| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. பபாதஸுத்தங்
2. Papātasuttaṃ
1112. ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. அத² கோ² ப⁴க³வா பி⁴க்கூ² ஆமந்தேஸி – ‘‘ஆயாம, பி⁴க்க²வே, யேன படிபா⁴னகூடோ தேனுபஸங்கமிஸ்ஸாம தி³வாவிஹாராயா’’தி. ‘‘ஏவங், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸுங். அத² கோ² ப⁴க³வா ஸம்ப³ஹுலேஹி பி⁴க்கூ²ஹி ஸத்³தி⁴ங் யேன படிபா⁴னகூடோ தேனுபஸங்கமி. அத்³த³ஸா கோ² அஞ்ஞதரோ பி⁴க்கு² படிபா⁴னகூடே மஹந்தங் பபாதங். தி³ஸ்வான ப⁴க³வந்தங் ஏதத³வோச – ‘‘மஹா வதாயங், ப⁴ந்தே, பபாதோ ஸுப⁴யானகோ, ப⁴ந்தே, பபாதோ. அத்தி² நு கோ², ப⁴ந்தே, இமம்ஹா பபாதா அஞ்ஞோ பபாதோ மஹந்ததரோ ச ப⁴யானகதரோ சா’’தி? ‘‘அத்தி² கோ², பி⁴க்கு², இமம்ஹா பபாதா அஞ்ஞோ பபாதோ மஹந்ததரோ ச ப⁴யானகதரோ சா’’தி.
1112. Ekaṃ samayaṃ bhagavā rājagahe viharati gijjhakūṭe pabbate. Atha kho bhagavā bhikkhū āmantesi – ‘‘āyāma, bhikkhave, yena paṭibhānakūṭo tenupasaṅkamissāma divāvihārāyā’’ti. ‘‘Evaṃ, bhante’’ti kho te bhikkhū bhagavato paccassosuṃ. Atha kho bhagavā sambahulehi bhikkhūhi saddhiṃ yena paṭibhānakūṭo tenupasaṅkami. Addasā kho aññataro bhikkhu paṭibhānakūṭe mahantaṃ papātaṃ. Disvāna bhagavantaṃ etadavoca – ‘‘mahā vatāyaṃ, bhante, papāto subhayānako, bhante, papāto. Atthi nu kho, bhante, imamhā papātā añño papāto mahantataro ca bhayānakataro cā’’ti? ‘‘Atthi kho, bhikkhu, imamhā papātā añño papāto mahantataro ca bhayānakataro cā’’ti.
‘‘கதமோ பன, ப⁴ந்தே, இமம்ஹா பபாதா அஞ்ஞோ பபாதோ மஹந்ததரோ ச ப⁴யானகதரோ சா’’தி? ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா ‘இத³ங் து³க்க²’ந்தி யதா²பூ⁴தங் நப்பஜானந்தி, ‘அயங் து³க்க²ஸமுத³யோ’தி யதா²பூ⁴தங் நப்பஜானந்தி, ‘அயங் து³க்க²னிரோதோ⁴’தி யதா²பூ⁴தங் நப்பஜானந்தி, ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் நப்பஜானந்தி, தே ஜாதிஸங்வத்தனிகேஸு ஸங்கா²ரேஸு அபி⁴ரமந்தி, ஜராஸங்வத்தனிகேஸு ஸங்கா²ரேஸு அபி⁴ரமந்தி , மரணஸங்வத்தனிகேஸு ஸங்கா²ரேஸு அபி⁴ரமந்தி, ஸோகபரிதே³வது³க்க²தோ³மனஸ்ஸுபாயாஸஸங்வத்தனிகேஸு ஸங்கா²ரேஸு அபி⁴ரமந்தி. தே ஜாதிஸங்வத்தனிகேஸு ஸங்கா²ரேஸு அபி⁴ரதா ஜராஸங்வத்தனிகேஸு ஸங்கா²ரேஸு அபி⁴ரதா மரணஸங்வத்தனிகேஸு ஸங்கா²ரேஸு அபி⁴ரதா ஸோகபரிதே³வது³க்க²தோ³மனஸ்ஸுபாயாஸஸங்வத்தனிகேஸு