| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
পারাজিকাদিআপত্তিৰণ্ণনা
Pārājikādiāpattivaṇṇanā
৩৩৯. এৰং পুচ্ছানুক্কমেন সব্বপঞ্হে ৰিস্সজ্জেত্ৰা ইদানি ‘‘আপত্তিক্খন্ধা চ ভৰন্তি সত্তা’’তি এত্থ সঙ্গহিতআপত্তিক্খন্ধানং পচ্চেকং নিব্বচনমত্তং দস্সেন্তো পারাজিকন্তিআদিমাহ। তত্থ পারাজিকন্তি গাথায অযমত্থো – যদিদং পুগ্গলাপত্তিসিক্খাপদপারাজিকেসু আপত্তিপারাজিকং নাম ৰুত্তং, তং আপজ্জন্তো পুগ্গলো যস্মা পরাজিতো পরাজযমাপন্নো সদ্ধম্মা চুতো পরদ্ধো ভট্ঠো নিরঙ্কতো চ হোতি, অনিহতে তস্মিং পুগ্গলে পুন উপোসথপ্পৰারণাদিভেদো সংৰাসো নত্থি। তেনেতং ইতি ৰুচ্চতীতি তেন কারণেন এতং আপত্তিপারাজিকন্তি ৰুচ্চতি। অযঞ্হেত্থ সঙ্খেপত্থো – যস্মা পরাজিতো হোতি তেন, তস্মা এতং পারাজিকন্তি ৰুচ্চতি।
339. Evaṃ pucchānukkamena sabbapañhe vissajjetvā idāni ‘‘āpattikkhandhā ca bhavanti sattā’’ti ettha saṅgahitaāpattikkhandhānaṃ paccekaṃ nibbacanamattaṃ dassento pārājikantiādimāha. Tattha pārājikanti gāthāya ayamattho – yadidaṃ puggalāpattisikkhāpadapārājikesu āpattipārājikaṃ nāma vuttaṃ, taṃ āpajjanto puggalo yasmā parājito parājayamāpanno saddhammā cuto paraddho bhaṭṭho niraṅkato ca hoti, anihate tasmiṃ puggale puna uposathappavāraṇādibhedo saṃvāso natthi. Tenetaṃ iti vuccatīti tena kāraṇena etaṃ āpattipārājikanti vuccati. Ayañhettha saṅkhepattho – yasmā parājito hoti tena, tasmā etaṃ pārājikanti vuccati.
দুতিযগাথাযপি ব্যঞ্জনং অনাদিযিত্ৰা অত্থমত্তমেৰ দস্সেতুং সঙ্ঘোৰ দেতি পরিৰাসন্তিআদি ৰুত্তং। অযং পনেত্থ অত্থো – ইমং আপত্তিং আপজ্জিত্ৰা ৰুট্ঠাতুকামস্স যং তং আপত্তিৰুট্ঠানং তস্স আদিম্হি চেৰ পরিৰাসদানত্থায আদিতো সেসে মজ্ঝে মানত্তদানত্থায মূলাযপটিকস্সনেন ৰা সহ মানত্তদানত্থায, অৰসানে অব্ভানত্থায চ সঙ্ঘো ইচ্ছিতব্বো, ন হেত্থ একম্পি কম্মং ৰিনা সঙ্ঘেন সক্কা কাতুন্তি সঙ্ঘো, আদিম্হি চেৰ সেসে চ ইচ্ছিতব্বো অস্সাতি সঙ্ঘাদিসেসো।
Dutiyagāthāyapi byañjanaṃ anādiyitvā atthamattameva dassetuṃ saṅghova deti parivāsantiādi vuttaṃ. Ayaṃ panettha attho – imaṃ āpattiṃ āpajjitvā vuṭṭhātukāmassa yaṃ taṃ āpattivuṭṭhānaṃ tassa ādimhi ceva parivāsadānatthāya ādito sese majjhe mānattadānatthāya mūlāyapaṭikassanena vā saha mānattadānatthāya, avasāne abbhānatthāya ca saṅgho icchitabbo, na hettha ekampi kammaṃ vinā saṅghena sakkā kātunti saṅgho, ādimhi ceva sese ca icchitabbo assāti saṅghādiseso.
