| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
ပာရာဇိကာဒိအာပတ္တိဝဏ္ဏနာ
Pārājikādiāpattivaṇṇanā
၃၃၉. ဧဝံ ဝိသ္သဇ္ဇေတ္ဝာတိ သမ္ဗန္ဓော။ ယဒိဒံ အာပတ္တိပာရာဇိကံ နာမာတိ ယောဇနာ။ အာပတ္တိပာရာဇိကန္တိ အာပတ္တိသင္ခာတံ ပာရာဇိကံ။ ‘‘ပရာဇယမာပန္နော’’တိ ဣမိနာ သာသနတော ပုဂ္ဂလံ ပရာဇေတီတိ ပာရာဇိကန္တိ ဝစနတ္ထံ ဒသ္သေတိ။ ဏ္ယပစ္စယော ဟေတုကတ္ဝတ္ထဝာစကော, ယကာရသ္သ ကကာရော။ စုတောတိ စဝကော။ ပရဒ္ဓောတိ ဝိရဒ္ဓော။ ဘဋ္ဌောတိ ပတိတော။ နိရင္ကတောတိ သင္ဃမ္ဟာ အပသာရိတော။ အနီဟတေ တသ္မိံ ပုဂ္ဂလေတိ တသ္မိံ ပုဂ္ဂလေ သင္ဃမ္ဟာ နီဟရိတ္ဝာ န ဟရိတေ, အနပနီတေတိ အတ္ထော။ ‘‘ဥပောသထပဝာရဏာဒိဘေဒော’’တိ ဣမိနာ သံဝာသသရူပံ ဒသ္သေတိ။ ဗ္ယဉ္ဇနေ အာဒရမကတ္ဝာ ‘‘ဧတံ အာပတ္တီ’’တိ ဝုတ္တံ။ အယံ ဟီတိ အယံ ဧဝံ ဝက္ခမာနော။ ဧတ္ထာတိ ဂာထာယံ။ တေန တသ္မာတိ ဧတ္ထ ‘‘တသ္မာ’’တိ ပဒေန ‘‘တေနာ’’တိ ပဒသ္သ ကာရဏတ္ထံ ဒသ္သေတိ။
339. Evaṃ vissajjetvāti sambandho. Yadidaṃ āpattipārājikaṃ nāmāti yojanā. Āpattipārājikanti āpattisaṅkhātaṃ pārājikaṃ. ‘‘Parājayamāpanno’’ti iminā sāsanato puggalaṃ parājetīti pārājikanti vacanatthaṃ dasseti. Ṇyapaccayo hetukatvatthavācako, yakārassa kakāro. Cutoti cavako. Paraddhoti viraddho. Bhaṭṭhoti patito. Niraṅkatoti saṅghamhā apasārito. Anīhate tasmiṃ puggaleti tasmiṃ puggale saṅghamhā nīharitvā na harite, anapanīteti attho. ‘‘Uposathapavāraṇādibhedo’’ti iminā saṃvāsasarūpaṃ dasseti. Byañjane ādaramakatvā ‘‘etaṃ āpattī’’ti vuttaṃ. Ayaṃ hīti ayaṃ evaṃ vakkhamāno. Etthāti gāthāyaṃ. Tena tasmāti ettha ‘‘tasmā’’ti padena ‘‘tenā’’ti padassa kāraṇatthaṃ dasseti.
