| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
1. கத்த²பஞ்ஞத்திவாரோ
1. Katthapaññattivāro
1. பாராஜிககண்ட³ங்
1. Pārājikakaṇḍaṃ
188. யங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன மேது²னங் த⁴ம்மங் படிஸேவனபச்சயா பாராஜிகங் கத்த² பஞ்ஞத்தங், கங் ஆரப்³ப⁴, கிஸ்மிங் வத்து²ஸ்மிங்…பே॰… கேனாப⁴தந்தி?
188. Yaṃ tena bhagavatā jānatā passatā arahatā sammāsambuddhena methunaṃ dhammaṃ paṭisevanapaccayā pārājikaṃ kattha paññattaṃ, kaṃ ārabbha, kismiṃ vatthusmiṃ…pe… kenābhatanti?
யங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன மேது²னங் த⁴ம்மங் படிஸேவனபச்சயா பாராஜிகங் கத்த² பஞ்ஞத்தந்தி? வேஸாலியங் பஞ்ஞத்தங். கங் ஆரப்³பா⁴தி? ஸுதி³ன்னங் கலந்த³புத்தங் ஆரப்³ப⁴. கிஸ்மிங் வத்து²ஸ்மிந்தி? ஸுதி³ன்னோ கலந்த³புத்தோ புராணது³தியிகாய மேது²னங் த⁴ம்மங் படிஸேவி, தஸ்மிங் வத்து²ஸ்மிங். அத்தி² தத்த² பஞ்ஞத்தி, அனுபஞ்ஞத்தி, அனுப்பன்னபஞ்ஞத்தீதி? ஏகா பஞ்ஞத்தி, த்³வே அனுபஞ்ஞத்தியோ. அனுப்பன்னபஞ்ஞத்தி தஸ்மிங் நத்தி². ஸப்³ப³த்த² பஞ்ஞத்தி, பதே³ஸபஞ்ஞத்தீதி? ஸப்³ப³த்த²பஞ்ஞத்தி. ஸாதா⁴ரணபஞ்ஞத்தி, அஸாதா⁴ரணபஞ்ஞத்தீதி? ஸாதா⁴ரணபஞ்ஞத்தி. ஏகதோபஞ்ஞத்தி, உப⁴தோபஞ்ஞத்தீதி? உப⁴தோபஞ்ஞத்தி. பஞ்சன்னங் பாதிமொக்கு²த்³தே³ஸானங் கத்தோ²க³த⁴ங் கத்த² பரியாபன்னந்தி? நிதா³னோக³த⁴ங் நிதா³னபரியாபன்னங். கதமேன உத்³தே³ஸேன உத்³தே³ஸங் ஆக³ச்ச²தீதி? து³தியேன உத்³தே³ஸேன உத்³தே³ஸங் ஆக³ச்ச²தி. சதுன்னங் விபத்தீனங் கதமா விபத்தீதி? ஸீலவிபத்தி. ஸத்தன்னங் ஆபத்திக்க²ந்தா⁴னங் கதமோ ஆபத்திக்க²ந்தோ⁴தி? பாராஜிகாபத்திக்க²ந்தோ⁴. ச²ன்னங் ஆபத்திஸமுட்டா²னானங் கதிஹி ஸமுட்டா²னேஹி ஸமுட்டா²தீதி? ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ…பே॰… கேனாப⁴தந்தி? பரம்பராப⁴தங் –
Yaṃ tena bhagavatā jānatā passatā arahatā sammāsambuddhena methunaṃ dhammaṃ paṭisevanapaccayā pārājikaṃ kattha paññattanti? Vesāliyaṃ paññattaṃ. Kaṃ ārabbhāti? Sudinnaṃ kalandaputtaṃ ārabbha. Kismiṃ vatthusminti? Sudinno kalandaputto purāṇadutiyikāya methunaṃ dhammaṃ paṭisevi, tasmiṃ vatthusmiṃ. Atthi tattha paññatti, anupaññatti, anuppannapaññattīti? Ekā paññatti, dve anupaññattiyo. Anuppannapaññatti tasmiṃ natthi. Sabbattha paññatti, padesapaññattīti? Sabbatthapaññatti. Sādhāraṇapaññatti, asādhāraṇapaññattīti? Sādhāraṇapaññatti. Ekatopaññatti, ubhatopaññattīti? Ubhatopaññatti. Pañcannaṃ pātimokkhuddesānaṃ katthogadhaṃ kattha pariyāpannanti? Nidānogadhaṃ nidānapariyāpannaṃ. Katamena uddesena uddesaṃ āgacchatīti? Dutiyena uddesena uddesaṃ āgacchati. Catunnaṃ vipattīnaṃ katamā vipattīti? Sīlavipatti. Sattannaṃ āpattikkhandhānaṃ katamo āpattikkhandhoti? Pārājikāpattikkhandho. Channaṃ āpattisamuṭṭhānānaṃ katihi samuṭṭhānehi samuṭṭhātīti? Ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe… kenābhatanti? Paramparābhataṃ –
உபாலி தா³ஸகோ சேவ, ஸோணகோ ஸிக்³க³வோ ததா²;
Upāli dāsako ceva, soṇako siggavo tathā;
மொக்³க³லிபுத்தேன பஞ்சமா, ஏதே ஜம்பு³ஸிரிவ்ஹயே. …பே॰…;
Moggaliputtena pañcamā, ete jambusirivhaye. …pe…;
ஏதே நாகா³ மஹாபஞ்ஞா, வினயஞ்ஞூ மக்³க³கோவிதா³;
Ete nāgā mahāpaññā, vinayaññū maggakovidā;
வினயங் தீ³பே பகாஸேஸுங், பிடகங் தம்ப³பண்ணியாதி.