ততিযগাথায অনিযতো ন নিযতোতি যস্মা ন নিযতো, তস্মা অনিযতো অযমাপত্তিক্খন্ধোতি অত্থো। কিং কারণা ন নিযতোতি? অনেকংসিকতং পদং, যস্মা ইদং সিক্খাপদং অনেকংসেন কতন্তি অত্থো। কথং অনেকংসেন? তিণ্ণমঞ্ঞতরং ঠানং, তিণ্ণং ধম্মানং অঞ্ঞতরেন কারেতব্বোতি হি তত্থ ৰুত্তং, তস্মা ‘‘অনিযতো’’তি পৰুচ্চতি, সো আপত্তিক্খন্ধো অনিযতোতি ৰুচ্চতি। যথা চ তিণ্ণং অঞ্ঞতরং ঠানং, এৰং দ্ৰিন্নং ধম্মানং অঞ্ঞতরং ঠানং যত্থ ৰুত্তং, সোপি অনিযতো এৰ।
Tatiyagāthāya aniyato na niyatoti yasmā na niyato, tasmā aniyato ayamāpattikkhandhoti attho. Kiṃ kāraṇā na niyatoti? Anekaṃsikataṃpadaṃ, yasmā idaṃ sikkhāpadaṃ anekaṃsena katanti attho. Kathaṃ anekaṃsena? Tiṇṇamaññataraṃ ṭhānaṃ, tiṇṇaṃ dhammānaṃ aññatarena kāretabboti hi tattha vuttaṃ, tasmā ‘‘aniyato’’ti pavuccati, so āpattikkhandho aniyatoti vuccati. Yathā ca tiṇṇaṃ aññataraṃ ṭhānaṃ, evaṃ dvinnaṃ dhammānaṃ aññataraṃ ṭhānaṃ yattha vuttaṃ, sopi aniyato eva.
চতুত্থগাথায অচ্চযো তেন সমো নত্থীতি দেসনাগামিনীসু অচ্চযেসু তেন সমো থূলো অচ্চযো নত্থি, তেনেতং ইতি ৰুচ্চতি; থূলত্তা অচ্চযস্স এতং থুল্লচ্চযন্তি ৰুচ্চতীতি অত্থো।
Catutthagāthāya accayo tena samo natthīti desanāgāminīsu accayesu tena samo thūlo accayo natthi, tenetaṃ iti vuccati; thūlattā accayassa etaṃ thullaccayanti vuccatīti attho.
পঞ্চমগাথায নিস্সজ্জিত্ৰান দেসেতি তেনেতন্তি নিস্সজ্জিত্ৰা দেসেতব্বতো নিস্সগ্গিযন্তি ৰুচ্চতীতি অত্থো।
Pañcamagāthāya nissajjitvāna deseti tenetanti nissajjitvā desetabbato nissaggiyanti vuccatīti attho.
ছট্ঠগাথায পাতেতি কুসলং ধম্মন্তি সঞ্চিচ্চ আপজ্জন্তস্স কুসলধম্মসঙ্খাতং কুসলচিত্তং পাতেতি, তস্মা পাতেতি চিত্তন্তি পাচিত্তিযং। যং পন চিত্তং পাতেতি, তং যস্মা অরিযমগ্গং অপরজ্ঝতি, চিত্তসম্মোহকারণঞ্চ হোতি, তস্মা ‘‘অরিযমগ্গং অপরজ্ঝতি, চিত্তসম্মোহনট্ঠান’’ন্তি চ ৰুত্তং।
Chaṭṭhagāthāya pāteti kusalaṃ dhammanti sañcicca āpajjantassa kusaladhammasaṅkhātaṃ kusalacittaṃ pāteti, tasmā pāteti cittanti pācittiyaṃ. Yaṃ pana cittaṃ pāteti, taṃ yasmā ariyamaggaṃ aparajjhati, cittasammohakāraṇañca hoti, tasmā ‘‘ariyamaggaṃ aparajjhati, cittasammohanaṭṭhāna’’nti ca vuttaṃ.
পাটিদেসনীযগাথাসু ‘‘গারয্হং আৰুসো ধম্মং আপজ্জি’’ন্তি ৰুত্তগারয্হভাৰকারণদস্সনত্থমেৰ ভিক্খু অঞ্ঞাতকো সন্তোতিআদি ৰুত্তং। পটিদেসেতব্বতো পন সা আপত্তি পাটিদেসনীযাতি ৰুচ্চতি।
Pāṭidesanīyagāthāsu ‘‘gārayhaṃ āvuso dhammaṃ āpajji’’nti vuttagārayhabhāvakāraṇadassanatthameva bhikkhu aññātako santotiādi vuttaṃ. Paṭidesetabbato pana sā āpatti pāṭidesanīyāti vuccati.
