| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. পপাতসুত্তং
2. Papātasuttaṃ
১১১২. একং সমযং ভগৰা রাজগহে ৰিহরতি গিজ্ঝকূটে পব্বতে। অথ খো ভগৰা ভিক্খূ আমন্তেসি – ‘‘আযাম, ভিক্খৰে, যেন পটিভানকূটো তেনুপসঙ্কমিস্সাম দিৰাৰিহারাযা’’তি। ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। অথ খো ভগৰা সম্বহুলেহি ভিক্খূহি সদ্ধিং যেন পটিভানকূটো তেনুপসঙ্কমি। অদ্দসা খো অঞ্ঞতরো ভিক্খু পটিভানকূটে মহন্তং পপাতং। দিস্ৰান ভগৰন্তং এতদৰোচ – ‘‘মহা ৰতাযং, ভন্তে, পপাতো সুভযানকো, ভন্তে, পপাতো। অত্থি নু খো, ভন্তে, ইমম্হা পপাতা অঞ্ঞো পপাতো মহন্ততরো চ ভযানকতরো চা’’তি? ‘‘অত্থি খো, ভিক্খু, ইমম্হা পপাতা অঞ্ঞো পপাতো মহন্ততরো চ ভযানকতরো চা’’তি।
1112. Ekaṃ samayaṃ bhagavā rājagahe viharati gijjhakūṭe pabbate. Atha kho bhagavā bhikkhū āmantesi – ‘‘āyāma, bhikkhave, yena paṭibhānakūṭo tenupasaṅkamissāma divāvihārāyā’’ti. ‘‘Evaṃ, bhante’’ti kho te bhikkhū bhagavato paccassosuṃ. Atha kho bhagavā sambahulehi bhikkhūhi saddhiṃ yena paṭibhānakūṭo tenupasaṅkami. Addasā kho aññataro bhikkhu paṭibhānakūṭe mahantaṃ papātaṃ. Disvāna bhagavantaṃ etadavoca – ‘‘mahā vatāyaṃ, bhante, papāto subhayānako, bhante, papāto. Atthi nu kho, bhante, imamhā papātā añño papāto mahantataro ca bhayānakataro cā’’ti? ‘‘Atthi kho, bhikkhu, imamhā papātā añño papāto mahantataro ca bhayānakataro cā’’ti.
‘‘কতমো পন, ভন্তে, ইমম্হা পপাতা অঞ্ঞো পপাতো মহন্ততরো চ ভযানকতরো চা’’তি? ‘‘যে হি কেচি, ভিক্খৰে, সমণা ৰা ব্রাহ্মণা ৰা ‘ইদং দুক্খ’ন্তি যথাভূতং নপ্পজানন্তি, ‘অযং দুক্খসমুদযো’তি যথাভূতং নপ্পজানন্তি, ‘অযং দুক্খনিরোধো’তি যথাভূতং নপ্পজানন্তি, ‘অযং দুক্খনিরোধগামিনী পটিপদা’তি যথাভূতং নপ্পজানন্তি, তে জাতিসংৰত্তনিকেসু সঙ্খারেসু অভিরমন্তি, জরাসংৰত্তনিকেসু সঙ্খারেসু অভিরমন্তি , মরণসংৰত্তনিকেসু সঙ্খারেসু অভিরমন্তি, সোকপরিদেৰদুক্খদোমনস্সুপাযাসসংৰত্তনিকেসু সঙ্খারেসু অভিরমন্তি। তে জাতিসংৰত্তনিকেসু সঙ্খারেসু অভিরতা জরাসংৰত্তনিকেসু সঙ্খারেসু অভিরতা মরণসংৰত্তনিকেসু সঙ্খারেসু অভিরতা সোকপরিদেৰদুক্খদোমনস্সুপাযাসসংৰত্তনিকেসু সঙ্খারেসু অভিরতা জাতিসংৰত্তনিকেপি সঙ্খারে