| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
பாராஜிகாதி³ஆபத்திவண்ணனா
Pārājikādiāpattivaṇṇanā
339. ஏவங் விஸ்ஸஜ்ஜெத்வாதி ஸம்ப³ந்தோ⁴. யதி³த³ங் ஆபத்திபாராஜிகங் நாமாதி யோஜனா. ஆபத்திபாராஜிகந்தி ஆபத்திஸங்கா²தங் பாராஜிகங். ‘‘பராஜயமாபன்னோ’’தி இமினா ஸாஸனதோ புக்³க³லங் பராஜேதீதி பாராஜிகந்தி வசனத்த²ங் த³ஸ்ஸேதி. ண்யபச்சயோ ஹேதுகத்வத்த²வாசகோ, யகாரஸ்ஸ ககாரோ. சுதோதி சவகோ. பரத்³தோ⁴தி விரத்³தோ⁴. ப⁴ட்டோ²தி பதிதோ. நிரங்கதோதி ஸங்க⁴ம்ஹா அபஸாரிதோ. அனீஹதே தஸ்மிங் புக்³க³லேதி தஸ்மிங் புக்³க³லே ஸங்க⁴ம்ஹா நீஹரித்வா ந ஹரிதே, அனபனீதேதி அத்தோ². ‘‘உபோஸத²பவாரணாதி³பே⁴தோ³’’தி இமினா ஸங்வாஸஸரூபங் த³ஸ்ஸேதி. ப்³யஞ்ஜனே ஆத³ரமகத்வா ‘‘ஏதங் ஆபத்தீ’’தி வுத்தங். அயங் ஹீதி அயங் ஏவங் வக்க²மானோ. எத்தா²தி கா³தா²யங். தேன தஸ்மாதி எத்த² ‘‘தஸ்மா’’தி பதே³ன ‘‘தேனா’’தி பத³ஸ்ஸ காரணத்த²ங் த³ஸ்ஸேதி.
339. Evaṃ vissajjetvāti sambandho. Yadidaṃ āpattipārājikaṃ nāmāti yojanā. Āpattipārājikanti āpattisaṅkhātaṃ pārājikaṃ. ‘‘Parājayamāpanno’’ti iminā sāsanato puggalaṃ parājetīti pārājikanti vacanatthaṃ dasseti. Ṇyapaccayo hetukatvatthavācako, yakārassa kakāro. Cutoti cavako. Paraddhoti viraddho. Bhaṭṭhoti patito. Niraṅkatoti saṅghamhā apasārito. Anīhate tasmiṃ puggaleti tasmiṃ puggale saṅghamhā nīharitvā na harite, anapanīteti attho. ‘‘Uposathapavāraṇādibhedo’’ti iminā saṃvāsasarūpaṃ dasseti. Byañjane ādaramakatvā ‘‘etaṃ āpattī’’ti vuttaṃ. Ayaṃ hīti ayaṃ evaṃ vakkhamāno. Etthāti gāthāyaṃ. Tena tasmāti ettha ‘‘tasmā’’ti padena ‘‘tenā’’ti padassa kāraṇatthaṃ dasseti.
எத்தா²தி து³தியகா³தா²யங். ஆதி³ம்ஹி சேவ இச்சி²தப்³போ³தி ஸம்ப³ந்தோ⁴. ஹீதி ஸச்சங். எத்தா²தி பரிவாஸதா³னாதீ³ஸு சதூஸு கம்மேஸு. ‘‘ஸங்கோ⁴’’திஆதி³வசனத்தோ² திபத³பி⁴ன்னாதி⁴கரணபா³ஹிரத்த²ஸமாஸோ ஹோதி, சேவஸத்³த³சஸத்³தே³ஹி ஆதி³ஸேஸபதா³னங் உப⁴யபத³த்த²பதா⁴னபா⁴வங் த³ஸ்ஸேதி, ‘‘இச்சி²தப்³போ³’’தி பத³ங் காரகானங் கிரியாபெக்க²த்தா கிரியத்தா²ய பக்கி²த்தங். அஸ்ஸாதி ஆபத்தியா, இமினா அஞ்ஞபத³ங் த³ஸ்ஸேதி. இச்சி²தப்³ப³த்தே² அபச்சயங் கத்வா தத்³தி⁴தந்திபி வத³ந்தி. லஹுகனயோ பனேஸ. அயங் பனெத்த² க³ருகனயோ – ஆதி³ ச ஸேஸோ ச ஆதி³ஸேஸா, ஸங்கோ⁴ ஆதி³ஸேஸேஸு அஸ்ஸா இச்சி²தப்³போ³தி ஸங்கா⁴தி³ஸேஸோதி.
