| Library / Tipiṭaka / തിപിടക • Tipiṭaka / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) |
൨. പപതിതസുത്തവണ്ണനാ
2. Papatitasuttavaṇṇanā
൨. ദുതിയേ പപതിതോതി പതിതോ ചുതോ. അപ്പപതിതോതി അപതിതോ പതിട്ഠിതോ. തത്ഥ ലോകിയമഹാജനോ പതിതോയേവ നാമ, സോതാപന്നാദയോ കിലേസുപ്പത്തിക്ഖണേ പതിതാ നാമ, ഖീണാസവോ ഏകന്തപതിട്ഠിതോ നാമ.
2. Dutiye papatitoti patito cuto. Appapatitoti apatito patiṭṭhito. Tattha lokiyamahājano patitoyeva nāma, sotāpannādayo kilesuppattikkhaṇe patitā nāma, khīṇāsavo ekantapatiṭṭhito nāma.
ചുതാ പതന്തീതി യേ ചുതാ, തേ പതന്തി നാമ. പതിതാതി യേ പതിതാ, തേ ചുതാ നാമ. ചുതത്താ പതിതാ, പതിതത്താ ചുതാതി അത്ഥോ. ഗിദ്ധാതി രാഗരത്താ. പുനരാഗതാതി പുന ജാതിം പുന ജരം പുന ബ്യാധിം പുന മരണം ആഗതാ നാമ ഹോന്തി. കതം കിച്ചന്തി ചതൂഹി മഗ്ഗേഹി കത്തബ്ബകിച്ചം കതം. രതം രമ്മന്തി രമിതബ്ബയുത്തകേ ഗുണജാതേ രമിതം. സുഖേനാന്വാഗതം സുഖന്തി സുഖേന സുഖം അനുആഗതം സമ്പത്തം. മാനുസകസുഖേന ദിബ്ബസുഖം, ഝാനസുഖേന വിപസ്സനാസുഖം, വിപസ്സനാസുഖേന മഗ്ഗസുഖം, മഗ്ഗസുഖേന ഫലസുഖം, ഫലസുഖേന നിബ്ബാനസുഖം സമ്പത്തം അധിഗതന്തി അത്ഥോ.
Cutāpatantīti ye cutā, te patanti nāma. Patitāti ye patitā, te cutā nāma. Cutattā patitā, patitattā cutāti attho. Giddhāti rāgarattā. Punarāgatāti puna jātiṃ puna jaraṃ puna byādhiṃ puna maraṇaṃ āgatā nāma honti. Kataṃ kiccanti catūhi maggehi kattabbakiccaṃ kataṃ. Rataṃ rammanti ramitabbayuttake guṇajāte ramitaṃ. Sukhenānvāgataṃ sukhanti sukhena sukhaṃ anuāgataṃ sampattaṃ. Mānusakasukhena dibbasukhaṃ, jhānasukhena vipassanāsukhaṃ, vipassanāsukhena maggasukhaṃ, maggasukhena phalasukhaṃ, phalasukhena nibbānasukhaṃ sampattaṃ adhigatanti attho.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൨. പപതിതസുത്തം • 2. Papatitasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൧-൨. അനുബുദ്ധസുത്താദിവണ്ണനാ • 1-2. Anubuddhasuttādivaṇṇanā
