| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
பாராஜிகாதி³ஆபத்திவண்ணனா
Pārājikādiāpattivaṇṇanā
339. ஏவங் புச்சா²னுக்கமேன ஸப்³ப³பஞ்ஹே விஸ்ஸஜ்ஜெத்வா இதா³னி ‘‘ஆபத்திக்க²ந்தா⁴ ச ப⁴வந்தி ஸத்தா’’தி எத்த² ஸங்க³ஹிதஆபத்திக்க²ந்தா⁴னங் பச்சேகங் நிப்³ப³சனமத்தங் த³ஸ்ஸெந்தோ பாராஜிகந்திஆதி³மாஹ. தத்த² பாராஜிகந்தி கா³தா²ய அயமத்தோ² – யதி³த³ங் புக்³க³லாபத்திஸிக்கா²பத³பாராஜிகேஸு ஆபத்திபாராஜிகங் நாம வுத்தங், தங் ஆபஜ்ஜந்தோ புக்³க³லோ யஸ்மா பராஜிதோ பராஜயமாபன்னோ ஸத்³த⁴ம்மா சுதோ பரத்³தோ⁴ ப⁴ட்டோ² நிரங்கதோ ச ஹோதி, அனிஹதே தஸ்மிங் புக்³க³லே புன உபோஸத²ப்பவாரணாதி³பே⁴தோ³ ஸங்வாஸோ நத்தி². தேனேதங் இதி வுச்சதீதி தேன காரணேன ஏதங் ஆபத்திபாராஜிகந்தி வுச்சதி. அயஞ்ஹெத்த² ஸங்கே²பத்தோ² – யஸ்மா பராஜிதோ ஹோதி தேன, தஸ்மா ஏதங் பாராஜிகந்தி வுச்சதி.
339. Evaṃ pucchānukkamena sabbapañhe vissajjetvā idāni ‘‘āpattikkhandhā ca bhavanti sattā’’ti ettha saṅgahitaāpattikkhandhānaṃ paccekaṃ nibbacanamattaṃ dassento pārājikantiādimāha. Tattha pārājikanti gāthāya ayamattho – yadidaṃ puggalāpattisikkhāpadapārājikesu āpattipārājikaṃ nāma vuttaṃ, taṃ āpajjanto puggalo yasmā parājito parājayamāpanno saddhammā cuto paraddho bhaṭṭho niraṅkato ca hoti, anihate tasmiṃ puggale puna uposathappavāraṇādibhedo saṃvāso natthi. Tenetaṃ iti vuccatīti tena kāraṇena etaṃ āpattipārājikanti vuccati. Ayañhettha saṅkhepattho – yasmā parājito hoti tena, tasmā etaṃ pārājikanti vuccati.
து³தியகா³தா²யபி ப்³யஞ்ஜனங் அனாதி³யித்வா அத்த²மத்தமேவ த³ஸ்ஸேதுங் ஸங்கோ⁴வ தே³தி பரிவாஸந்திஆதி³ வுத்தங். அயங் பனெத்த² அத்தோ² – இமங் ஆபத்திங் ஆபஜ்ஜித்வா வுட்டா²துகாமஸ்ஸ யங் தங் ஆபத்திவுட்டா²னங் தஸ்ஸ ஆதி³ம்ஹி சேவ பரிவாஸதா³னத்தா²ய ஆதி³தோ ஸேஸே மஜ்ஜே² மானத்ததா³னத்தா²ய மூலாயபடிகஸ்ஸனேன வா ஸஹ மானத்ததா³னத்தா²ய, அவஸானே அப்³பா⁴னத்தா²ய ச ஸங்கோ⁴ இச்சி²தப்³போ³, ந ஹெத்த² ஏகம்பி கம்மங் வினா ஸங்கே⁴ன ஸக்கா காதுந்தி ஸங்கோ⁴, ஆதி³ம்ஹி சேவ ஸேஸே ச இச்சி²தப்³போ³ அஸ்ஸாதி ஸங்கா⁴தி³ஸேஸோ.