Etthāti dutiyagāthāyaṃ. Ādimhi ceva icchitabboti sambandho. Hīti saccaṃ. Etthāti parivāsadānādīsu catūsu kammesu. ‘‘Saṅgho’’tiādivacanattho tipadabhinnādhikaraṇabāhiratthasamāso hoti, cevasaddacasaddehi ādisesapadānaṃ ubhayapadatthapadhānabhāvaṃ dasseti, ‘‘icchitabbo’’ti padaṃ kārakānaṃ kiriyāpekkhattā kiriyatthāya pakkhittaṃ. Assāti āpattiyā, iminā aññapadaṃ dasseti. Icchitabbatthe apaccayaṃ katvā taddhitantipi vadanti. Lahukanayo panesa. Ayaṃ panettha garukanayo – ādi ca seso ca ādisesā, saṅgho ādisesesu assā icchitabboti saṅghādisesoti.
அனேகங்ஸிகதங் பத³ந்தி எத்த² பத³ந்தி ஸிக்கா²பத³ங். அனேகங்ஸேன கதங் அனேகங்ஸிகதந்தி த³ஸ்ஸெந்தோ ஆஹ ‘‘யஸ்மா இத³ங் ஸிக்கா²பத³ங் அனேகங்ஸேன கத’’ந்தி. யஸ்மா கதங், தஸ்மா அனியதோதி பவுச்சதீதி யோஜனா. தத்தா²தி அனியதே. யத்தா²தி ஸிக்கா²பதே³. ஸோபீதி ஸிக்கா²பத³த⁴ம்மோபி.
Anekaṃsikataṃpadanti ettha padanti sikkhāpadaṃ. Anekaṃsena kataṃ anekaṃsikatanti dassento āha ‘‘yasmā idaṃ sikkhāpadaṃ anekaṃsena kata’’nti. Yasmā kataṃ, tasmā aniyatoti pavuccatīti yojanā. Tatthāti aniyate. Yatthāti sikkhāpade. Sopīti sikkhāpadadhammopi.
அச்சயேஸூதி தோ³ஸேஸு. தே ஹி நித்³தோ³ஸங் அதிக்கம்ம அயந்தி க³ச்ச²ந்தி பவத்தந்தீதி அச்சயாதி வுச்சந்தி. தேனாதி அச்சயேன. தூ²லோதி ஓளாரிகோ. ‘‘தூ²லத்தா’’தி இமினா ‘‘தேனேத’’ந்தி எத்த² தேனஸத்³த³ஸ்ஸ காரணத்த²ங் த³ஸ்ஸேதி. அச்சயஸ்ஸ தூ²லத்தாதி ஸம்ப³ந்தோ⁴. ஏதந்தி ஆபத்தித⁴ம்மங். இமாய கா³தா²ய அஞ்ஞேஸங் லஹுகாபத்தீனங் தூ²லோ அச்சயோ து²ல்லச்சயோதி வசனத்த²ங் த³ஸ்ஸேதி. த்³வேபா⁴வே ஸதி ஸங்யோக³பரத்தா ரஸ்ஸோ ஹோதீதி த³ட்ட²ப்³ப³ங்.
Accayesūti dosesu. Te hi niddosaṃ atikkamma ayanti gacchanti pavattantīti accayāti vuccanti. Tenāti accayena. Thūloti oḷāriko. ‘‘Thūlattā’’ti iminā ‘‘teneta’’nti ettha tenasaddassa kāraṇatthaṃ dasseti. Accayassa thūlattāti sambandho. Etanti āpattidhammaṃ. Imāya gāthāya aññesaṃ lahukāpattīnaṃ thūlo accayo thullaccayoti vacanatthaṃ dasseti. Dvebhāve sati saṃyogaparattā rasso hotīti daṭṭhabbaṃ.
