| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
(2) පාරාජිකාදිපඤ්‌හාවණ්‌ණනා
(2) Pārājikādipañhāvaṇṇanā
480. ඡිද්‌දං තස්‌මිං ඝරෙ නත්‌ථීති අයං පඤ්‌හා දුස්‌සකුටිආදීනි සන්‌ථතපෙය්‍යාලඤ්‌ච සන්‌ධාය වුත්‌තා.
480.Chiddaṃ tasmiṃ ghare natthīti ayaṃ pañhā dussakuṭiādīni santhatapeyyālañca sandhāya vuttā.
තෙලං මධුං ඵාණිතන්‌ති ගාථා ලිඞ්‌ගපරිවත්‌තං සන්‌ධාය වුත්‌තා.
Telaṃ madhuṃ phāṇitanti gāthā liṅgaparivattaṃ sandhāya vuttā.
නිස්‌සග්‌ගියෙනාති ගාථා පරිණාමනං සන්‌ධාය වුත්‌තා. යො හි සඞ්‌ඝස්‌ස පරිණතලාභතො එකං චීවරං අත්‌තනො, එකං අඤ්‌ඤස්‌සාති ද්‌වෙ චීවරානි ‘‘එකං මය්‌හං, එකං තස්‌ස දෙහී’’ති එකපයඔගෙන පරිණාමෙති, සො නිස්‌සග්‌ගියපාචිත්‌තියඤ්‌චෙව සුද්‌ධිකපාචිත්‌තියඤ්‌ච එකතො ආපජ්‌ජති.
Nissaggiyenāti gāthā pariṇāmanaṃ sandhāya vuttā. Yo hi saṅghassa pariṇatalābhato ekaṃ cīvaraṃ attano, ekaṃ aññassāti dve cīvarāni ‘‘ekaṃ mayhaṃ, ekaṃ tassa dehī’’ti ekapayaogena pariṇāmeti, so nissaggiyapācittiyañceva suddhikapācittiyañca ekato āpajjati.
කම්‌මඤ්‌ච තං කුප්‌පෙය්‍ය වග්‌ගපච්‌චයාති අයං පඤ්‌හා ද්‌වාදසයොජනපමාණෙසු බාරාණසිආදීසු නගරෙසු ගාමසීමං සන්‌ධාය වුත්‌තා.
Kammañca taṃ kuppeyya vaggapaccayāti ayaṃ pañhā dvādasayojanapamāṇesu bārāṇasiādīsu nagaresu gāmasīmaṃ sandhāya vuttā.
පදවීතිහාරමත්‌තෙනාති ගාථා සඤ්‌චරිත්‌තං සන්‌ධාය වුත්‌තා, අත්‌ථොපි චස්‌සා සඤ්‌චරිත්‌තවණ්‌ණනායමෙව වුත්‌තො.
Padavītihāramattenāti gāthā sañcarittaṃ sandhāya vuttā, atthopi cassā sañcarittavaṇṇanāyameva vutto.
සබ්‌බානි තානි නිස්‌සග්‌ගියානීති අයං පඤ්‌හා අඤ්‌ඤාතිකාය භික්‌ඛුනියා ධොවාපනං සන්‌ධාය වුත්‌තා. සචෙ හි තිණ්‌ණම්‌පි චීවරානං කාකඌහදනං වා කද්‌දමමක්‌ඛිතං වා කණ්‌ණං ගහෙත්‌වා භික්‌ඛුනී උදකෙන ධොවති, භික්‌ඛුස්‌ස කායගතානෙව නිස්‌සග්‌ගියානි හොන්‌ති.
Sabbāni tāni nissaggiyānīti ayaṃ pañhā aññātikāya bhikkhuniyā dhovāpanaṃ sandhāya vuttā. Sace hi tiṇṇampi cīvarānaṃ kākaūhadanaṃ vā kaddamamakkhitaṃ vā kaṇṇaṃ gahetvā bhikkhunī udakena dhovati, bhikkhussa kāyagatāneva nissaggiyāni honti.
සරණගමනම්‌පි න තස්‌ස අත්‌ථීති සරණගමනඋපසම්‌පදාපි නත්‌ථි. අයං පන පඤ්‌හා මහාපජාපතියා උපසම්‌පදං සන්‌ධාය වුත්‌තා.
Saraṇagamanampi na tassa atthīti saraṇagamanaupasampadāpi natthi. Ayaṃ pana pañhā mahāpajāpatiyā upasampadaṃ sandhāya vuttā.
හනෙය්‍ය අනරියං මන්‌දොති තඤ්‌හි ඉත්‌ථිං වා පුරිසං වා අනරියං හනෙය්‍ය. අයං පඤ්‌හා ලිඞ්‌ගපරිවත්‌තෙන ඉත්‌ථිභූතං පිතරං පුරිසභූතඤ්‌ච මාතරං සන්‌ධාය වුත්‌තා.