দুক্কটগাথায অপরদ্ধং ৰিরদ্ধঞ্চ খলিতন্তি সব্বমেতং ‘‘যঞ্চ দুক্কট’’ন্তি এত্থ ৰুত্তস্স দুক্কটস্স পরিযাযৰচনং। যঞ্হি দুট্ঠু কতং ৰিরূপং ৰা কতং, তং দুক্কটং। তং পনেতং যথা সত্থারা ৰুত্তং; এৰং অকতত্তা অপরদ্ধং, কুসলং ৰিরজ্ঝিত্ৰা পৰত্তত্তা ৰিরদ্ধং, অরিযৰত্তপটিপদং অনারুল়্হত্তা খলিতং। যং মনুস্সো করেতি ইদং পনস্স ওপম্মনিদস্সনং। তস্সত্থো – যথা হি যং লোকে মনুস্সো আৰি ৰা যদি ৰা রহো পাপং করোতি, তং দুক্কটন্তি পৰেদেন্তি; এৰমিদম্পি বুদ্ধপ্পটিকুট্ঠেন লামকভাৰেন পাপং, তস্মা দুক্কটন্তি ৰেদিতব্বং।
Dukkaṭagāthāya aparaddhaṃ viraddhañca khalitanti sabbametaṃ ‘‘yañca dukkaṭa’’nti ettha vuttassa dukkaṭassa pariyāyavacanaṃ. Yañhi duṭṭhu kataṃ virūpaṃ vā kataṃ, taṃ dukkaṭaṃ. Taṃ panetaṃ yathā satthārā vuttaṃ; evaṃ akatattā aparaddhaṃ, kusalaṃ virajjhitvā pavattattā viraddhaṃ, ariyavattapaṭipadaṃ anāruḷhattā khalitaṃ. Yaṃ manusso kareti idaṃ panassa opammanidassanaṃ. Tassattho – yathā hi yaṃ loke manusso āvi vā yadi vā raho pāpaṃ karoti, taṃ dukkaṭanti pavedenti; evamidampi buddhappaṭikuṭṭhena lāmakabhāvena pāpaṃ, tasmā dukkaṭanti veditabbaṃ.
দুব্ভাসিতগাথায দুব্ভাসিতং দুরাভট্ঠন্তি দুট্ঠু আভট্ঠং ভাসিতং লপিতন্তি দুরাভট্ঠং। যং দুরাভট্ঠং, তং দুব্ভাসিতন্তি অত্থো। কিঞ্চ ভিয্যো? সংকিলিট্ঠঞ্চ যং পদং, সংকিলিট্ঠং যস্মা তং পদং হোতীতি অত্থো। তথা যঞ্চ ৰিঞ্ঞূ গরহন্তি, যস্মা চ নং ৰিঞ্ঞূ গরহন্তীতি অত্থো। তেনেতং ইতি ৰুচ্চতীতি তেন সংকিলিট্ঠভাৰেন চ ৰিঞ্ঞুগরহনেনাপি চ এতং ইতি ৰুচ্চতি; ‘‘দুব্ভাসিত’’ন্তি এৰং ৰুচ্চতীতি অত্থো।
Dubbhāsitagāthāya dubbhāsitaṃ durābhaṭṭhanti duṭṭhu ābhaṭṭhaṃ bhāsitaṃ lapitanti durābhaṭṭhaṃ. Yaṃ durābhaṭṭhaṃ, taṃ dubbhāsitanti attho. Kiñca bhiyyo? Saṃkiliṭṭhañca yaṃ padaṃ, saṃkiliṭṭhaṃ yasmā taṃ padaṃ hotīti attho. Tathā yañca viññū garahanti, yasmā ca naṃ viññū garahantīti attho. Tenetaṃ iti vuccatīti tena saṃkiliṭṭhabhāvena ca viññugarahanenāpi ca etaṃ iti vuccati; ‘‘dubbhāsita’’nti evaṃ vuccatīti attho.
সেখিযগাথায ‘‘আদি চেতং চরণঞ্চা’’তিআদিনা নযেন সেখস্স সন্তকভাৰং দীপেতি। তস্মা সেখস্স ইদং সেখিযন্তি অযমেত্থ সঙ্খেপত্থো। ইদং ‘‘গরুকলহুকঞ্চাপী’’তিআদিপঞ্হেহি অসঙ্গহিতস্স ‘‘হন্দ ৰাক্যং সুণোম তে’’তি ইমিনা পন আযাচনৰচনেন সঙ্গহিতস্স অত্থস্স দীপনত্থং ৰুত্তন্তি ৰেদিতব্বং।
Sekhiyagāthāya ‘‘ādi cetaṃ caraṇañcā’’tiādinā nayena sekhassa santakabhāvaṃ dīpeti. Tasmā sekhassa idaṃ sekhiyanti ayamettha saṅkhepattho. Idaṃ ‘‘garukalahukañcāpī’’tiādipañhehi asaṅgahitassa ‘‘handa vākyaṃ suṇoma te’’ti iminā pana āyācanavacanena saṅgahitassa atthassa dīpanatthaṃ vuttanti veditabbaṃ.