অভিসঙ্খরোন্তি, জরাসংৰত্তনিকেপি সঙ্খারে অভিসঙ্খরোন্তি, মরণসংৰত্তনিকেপি সঙ্খারে অভিসঙ্খরোন্তি, সোকপরিদেৰদুক্খদোমনস্সুপাযাসসংৰত্তনিকেপি সঙ্খারে অভিসঙ্খরোন্তি। তে জাতিসংৰত্তনিকেপি সঙ্খারে অভিসঙ্খরিত্ৰা জরাসংৰত্তনিকেপি সঙ্খারে অভিসঙ্খরিত্ৰা মরণসংৰত্তনিকেপি সঙ্খারে অভিসঙ্খরিত্ৰা সোকপরিদেৰদুক্খদোমনস্সুপাযাসসংৰত্তনিকেপি সঙ্খারে অভিসঙ্খরিত্ৰা জাতিপপাতম্পি পপতন্তি, জরাপপাতম্পি পপতন্তি, মরণপপাতম্পি পপতন্তি, সোকপরিদেৰদুক্খদোমনস্সুপাযাসপপাতম্পি পপতন্তি। তে ন পরিমুচ্চন্তি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি। ‘ন পরিমুচ্চন্তি দুক্খস্মা’তি ৰদামি’’।
‘‘Katamo pana, bhante, imamhā papātā añño papāto mahantataro ca bhayānakataro cā’’ti? ‘‘Ye hi keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ nappajānanti, ‘ayaṃ dukkhasamudayo’ti yathābhūtaṃ nappajānanti, ‘ayaṃ dukkhanirodho’ti yathābhūtaṃ nappajānanti, ‘ayaṃ dukkhanirodhagāminī paṭipadā’ti yathābhūtaṃ nappajānanti, te jātisaṃvattanikesu saṅkhāresu abhiramanti, jarāsaṃvattanikesu saṅkhāresu abhiramanti , maraṇasaṃvattanikesu saṅkhāresu abhiramanti, sokaparidevadukkhadomanassupāyāsasaṃvattanikesu saṅkhāresu abhiramanti. Te jātisaṃvattanikesu saṅkhāresu abhiratā jarāsaṃvattanikesu saṅkhāresu abhiratā maraṇasaṃvattanikesu saṅkhāresu abhiratā sokaparidevadukkhadomanassupāyāsasaṃvattanikesu saṅkhāresu abhiratā jātisaṃvattanikepi saṅkhāre abhisaṅkharonti, jarāsaṃvattanikepi saṅkhāre abhisaṅkharonti, maraṇasaṃvattanikepi saṅkhāre abhisaṅkharonti, sokaparidevadukkhadomanassupāyāsasaṃvattanikepi saṅkhāre abhisaṅkharonti. Te jātisaṃvattanikepi saṅkhāre abhisaṅkharitvā jarāsaṃvattanikepi saṅkhāre abhisaṅkharitvā maraṇasaṃvattanikepi saṅkhāre abhisaṅkharitvā sokaparidevadukkhadomanassupāyāsasaṃvattanikepi saṅkhāre abhisaṅkharitvā jātipapātampi papatanti, jarāpapātampi papatanti, maraṇapapātampi papatanti, sokaparidevadukkhadomanassupāyāsapapātampi papatanti. Te na parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Na parimuccanti dukkhasmā’ti vadāmi’’.
