.
ลกฺขณสํยุตฺตํ สมตฺตํฯ
Lakkhaṇasaṃyuttaṃ samattaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๗-๑๑. ปาปภิกฺขุสุตฺตาทิวณฺณนา • 7-11. Pāpabhikkhusuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๗-๑๑. ปาปภิกฺขุสุตฺตาทิวณฺณนา • 7-11. Pāpabhikkhusuttādivaṇṇanā