Haneyyaanariyaṃ mandoti tañhi itthiṃ vā purisaṃ vā anariyaṃ haneyya. Ayaṃ pañhā liṅgaparivattena itthibhūtaṃ pitaraṃ purisabhūtañca mātaraṃ sandhāya vuttā.
න තෙනානන්‌තරං ඵුසෙති අයං පඤ්‌හා මිගසිඞ්‌ගතාපසසීහකුමාරාදීනං විය තිරච්‌ඡානමාතාපිතරො සන්‌ධාය වුත්‌තා.
Na tenānantaraṃ phuseti ayaṃ pañhā migasiṅgatāpasasīhakumārādīnaṃ viya tiracchānamātāpitaro sandhāya vuttā.
අචොදයිත්‌වාති ගාථා දූතෙනුපසම්‌පදං සන්‌ධාය වුත්‌තා. චොදයිත්‌වාති ගාථා පණ්‌ඩකාදීනං උපසම්‌පදං සන්‌ධාය වුත්‌තා. කුරුන්‌දියං පන ‘‘පඨමගාථා අට්‌ඨ අසම්‌මුඛාකම්‌මානි, දුතියා අනාපත්‌තිකස්‌ස කම්‌මං සන්‌ධාය වුත්‌තා’’ති ආගතං.
Acodayitvāti gāthā dūtenupasampadaṃ sandhāya vuttā. Codayitvāti gāthā paṇḍakādīnaṃ upasampadaṃ sandhāya vuttā. Kurundiyaṃ pana ‘‘paṭhamagāthā aṭṭha asammukhākammāni, dutiyā anāpattikassa kammaṃ sandhāya vuttā’’ti āgataṃ.
ඡින්‌දන්‌තස්‌ස ආපත්‌තීති වනප්‌පතිං ඡින්‌දන්‌තස්‌ස පාරාජිකං, තිණලතාදිං ඡින්‌දන්‌තස්‌ස පාචිත්‌තියං, අඞ්‌ගජාතං ඡින්‌දන්‌තස්‌ස ථුල්‌ලච්‌චයං. ඡින්‌දන්‌තස්‌ස අනාපත්‌තීති කෙසෙ ච නඛෙ ච ඡින්‌දන්‌තස්‌ස අනාපත්‌ති. ඡාදෙන්‌තස්‌ස ආපත්‌තීති අත්‌තනො ආපත්‌තිං ඡාදෙන්‌තස්‌ස අඤ්‌ඤෙසං වා ආපත්‌තිං. ඡාදෙන්‌තස්‌ස අනාපත්‌තීති ගෙහාදීනි ඡාදෙන්‌තස්‌ස අනාපත්‌ති.
Chindantassa āpattīti vanappatiṃ chindantassa pārājikaṃ, tiṇalatādiṃ chindantassa pācittiyaṃ, aṅgajātaṃ chindantassa thullaccayaṃ. Chindantassa anāpattīti kese ca nakhe ca chindantassa anāpatti. Chādentassa āpattīti attano āpattiṃ chādentassa aññesaṃ vā āpattiṃ. Chādentassa anāpattīti gehādīni chādentassa anāpatti.
සච්‌චං භණන්‌තොති ගාථාය ‘‘සිඛරණීසි උභතොබ්‍යඤ්‌ජනාසී’’ති සච්‌චං භණන්‌තො ගරුකං ආපජ්‌ජති, සම්‌පජානමුසාවාදෙ පන මුසා භාසතො ලහුකාපත්‌ති හොති, අභූතාරොචනෙ මුසා භණන්‌තො ගරුකං ආපජ්‌ජති, භූතාරොචනෙ සච්‌චං භාසතො ලහුකාපත්‌ති හොතීති.
Saccaṃbhaṇantoti gāthāya ‘‘sikharaṇīsi ubhatobyañjanāsī’’ti saccaṃ bhaṇanto garukaṃ āpajjati, sampajānamusāvāde pana musā bhāsato lahukāpatti hoti, abhūtārocane musā bhaṇanto garukaṃ āpajjati, bhūtārocane saccaṃ bhāsato lahukāpatti hotīti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 2. පාරාජිකාදිපඤ්‌හා • 2. Pārājikādipañhā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පාරාජිකාදිපඤ්‌හවණ්‌ණනා • Pārājikādipañhavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පාරාජිකාදිපඤ්‌හාවණ්‌ණනා • Pārājikādipañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පාරාජිකාදිපඤ්‌හාවණ්‌ණනා • Pārājikādipañhāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / (2) පාරාජිකාදිපඤ්‌හාවණ්‌ණනා • (2) Pārājikādipañhāvaṇṇanā
