| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
(২) পারাজিকাদিপঞ্হাৰণ্ণনা
(2) Pārājikādipañhāvaṇṇanā
৪৮০. ছিদ্দং তস্মিং ঘরে নত্থীতি অযং পঞ্হা দুস্সকুটিআদীনি সন্থতপেয্যালঞ্চ সন্ধায ৰুত্তা।
480.Chiddaṃ tasmiṃ ghare natthīti ayaṃ pañhā dussakuṭiādīni santhatapeyyālañca sandhāya vuttā.
তেলং মধুং ফাণিতন্তি গাথা লিঙ্গপরিৰত্তং সন্ধায ৰুত্তা।
Telaṃ madhuṃ phāṇitanti gāthā liṅgaparivattaṃ sandhāya vuttā.
নিস্সগ্গিযেনাতি গাথা পরিণামনং সন্ধায ৰুত্তা। যো হি সঙ্ঘস্স পরিণতলাভতো একং চীৰরং অত্তনো, একং অঞ্ঞস্সাতি দ্ৰে চীৰরানি ‘‘একং ময্হং, একং তস্স দেহী’’তি একপযওগেন পরিণামেতি, সো নিস্সগ্গিযপাচিত্তিযঞ্চেৰ সুদ্ধিকপাচিত্তিযঞ্চ একতো আপজ্জতি।
Nissaggiyenāti gāthā pariṇāmanaṃ sandhāya vuttā. Yo hi saṅghassa pariṇatalābhato ekaṃ cīvaraṃ attano, ekaṃ aññassāti dve cīvarāni ‘‘ekaṃ mayhaṃ, ekaṃ tassa dehī’’ti ekapayaogena pariṇāmeti, so nissaggiyapācittiyañceva suddhikapācittiyañca ekato āpajjati.
কম্মঞ্চ তং কুপ্পেয্য ৰগ্গপচ্চযাতি অযং পঞ্হা দ্ৰাদসযোজনপমাণেসু বারাণসিআদীসু নগরেসু গামসীমং সন্ধায ৰুত্তা।
Kammañca taṃ kuppeyya vaggapaccayāti ayaṃ pañhā dvādasayojanapamāṇesu bārāṇasiādīsu nagaresu gāmasīmaṃ sandhāya vuttā.
পদৰীতিহারমত্তেনাতি গাথা সঞ্চরিত্তং সন্ধায ৰুত্তা, অত্থোপি চস্সা সঞ্চরিত্তৰণ্ণনাযমেৰ ৰুত্তো।
Padavītihāramattenāti gāthā sañcarittaṃ sandhāya vuttā, atthopi cassā sañcarittavaṇṇanāyameva vutto.
সব্বানি তানি নিস্সগ্গিযানীতি অযং পঞ্হা অঞ্ঞাতিকায ভিক্খুনিযা ধোৰাপনং সন্ধায ৰুত্তা। সচে হি তিণ্ণম্পি চীৰরানং কাকঊহদনং ৰা কদ্দমমক্খিতং ৰা কণ্ণং গহেত্ৰা ভিক্খুনী উদকেন ধোৰতি, ভিক্খুস্স কাযগতানেৰ নিস্সগ্গিযানি হোন্তি।
Sabbāni tāni nissaggiyānīti ayaṃ pañhā aññātikāya bhikkhuniyā dhovāpanaṃ sandhāya vuttā. Sace hi tiṇṇampi cīvarānaṃ kākaūhadanaṃ vā kaddamamakkhitaṃ vā kaṇṇaṃ gahetvā bhikkhunī udakena dhovati, bhikkhussa kāyagatāneva nissaggiyāni honti.
সরণগমনম্পি ন তস্স অত্থীতি সরণগমনউপসম্পদাপি নত্থি। অযং পন পঞ্হা মহাপজাপতিযা উপসম্পদং সন্ধায ৰুত্তা।
Saraṇagamanampi na tassa atthīti saraṇagamanaupasampadāpi natthi. Ayaṃ pana pañhā mahāpajāpatiyā upasampadaṃ sandhāya vuttā.
