| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
११. पराभवसुत्तं
11. Parābhavasuttaṃ
३१. ‘‘सत्तिमे, भिक्खवे, उपासकस्स पराभवा…पे॰… सत्तिमे, भिक्खवे, उपासकस्स सम्भवा। कतमे सत्त? भिक्खुदस्सनं न हापेति, सद्धम्मस्सवनं नप्पमज्जति, अधिसीले सिक्खति, पसादबहुलो होति, भिक्खूसु थेरेसु चेव नवेसु च मज्झिमेसु च अनुपारम्भचित्तो धम्मं सुणाति न रन्धगवेसी, न इतो बहिद्धा दक्खिणेय्यं गवेसति, इध च पुब्बकारं करोति। इमे खो, भिक्खवे, सत्त उपासकस्स सम्भवाति।
31. ‘‘Sattime, bhikkhave, upāsakassa parābhavā…pe… sattime, bhikkhave, upāsakassa sambhavā. Katame satta? Bhikkhudassanaṃ na hāpeti, saddhammassavanaṃ nappamajjati, adhisīle sikkhati, pasādabahulo hoti, bhikkhūsu theresu ceva navesu ca majjhimesu ca anupārambhacitto dhammaṃ suṇāti na randhagavesī, na ito bahiddhā dakkhiṇeyyaṃ gavesati, idha ca pubbakāraṃ karoti. Ime kho, bhikkhave, satta upāsakassa sambhavāti.
‘‘दस्सनं भावितत्तानं, यो हापेति उपासको।
‘‘Dassanaṃ bhāvitattānaṃ, yo hāpeti upāsako;
सवनञ्च अरियधम्मानं, अधिसीले न सिक्खति॥
Savanañca ariyadhammānaṃ, adhisīle na sikkhati.
‘‘अप्पसादो च भिक्खूसु, भिय्यो भिय्यो पवड्ढति।
‘‘Appasādo ca bhikkhūsu, bhiyyo bhiyyo pavaḍḍhati;
उपारम्भकचित्तो च, सद्धम्मं सोतुमिच्छति॥
Upārambhakacitto ca, saddhammaṃ sotumicchati.
‘‘इतो च बहिद्धा अञ्ञं, दक्खिणेय्यं गवेसति।
‘‘Ito ca bahiddhā aññaṃ, dakkhiṇeyyaṃ gavesati;
तत्थेव च पुब्बकारं, यो करोति उपासको॥
Tattheva ca pubbakāraṃ, yo karoti upāsako.
‘‘एते खो परिहानिये, सत्त धम्मे सुदेसिते।
‘‘Ete kho parihāniye, satta dhamme sudesite;
उपासको सेवमानो, सद्धम्मा परिहायति॥
Upāsako sevamāno, saddhammā parihāyati.
‘‘दस्सनं भावितत्तानं, यो न हापेति उपासको।
‘‘Dassanaṃ bhāvitattānaṃ, yo na hāpeti upāsako;
सवनञ्च अरियधम्मानं, अधिसीले च सिक्खति॥
Savanañca ariyadhammānaṃ, adhisīle ca sikkhati.
‘‘पसादो चस्स भिक्खूसु, भिय्यो भिय्यो पवड्ढति।
‘‘Pasādo cassa bhikkhūsu, bhiyyo bhiyyo pavaḍḍhati;
अनुपारम्भचित्तो च, सद्धम्मं सोतुमिच्छति॥
Anupārambhacitto ca, saddhammaṃ sotumicchati.
‘‘न इतो बहिद्धा अञ्ञं, दक्खिणेय्यं गवेसति।
‘‘Na ito bahiddhā aññaṃ, dakkhiṇeyyaṃ gavesati;
इधेव च पुब्बकारं, यो करोति उपासको॥
Idheva ca pubbakāraṃ, yo karoti upāsako.
‘‘एते खो अपरिहानिये, सत्त धम्मे सुदेसिते।
‘‘Ete kho aparihāniye, satta dhamme sudesite;
उपासको सेवमानो, सद्धम्मा न परिहायती’’ति॥ एकादसमं।
Upāsako sevamāno, saddhammā na parihāyatī’’ti. ekādasamaṃ;
तस्सुद्दानं –
Tassuddānaṃ –
सारन्द -वस्सकारो च, तिसत्तकानि भिक्खुका।
Sāranda -vassakāro ca, tisattakāni bhikkhukā;
बोधिसञ्ञा द्वे च हानि, विपत्ति च पराभवोति॥
Bodhisaññā dve ca hāni, vipatti ca parābhavoti.
Footnotes:
Related texts:
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ७-११. सञ्ञासुत्तादिवण्णना • 7-11. Saññāsuttādivaṇṇanā
