| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១១. បរាភវសុត្តំ
11. Parābhavasuttaṃ
៣១. ‘‘សត្តិមេ, ភិក្ខវេ, ឧបាសកស្ស បរាភវា…បេ.… សត្តិមេ, ភិក្ខវេ, ឧបាសកស្ស សម្ភវា។ កតមេ សត្ត? ភិក្ខុទស្សនំ ន ហាបេតិ, សទ្ធម្មស្សវនំ នប្បមជ្ជតិ, អធិសីលេ សិក្ខតិ, បសាទពហុលោ ហោតិ, ភិក្ខូសុ ថេរេសុ ចេវ នវេសុ ច មជ្ឈិមេសុ ច អនុបារម្ភចិត្តោ ធម្មំ សុណាតិ ន រន្ធគវេសី, ន ឥតោ ពហិទ្ធា ទក្ខិណេយ្យំ គវេសតិ, ឥធ ច បុព្ពការំ ករោតិ។ ឥមេ ខោ, ភិក្ខវេ, សត្ត ឧបាសកស្ស សម្ភវាតិ។
31. ‘‘Sattime, bhikkhave, upāsakassa parābhavā…pe… sattime, bhikkhave, upāsakassa sambhavā. Katame satta? Bhikkhudassanaṃ na hāpeti, saddhammassavanaṃ nappamajjati, adhisīle sikkhati, pasādabahulo hoti, bhikkhūsu theresu ceva navesu ca majjhimesu ca anupārambhacitto dhammaṃ suṇāti na randhagavesī, na ito bahiddhā dakkhiṇeyyaṃ gavesati, idha ca pubbakāraṃ karoti. Ime kho, bhikkhave, satta upāsakassa sambhavāti.
‘‘ទស្សនំ ភាវិតត្តានំ, យោ ហាបេតិ ឧបាសកោ;
‘‘Dassanaṃ bhāvitattānaṃ, yo hāpeti upāsako;
សវនញ្ច អរិយធម្មានំ, អធិសីលេ ន សិក្ខតិ។
Savanañca ariyadhammānaṃ, adhisīle na sikkhati.
‘‘អប្បសាទោ ច ភិក្ខូសុ, ភិយ្យោ ភិយ្យោ បវឌ្ឍតិ;
‘‘Appasādo ca bhikkhūsu, bhiyyo bhiyyo pavaḍḍhati;
ឧបារម្ភកចិត្តោ ច, សទ្ធម្មំ សោតុមិច្ឆតិ។
Upārambhakacitto ca, saddhammaṃ sotumicchati.
‘‘ឥតោ ច ពហិទ្ធា អញ្ញំ, ទក្ខិណេយ្យំ គវេសតិ;
‘‘Ito ca bahiddhā aññaṃ, dakkhiṇeyyaṃ gavesati;
តត្ថេវ ច បុព្ពការំ, យោ ករោតិ ឧបាសកោ។
Tattheva ca pubbakāraṃ, yo karoti upāsako.
‘‘ឯតេ ខោ បរិហានិយេ, សត្ត ធម្មេ សុទេសិតេ;
‘‘Ete kho parihāniye, satta dhamme sudesite;
ឧបាសកោ សេវមានោ, សទ្ធម្មា បរិហាយតិ។
Upāsako sevamāno, saddhammā parihāyati.
‘‘ទស្សនំ ភាវិតត្តានំ, យោ ន ហាបេតិ ឧបាសកោ;
‘‘Dassanaṃ bhāvitattānaṃ, yo na hāpeti upāsako;
សវនញ្ច អរិយធម្មានំ, អធិសីលេ ច សិក្ខតិ។
Savanañca ariyadhammānaṃ, adhisīle ca sikkhati.
‘‘បសាទោ ចស្ស ភិក្ខូសុ, ភិយ្យោ ភិយ្យោ បវឌ្ឍតិ;
‘‘Pasādo cassa bhikkhūsu, bhiyyo bhiyyo pavaḍḍhati;
អនុបារម្ភចិត្តោ ច, សទ្ធម្មំ សោតុមិច្ឆតិ។
Anupārambhacitto ca, saddhammaṃ sotumicchati.
‘‘ន ឥតោ ពហិទ្ធា អញ្ញំ, ទក្ខិណេយ្យំ គវេសតិ;
‘‘Na ito bahiddhā aññaṃ, dakkhiṇeyyaṃ gavesati;
ឥធេវ ច បុព្ពការំ, យោ ករោតិ ឧបាសកោ។
Idheva ca pubbakāraṃ, yo karoti upāsako.
‘‘ឯតេ ខោ អបរិហានិយេ, សត្ត ធម្មេ សុទេសិតេ;
‘‘Ete kho aparihāniye, satta dhamme sudesite;
ឧបាសកោ សេវមានោ, សទ្ធម្មា ន បរិហាយតី’’តិ។ ឯកាទសមំ;
Upāsako sevamāno, saddhammā na parihāyatī’’ti. ekādasamaṃ;
តស្សុទ្ទានំ –
Tassuddānaṃ –
សារន្ទ -វស្សការោ ច, តិសត្តកានិ ភិក្ខុកា;
Sāranda -vassakāro ca, tisattakāni bhikkhukā;
ពោធិសញ្ញា ទ្វេ ច ហានិ, វិបត្តិ ច បរាភវោតិ។
Bodhisaññā dve ca hāni, vipatti ca parābhavoti.
Footnotes:
Related texts:
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៧-១១. សញ្ញាសុត្តាទិវណ្ណនា • 7-11. Saññāsuttādivaṇṇanā
