| Library / Tipiṭaka / តិបិដក • Tipiṭaka / បរិវារ-អដ្ឋកថា • Parivāra-aṭṭhakathā |
(២) បារាជិកាទិបញ្ហាវណ្ណនា
(2) Pārājikādipañhāvaṇṇanā
៤៨០. ឆិទ្ទំ តស្មិំ ឃរេ នត្ថីតិ អយំ បញ្ហា ទុស្សកុដិអាទីនិ សន្ថតបេយ្យាលញ្ច សន្ធាយ វុត្តា។
480.Chiddaṃ tasmiṃ ghare natthīti ayaṃ pañhā dussakuṭiādīni santhatapeyyālañca sandhāya vuttā.
តេលំ មធុំ ផាណិតន្តិ គាថា លិង្គបរិវត្តំ សន្ធាយ វុត្តា។
Telaṃ madhuṃ phāṇitanti gāthā liṅgaparivattaṃ sandhāya vuttā.
និស្សគ្គិយេនាតិ គាថា បរិណាមនំ សន្ធាយ វុត្តា។ យោ ហិ សង្ឃស្ស បរិណតលាភតោ ឯកំ ចីវរំ អត្តនោ, ឯកំ អញ្ញស្សាតិ ទ្វេ ចីវរានិ ‘‘ឯកំ មយ្ហំ, ឯកំ តស្ស ទេហី’’តិ ឯកបយឱគេន បរិណាមេតិ, សោ និស្សគ្គិយបាចិត្តិយញ្ចេវ សុទ្ធិកបាចិត្តិយញ្ច ឯកតោ អាបជ្ជតិ។
Nissaggiyenāti gāthā pariṇāmanaṃ sandhāya vuttā. Yo hi saṅghassa pariṇatalābhato ekaṃ cīvaraṃ attano, ekaṃ aññassāti dve cīvarāni ‘‘ekaṃ mayhaṃ, ekaṃ tassa dehī’’ti ekapayaogena pariṇāmeti, so nissaggiyapācittiyañceva suddhikapācittiyañca ekato āpajjati.
កម្មញ្ច តំ កុប្បេយ្យ វគ្គបច្ចយាតិ អយំ បញ្ហា ទ្វាទសយោជនបមាណេសុ ពារាណសិអាទីសុ នគរេសុ គាមសីមំ សន្ធាយ វុត្តា។
Kammañca taṃ kuppeyya vaggapaccayāti ayaṃ pañhā dvādasayojanapamāṇesu bārāṇasiādīsu nagaresu gāmasīmaṃ sandhāya vuttā.
បទវីតិហារមត្តេនាតិ គាថា សញ្ចរិត្តំ សន្ធាយ វុត្តា, អត្ថោបិ ចស្សា សញ្ចរិត្តវណ្ណនាយមេវ វុត្តោ។
Padavītihāramattenāti gāthā sañcarittaṃ sandhāya vuttā, atthopi cassā sañcarittavaṇṇanāyameva vutto.
សព្ពានិ តានិ និស្សគ្គិយានីតិ អយំ បញ្ហា អញ្ញាតិកាយ ភិក្ខុនិយា ធោវាបនំ សន្ធាយ វុត្តា។ សចេ ហិ តិណ្ណម្បិ ចីវរានំ កាកឩហទនំ វា កទ្ទមមក្ខិតំ វា កណ្ណំ គហេត្វា ភិក្ខុនី ឧទកេន ធោវតិ, ភិក្ខុស្ស កាយគតានេវ និស្សគ្គិយានិ ហោន្តិ។
Sabbāni tāni nissaggiyānīti ayaṃ pañhā aññātikāya bhikkhuniyā dhovāpanaṃ sandhāya vuttā. Sace hi tiṇṇampi cīvarānaṃ kākaūhadanaṃ vā kaddamamakkhitaṃ vā kaṇṇaṃ gahetvā bhikkhunī udakena dhovati, bhikkhussa kāyagatāneva nissaggiyāni honti.
សរណគមនម្បិ ន តស្ស អត្ថីតិ សរណគមនឧបសម្បទាបិ នត្ថិ។ អយំ បន បញ្ហា មហាបជាបតិយា ឧបសម្បទំ សន្ធាយ វុត្តា។
Saraṇagamanampi na tassa atthīti saraṇagamanaupasampadāpi natthi. Ayaṃ pana pañhā mahāpajāpatiyā upasampadaṃ sandhāya vuttā.