ஸங்கா²ரேஸு அபி⁴ரதா ஜாதிஸங்வத்தனிகேபி ஸங்கா²ரே அபி⁴ஸங்க²ரொந்தி, ஜராஸங்வத்தனிகேபி ஸங்கா²ரே அபி⁴ஸங்க²ரொந்தி, மரணஸங்வத்தனிகேபி ஸங்கா²ரே அபி⁴ஸங்க²ரொந்தி, ஸோகபரிதே³வது³க்க²தோ³மனஸ்ஸுபாயாஸஸங்வத்தனிகேபி ஸங்கா²ரே அபி⁴ஸங்க²ரொந்தி. தே ஜாதிஸங்வத்தனிகேபி ஸங்கா²ரே அபி⁴ஸங்க²ரித்வா ஜராஸங்வத்தனிகேபி ஸங்கா²ரே அபி⁴ஸங்க²ரித்வா மரணஸங்வத்தனிகேபி ஸங்கா²ரே அபி⁴ஸங்க²ரித்வா ஸோகபரிதே³வது³க்க²தோ³மனஸ்ஸுபாயாஸஸங்வத்தனிகேபி ஸங்கா²ரே அபி⁴ஸங்க²ரித்வா ஜாதிபபாதம்பி பபதந்தி, ஜராபபாதம்பி பபதந்தி, மரணபபாதம்பி பபதந்தி, ஸோகபரிதே³வது³க்க²தோ³மனஸ்ஸுபாயாஸபபாதம்பி பபதந்தி. தே ந பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ‘ந பரிமுச்சந்தி து³க்க²ஸ்மா’தி வதா³மி’’.
‘‘Katamo pana, bhante, imamhā papātā añño papāto mahantataro ca bhayānakataro cā’’ti? ‘‘Ye hi keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ nappajānanti, ‘ayaṃ dukkhasamudayo’ti yathābhūtaṃ nappajānanti, ‘ayaṃ dukkhanirodho’ti yathābhūtaṃ nappajānanti, ‘ayaṃ dukkhanirodhagāminī paṭipadā’ti yathābhūtaṃ nappajānanti, te jātisaṃvattanikesu saṅkhāresu abhiramanti, jarāsaṃvattanikesu saṅkhāresu abhiramanti , maraṇasaṃvattanikesu saṅkhāresu abhiramanti, sokaparidevadukkhadomanassupāyāsasaṃvattanikesu saṅkhāresu abhiramanti. Te jātisaṃvattanikesu saṅkhāresu abhiratā jarāsaṃvattanikesu saṅkhāresu abhiratā maraṇasaṃvattanikesu saṅkhāresu abhiratā sokaparidevadukkhadomanassupāyāsasaṃvattanikesu saṅkhāresu abhiratā jātisaṃvattanikepi saṅkhāre abhisaṅkharonti, jarāsaṃvattanikepi saṅkhāre abhisaṅkharonti, maraṇasaṃvattanikepi saṅkhāre abhisaṅkharonti, sokaparidevadukkhadomanassupāyāsasaṃvattanikepi saṅkhāre abhisaṅkharonti. Te jātisaṃvattanikepi saṅkhāre abhisaṅkharitvā jarāsaṃvattanikepi saṅkhāre abhisaṅkharitvā maraṇasaṃvattanikepi saṅkhāre abhisaṅkharitvā sokaparidevadukkhadomanassupāyāsasaṃvattanikepi saṅkhāre abhisaṅkharitvā jātipapātampi papatanti, jarāpapātampi papatanti, maraṇapapātampi papatanti, sokaparidevadukkhadomanassupāyāsapapātampi papatanti. Te na parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Na parimuccanti dukkhasmā’ti vadāmi’’.
‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா ‘இத³ங் து³க்க²’ந்தி யதா²பூ⁴தங் பஜானந்தி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானந்தி, தே ஜாதிஸங்வத்தனிகேஸு ஸங்கா²ரேஸு நாபி⁴ரமந்தி, ஜராஸங்வத்தனிகேஸு ஸங்கா²ரேஸு நாபி⁴ரமந்தி, மரணஸங்வத்தனிகேஸு ஸங்கா²ரேஸு நாபி⁴ரமந்தி, ஸோகபரிதே³வது³க்க²தோ³மனஸ்ஸுபாயாஸஸங்வத்தனிகேஸு ஸங்கா²ரேஸு நாபி⁴ரமந்தி. தே ஜாதிஸங்வத்தனிகேஸு ஸங்கா²ரேஸு அனபி⁴ரதா, ஜராஸங்வத்தனிகேஸு ஸங்கா²ரேஸு அனபி⁴ரதா, மரணஸங்வத்தனிகேஸு ஸங்கா²ரேஸு அனபி⁴ரதா, ஸோகபரிதே³வது³க்க²தோ³மனஸ்ஸுபாயாஸஸங்வத்தனிகேஸு ஸங்கா²ரேஸு அனபி⁴ரதா, ஜாதிஸங்வத்தனிகேபி ஸங்கா²ரே நாபி⁴ஸங்க²ரொந்தி, ஜராஸங்வத்தனிகேபி ஸங்கா²ரே நாபி⁴ஸங்க²ரொந்தி, மரணஸங்வத்தனிகேபி ஸங்கா²ரே நாபி⁴ஸங்க²ரொந்தி, ஸோகபரிதே³வது³க்க²தோ³மனஸ்ஸுபாயாஸஸங்வத்தனிகேபி ஸங்கா²ரே நாபி⁴ஸங்க²ரொந்தி. தே ஜாதிஸங்வத்தனிகேபி ஸங்கா²ரே அனபி⁴ஸங்க²ரித்வா, ஜராஸங்வத்தனிகேபி ஸங்கா²ரே அனபி⁴ஸங்க²ரித்வா, மரணஸங்வத்தனிகேபி ஸங்கா²ரே அனபி⁴ஸங்க²ரித்வா, ஸோகபரிதே³வது³க்க²தோ³மனஸ்ஸுபாயாஸஸங்வத்தனிகேபி ஸங்கா²ரே அனபி⁴ஸங்க²ரித்வா, ஜாதிபபாதம்பி நப்பபதந்தி, ஜராபபாதம்பி நப்பபதந்தி, மரணபபாதம்பி நப்பபதந்தி, ஸோகபரிதே³வது³க்க²தோ³மனஸ்ஸுபாயாஸபபாதம்பி நப்பபதந்தி. தே பரிமுச்சந்தி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி. ‘பரிமுச்சந்தி து³க்க²ஸ்மா’தி வதா³மி’’.
‘‘Ye ca kho keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ pajānanti…pe… ‘ayaṃ dukkhanirodhagāminī paṭipadā’ti yathābhūtaṃ pajānanti, te jātisaṃvattanikesu saṅkhāresu nābhiramanti, jarāsaṃvattanikesu saṅkhāresu nābhiramanti, maraṇasaṃvattanikesu saṅkhāresu nābhiramanti, sokaparidevadukkhadomanassupāyāsasaṃvattanikesu saṅkhāresu nābhiramanti. Te jātisaṃvattanikesu saṅkhāresu anabhiratā, jarāsaṃvattanikesu saṅkhāresu anabhiratā, maraṇasaṃvattanikesu saṅkhāresu anabhiratā, sokaparidevadukkhadomanassupāyāsasaṃvattanikesu saṅkhāresu anabhiratā, jātisaṃvattanikepi saṅkhāre nābhisaṅkharonti, jarāsaṃvattanikepi saṅkhāre nābhisaṅkharonti, maraṇasaṃvattanikepi saṅkhāre nābhisaṅkharonti, sokaparidevadukkhadomanassupāyāsasaṃvattanikepi saṅkhāre nābhisaṅkharonti. Te jātisaṃvattanikepi saṅkhāre anabhisaṅkharitvā, jarāsaṃvattanikepi saṅkhāre anabhisaṅkharitvā, maraṇasaṃvattanikepi saṅkhāre anabhisaṅkharitvā, sokaparidevadukkhadomanassupāyāsasaṃvattanikepi saṅkhāre anabhisaṅkharitvā, jātipapātampi nappapatanti, jarāpapātampi nappapatanti, maraṇapapātampi nappapatanti, sokaparidevadukkhadomanassupāyāsapapātampi nappapatanti. Te parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Parimuccanti dukkhasmā’ti vadāmi’’.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. து³தியங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-3. பபாதஸுத்தாதி³வண்ணனா • 2-3. Papātasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2-3. பபாதஸுத்தாதி³வண்ணனா • 2-3. Papātasuttādivaṇṇanā