ဧတ္ထာတိ ဒုတိယဂာထာယံ။ အာဒိမ္ဟိ စေဝ ဣစ္ဆိတဗ္ဗောတိ သမ္ဗန္ဓော။ ဟီတိ သစ္စံ။ ဧတ္ထာတိ ပရိဝာသဒာနာဒီသု စတူသု ကမ္မေသု။ ‘‘သင္ဃော’’တိအာဒိဝစနတ္ထော တိပဒဘိန္နာဓိကရဏဗာဟိရတ္ထသမာသော ဟောတိ, စေဝသဒ္ဒစသဒ္ဒေဟိ အာဒိသေသပဒာနံ ဥဘယပဒတ္ထပဓာနဘာဝံ ဒသ္သေတိ, ‘‘ဣစ္ဆိတဗ္ဗော’’တိ ပဒံ ကာရကာနံ ကိရိယာပေက္ခတ္တာ ကိရိယတ္ထာယ ပက္ခိတ္တံ။ အသ္သာတိ အာပတ္တိယာ, ဣမိနာ အညပဒံ ဒသ္သေတိ။ ဣစ္ဆိတဗ္ဗတ္ထေ အပစ္စယံ ကတ္ဝာ တဒ္ဓိတန္တိပိ ဝဒန္တိ။ လဟုကနယော ပနေသ။ အယံ ပနေတ္ထ ဂရုကနယော – အာဒိ စ သေသော စ အာဒိသေသာ, သင္ဃော အာဒိသေသေသု အသ္သာ ဣစ္ဆိတဗ္ဗောတိ သင္ဃာဒိသေသောတိ။
Etthāti dutiyagāthāyaṃ. Ādimhi ceva icchitabboti sambandho. Hīti saccaṃ. Etthāti parivāsadānādīsu catūsu kammesu. ‘‘Saṅgho’’tiādivacanattho tipadabhinnādhikaraṇabāhiratthasamāso hoti, cevasaddacasaddehi ādisesapadānaṃ ubhayapadatthapadhānabhāvaṃ dasseti, ‘‘icchitabbo’’ti padaṃ kārakānaṃ kiriyāpekkhattā kiriyatthāya pakkhittaṃ. Assāti āpattiyā, iminā aññapadaṃ dasseti. Icchitabbatthe apaccayaṃ katvā taddhitantipi vadanti. Lahukanayo panesa. Ayaṃ panettha garukanayo – ādi ca seso ca ādisesā, saṅgho ādisesesu assā icchitabboti saṅghādisesoti.
အနေကံသိကတံ ပဒန္တိ ဧတ္ထ ပဒန္တိ သိက္ခာပဒံ။ အနေကံသေန ကတံ အနေကံသိကတန္တိ ဒသ္သေန္တော အာဟ ‘‘ယသ္မာ ဣဒံ သိက္ခာပဒံ အနေကံသေန ကတ’’န္တိ။ ယသ္မာ ကတံ, တသ္မာ အနိယတောတိ ပဝုစ္စတီတိ ယောဇနာ။ တတ္ထာတိ အနိယတေ။ ယတ္ထာတိ သိက္ခာပဒေ။ သောပီတိ သိက္ခာပဒဓမ္မောပိ။
Anekaṃsikataṃpadanti ettha padanti sikkhāpadaṃ. Anekaṃsena kataṃ anekaṃsikatanti dassento āha ‘‘yasmā idaṃ sikkhāpadaṃ anekaṃsena kata’’nti. Yasmā kataṃ, tasmā aniyatoti pavuccatīti yojanā. Tatthāti aniyate. Yatthāti sikkhāpade. Sopīti sikkhāpadadhammopi.
