| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১১. পরাভৰসুত্তং
11. Parābhavasuttaṃ
৩১. ‘‘সত্তিমে, ভিক্খৰে, উপাসকস্স পরাভৰা…পে॰… সত্তিমে, ভিক্খৰে, উপাসকস্স সম্ভৰা। কতমে সত্ত? ভিক্খুদস্সনং ন হাপেতি, সদ্ধম্মস্সৰনং নপ্পমজ্জতি, অধিসীলে সিক্খতি, পসাদবহুলো হোতি, ভিক্খূসু থেরেসু চেৰ নৰেসু চ মজ্ঝিমেসু চ অনুপারম্ভচিত্তো ধম্মং সুণাতি ন রন্ধগৰেসী, ন ইতো বহিদ্ধা দক্খিণেয্যং গৰেসতি, ইধ চ পুব্বকারং করোতি। ইমে খো, ভিক্খৰে, সত্ত উপাসকস্স সম্ভৰাতি।
31. ‘‘Sattime, bhikkhave, upāsakassa parābhavā…pe… sattime, bhikkhave, upāsakassa sambhavā. Katame satta? Bhikkhudassanaṃ na hāpeti, saddhammassavanaṃ nappamajjati, adhisīle sikkhati, pasādabahulo hoti, bhikkhūsu theresu ceva navesu ca majjhimesu ca anupārambhacitto dhammaṃ suṇāti na randhagavesī, na ito bahiddhā dakkhiṇeyyaṃ gavesati, idha ca pubbakāraṃ karoti. Ime kho, bhikkhave, satta upāsakassa sambhavāti.
‘‘দস্সনং ভাৰিতত্তানং, যো হাপেতি উপাসকো।
‘‘Dassanaṃ bhāvitattānaṃ, yo hāpeti upāsako;
সৰনঞ্চ অরিযধম্মানং, অধিসীলে ন সিক্খতি॥
Savanañca ariyadhammānaṃ, adhisīle na sikkhati.
‘‘অপ্পসাদো চ ভিক্খূসু, ভিয্যো ভিয্যো পৰড্ঢতি।
‘‘Appasādo ca bhikkhūsu, bhiyyo bhiyyo pavaḍḍhati;
উপারম্ভকচিত্তো চ, সদ্ধম্মং সোতুমিচ্ছতি॥
Upārambhakacitto ca, saddhammaṃ sotumicchati.
‘‘ইতো চ বহিদ্ধা অঞ্ঞং, দক্খিণেয্যং গৰেসতি।
‘‘Ito ca bahiddhā aññaṃ, dakkhiṇeyyaṃ gavesati;
তত্থেৰ চ পুব্বকারং, যো করোতি উপাসকো॥
Tattheva ca pubbakāraṃ, yo karoti upāsako.
‘‘এতে খো পরিহানিযে, সত্ত ধম্মে সুদেসিতে।
‘‘Ete kho parihāniye, satta dhamme sudesite;
উপাসকো সেৰমানো, সদ্ধম্মা পরিহাযতি॥
Upāsako sevamāno, saddhammā parihāyati.
‘‘দস্সনং ভাৰিতত্তানং, যো ন হাপেতি উপাসকো।
‘‘Dassanaṃ bhāvitattānaṃ, yo na hāpeti upāsako;
সৰনঞ্চ অরিযধম্মানং, অধিসীলে চ সিক্খতি॥
Savanañca ariyadhammānaṃ, adhisīle ca sikkhati.
‘‘পসাদো চস্স ভিক্খূসু, ভিয্যো ভিয্যো পৰড্ঢতি।
‘‘Pasādo cassa bhikkhūsu, bhiyyo bhiyyo pavaḍḍhati;
অনুপারম্ভচিত্তো চ, সদ্ধম্মং সোতুমিচ্ছতি॥
Anupārambhacitto ca, saddhammaṃ sotumicchati.
‘‘ন ইতো বহিদ্ধা অঞ্ঞং, দক্খিণেয্যং গৰেসতি।
‘‘Na ito bahiddhā aññaṃ, dakkhiṇeyyaṃ gavesati;
ইধেৰ চ পুব্বকারং, যো করোতি উপাসকো॥
Idheva ca pubbakāraṃ, yo karoti upāsako.
‘‘এতে খো অপরিহানিযে, সত্ত ধম্মে সুদেসিতে।
‘‘Ete kho aparihāniye, satta dhamme sudesite;
উপাসকো সেৰমানো, সদ্ধম্মা ন পরিহাযতী’’তি॥ একাদসমং।
Upāsako sevamāno, saddhammā na parihāyatī’’ti. ekādasamaṃ;
তস্সুদ্দানং –
Tassuddānaṃ –
সারন্দ -ৰস্সকারো চ, তিসত্তকানি ভিক্খুকা।
Sāranda -vassakāro ca, tisattakāni bhikkhukā;
বোধিসঞ্ঞা দ্ৰে চ হানি, ৰিপত্তি চ পরাভৰোতি॥
Bodhisaññā dve ca hāni, vipatti ca parābhavoti.
Footnotes:
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭-১১. সঞ্ঞাসুত্তাদিৰণ্ণনা • 7-11. Saññāsuttādivaṇṇanā