‘‘நிஸ்ஸஜ்ஜித்வா தே³ஸேதப்³ப³தோ’’தி இமினா நிஸ்ஸஜ்ஜனங் நிஸ்ஸக்³கோ³, ஆபத்திதே³ஸனதோ புப்³ப³பா⁴கே³ கத்தப்³ப³ஸ்ஸ வினயகம்மஸ்ஸேதமதி⁴வசனங், ஸோ ஏதஸ்ஸத்தீ²தி நிஸ்ஸக்³கி³யந்தி வசனத்த²ங் த³ஸ்ஸேதி.
‘‘Nissajjitvā desetabbato’’ti iminā nissajjanaṃ nissaggo, āpattidesanato pubbabhāge kattabbassa vinayakammassetamadhivacanaṃ, so etassatthīti nissaggiyanti vacanatthaṃ dasseti.
குஸலத⁴ம்மஸத்³தே³ன குஸலசித்தமேவ க³ஹேதப்³ப³ந்தி ஆஹ ‘‘குஸலத⁴ம்மஸங்கா²தங் குஸலசித்த’’ந்தி. ‘‘குஸலசித்தங் பாதேதீ’’தி இமினா சித்தங் பாதேதீதி பாசித்தியந்தி வசனத்த²ங் த³ஸ்ஸேதி. எத்த² ‘‘சித்தபாதிய’’ந்தி வத்தப்³பே³ பத³விபரியாயங் கத்வா, தகாரஸ்ஸ ச லோபங் கத்வா ‘‘பாசித்திய’’ந்தி வுத்தங். அசிந்தெய்யோ ஹி பாளினயோ. ண்யபச்சயோ ஹேதுகத்வத்த²வாசகோ. நனு ‘‘பாதேதி குஸலங் த⁴ம்ம’’ந்தி இமினாவ ‘‘பாசித்திய’’ந்தி பத³ஸ்ஸ நிப்³ப³சனங் ஸித்³த⁴ங், கஸ்மா பன ‘‘அபரஜ்ஜ²தி சித்தஸம்மோஹனட்டா²ன’’ந்தி வுத்தந்தி ஆஹ ‘‘யங் பனா’’திஆதி³. யஸ்மா ஹோதீதி ஸம்ப³ந்தோ⁴.
Kusaladhammasaddena kusalacittameva gahetabbanti āha ‘‘kusaladhammasaṅkhātaṃ kusalacitta’’nti. ‘‘Kusalacittaṃ pātetī’’ti iminā cittaṃ pātetīti pācittiyanti vacanatthaṃ dasseti. Ettha ‘‘cittapātiya’’nti vattabbe padavipariyāyaṃ katvā, takārassa ca lopaṃ katvā ‘‘pācittiya’’nti vuttaṃ. Acinteyyo hi pāḷinayo. Ṇyapaccayo hetukatvatthavācako. Nanu ‘‘pāteti kusalaṃ dhamma’’nti imināva ‘‘pācittiya’’nti padassa nibbacanaṃ siddhaṃ, kasmā pana ‘‘aparajjhati cittasammohanaṭṭhāna’’nti vuttanti āha ‘‘yaṃ panā’’tiādi. Yasmā hotīti sambandho.
பாடிதே³ஸனீயாஸு நிப்³ப³சனமேவ அத³ஸ்ஸெத்வா கஸ்மா ‘‘பி⁴க்கு² அஞ்ஞாதகோ ஸந்தோ’’திஆதி³ வுத்தந்தி ஆஹ ‘‘வுத்தகா³ரய்ஹபா⁴வகாரணத³ஸ்ஸனத்த²மேவா’’தி. ‘‘படிதே³ஸேதப்³ப³தோ’’தி இமினா அஞ்ஞாபத்திதே³ஸனானயதோ ‘‘கா³ரய்ஹ’’ந்திஆதி³னா படி விஸுங் வத்வா தே³ஸேதப்³பா³தி பாடிதே³ஸனீயாதி நிப்³ப³சனங் த³ஸ்ஸேதி.
Pāṭidesanīyāsu nibbacanameva adassetvā kasmā ‘‘bhikkhu aññātako santo’’tiādi vuttanti āha ‘‘vuttagārayhabhāvakāraṇadassanatthamevā’’ti. ‘‘Paṭidesetabbato’’ti iminā aññāpattidesanānayato ‘‘gārayha’’ntiādinā paṭi visuṃ vatvā desetabbāti pāṭidesanīyāti nibbacanaṃ dasseti.