Dutiyagāthāyapi byañjanaṃ anādiyitvā atthamattameva dassetuṃ saṅghova deti parivāsantiādi vuttaṃ. Ayaṃ panettha attho – imaṃ āpattiṃ āpajjitvā vuṭṭhātukāmassa yaṃ taṃ āpattivuṭṭhānaṃ tassa ādimhi ceva parivāsadānatthāya ādito sese majjhe mānattadānatthāya mūlāyapaṭikassanena vā saha mānattadānatthāya, avasāne abbhānatthāya ca saṅgho icchitabbo, na hettha ekampi kammaṃ vinā saṅghena sakkā kātunti saṅgho, ādimhi ceva sese ca icchitabbo assāti saṅghādiseso.
ததியகா³தா²ய அனியதோ ந நியதோதி யஸ்மா ந நியதோ, தஸ்மா அனியதோ அயமாபத்திக்க²ந்தோ⁴தி அத்தோ². கிங் காரணா ந நியதோதி? அனேகங்ஸிகதங் பத³ங், யஸ்மா இத³ங் ஸிக்கா²பத³ங் அனேகங்ஸேன கதந்தி அத்தோ². கத²ங் அனேகங்ஸேன? திண்ணமஞ்ஞதரங் டா²னங், திண்ணங் த⁴ம்மானங் அஞ்ஞதரேன காரேதப்³போ³தி ஹி தத்த² வுத்தங், தஸ்மா ‘‘அனியதோ’’தி பவுச்சதி, ஸோ ஆபத்திக்க²ந்தோ⁴ அனியதோதி வுச்சதி. யதா² ச திண்ணங் அஞ்ஞதரங் டா²னங், ஏவங் த்³வின்னங் த⁴ம்மானங் அஞ்ஞதரங் டா²னங் யத்த² வுத்தங், ஸோபி அனியதோ ஏவ.
Tatiyagāthāya aniyato na niyatoti yasmā na niyato, tasmā aniyato ayamāpattikkhandhoti attho. Kiṃ kāraṇā na niyatoti? Anekaṃsikataṃpadaṃ, yasmā idaṃ sikkhāpadaṃ anekaṃsena katanti attho. Kathaṃ anekaṃsena? Tiṇṇamaññataraṃ ṭhānaṃ, tiṇṇaṃ dhammānaṃ aññatarena kāretabboti hi tattha vuttaṃ, tasmā ‘‘aniyato’’ti pavuccati, so āpattikkhandho aniyatoti vuccati. Yathā ca tiṇṇaṃ aññataraṃ ṭhānaṃ, evaṃ dvinnaṃ dhammānaṃ aññataraṃ ṭhānaṃ yattha vuttaṃ, sopi aniyato eva.
சதுத்த²கா³தா²ய அச்சயோ தேன ஸமோ நத்தீ²தி தே³ஸனாகா³மினீஸு அச்சயேஸு தேன ஸமோ தூ²லோ அச்சயோ நத்தி², தேனேதங் இதி வுச்சதி; தூ²லத்தா அச்சயஸ்ஸ ஏதங் து²ல்லச்சயந்தி வுச்சதீதி அத்தோ².
Catutthagāthāya accayo tena samo natthīti desanāgāminīsu accayesu tena samo thūlo accayo natthi, tenetaṃ iti vuccati; thūlattā accayassa etaṃ thullaccayanti vuccatīti attho.
பஞ்சமகா³தா²ய நிஸ்ஸஜ்ஜித்வான தே³ஸேதி தேனேதந்தி நிஸ்ஸஜ்ஜித்வா தே³ஸேதப்³ப³தோ நிஸ்ஸக்³கி³யந்தி வுச்சதீதி அத்தோ².
Pañcamagāthāya nissajjitvāna deseti tenetanti nissajjitvā desetabbato nissaggiyanti vuccatīti attho.
ச²ட்ட²கா³தா²ய பாதேதி குஸலங் த⁴ம்மந்தி ஸஞ்சிச்ச ஆபஜ்ஜந்தஸ்ஸ குஸலத⁴ம்மஸங்கா²தங் குஸலசித்தங் பாதேதி, தஸ்மா பாதேதி சித்தந்தி பாசித்தியங். யங் பன சித்தங் பாதேதி, தங் யஸ்மா அரியமக்³க³ங் அபரஜ்ஜ²தி, சித்தஸம்மோஹகாரணஞ்ச ஹோதி, தஸ்மா ‘‘அரியமக்³க³ங் அபரஜ்ஜ²தி, சித்தஸம்மோஹனட்டா²ன’’ந்தி ச வுத்தங்.