ហនេយ្យ អនរិយំ មន្ទោតិ តញ្ហិ ឥត្ថិំ វា បុរិសំ វា អនរិយំ ហនេយ្យ។ អយំ បញ្ហា លិង្គបរិវត្តេន ឥត្ថិភូតំ បិតរំ បុរិសភូតញ្ច មាតរំ សន្ធាយ វុត្តា។
Haneyyaanariyaṃ mandoti tañhi itthiṃ vā purisaṃ vā anariyaṃ haneyya. Ayaṃ pañhā liṅgaparivattena itthibhūtaṃ pitaraṃ purisabhūtañca mātaraṃ sandhāya vuttā.
ន តេនានន្តរំ ផុសេតិ អយំ បញ្ហា មិគសិង្គតាបសសីហកុមារាទីនំ វិយ តិរច្ឆានមាតាបិតរោ សន្ធាយ វុត្តា។
Na tenānantaraṃ phuseti ayaṃ pañhā migasiṅgatāpasasīhakumārādīnaṃ viya tiracchānamātāpitaro sandhāya vuttā.
អចោទយិត្វាតិ គាថា ទូតេនុបសម្បទំ សន្ធាយ វុត្តា។ ចោទយិត្វាតិ គាថា បណ្ឌកាទីនំ ឧបសម្បទំ សន្ធាយ វុត្តា។ កុរុន្ទិយំ បន ‘‘បឋមគាថា អដ្ឋ អសម្មុខាកម្មានិ, ទុតិយា អនាបត្តិកស្ស កម្មំ សន្ធាយ វុត្តា’’តិ អាគតំ។
Acodayitvāti gāthā dūtenupasampadaṃ sandhāya vuttā. Codayitvāti gāthā paṇḍakādīnaṃ upasampadaṃ sandhāya vuttā. Kurundiyaṃ pana ‘‘paṭhamagāthā aṭṭha asammukhākammāni, dutiyā anāpattikassa kammaṃ sandhāya vuttā’’ti āgataṃ.
ឆិន្ទន្តស្ស អាបត្តីតិ វនប្បតិំ ឆិន្ទន្តស្ស បារាជិកំ, តិណលតាទិំ ឆិន្ទន្តស្ស បាចិត្តិយំ, អង្គជាតំ ឆិន្ទន្តស្ស ថុល្លច្ចយំ។ ឆិន្ទន្តស្ស អនាបត្តីតិ កេសេ ច នខេ ច ឆិន្ទន្តស្ស អនាបត្តិ។ ឆាទេន្តស្ស អាបត្តីតិ អត្តនោ អាបត្តិំ ឆាទេន្តស្ស អញ្ញេសំ វា អាបត្តិំ។ ឆាទេន្តស្ស អនាបត្តីតិ គេហាទីនិ ឆាទេន្តស្ស អនាបត្តិ។
Chindantassa āpattīti vanappatiṃ chindantassa pārājikaṃ, tiṇalatādiṃ chindantassa pācittiyaṃ, aṅgajātaṃ chindantassa thullaccayaṃ. Chindantassa anāpattīti kese ca nakhe ca chindantassa anāpatti. Chādentassa āpattīti attano āpattiṃ chādentassa aññesaṃ vā āpattiṃ. Chādentassa anāpattīti gehādīni chādentassa anāpatti.
សច្ចំ ភណន្តោតិ គាថាយ ‘‘សិខរណីសិ ឧភតោព្យញ្ជនាសី’’តិ សច្ចំ ភណន្តោ គរុកំ អាបជ្ជតិ, សម្បជានមុសាវាទេ បន មុសា ភាសតោ លហុកាបត្តិ ហោតិ, អភូតារោចនេ មុសា ភណន្តោ គរុកំ អាបជ្ជតិ, ភូតារោចនេ សច្ចំ ភាសតោ លហុកាបត្តិ ហោតីតិ។
Saccaṃbhaṇantoti gāthāya ‘‘sikharaṇīsi ubhatobyañjanāsī’’ti saccaṃ bhaṇanto garukaṃ āpajjati, sampajānamusāvāde pana musā bhāsato lahukāpatti hoti, abhūtārocane musā bhaṇanto garukaṃ āpajjati, bhūtārocane saccaṃ bhāsato lahukāpatti hotīti.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ២. បារាជិកាទិបញ្ហា • 2. Pārājikādipañhā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បារាជិកាទិបញ្ហវណ្ណនា • Pārājikādipañhavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បារាជិកាទិបញ្ហាវណ្ណនា • Pārājikādipañhāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / បារាជិកាទិបញ្ហាវណ្ណនា • Pārājikādipañhāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / (២) បារាជិកាទិបញ្ហាវណ្ណនា • (2) Pārājikādipañhāvaṇṇanā
