| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
11. පාපසාමණෙරීසුත්‌තං
11. Pāpasāmaṇerīsuttaṃ
222. ‘‘ඉධාහං, ආවුසො, ගිජ්‌ඣකූටා පබ්‌බතා ඔරොහන්‌තො අද්‌දසං සාමණෙරිං වෙහාසං ගච්‌ඡන්‌තිං. තස්‌සා සඞ්‌ඝාටිපි ආදිත්‌තා සම්‌පජ්‌ජලිතා සජොතිභූතා, පත්‌තොපි ආදිත්‌තො සම්‌පජ්‌ජලිතො සජොතිභූතො, කායබන්‌ධනම්‌පි ආදිත්‌තං සම්‌පජ්‌ජලිතං සජොතිභූතං, කායොපි ආදිත්‌තො සම්‌පජ්‌ජලිතො සජොතිභූතො. සා සුදං අට්‌ටස්‌සරං කරොති. තස්‌ස මය්‌හං, ආවුසො, එතදහොසි – ‘අච්‌ඡරියං වත, භො, අබ්‌භුතං වත, භො! එවරූපොපි නාම සත්‌තො භවිස්‌සති! එවරූපොපි නාම යක්‌ඛො භවිස්‌සති! එවරූපොපි නාම අත්‌තභාවපටිලාභො භවිස්‌සතී’’’ති!!
222. ‘‘Idhāhaṃ, āvuso, gijjhakūṭā pabbatā orohanto addasaṃ sāmaṇeriṃ vehāsaṃ gacchantiṃ. Tassā saṅghāṭipi ādittā sampajjalitā sajotibhūtā, pattopi āditto sampajjalito sajotibhūto, kāyabandhanampi ādittaṃ sampajjalitaṃ sajotibhūtaṃ, kāyopi āditto sampajjalito sajotibhūto. Sā sudaṃ aṭṭassaraṃ karoti. Tassa mayhaṃ, āvuso, etadahosi – ‘acchariyaṃ vata, bho, abbhutaṃ vata, bho! Evarūpopi nāma satto bhavissati! Evarūpopi nāma yakkho bhavissati! Evarūpopi nāma attabhāvapaṭilābho bhavissatī’’’ti!!
අථ ඛො භගවා භික්‌ඛූ ආමන්‌තෙසි – ‘‘චක්‌ඛුභූතා වත, භික්‌ඛවෙ, සාවකා විහරන්‌ති; ඤාණභූතා වත, භික්‌ඛවෙ, සාවකා විහරන්‌ති, යත්‍ර හි නාම සාවකො එවරූපං ඤස්‌සති වා දක්‌ඛති වා සක්‌ඛිං වා කරිස්‌සති. පුබ්‌බෙව මෙ සා, භික්‌ඛවෙ, සාමණෙරී දිට්‌ඨා අහොසි. අපි චාහං න බ්‍යාකාසිං. අහඤ්‌චෙතං බ්‍යාකරෙය්‍යං, පරෙ ච මෙ න සද්‌දහෙය්‍යුං. යෙ මෙ න සද්‌දහෙය්‍යුං, තෙසං තං අස්‌ස දීඝරත්‌තං අහිතාය දුක්‌ඛාය. එසා, භික්‌ඛවෙ, සාමණෙරී කස්‌සපස්‌ස සම්‌මාසම්‌බුද්‌ධස්‌ස පාවචනෙ පාපසාමණෙරී අහොසි. සා තස්‌ස කම්‌මස්‌ස විපාකෙන බහූනි වස්‌සානි බහූනි වස්‌සසතානි බහූනි වස්‌සසහස්‌සානි බහූනි වස්‌සසතසහස්‌සානි නිරයෙ පච්‌චිත්‌වා තස්‌සෙව කම්‌මස්‌ස විපාකාවසෙසෙන එවරූපං අත්‌තභාවපටිලාභං පටිසංවෙදයතී’’ති. එකාදසමං.
Atha kho bhagavā bhikkhū āmantesi – ‘‘cakkhubhūtā vata, bhikkhave, sāvakā viharanti; ñāṇabhūtā vata, bhikkhave, sāvakā viharanti, yatra hi nāma sāvako evarūpaṃ ñassati vā dakkhati vā sakkhiṃ vā karissati. Pubbeva me sā, bhikkhave, sāmaṇerī diṭṭhā ahosi. Api cāhaṃ na byākāsiṃ. Ahañcetaṃ byākareyyaṃ, pare ca me na saddaheyyuṃ. Ye me na saddaheyyuṃ, tesaṃ taṃ assa dīgharattaṃ ahitāya dukkhāya. Esā, bhikkhave, sāmaṇerī kassapassa sammāsambuddhassa pāvacane pāpasāmaṇerī ahosi. Sā tassa kammassa vipākena bahūni vassāni bahūni vassasatāni bahūni vassasahassāni bahūni vassasatasahassāni niraye paccitvā tasseva kammassa vipākāvasesena evarūpaṃ attabhāvapaṭilābhaṃ paṭisaṃvedayatī’’ti. Ekādasamaṃ.
දුතියො වග්‌ගො.
Dutiyo vaggo.
තස්‌සුද්‌දානං –
Tassuddānaṃ –
කූපෙ නිමුග්‌ගො හි සො පාරදාරිකො;
Kūpe nimuggo hi so pāradāriko;
ගූථඛාදි අහු දුට්‌ඨබ්‍රාහ්‌මණො.
Gūthakhādi ahu duṭṭhabrāhmaṇo.
නිච්‌ඡවිත්‌ථි අතිචාරිනී අහු;
Nicchavitthi aticārinī ahu;
මඞ්‌ගුලිත්‌ථි අහු ඉක්‌ඛණිත්‌ථිකා.
Maṅgulitthi ahu ikkhaṇitthikā.
ඔකිලිනි සපත්‌තඞ්‌ගාරොකිරි;
Okilini sapattaṅgārokiri;
සීසච්‌ඡින්‌නො අහු චොරඝාතකො.
Sīsacchinno ahu coraghātako.
භික්‌ඛු භික්‌ඛුනී සික්‌ඛමානා;
Bhikkhu bhikkhunī sikkhamānā;
සාමණෙරො අථ සාමණෙරිකා.
Sāmaṇero atha sāmaṇerikā.
කස්‌සපස්‌ස විනයස්‌මිං පබ්‌බජ්‌ජං;
Kassapassa vinayasmiṃ pabbajjaṃ;
පාපකම්‌මං කරිංසු තාවදෙති.
Pāpakammaṃ kariṃsu tāvadeti.
ලක්‌ඛණසංයුත්‌තං සමත්‌තං.
Lakkhaṇasaṃyuttaṃ samattaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7-11. පාපභික්‌ඛුසුත්‌තාදිවණ්‌ණනා • 7-11. Pāpabhikkhusuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7-11. පාපභික්‌ඛුසුත්‌තාදිවණ්‌ණනා • 7-11. Pāpabhikkhusuttādivaṇṇanā