ছন্নমতিৰস্সতীতিআদিম্হিপি এসেৰ নযো। তত্থ ছন্নমতিৰস্সতীতি গেহং তাৰ তিণাদীহি অচ্ছন্নং অতিৰস্সতি। ইদং পন আপত্তিসঙ্খাতং গেহং ছন্নং অতিৰস্সতি; মূলাপত্তিঞ্হি ছাদেন্তো অঞ্ঞং নৰং আপত্তিং আপজ্জতি। ৰিৰটং নাতিৰস্সতীতি গেহং তাৰ অৰিৰটং সুচ্ছন্নং নাতিৰস্সতি। ইদং পন আপত্তিসঙ্খাতং গেহং ৰিৰটং নাতিৰস্সতি; মূলাপত্তিঞ্হি ৰিৰরন্তো দেসনাগামিনিং দেসেত্ৰা ৰুট্ঠানগামিনিতো ৰুট্ঠহিত্ৰা সুদ্ধন্তে পতিট্ঠাতি। আযতিং সংৰরন্তো অঞ্ঞং আপত্তিং নাপজ্জতি। তস্মা ছন্নং ৰিৰরেথাতি তেন কারণেন দেসনাগামিনিং দেসেন্তো ৰুট্ঠানগামিনিতো চ ৰুট্ঠহন্তো ছন্নং ৰিৰরেথ। এৰং তং নাতিৰস্সতীতি এৰঞ্চেতং ৰিৰটং নাতিৰস্সতীতি অত্থো।
Channamativassatītiādimhipi eseva nayo. Tattha channamativassatīti gehaṃ tāva tiṇādīhi acchannaṃ ativassati. Idaṃ pana āpattisaṅkhātaṃ gehaṃ channaṃ ativassati; mūlāpattiñhi chādento aññaṃ navaṃ āpattiṃ āpajjati. Vivaṭaṃ nātivassatīti gehaṃ tāva avivaṭaṃ succhannaṃ nātivassati. Idaṃ pana āpattisaṅkhātaṃ gehaṃ vivaṭaṃ nātivassati; mūlāpattiñhi vivaranto desanāgāminiṃ desetvā vuṭṭhānagāminito vuṭṭhahitvā suddhante patiṭṭhāti. Āyatiṃ saṃvaranto aññaṃ āpattiṃ nāpajjati. Tasmā channaṃ vivarethāti tena kāraṇena desanāgāminiṃ desento vuṭṭhānagāminito ca vuṭṭhahanto channaṃ vivaretha. Evaṃ taṃ nātivassatīti evañcetaṃ vivaṭaṃ nātivassatīti attho.
গতি মিগানং পৰনন্তি অজ্ঝোকাসে ব্যগ্ঘাদীহি পরিপাতিযমানানং মিগানং পৰনং রুক্খাদিগহনং অরঞ্ঞং গতি পটিসরণং হোতি, তং পত্ৰা তে অস্সাসন্তি। এতেনেৰ নযেন আকাসো পক্খীনং গতি। অৰস্সং উপগমনট্ঠেন পন ৰিভৰো গতি ধম্মানং, সব্বেসম্পি সঙ্খতধম্মানং ৰিনাসোৰ তেসং গতি। ন হি তে ৰিনাসং অগচ্ছন্তা ঠাতুং সক্কোন্তি। সুচিরম্পি ঠত্ৰা পন নিব্বানং অরহতো গতি, খীণাসৰস্স অরহতো অনুপাদিসেসনিব্বানধাতু একংসেন গতীতি অত্থো।
Gati migānaṃ pavananti ajjhokāse byagghādīhi paripātiyamānānaṃ migānaṃ pavanaṃ rukkhādigahanaṃ araññaṃ gati paṭisaraṇaṃ hoti, taṃ patvā te assāsanti. Eteneva nayena ākāso pakkhīnaṃ gati. Avassaṃ upagamanaṭṭhena pana vibhavo gati dhammānaṃ, sabbesampi saṅkhatadhammānaṃ vināsova tesaṃ gati. Na hi te vināsaṃ agacchantā ṭhātuṃ sakkonti. Sucirampi ṭhatvā pana nibbānaṃ arahato gati, khīṇāsavassa arahato anupādisesanibbānadhātu ekaṃsena gatīti attho.
পঠমগাথাসঙ্গণিকৰণ্ণনা নিট্ঠিতা।
Paṭhamagāthāsaṅgaṇikavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৫. পারাজিকাদিআপত্তি • 5. Pārājikādiāpatti
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অসাধারণাদিৰণ্ণনা • Asādhāraṇādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পারাজিকাদিআপত্তিৰণ্ণনা • Pārājikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পারাজিকাদিআপত্তিৰণ্ণনা • Pārājikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / পারাজিকাদিআপত্তিৰণ্ণনা • Pārājikādiāpattivaṇṇanā