အစ္စယေသူတိ ဒောသေသု။ တေ ဟိ နိဒ္ဒောသံ အတိက္ကမ္မ အယန္တိ ဂစ္ဆန္တိ ပဝတ္တန္တီတိ အစ္စယာတိ ဝုစ္စန္တိ။ တေနာတိ အစ္စယေန။ ထူလောတိ ဩဠာရိကော။ ‘‘ထူလတ္တာ’’တိ ဣမိနာ ‘‘တေနေတ’’န္တိ ဧတ္ထ တေနသဒ္ဒသ္သ ကာရဏတ္ထံ ဒသ္သေတိ။ အစ္စယသ္သ ထူလတ္တာတိ သမ္ဗန္ဓော။ ဧတန္တိ အာပတ္တိဓမ္မံ။ ဣမာယ ဂာထာယ အညေသံ လဟုကာပတ္တီနံ ထူလော အစ္စယော ထုလ္လစ္စယောတိ ဝစနတ္ထံ ဒသ္သေတိ။ ဒ္ဝေဘာဝေ သတိ သံယောဂပရတ္တာ ရသ္သော ဟောတီတိ ဒဋ္ဌဗ္ဗံ။
Accayesūti dosesu. Te hi niddosaṃ atikkamma ayanti gacchanti pavattantīti accayāti vuccanti. Tenāti accayena. Thūloti oḷāriko. ‘‘Thūlattā’’ti iminā ‘‘teneta’’nti ettha tenasaddassa kāraṇatthaṃ dasseti. Accayassa thūlattāti sambandho. Etanti āpattidhammaṃ. Imāya gāthāya aññesaṃ lahukāpattīnaṃ thūlo accayo thullaccayoti vacanatthaṃ dasseti. Dvebhāve sati saṃyogaparattā rasso hotīti daṭṭhabbaṃ.
‘‘နိသ္သဇ္ဇိတ္ဝာ ဒေသေတဗ္ဗတော’’တိ ဣမိနာ နိသ္သဇ္ဇနံ နိသ္သဂ္ဂော, အာပတ္တိဒေသနတော ပုဗ္ဗဘာဂေ ကတ္တဗ္ဗသ္သ ဝိနယကမ္မသ္သေတမဓိဝစနံ, သော ဧတသ္သတ္ထီတိ နိသ္သဂ္ဂိယန္တိ ဝစနတ္ထံ ဒသ္သေတိ။
‘‘Nissajjitvā desetabbato’’ti iminā nissajjanaṃ nissaggo, āpattidesanato pubbabhāge kattabbassa vinayakammassetamadhivacanaṃ, so etassatthīti nissaggiyanti vacanatthaṃ dasseti.
ကုသလဓမ္မသဒ္ဒေန ကုသလစိတ္တမေဝ ဂဟေတဗ္ဗန္တိ အာဟ ‘‘ကုသလဓမ္မသင္ခာတံ ကုသလစိတ္တ’’န္တိ။ ‘‘ကုသလစိတ္တံ ပာတေတီ’’တိ ဣမိနာ စိတ္တံ ပာတေတီတိ ပာစိတ္တိယန္တိ ဝစနတ္ထံ ဒသ္သေတိ။ ဧတ္ထ ‘‘စိတ္တပာတိယ’’န္တိ ဝတ္တဗ္ဗေ ပဒဝိပရိယာယံ ကတ္ဝာ, တကာရသ္သ စ လောပံ ကတ္ဝာ ‘‘ပာစိတ္တိယ’’န္တိ ဝုတ္တံ။ အစိန္တေယ္ယော ဟိ ပာဠိနယော။ ဏ္ယပစ္စယော ဟေတုကတ္ဝတ္ထဝာစကော။ နနု ‘‘ပာတေတိ ကုသလံ ဓမ္မ’’န္တိ ဣမိနာဝ ‘‘ပာစိတ္တိယ’’န္တိ ပဒသ္သ နိဗ္ဗစနံ သိဒ္ဓံ, ကသ္မာ ပန ‘‘အပရဇ္ဈတိ စိတ္တသမ္မောဟနဋ္ဌာန’’န္တိ ဝုတ္တန္တိ အာဟ ‘‘ယံ ပနာ’’တိအာဒိ။ ယသ္မာ ဟောတီတိ သမ္ဗန္ဓော။
Kusaladhammasaddena kusalacittameva gahetabbanti āha ‘‘kusaladhammasaṅkhātaṃ kusalacitta’’nti. ‘‘Kusalacittaṃ pātetī’’ti iminā cittaṃ pātetīti pācittiyanti vacanatthaṃ dasseti. Ettha ‘‘cittapātiya’’nti vattabbe padavipariyāyaṃ katvā, takārassa ca lopaṃ katvā ‘‘pācittiya’’nti vuttaṃ. Acinteyyo hi pāḷinayo. Ṇyapaccayo hetukatvatthavācako. Nanu ‘‘pāteti kusalaṃ dhamma’’nti imināva ‘‘pācittiya’’nti padassa nibbacanaṃ siddhaṃ, kasmā pana ‘‘aparajjhati cittasammohanaṭṭhāna’’nti vuttanti āha ‘‘yaṃ panā’’tiādi. Yasmā hotīti sambandho.