து³க்கடந்தி எத்த² து³ஸத்³தோ³ து³ட்டு²அத்தோ² ச விரூபத்தோ² ச ஹோதீதி த³ஸ்ஸெந்தோ ஆஹ ‘‘து³ட்டு² கதங், விரூபங் வா கத’’ந்தி. தந்தி கம்மங். தங் பனேதந்தி து³க்கடங், க²லிதந்தி ஸம்ப³ந்தோ⁴. அஸ்ஸாதி து³க்கடஸ்ஸ. தஸ்ஸத்தோ² ஏவங் வேதி³தப்³போ³தி யோஜனா. ஹீதி வித்தா²ரோ. யங் பாபந்தி யோஜனா. யதீ³தி அத². யதி³ஸத்³தோ³ ஹி அத²பரியாயோ. இத³ம்பீதி இத³ம்பி கம்மங், பாபந்தி ஸம்ப³ந்தோ⁴.
Dukkaṭanti ettha dusaddo duṭṭhuattho ca virūpattho ca hotīti dassento āha ‘‘duṭṭhu kataṃ, virūpaṃ vā kata’’nti. Tanti kammaṃ. Taṃ panetanti dukkaṭaṃ, khalitanti sambandho. Assāti dukkaṭassa. Tassattho evaṃ veditabboti yojanā. Hīti vitthāro. Yaṃ pāpanti yojanā. Yadīti atha. Yadisaddo hi athapariyāyo. Idampīti idampi kammaṃ, pāpanti sambandho.
‘‘லபித’’ந்தி இமினா து³ராப⁴ட்ட²ந்தி எத்த² பா⁴ஸதா⁴துயா கத²னத்த²ங் த³ஸ்ஸேதி. யந்தி வசனங். கிஞ்ச பி⁴ய்யோதி ததோ அதிரேகங் கதே²தப்³ப³வசனங் கிஞ்சாதி அத்தோ². ஸங்கிலிட்ட²ஞ்ச யங் பத³ந்தி எத்த² சகாரோ பிஸத்³த³த்தோ² ‘‘பத³’’ந்தி எத்த² யோஜேதப்³போ³, யங்ஸத்³தோ³ காரணத்தோ²தி ஆஹ ‘‘ஸங்கிலிட்ட²ங் யஸ்மா தம்பி பத³’’ந்தி. தம்பி பத³ந்தி தம்பி வசனங். பத³ஸத்³தோ³ ஹி வசனவாசகோ. தம்பி வசனங் யஸ்மா ஸங்கிலிட்ட²ங் ஹோதீதி யோஜனா. கத²ங் ஸங்கிலிட்ட²ங் ஹோதீதி யோஜனா. ‘‘யஸ்மா’’தி பதே³ன யங்ஸத்³தோ³ காரணத்தோ²தி த³ஸ்ஸேதி. நந்தி பத³ங். ‘‘ஏதங் இதி வுச்சதீ’’தி ஸங்வண்ணேதப்³ப³பத³ங். ‘‘து³ப்³பா⁴ஸிதந்தி ஏதங் வுச்சதீ’’தி ஸங்வண்ணனாபத³ங். ஏதந்தி ஏதங் பத³ங், ஏதங் வசனந்தி அத்தோ².
‘‘Lapita’’nti iminā durābhaṭṭhanti ettha bhāsadhātuyā kathanatthaṃ dasseti. Yanti vacanaṃ. Kiñca bhiyyoti tato atirekaṃ kathetabbavacanaṃ kiñcāti attho. Saṃkiliṭṭhañca yaṃ padanti ettha cakāro pisaddattho ‘‘pada’’nti ettha yojetabbo, yaṃsaddo kāraṇatthoti āha ‘‘saṃkiliṭṭhaṃ yasmā tampi pada’’nti. Tampi padanti tampi vacanaṃ. Padasaddo hi vacanavācako. Tampi vacanaṃ yasmā saṃkiliṭṭhaṃ hotīti yojanā. Kathaṃ saṃkiliṭṭhaṃ hotīti yojanā. ‘‘Yasmā’’ti padena yaṃsaddo kāraṇatthoti dasseti. Nanti padaṃ. ‘‘Etaṃ iti vuccatī’’ti saṃvaṇṇetabbapadaṃ. ‘‘Dubbhāsitanti etaṃ vuccatī’’ti saṃvaṇṇanāpadaṃ. Etanti etaṃ padaṃ, etaṃ vacananti attho.
