| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೧. ಪರಾಭವಸುತ್ತಂ
11. Parābhavasuttaṃ
೩೧. ‘‘ಸತ್ತಿಮೇ, ಭಿಕ್ಖವೇ, ಉಪಾಸಕಸ್ಸ ಪರಾಭವಾ…ಪೇ॰… ಸತ್ತಿಮೇ, ಭಿಕ್ಖವೇ, ಉಪಾಸಕಸ್ಸ ಸಮ್ಭವಾ। ಕತಮೇ ಸತ್ತ? ಭಿಕ್ಖುದಸ್ಸನಂ ನ ಹಾಪೇತಿ, ಸದ್ಧಮ್ಮಸ್ಸವನಂ ನಪ್ಪಮಜ್ಜತಿ, ಅಧಿಸೀಲೇ ಸಿಕ್ಖತಿ, ಪಸಾದಬಹುಲೋ ಹೋತಿ, ಭಿಕ್ಖೂಸು ಥೇರೇಸು ಚೇವ ನವೇಸು ಚ ಮಜ್ಝಿಮೇಸು ಚ ಅನುಪಾರಮ್ಭಚಿತ್ತೋ ಧಮ್ಮಂ ಸುಣಾತಿ ನ ರನ್ಧಗವೇಸೀ, ನ ಇತೋ ಬಹಿದ್ಧಾ ದಕ್ಖಿಣೇಯ್ಯಂ ಗವೇಸತಿ, ಇಧ ಚ ಪುಬ್ಬಕಾರಂ ಕರೋತಿ। ಇಮೇ ಖೋ, ಭಿಕ್ಖವೇ, ಸತ್ತ ಉಪಾಸಕಸ್ಸ ಸಮ್ಭವಾತಿ।
31. ‘‘Sattime, bhikkhave, upāsakassa parābhavā…pe… sattime, bhikkhave, upāsakassa sambhavā. Katame satta? Bhikkhudassanaṃ na hāpeti, saddhammassavanaṃ nappamajjati, adhisīle sikkhati, pasādabahulo hoti, bhikkhūsu theresu ceva navesu ca majjhimesu ca anupārambhacitto dhammaṃ suṇāti na randhagavesī, na ito bahiddhā dakkhiṇeyyaṃ gavesati, idha ca pubbakāraṃ karoti. Ime kho, bhikkhave, satta upāsakassa sambhavāti.
‘‘ದಸ್ಸನಂ ಭಾವಿತತ್ತಾನಂ, ಯೋ ಹಾಪೇತಿ ಉಪಾಸಕೋ।
‘‘Dassanaṃ bhāvitattānaṃ, yo hāpeti upāsako;
ಸವನಞ್ಚ ಅರಿಯಧಮ್ಮಾನಂ, ಅಧಿಸೀಲೇ ನ ಸಿಕ್ಖತಿ॥
Savanañca ariyadhammānaṃ, adhisīle na sikkhati.
‘‘ಅಪ್ಪಸಾದೋ ಚ ಭಿಕ್ಖೂಸು, ಭಿಯ್ಯೋ ಭಿಯ್ಯೋ ಪವಡ್ಢತಿ।
‘‘Appasādo ca bhikkhūsu, bhiyyo bhiyyo pavaḍḍhati;
ಉಪಾರಮ್ಭಕಚಿತ್ತೋ ಚ, ಸದ್ಧಮ್ಮಂ ಸೋತುಮಿಚ್ಛತಿ॥
Upārambhakacitto ca, saddhammaṃ sotumicchati.
‘‘ಇತೋ ಚ ಬಹಿದ್ಧಾ ಅಞ್ಞಂ, ದಕ್ಖಿಣೇಯ್ಯಂ ಗವೇಸತಿ।
‘‘Ito ca bahiddhā aññaṃ, dakkhiṇeyyaṃ gavesati;
ತತ್ಥೇವ ಚ ಪುಬ್ಬಕಾರಂ, ಯೋ ಕರೋತಿ ಉಪಾಸಕೋ॥
Tattheva ca pubbakāraṃ, yo karoti upāsako.
‘‘ಏತೇ ಖೋ ಪರಿಹಾನಿಯೇ, ಸತ್ತ ಧಮ್ಮೇ ಸುದೇಸಿತೇ।
‘‘Ete kho parihāniye, satta dhamme sudesite;
ಉಪಾಸಕೋ ಸೇವಮಾನೋ, ಸದ್ಧಮ್ಮಾ ಪರಿಹಾಯತಿ॥
Upāsako sevamāno, saddhammā parihāyati.
‘‘ದಸ್ಸನಂ ಭಾವಿತತ್ತಾನಂ, ಯೋ ನ ಹಾಪೇತಿ ಉಪಾಸಕೋ।
‘‘Dassanaṃ bhāvitattānaṃ, yo na hāpeti upāsako;
ಸವನಞ್ಚ ಅರಿಯಧಮ್ಮಾನಂ, ಅಧಿಸೀಲೇ ಚ ಸಿಕ್ಖತಿ॥
Savanañca ariyadhammānaṃ, adhisīle ca sikkhati.
‘‘ಪಸಾದೋ ಚಸ್ಸ ಭಿಕ್ಖೂಸು, ಭಿಯ್ಯೋ ಭಿಯ್ಯೋ ಪವಡ್ಢತಿ।
‘‘Pasādo cassa bhikkhūsu, bhiyyo bhiyyo pavaḍḍhati;
ಅನುಪಾರಮ್ಭಚಿತ್ತೋ ಚ, ಸದ್ಧಮ್ಮಂ ಸೋತುಮಿಚ್ಛತಿ॥
Anupārambhacitto ca, saddhammaṃ sotumicchati.
‘‘ನ ಇತೋ ಬಹಿದ್ಧಾ ಅಞ್ಞಂ, ದಕ್ಖಿಣೇಯ್ಯಂ ಗವೇಸತಿ।
‘‘Na ito bahiddhā aññaṃ, dakkhiṇeyyaṃ gavesati;
ಇಧೇವ ಚ ಪುಬ್ಬಕಾರಂ, ಯೋ ಕರೋತಿ ಉಪಾಸಕೋ॥
Idheva ca pubbakāraṃ, yo karoti upāsako.
‘‘ಏತೇ ಖೋ ಅಪರಿಹಾನಿಯೇ, ಸತ್ತ ಧಮ್ಮೇ ಸುದೇಸಿತೇ।
‘‘Ete kho aparihāniye, satta dhamme sudesite;
ಉಪಾಸಕೋ ಸೇವಮಾನೋ, ಸದ್ಧಮ್ಮಾ ನ ಪರಿಹಾಯತೀ’’ತಿ॥ ಏಕಾದಸಮಂ।
Upāsako sevamāno, saddhammā na parihāyatī’’ti. ekādasamaṃ;
ತಸ್ಸುದ್ದಾನಂ –
Tassuddānaṃ –
ಸಾರನ್ದ -ವಸ್ಸಕಾರೋ ಚ, ತಿಸತ್ತಕಾನಿ ಭಿಕ್ಖುಕಾ।
Sāranda -vassakāro ca, tisattakāni bhikkhukā;
ಬೋಧಿಸಞ್ಞಾ ದ್ವೇ ಚ ಹಾನಿ, ವಿಪತ್ತಿ ಚ ಪರಾಭವೋತಿ॥
Bodhisaññā dve ca hāni, vipatti ca parābhavoti.
Footnotes:
Related texts:
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೭-೧೧. ಸಞ್ಞಾಸುತ್ತಾದಿವಣ್ಣನಾ • 7-11. Saññāsuttādivaṇṇanā