ပာဋိဒေသနီယာသု နိဗ္ဗစနမေဝ အဒသ္သေတ္ဝာ ကသ္မာ ‘‘ဘိက္ခု အညာတကော သန္တော’’တိအာဒိ ဝုတ္တန္တိ အာဟ ‘‘ဝုတ္တဂာရယ္ဟဘာဝကာရဏဒသ္သနတ္ထမေဝာ’’တိ။ ‘‘ပဋိဒေသေတဗ္ဗတော’’တိ ဣမိနာ အညာပတ္တိဒေသနာနယတော ‘‘ဂာရယ္ဟ’’န္တိအာဒိနာ ပဋိ ဝိသုံ ဝတ္ဝာ ဒေသေတဗ္ဗာတိ ပာဋိဒေသနီယာတိ နိဗ္ဗစနံ ဒသ္သေတိ။
Pāṭidesanīyāsu nibbacanameva adassetvā kasmā ‘‘bhikkhu aññātako santo’’tiādi vuttanti āha ‘‘vuttagārayhabhāvakāraṇadassanatthamevā’’ti. ‘‘Paṭidesetabbato’’ti iminā aññāpattidesanānayato ‘‘gārayha’’ntiādinā paṭi visuṃ vatvā desetabbāti pāṭidesanīyāti nibbacanaṃ dasseti.
ဒုက္ကဋန္တိ ဧတ္ထ ဒုသဒ္ဒော ဒုဋ္ဌုအတ္ထော စ ဝိရူပတ္ထော စ ဟောတီတိ ဒသ္သေန္တော အာဟ ‘‘ဒုဋ္ဌု ကတံ, ဝိရူပံ ဝာ ကတ’’န္တိ။ တန္တိ ကမ္မံ။ တံ ပနေတန္တိ ဒုက္ကဋံ, ခလိတန္တိ သမ္ဗန္ဓော။ အသ္သာတိ ဒုက္ကဋသ္သ။ တသ္သတ္ထော ဧဝံ ဝေဒိတဗ္ဗောတိ ယောဇနာ။ ဟီတိ ဝိတ္ထာရော။ ယံ ပာပန္တိ ယောဇနာ။ ယဒီတိ အထ။ ယဒိသဒ္ဒော ဟိ အထပရိယာယော။ ဣဒမ္ပီတိ ဣဒမ္ပိ ကမ္မံ, ပာပန္တိ သမ္ဗန္ဓော။
Dukkaṭanti ettha dusaddo duṭṭhuattho ca virūpattho ca hotīti dassento āha ‘‘duṭṭhu kataṃ, virūpaṃ vā kata’’nti. Tanti kammaṃ. Taṃ panetanti dukkaṭaṃ, khalitanti sambandho. Assāti dukkaṭassa. Tassattho evaṃ veditabboti yojanā. Hīti vitthāro. Yaṃ pāpanti yojanā. Yadīti atha. Yadisaddo hi athapariyāyo. Idampīti idampi kammaṃ, pāpanti sambandho.