‘‘যে চ খো কেচি, ভিক্খৰে, সমণা ৰা ব্রাহ্মণা ৰা ‘ইদং দুক্খ’ন্তি যথাভূতং পজানন্তি…পে॰… ‘অযং দুক্খনিরোধগামিনী পটিপদা’তি যথাভূতং পজানন্তি, তে জাতিসংৰত্তনিকেসু সঙ্খারেসু নাভিরমন্তি, জরাসংৰত্তনিকেসু সঙ্খারেসু নাভিরমন্তি, মরণসংৰত্তনিকেসু সঙ্খারেসু নাভিরমন্তি, সোকপরিদেৰদুক্খদোমনস্সুপাযাসসংৰত্তনিকেসু সঙ্খারেসু নাভিরমন্তি। তে জাতিসংৰত্তনিকেসু সঙ্খারেসু অনভিরতা, জরাসংৰত্তনিকেসু সঙ্খারেসু অনভিরতা, মরণসংৰত্তনিকেসু সঙ্খারেসু অনভিরতা, সোকপরিদেৰদুক্খদোমনস্সুপাযাসসংৰত্তনিকেসু সঙ্খারেসু অনভিরতা, জাতিসংৰত্তনিকেপি সঙ্খারে নাভিসঙ্খরোন্তি, জরাসংৰত্তনিকেপি সঙ্খারে নাভিসঙ্খরোন্তি, মরণসংৰত্তনিকেপি সঙ্খারে নাভিসঙ্খরোন্তি, সোকপরিদেৰদুক্খদোমনস্সুপাযাসসংৰত্তনিকেপি সঙ্খারে নাভিসঙ্খরোন্তি। তে জাতিসংৰত্তনিকেপি সঙ্খারে অনভিসঙ্খরিত্ৰা, জরাসংৰত্তনিকেপি সঙ্খারে অনভিসঙ্খরিত্ৰা, মরণসংৰত্তনিকেপি সঙ্খারে অনভিসঙ্খরিত্ৰা, সোকপরিদেৰদুক্খদোমনস্সুপাযাসসংৰত্তনিকেপি সঙ্খারে অনভিসঙ্খরিত্ৰা, জাতিপপাতম্পি নপ্পপতন্তি, জরাপপাতম্পি নপ্পপতন্তি, মরণপপাতম্পি নপ্পপতন্তি, সোকপরিদেৰদুক্খদোমনস্সুপাযাসপপাতম্পি নপ্পপতন্তি। তে পরিমুচ্চন্তি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি। ‘পরিমুচ্চন্তি দুক্খস্মা’তি ৰদামি’’।
‘‘Ye ca kho keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ pajānanti…pe… ‘ayaṃ dukkhanirodhagāminī paṭipadā’ti yathābhūtaṃ pajānanti, te jātisaṃvattanikesu saṅkhāresu nābhiramanti, jarāsaṃvattanikesu saṅkhāresu nābhiramanti, maraṇasaṃvattanikesu saṅkhāresu nābhiramanti, sokaparidevadukkhadomanassupāyāsasaṃvattanikesu saṅkhāresu nābhiramanti. Te jātisaṃvattanikesu saṅkhāresu anabhiratā, jarāsaṃvattanikesu saṅkhāresu anabhiratā, maraṇasaṃvattanikesu saṅkhāresu anabhiratā, sokaparidevadukkhadomanassupāyāsasaṃvattanikesu saṅkhāresu anabhiratā, jātisaṃvattanikepi saṅkhāre nābhisaṅkharonti, jarāsaṃvattanikepi saṅkhāre nābhisaṅkharonti, maraṇasaṃvattanikepi saṅkhāre nābhisaṅkharonti, sokaparidevadukkhadomanassupāyāsasaṃvattanikepi saṅkhāre nābhisaṅkharonti. Te jātisaṃvattanikepi saṅkhāre anabhisaṅkharitvā, jarāsaṃvattanikepi saṅkhāre anabhisaṅkharitvā, maraṇasaṃvattanikepi saṅkhāre anabhisaṅkharitvā, sokaparidevadukkhadomanassupāyāsasaṃvattanikepi saṅkhāre anabhisaṅkharitvā, jātipapātampi nappapatanti, jarāpapātampi nappapatanti, maraṇapapātampi nappapatanti, sokaparidevadukkhadomanassupāyāsapapātampi nappapatanti. Te parimuccanti jātiyā jarāya maraṇena sokehi paridevehi dukkhehi domanassehi upāyāsehi. ‘Parimuccanti dukkhasmā’ti vadāmi’’.
‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। দুতিযং।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dutiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২-৩. পপাতসুত্তাদিৰণ্ণনা • 2-3. Papātasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২-৩. পপাতসুত্তাদিৰণ্ণনা • 2-3. Papātasuttādivaṇṇanā
