| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
२. पपतितसुत्तवण्णना
2. Papatitasuttavaṇṇanā
२. दुतिये पपतितोति पतितो चुतो। अप्पपतितोति अपतितो पतिट्ठितो। तत्थ लोकियमहाजनो पतितोयेव नाम, सोतापन्नादयो किलेसुप्पत्तिक्खणे पतिता नाम, खीणासवो एकन्तपतिट्ठितो नाम।
2. Dutiye papatitoti patito cuto. Appapatitoti apatito patiṭṭhito. Tattha lokiyamahājano patitoyeva nāma, sotāpannādayo kilesuppattikkhaṇe patitā nāma, khīṇāsavo ekantapatiṭṭhito nāma.
चुता पतन्तीति ये चुता, ते पतन्ति नाम। पतिताति ये पतिता, ते चुता नाम। चुतत्ता पतिता, पतितत्ता चुताति अत्थो। गिद्धाति रागरत्ता। पुनरागताति पुन जातिं पुन जरं पुन ब्याधिं पुन मरणं आगता नाम होन्ति। कतं किच्चन्ति चतूहि मग्गेहि कत्तब्बकिच्चं कतं। रतं रम्मन्ति रमितब्बयुत्तके गुणजाते रमितं। सुखेनान्वागतं सुखन्ति सुखेन सुखं अनुआगतं सम्पत्तं। मानुसकसुखेन दिब्बसुखं, झानसुखेन विपस्सनासुखं, विपस्सनासुखेन मग्गसुखं, मग्गसुखेन फलसुखं, फलसुखेन निब्बानसुखं सम्पत्तं अधिगतन्ति अत्थो।
Cutāpatantīti ye cutā, te patanti nāma. Patitāti ye patitā, te cutā nāma. Cutattā patitā, patitattā cutāti attho. Giddhāti rāgarattā. Punarāgatāti puna jātiṃ puna jaraṃ puna byādhiṃ puna maraṇaṃ āgatā nāma honti. Kataṃ kiccanti catūhi maggehi kattabbakiccaṃ kataṃ. Rataṃ rammanti ramitabbayuttake guṇajāte ramitaṃ. Sukhenānvāgataṃ sukhanti sukhena sukhaṃ anuāgataṃ sampattaṃ. Mānusakasukhena dibbasukhaṃ, jhānasukhena vipassanāsukhaṃ, vipassanāsukhena maggasukhaṃ, maggasukhena phalasukhaṃ, phalasukhena nibbānasukhaṃ sampattaṃ adhigatanti attho.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / २. पपतितसुत्तं • 2. Papatitasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १-२. अनुबुद्धसुत्तादिवण्णना • 1-2. Anubuddhasuttādivaṇṇanā