‘‘လပိတ’’န္တိ ဣမိနာ ဒုရာဘဋ္ဌန္တိ ဧတ္ထ ဘာသဓာတုယာ ကထနတ္ထံ ဒသ္သေတိ။ ယန္တိ ဝစနံ။ ကိဉ္စ ဘိယ္ယောတိ တတော အတိရေကံ ကထေတဗ္ဗဝစနံ ကိဉ္စာတိ အတ္ထော။ သံကိလိဋ္ဌဉ္စ ယံ ပဒန္တိ ဧတ္ထ စကာရော ပိသဒ္ဒတ္ထော ‘‘ပဒ’’န္တိ ဧတ္ထ ယောဇေတဗ္ဗော, ယံသဒ္ဒော ကာရဏတ္ထောတိ အာဟ ‘‘သံကိလိဋ္ဌံ ယသ္မာ တမ္ပိ ပဒ’’န္တိ။ တမ္ပိ ပဒန္တိ တမ္ပိ ဝစနံ။ ပဒသဒ္ဒော ဟိ ဝစနဝာစကော။ တမ္ပိ ဝစနံ ယသ္မာ သံကိလိဋ္ဌံ ဟောတီတိ ယောဇနာ။ ကထံ သံကိလိဋ္ဌံ ဟောတီတိ ယောဇနာ။ ‘‘ယသ္မာ’’တိ ပဒေန ယံသဒ္ဒော ကာရဏတ္ထောတိ ဒသ္သေတိ။ နန္တိ ပဒံ။ ‘‘ဧတံ ဣတိ ဝုစ္စတီ’’တိ သံဝဏ္ဏေတဗ္ဗပဒံ။ ‘‘ဒုဗ္ဘာသိတန္တိ ဧတံ ဝုစ္စတီ’’တိ သံဝဏ္ဏနာပဒံ။ ဧတန္တိ ဧတံ ပဒံ, ဧတံ ဝစနန္တိ အတ္ထော။
‘‘Lapita’’nti iminā durābhaṭṭhanti ettha bhāsadhātuyā kathanatthaṃ dasseti. Yanti vacanaṃ. Kiñca bhiyyoti tato atirekaṃ kathetabbavacanaṃ kiñcāti attho. Saṃkiliṭṭhañca yaṃ padanti ettha cakāro pisaddattho ‘‘pada’’nti ettha yojetabbo, yaṃsaddo kāraṇatthoti āha ‘‘saṃkiliṭṭhaṃ yasmā tampi pada’’nti. Tampi padanti tampi vacanaṃ. Padasaddo hi vacanavācako. Tampi vacanaṃ yasmā saṃkiliṭṭhaṃ hotīti yojanā. Kathaṃ saṃkiliṭṭhaṃ hotīti yojanā. ‘‘Yasmā’’ti padena yaṃsaddo kāraṇatthoti dasseti. Nanti padaṃ. ‘‘Etaṃ iti vuccatī’’ti saṃvaṇṇetabbapadaṃ. ‘‘Dubbhāsitanti etaṃ vuccatī’’ti saṃvaṇṇanāpadaṃ. Etanti etaṃ padaṃ, etaṃ vacananti attho.
ဧတ္ထာတိ သေခိယဂာထာယ။ ဣဒန္တိ အာပတ္တီနံ နိဗ္ဗစနဒီပကံ ဝစနံ, ဝုတ္တန္တိ သမ္ဗန္ဓော။ ကသ္သ ဒီပနတ္ထံ ဝုတ္တန္တိ အာဟ ‘‘သင္ဂဟိတသ္သ အတ္ထသ္သ ဒီပနတ္ထ’’န္တိ။
Etthāti sekhiyagāthāya. Idanti āpattīnaṃ nibbacanadīpakaṃ vacanaṃ, vuttanti sambandho. Kassa dīpanatthaṃ vuttanti āha ‘‘saṅgahitassa atthassa dīpanattha’’nti.