Vinayaṃ dīpe pakāsesuṃ, piṭakaṃ tambapaṇṇiyāti.
189. யங் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன அதி³ன்னங் ஆதி³யனபச்சயா பாராஜிகங் கத்த² பஞ்ஞத்தந்தி? ராஜக³ஹே பஞ்ஞத்தங். கங் ஆரப்³பா⁴தி? த⁴னியங் கும்ப⁴காரபுத்தங் ஆரப்³ப⁴. கிஸ்மிங் வத்து²ஸ்மிந்தி? த⁴னியோ கும்ப⁴காரபுத்தோ ரஞ்ஞோ தா³ரூனி அதி³ன்னங் ஆதி³யி, தஸ்மிங் வத்து²ஸ்மிங். ஏகா பஞ்ஞத்தி, ஏகா அனுபஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி – ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே॰….
189. Yaṃ tena bhagavatā jānatā passatā arahatā sammāsambuddhena adinnaṃ ādiyanapaccayā pārājikaṃ kattha paññattanti? Rājagahe paññattaṃ. Kaṃ ārabbhāti? Dhaniyaṃ kumbhakāraputtaṃ ārabbha. Kismiṃ vatthusminti? Dhaniyo kumbhakāraputto rañño dārūni adinnaṃ ādiyi, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
190. ஸஞ்சிச்ச மனுஸ்ஸவிக்³க³ஹங் ஜீவிதா வோரோபனபச்சயா பாராஜிகங் கத்த² பஞ்ஞத்தந்தி? வேஸாலியங் பஞ்ஞத்தங். கங் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ஸம்ப³ஹுலா பி⁴க்கூ² அஞ்ஞமஞ்ஞங் ஜீவிதா வோரோபேஸுங், தஸ்மிங் வத்து²ஸ்மிங். ஏகா பஞ்ஞத்தி, ஏகா அனுபஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி – ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே॰….
190. Sañcicca manussaviggahaṃ jīvitā voropanapaccayā pārājikaṃ kattha paññattanti? Vesāliyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū aññamaññaṃ jīvitā voropesuṃ, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
191. அஸந்தங் அபூ⁴தங் உத்தரிமனுஸ்ஸத⁴ம்மங் உல்லபனபச்சயா பாராஜிகங் கத்த² பஞ்ஞத்தந்தி? வேஸாலியங் பஞ்ஞத்தங். கங் ஆரப்³பா⁴தி? வக்³கு³முதா³தீரியே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? வக்³கு³முதா³தீரியா பி⁴க்கூ² கி³ஹீனங் அஞ்ஞமஞ்ஞஸ்ஸ உத்தரிமனுஸ்ஸத⁴ம்மஸ்ஸ வண்ணங் பா⁴ஸிங்ஸு, தஸ்மிங் வத்து²ஸ்மிங். ஏகா பஞ்ஞத்தி, ஏகா அனுபஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி – ஸியா காயதோ ச சித்ததோ ச ஸமுட்டா²தி, ந வாசதோ; ஸியா வாசதோ ச சித்ததோ ச ஸமுட்டா²தி, ந காயதோ; ஸியா காயதோ ச வாசதோ ச சித்ததோ ச ஸமுட்டா²தி…பே॰….
191. Asantaṃ abhūtaṃ uttarimanussadhammaṃ ullapanapaccayā pārājikaṃ kattha paññattanti? Vesāliyaṃ paññattaṃ. Kaṃ ārabbhāti? Vaggumudātīriye bhikkhū ārabbha. Kismiṃ vatthusminti? Vaggumudātīriyā bhikkhū gihīnaṃ aññamaññassa uttarimanussadhammassa vaṇṇaṃ bhāsiṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti – siyā kāyato ca cittato ca samuṭṭhāti, na vācato; siyā vācato ca cittato ca samuṭṭhāti, na kāyato; siyā kāyato ca vācato ca cittato ca samuṭṭhāti…pe….
சத்தாரோ பாராஜிகா நிட்டி²தா.
Cattāro pārājikā niṭṭhitā.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / கதாபத்திவாராதி³வண்ணனா • Katāpattivārādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஞ்ஞத்திவாரவண்ணனா • Paññattivāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / கதாபத்திவாராதி³வண்ணனா • Katāpattivārādivaṇṇanā