எத்தா²தி ஸேகி²யகா³தா²ய. இத³ந்தி ஆபத்தீனங் நிப்³ப³சனதீ³பகங் வசனங், வுத்தந்தி ஸம்ப³ந்தோ⁴. கஸ்ஸ தீ³பனத்த²ங் வுத்தந்தி ஆஹ ‘‘ஸங்க³ஹிதஸ்ஸ அத்த²ஸ்ஸ தீ³பனத்த²’’ந்தி.
Etthāti sekhiyagāthāya. Idanti āpattīnaṃ nibbacanadīpakaṃ vacanaṃ, vuttanti sambandho. Kassa dīpanatthaṃ vuttanti āha ‘‘saṅgahitassa atthassa dīpanattha’’nti.
தத்தா²தி ‘‘ச²ன்னமதிவஸ்ஸதீ’’திஆதி³வசனே. கே³ஹந்தி பகதிகே³ஹங். இத³ங் பன கே³ஹந்தி யோஜனா. வித்தா²ரெந்தோ ஆஹ ‘‘மூலாபத்திஞ்ஹீ’’திஆதி³. ‘‘அவிவட’’ந்தி வத்வா தஸ்ஸத்த²ங் த³ஸ்ஸேதுங் வுத்தங் ‘‘ஸுச்ச²ன்ன’’ந்தி. விவடந்தி அச்ச²ன்னங். நாதிவஸ்ஸனபா⁴வங் வித்தா²ரெந்தோ ஆஹ ‘‘மூலாபத்திஞ்ஹீ’’திஆதி³. விவரந்தோ பி⁴க்கு² நாபஜ்ஜதீதி ஸம்ப³ந்தோ⁴. ஸுத்³த⁴ந்தேதி ஸுத்³த⁴கொட்டா²ஸே. ‘‘தஸ்மா’’தி ச ‘‘தேனா’’தி ச யேபு⁴ய்யேன அத்த²தோ ஏகங், தஸ்மா வுத்தங் ‘‘தேன காரணேனா’’தி. ஏவஞ்சேதங் விவடந்தி ஏவங் ஏதங் ச²ன்னங் சே விவடந்தி யோஜனா.
Tatthāti ‘‘channamativassatī’’tiādivacane. Gehanti pakatigehaṃ. Idaṃ pana gehanti yojanā. Vitthārento āha ‘‘mūlāpattiñhī’’tiādi. ‘‘Avivaṭa’’nti vatvā tassatthaṃ dassetuṃ vuttaṃ ‘‘succhanna’’nti. Vivaṭanti acchannaṃ. Nātivassanabhāvaṃ vitthārento āha ‘‘mūlāpattiñhī’’tiādi. Vivaranto bhikkhu nāpajjatīti sambandho. Suddhanteti suddhakoṭṭhāse. ‘‘Tasmā’’ti ca ‘‘tenā’’ti ca yebhuyyena atthato ekaṃ, tasmā vuttaṃ ‘‘tena kāraṇenā’’ti. Evañcetaṃ vivaṭanti evaṃ etaṃ channaṃ ce vivaṭanti yojanā.