တတ္ထာတိ ‘‘ဆန္နမတိဝသ္သတီ’’တိအာဒိဝစနေ။ ဂေဟန္တိ ပကတိဂေဟံ။ ဣဒံ ပန ဂေဟန္တိ ယောဇနာ။ ဝိတ္ထာရေန္တော အာဟ ‘‘မူလာပတ္တိဉ္ဟီ’’တိအာဒိ။ ‘‘အဝိဝဋ’’န္တိ ဝတ္ဝာ တသ္သတ္ထံ ဒသ္သေတုံ ဝုတ္တံ ‘‘သုစ္ဆန္န’’န္တိ။ ဝိဝဋန္တိ အစ္ဆန္နံ။ နာတိဝသ္သနဘာဝံ ဝိတ္ထာရေန္တော အာဟ ‘‘မူလာပတ္တိဉ္ဟီ’’တိအာဒိ။ ဝိဝရန္တော ဘိက္ခု နာပဇ္ဇတီတိ သမ္ဗန္ဓော။ သုဒ္ဓန္တေတိ သုဒ္ဓကောဋ္ဌာသေ။ ‘‘တသ္မာ’’တိ စ ‘‘တေနာ’’တိ စ ယေဘုယ္ယေန အတ္ထတော ဧကံ, တသ္မာ ဝုတ္တံ ‘‘တေန ကာရဏေနာ’’တိ။ ဧဝဉ္စေတံ ဝိဝဋန္တိ ဧဝံ ဧတံ ဆန္နံ စေ ဝိဝဋန္တိ ယောဇနာ။
Tatthāti ‘‘channamativassatī’’tiādivacane. Gehanti pakatigehaṃ. Idaṃ pana gehanti yojanā. Vitthārento āha ‘‘mūlāpattiñhī’’tiādi. ‘‘Avivaṭa’’nti vatvā tassatthaṃ dassetuṃ vuttaṃ ‘‘succhanna’’nti. Vivaṭanti acchannaṃ. Nātivassanabhāvaṃ vitthārento āha ‘‘mūlāpattiñhī’’tiādi. Vivaranto bhikkhu nāpajjatīti sambandho. Suddhanteti suddhakoṭṭhāse. ‘‘Tasmā’’ti ca ‘‘tenā’’ti ca yebhuyyena atthato ekaṃ, tasmā vuttaṃ ‘‘tena kāraṇenā’’ti. Evañcetaṃ vivaṭanti evaṃ etaṃ channaṃ ce vivaṭanti yojanā.
ပရိပာတိယမာနာနန္တိ အဘိဘူယမာနာနံ။ ‘‘ရုက္ခာဒိဂဟနံ အရည’’န္တိ ဣမိနာ ပဝနန္တိ ပဒသ္သ အရညပရိယာယတံ ဒသ္သေတိ။ ဂတိသဒ္ဒသ္သ ဘဝဘေဒာဒိအတ္ထံ ပဋိက္ခိပိတ္ဝာ ပဋိသ္သရဏတ္ထေ ဟောတီတိ ဒသ္သေန္တော အာဟ ‘‘ပဋိသ္သရဏံ ဟောတီ’’တိ။ တန္တိ ပဝနံ။ တေတိ မိဂာ။ ‘‘အသ္သသန္တီ’’တိ ပဒေန ‘‘ပသ္သသန္တီ’’တိ အတ္ထောပိ ဂဟေတဗ္ဗော အဝိနာဘာဝတော, အာနာပာနံ ကရောန္တီတိ အတ္ထော။ အာကာသောတိ အဇဋာကာသော။ ပက္ခီနန္တိ ဝိဟင္ဂမာနံ။ ‘‘သဗ္ဗေသံ သင္ခတဓမ္မာန’’န္တိ ဣမိနာ ဓမ္မာနန္တိ ဧတ္ထ သင္ခတဓမ္မောယေဝ ဂဟေတဗ္ဗောတိ ဒသ္သေတိ။ ‘‘ဝိနာသောဝာ’’တိ ဣမိနာ ဝိဘဝသဒ္ဒော ဝိနာသဝာစကောတိ ဒသ္သေတိ။ တေသန္တိ သဗ္ဗေသမ္ပိ သင္ခတဓမ္မာနံ။ ဂတီတိ ပတိဋ္ဌာ။ ကသ္မာ ဝိဘဝော ဓမ္မာနံ ဂတိ ဟောတီတိ အာဟ ‘‘န ဟီ’’တိအာဒိ။ ဟီတိ ယသ္မာ။ တေတိ သဗ္ဗေပိ သင္ခတဓမ္မာ။ ဝိနာသန္တိ ဝိဘဝံ။ သုစိရမ္ပီတိ အသီတိဝသ္သာဒိကာလမ္ပိ။ နိဗ္ဗာနံ အရဟတော ဂတီတိ သံဝဏ္ဏေတဗ္ဗပဒံ။ ‘‘ခီဏာသဝသ္သာ’’တိ ဣမိနာ အရဟတောတိ ပဒသ္သ အတ္ထံ ဒသ္သေတိ။ ‘‘အနုပာဒိသေသနိဗ္ဗာနဓာတူ’’တိ ဣမိနာ ‘‘နိဗ္ဗာန’’န္တိ ပဒသ္သ ဣဓ အဓိပ္ပေတနိဗ္ဗာနံ ဒသ္သေတိ။ ဂာထာယ တေ တေ အတ္ထာ သံဂဟေတ္ဝာ ဂဏိယန္တိ ဧတ္ထာတိ ဂာထာသင္ဂဏိကံ။