Chaṭṭhagāthāya pāteti kusalaṃ dhammanti sañcicca āpajjantassa kusaladhammasaṅkhātaṃ kusalacittaṃ pāteti, tasmā pāteti cittanti pācittiyaṃ. Yaṃ pana cittaṃ pāteti, taṃ yasmā ariyamaggaṃ aparajjhati, cittasammohakāraṇañca hoti, tasmā ‘‘ariyamaggaṃ aparajjhati, cittasammohanaṭṭhāna’’nti ca vuttaṃ.
பாடிதே³ஸனீயகா³தா²ஸு ‘‘கா³ரய்ஹங் ஆவுஸோ த⁴ம்மங் ஆபஜ்ஜி’’ந்தி வுத்தகா³ரய்ஹபா⁴வகாரணத³ஸ்ஸனத்த²மேவ பி⁴க்கு² அஞ்ஞாதகோ ஸந்தோதிஆதி³ வுத்தங். படிதே³ஸேதப்³ப³தோ பன ஸா ஆபத்தி பாடிதே³ஸனீயாதி வுச்சதி.
Pāṭidesanīyagāthāsu ‘‘gārayhaṃ āvuso dhammaṃ āpajji’’nti vuttagārayhabhāvakāraṇadassanatthameva bhikkhu aññātako santotiādi vuttaṃ. Paṭidesetabbato pana sā āpatti pāṭidesanīyāti vuccati.
து³க்கடகா³தா²ய அபரத்³த⁴ங் விரத்³த⁴ஞ்ச க²லிதந்தி ஸப்³ப³மேதங் ‘‘யஞ்ச து³க்கட’’ந்தி எத்த² வுத்தஸ்ஸ து³க்கடஸ்ஸ பரியாயவசனங். யஞ்ஹி து³ட்டு² கதங் விரூபங் வா கதங், தங் து³க்கடங். தங் பனேதங் யதா² ஸத்தா²ரா வுத்தங்; ஏவங் அகதத்தா அபரத்³த⁴ங், குஸலங் விரஜ்ஜி²த்வா பவத்தத்தா விரத்³த⁴ங், அரியவத்தபடிபத³ங் அனாருள்ஹத்தா க²லிதங். யங் மனுஸ்ஸோ கரேதி இத³ங் பனஸ்ஸ ஓபம்மனித³ஸ்ஸனங். தஸ்ஸத்தோ² – யதா² ஹி யங் லோகே மனுஸ்ஸோ ஆவி வா யதி³ வா ரஹோ பாபங் கரோதி, தங் து³க்கடந்தி பவேதெ³ந்தி; ஏவமித³ம்பி பு³த்³த⁴ப்படிகுட்டே²ன லாமகபா⁴வேன பாபங், தஸ்மா து³க்கடந்தி வேதி³தப்³ப³ங்.
Dukkaṭagāthāya aparaddhaṃ viraddhañca khalitanti sabbametaṃ ‘‘yañca dukkaṭa’’nti ettha vuttassa dukkaṭassa pariyāyavacanaṃ. Yañhi duṭṭhu kataṃ virūpaṃ vā kataṃ, taṃ dukkaṭaṃ. Taṃ panetaṃ yathā satthārā vuttaṃ; evaṃ akatattā aparaddhaṃ, kusalaṃ virajjhitvā pavattattā viraddhaṃ, ariyavattapaṭipadaṃ anāruḷhattā khalitaṃ. Yaṃ manusso kareti idaṃ panassa opammanidassanaṃ. Tassattho – yathā hi yaṃ loke manusso āvi vā yadi vā raho pāpaṃ karoti, taṃ dukkaṭanti pavedenti; evamidampi buddhappaṭikuṭṭhena lāmakabhāvena pāpaṃ, tasmā dukkaṭanti veditabbaṃ.