பரிபாதியமானானந்தி அபி⁴பூ⁴யமானானங். ‘‘ருக்கா²தி³க³ஹனங் அரஞ்ஞ’’ந்தி இமினா பவனந்தி பத³ஸ்ஸ அரஞ்ஞபரியாயதங் த³ஸ்ஸேதி. க³திஸத்³த³ஸ்ஸ ப⁴வபே⁴தா³தி³அத்த²ங் படிக்கி²பித்வா படிஸ்ஸரணத்தே² ஹோதீதி த³ஸ்ஸெந்தோ ஆஹ ‘‘படிஸ்ஸரணங் ஹோதீ’’தி. தந்தி பவனங். தேதி மிகா³. ‘‘அஸ்ஸஸந்தீ’’தி பதே³ன ‘‘பஸ்ஸஸந்தீ’’தி அத்தோ²பி க³ஹேதப்³போ³ அவினாபா⁴வதோ, ஆனாபானங் கரொந்தீதி அத்தோ². ஆகாஸோதி அஜடாகாஸோ. பக்கீ²னந்தி விஹங்க³மானங். ‘‘ஸப்³பே³ஸங் ஸங்க²தத⁴ம்மான’’ந்தி இமினா த⁴ம்மானந்தி எத்த² ஸங்க²தத⁴ம்மோயேவ க³ஹேதப்³போ³தி த³ஸ்ஸேதி. ‘‘வினாஸோவா’’தி இமினா விப⁴வஸத்³தோ³ வினாஸவாசகோதி த³ஸ்ஸேதி. தேஸந்தி ஸப்³பே³ஸம்பி ஸங்க²தத⁴ம்மானங். க³தீதி பதிட்டா². கஸ்மா விப⁴வோ த⁴ம்மானங் க³தி ஹோதீதி ஆஹ ‘‘ந ஹீ’’திஆதி³. ஹீதி யஸ்மா. தேதி ஸப்³பே³பி ஸங்க²தத⁴ம்மா. வினாஸந்தி விப⁴வங். ஸுசிரம்பீதி அஸீதிவஸ்ஸாதி³காலம்பி. நிப்³பா³னங் அரஹதோ க³தீதி ஸங்வண்ணேதப்³ப³பத³ங். ‘‘கீ²ணாஸவஸ்ஸா’’தி இமினா அரஹதோதி பத³ஸ்ஸ அத்த²ங் த³ஸ்ஸேதி. ‘‘அனுபாதி³ஸேஸனிப்³பா³னதா⁴தூ’’தி இமினா ‘‘நிப்³பா³ன’’ந்தி பத³ஸ்ஸ இத⁴ அதி⁴ப்பேதனிப்³பா³னங் த³ஸ்ஸேதி. கா³தா²ய தே தே அத்தா² ஸங்க³ஹெத்வா க³ணியந்தி எத்தா²தி கா³தா²ஸங்க³ணிகங்.
Paripātiyamānānanti abhibhūyamānānaṃ. ‘‘Rukkhādigahanaṃ arañña’’nti iminā pavananti padassa araññapariyāyataṃ dasseti. Gatisaddassa bhavabhedādiatthaṃ paṭikkhipitvā paṭissaraṇatthe hotīti dassento āha ‘‘paṭissaraṇaṃ hotī’’ti. Tanti pavanaṃ. Teti migā. ‘‘Assasantī’’ti padena ‘‘passasantī’’ti atthopi gahetabbo avinābhāvato, ānāpānaṃ karontīti attho. Ākāsoti ajaṭākāso. Pakkhīnanti vihaṅgamānaṃ. ‘‘Sabbesaṃ saṅkhatadhammāna’’nti iminā dhammānanti ettha saṅkhatadhammoyeva gahetabboti dasseti. ‘‘Vināsovā’’ti iminā vibhavasaddo vināsavācakoti dasseti. Tesanti sabbesampi saṅkhatadhammānaṃ. Gatīti patiṭṭhā. Kasmā vibhavo dhammānaṃ gati hotīti āha ‘‘na hī’’tiādi. Hīti yasmā. Teti sabbepi saṅkhatadhammā. Vināsanti vibhavaṃ. Sucirampīti asītivassādikālampi. Nibbānaṃ arahato gatīti saṃvaṇṇetabbapadaṃ. ‘‘Khīṇāsavassā’’ti iminā arahatoti padassa atthaṃ dasseti. ‘‘Anupādisesanibbānadhātū’’ti iminā ‘‘nibbāna’’nti padassa idha adhippetanibbānaṃ dasseti. Gāthāya te te atthā saṃgahetvā gaṇiyanti etthāti gāthāsaṅgaṇikaṃ.
இதி பட²மகா³தா²ஸங்க³ணிகவண்ணனாய யோஜனா ஸமத்தா.
Iti paṭhamagāthāsaṅgaṇikavaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 5. பாராஜிகாதி³ஆபத்தி • 5. Pārājikādiāpatti
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / பாராஜிகாதி³ஆபத்திவண்ணனா • Pārājikādiāpattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அஸாதா⁴ரணாதி³வண்ணனா • Asādhāraṇādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாராஜிகாதி³ஆபத்திவண்ணனா • Pārājikādiāpattivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாராஜிகாதி³ஆபத்திவண்ணனா • Pārājikādiāpattivaṇṇanā