Paripātiyamānānanti abhibhūyamānānaṃ. ‘‘Rukkhādigahanaṃ arañña’’nti iminā pavananti padassa araññapariyāyataṃ dasseti. Gatisaddassa bhavabhedādiatthaṃ paṭikkhipitvā paṭissaraṇatthe hotīti dassento āha ‘‘paṭissaraṇaṃ hotī’’ti. Tanti pavanaṃ. Teti migā. ‘‘Assasantī’’ti padena ‘‘passasantī’’ti atthopi gahetabbo avinābhāvato, ānāpānaṃ karontīti attho. Ākāsoti ajaṭākāso. Pakkhīnanti vihaṅgamānaṃ. ‘‘Sabbesaṃ saṅkhatadhammāna’’nti iminā dhammānanti ettha saṅkhatadhammoyeva gahetabboti dasseti. ‘‘Vināsovā’’ti iminā vibhavasaddo vināsavācakoti dasseti. Tesanti sabbesampi saṅkhatadhammānaṃ. Gatīti patiṭṭhā. Kasmā vibhavo dhammānaṃ gati hotīti āha ‘‘na hī’’tiādi. Hīti yasmā. Teti sabbepi saṅkhatadhammā. Vināsanti vibhavaṃ. Sucirampīti asītivassādikālampi. Nibbānaṃ arahato gatīti saṃvaṇṇetabbapadaṃ. ‘‘Khīṇāsavassā’’ti iminā arahatoti padassa atthaṃ dasseti. ‘‘Anupādisesanibbānadhātū’’ti iminā ‘‘nibbāna’’nti padassa idha adhippetanibbānaṃ dasseti. Gāthāya te te atthā saṃgahetvā gaṇiyanti etthāti gāthāsaṅgaṇikaṃ.
ဣတိ ပဌမဂာထာသင္ဂဏိကဝဏ္ဏနာယ ယောဇနာ သမတ္တာ။
Iti paṭhamagāthāsaṅgaṇikavaṇṇanāya yojanā samattā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၅. ပာရာဇိကာဒိအာပတ္တိ • 5. Pārājikādiāpatti
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ပာရာဇိကာဒိအာပတ္တိဝဏ္ဏနာ • Pārājikādiāpattivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အသာဓာရဏာဒိဝဏ္ဏနာ • Asādhāraṇādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပာရာဇိကာဒိအာပတ္တိဝဏ္ဏနာ • Pārājikādiāpattivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပာရာဇိကာဒိအာပတ္တိဝဏ္ဏနာ • Pārājikādiāpattivaṇṇanā