হনেয্য অনরিযং মন্দোতি তঞ্হি ইত্থিং ৰা পুরিসং ৰা অনরিযং হনেয্য। অযং পঞ্হা লিঙ্গপরিৰত্তেন ইত্থিভূতং পিতরং পুরিসভূতঞ্চ মাতরং সন্ধায ৰুত্তা।
Haneyyaanariyaṃ mandoti tañhi itthiṃ vā purisaṃ vā anariyaṃ haneyya. Ayaṃ pañhā liṅgaparivattena itthibhūtaṃ pitaraṃ purisabhūtañca mātaraṃ sandhāya vuttā.
ন তেনানন্তরং ফুসেতি অযং পঞ্হা মিগসিঙ্গতাপসসীহকুমারাদীনং ৰিয তিরচ্ছানমাতাপিতরো সন্ধায ৰুত্তা।
Na tenānantaraṃ phuseti ayaṃ pañhā migasiṅgatāpasasīhakumārādīnaṃ viya tiracchānamātāpitaro sandhāya vuttā.
অচোদযিত্ৰাতি গাথা দূতেনুপসম্পদং সন্ধায ৰুত্তা। চোদযিত্ৰাতি গাথা পণ্ডকাদীনং উপসম্পদং সন্ধায ৰুত্তা। কুরুন্দিযং পন ‘‘পঠমগাথা অট্ঠ অসম্মুখাকম্মানি, দুতিযা অনাপত্তিকস্স কম্মং সন্ধায ৰুত্তা’’তি আগতং।
Acodayitvāti gāthā dūtenupasampadaṃ sandhāya vuttā. Codayitvāti gāthā paṇḍakādīnaṃ upasampadaṃ sandhāya vuttā. Kurundiyaṃ pana ‘‘paṭhamagāthā aṭṭha asammukhākammāni, dutiyā anāpattikassa kammaṃ sandhāya vuttā’’ti āgataṃ.
ছিন্দন্তস্স আপত্তীতি ৰনপ্পতিং ছিন্দন্তস্স পারাজিকং, তিণলতাদিং ছিন্দন্তস্স পাচিত্তিযং, অঙ্গজাতং ছিন্দন্তস্স থুল্লচ্চযং। ছিন্দন্তস্স অনাপত্তীতি কেসে চ নখে চ ছিন্দন্তস্স অনাপত্তি। ছাদেন্তস্স আপত্তীতি অত্তনো আপত্তিং ছাদেন্তস্স অঞ্ঞেসং ৰা আপত্তিং। ছাদেন্তস্স অনাপত্তীতি গেহাদীনি ছাদেন্তস্স অনাপত্তি।
Chindantassa āpattīti vanappatiṃ chindantassa pārājikaṃ, tiṇalatādiṃ chindantassa pācittiyaṃ, aṅgajātaṃ chindantassa thullaccayaṃ. Chindantassa anāpattīti kese ca nakhe ca chindantassa anāpatti. Chādentassa āpattīti attano āpattiṃ chādentassa aññesaṃ vā āpattiṃ. Chādentassa anāpattīti gehādīni chādentassa anāpatti.
সচ্চং ভণন্তোতি গাথায ‘‘সিখরণীসি উভতোব্যঞ্জনাসী’’তি সচ্চং ভণন্তো গরুকং আপজ্জতি, সম্পজানমুসাৰাদে পন মুসা ভাসতো লহুকাপত্তি হোতি, অভূতারোচনে মুসা ভণন্তো গরুকং আপজ্জতি, ভূতারোচনে সচ্চং ভাসতো লহুকাপত্তি হোতীতি।
Saccaṃbhaṇantoti gāthāya ‘‘sikharaṇīsi ubhatobyañjanāsī’’ti saccaṃ bhaṇanto garukaṃ āpajjati, sampajānamusāvāde pana musā bhāsato lahukāpatti hoti, abhūtārocane musā bhaṇanto garukaṃ āpajjati, bhūtārocane saccaṃ bhāsato lahukāpatti hotīti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ২. পারাজিকাদিপঞ্হা • 2. Pārājikādipañhā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পারাজিকাদিপঞ্হৰণ্ণনা • Pārājikādipañhavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পারাজিকাদিপঞ্হাৰণ্ণনা • Pārājikādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পারাজিকাদিপঞ্হাৰণ্ণনা • Pārājikādipañhāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / (২) পারাজিকাদিপঞ্হাৰণ্ণনা • (2) Pārājikādipañhāvaṇṇanā