து³ப்³பா⁴ஸிதகா³தா²ய து³ப்³பா⁴ஸிதங் து³ராப⁴ட்ட²ந்தி து³ட்டு² ஆப⁴ட்ட²ங் பா⁴ஸிதங் லபிதந்தி து³ராப⁴ட்ட²ங். யங் து³ராப⁴ட்ட²ங், தங் து³ப்³பா⁴ஸிதந்தி அத்தோ². கிஞ்ச பி⁴ய்யோ? ஸங்கிலிட்ட²ஞ்ச யங் பத³ங், ஸங்கிலிட்ட²ங் யஸ்மா தங் பத³ங் ஹோதீதி அத்தோ². ததா² யஞ்ச விஞ்ஞூ க³ரஹந்தி, யஸ்மா ச நங் விஞ்ஞூ க³ரஹந்தீதி அத்தோ². தேனேதங் இதி வுச்சதீதி தேன ஸங்கிலிட்ட²பா⁴வேன ச விஞ்ஞுக³ரஹனேனாபி ச ஏதங் இதி வுச்சதி; ‘‘து³ப்³பா⁴ஸித’’ந்தி ஏவங் வுச்சதீதி அத்தோ².
Dubbhāsitagāthāya dubbhāsitaṃ durābhaṭṭhanti duṭṭhu ābhaṭṭhaṃ bhāsitaṃ lapitanti durābhaṭṭhaṃ. Yaṃ durābhaṭṭhaṃ, taṃ dubbhāsitanti attho. Kiñca bhiyyo? Saṃkiliṭṭhañca yaṃ padaṃ, saṃkiliṭṭhaṃ yasmā taṃ padaṃ hotīti attho. Tathā yañca viññū garahanti, yasmā ca naṃ viññū garahantīti attho. Tenetaṃ iti vuccatīti tena saṃkiliṭṭhabhāvena ca viññugarahanenāpi ca etaṃ iti vuccati; ‘‘dubbhāsita’’nti evaṃ vuccatīti attho.
ஸேகி²யகா³தா²ய ‘‘ஆதி³ சேதங் சரணஞ்சா’’திஆதி³னா நயேன ஸேக²ஸ்ஸ ஸந்தகபா⁴வங் தீ³பேதி. தஸ்மா ஸேக²ஸ்ஸ இத³ங் ஸேகி²யந்தி அயமெத்த² ஸங்கே²பத்தோ². இத³ங் ‘‘க³ருகலஹுகஞ்சாபீ’’திஆதி³பஞ்ஹேஹி அஸங்க³ஹிதஸ்ஸ ‘‘ஹந்த³ வாக்யங் ஸுணோம தே’’தி இமினா பன ஆயாசனவசனேன ஸங்க³ஹிதஸ்ஸ அத்த²ஸ்ஸ தீ³பனத்த²ங் வுத்தந்தி வேதி³தப்³ப³ங்.
Sekhiyagāthāya ‘‘ādi cetaṃ caraṇañcā’’tiādinā nayena sekhassa santakabhāvaṃ dīpeti. Tasmā sekhassa idaṃ sekhiyanti ayamettha saṅkhepattho. Idaṃ ‘‘garukalahukañcāpī’’tiādipañhehi asaṅgahitassa ‘‘handa vākyaṃ suṇoma te’’ti iminā pana āyācanavacanena saṅgahitassa atthassa dīpanatthaṃ vuttanti veditabbaṃ.
ச²ன்னமதிவஸ்ஸதீதிஆதி³ம்ஹிபி ஏஸேவ நயோ. தத்த² ச²ன்னமதிவஸ்ஸதீதி கே³ஹங் தாவ திணாதீ³ஹி அச்ச²ன்னங் அதிவஸ்ஸதி. இத³ங் பன ஆபத்திஸங்கா²தங் கே³ஹங் ச²ன்னங் அதிவஸ்ஸதி; மூலாபத்திஞ்ஹி சா²தெ³ந்தோ அஞ்ஞங் நவங் ஆபத்திங் ஆபஜ்ஜதி. விவடங் நாதிவஸ்ஸதீதி கே³ஹங் தாவ அவிவடங் ஸுச்ச²ன்னங் நாதிவஸ்ஸதி. இத³ங் பன ஆபத்திஸங்கா²தங் கே³ஹங் விவடங் நாதிவஸ்ஸதி; மூலாபத்திஞ்ஹி விவரந்தோ தே³ஸனாகா³மினிங் தே³ஸெத்வா வுட்டா²னகா³மினிதோ வுட்ட²ஹித்வா ஸுத்³த⁴ந்தே பதிட்டா²தி. ஆயதிங் ஸங்வரந்தோ அஞ்ஞங் ஆபத்திங் நாபஜ்ஜதி. தஸ்மா ச²ன்னங் விவரேதா²தி தேன காரணேன தே³ஸனாகா³மினிங் தே³ஸெந்தோ வுட்டா²னகா³மினிதோ ச வுட்ட²ஹந்தோ ச²ன்னங் விவரேத². ஏவங் தங் நாதிவஸ்ஸதீதி ஏவஞ்சேதங் விவடங் நாதிவஸ்ஸதீதி அத்தோ².
Channamativassatītiādimhipi eseva nayo. Tattha channamativassatīti gehaṃ tāva tiṇādīhi acchannaṃ ativassati. Idaṃ pana āpattisaṅkhātaṃ gehaṃ channaṃ ativassati; mūlāpattiñhi chādento aññaṃ navaṃ āpattiṃ āpajjati. Vivaṭaṃ nātivassatīti gehaṃ tāva avivaṭaṃ succhannaṃ nātivassati. Idaṃ pana āpattisaṅkhātaṃ gehaṃ vivaṭaṃ nātivassati; mūlāpattiñhi vivaranto desanāgāminiṃ desetvā vuṭṭhānagāminito vuṭṭhahitvā suddhante patiṭṭhāti. Āyatiṃ saṃvaranto aññaṃ āpattiṃ nāpajjati. Tasmā channaṃ vivarethāti tena kāraṇena desanāgāminiṃ desento vuṭṭhānagāminito ca vuṭṭhahanto channaṃ vivaretha. Evaṃ taṃ nātivassatīti evañcetaṃ vivaṭaṃ nātivassatīti attho.
க³தி மிகா³னங் பவனந்தி அஜ்ஜோ²காஸே ப்³யக்³கா⁴தீ³ஹி பரிபாதியமானானங் மிகா³னங் பவனங் ருக்கா²தி³க³ஹனங் அரஞ்ஞங் க³தி படிஸரணங் ஹோதி, தங் பத்வா தே அஸ்ஸாஸந்தி. ஏதேனேவ நயேன ஆகாஸோ பக்கீ²னங் க³தி. அவஸ்ஸங் உபக³மனட்டே²ன பன விப⁴வோ க³தி த⁴ம்மானங், ஸப்³பே³ஸம்பி ஸங்க²தத⁴ம்மானங் வினாஸோவ தேஸங் க³தி. ந ஹி தே வினாஸங் அக³ச்ச²ந்தா டா²துங் ஸக்கொந்தி. ஸுசிரம்பி ட²த்வா பன நிப்³பா³னங் அரஹதோ க³தி, கீ²ணாஸவஸ்ஸ அரஹதோ அனுபாதி³ஸேஸனிப்³பா³னதா⁴து ஏகங்ஸேன க³தீதி அத்தோ².
Gati migānaṃ pavananti ajjhokāse byagghādīhi paripātiyamānānaṃ migānaṃ pavanaṃ rukkhādigahanaṃ araññaṃ gati paṭisaraṇaṃ hoti, taṃ patvā te assāsanti. Eteneva nayena ākāso pakkhīnaṃ gati. Avassaṃ upagamanaṭṭhena pana vibhavo gati dhammānaṃ, sabbesampi saṅkhatadhammānaṃ vināsova tesaṃ gati. Na hi te vināsaṃ agacchantā ṭhātuṃ sakkonti. Sucirampi ṭhatvā pana nibbānaṃ arahato gati, khīṇāsavassa arahato anupādisesanibbānadhātu ekaṃsena gatīti attho.
பட²மகா³தா²ஸங்க³ணிகவண்ணனா நிட்டி²தா.
Paṭhamagāthāsaṅgaṇikavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 5. பாராஜிகாதி³ஆபத்தி • 5. Pārājikādiāpatti
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அஸாதா⁴ரணாதி³வண்ணனா • Asādhāraṇādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாராஜிகாதி³ஆபத்திவண்ணனா • Pārājikādiāpattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாராஜிகாதி³ஆபத்திவண்ணனா • Pārājikādiāpattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / பாராஜிகாதி³ஆபத்திவண்ணனா • Pārājikādiāpattivaṇṇanā
